ད་ལོའི་ཟླ་2པའི་ཚེས་8ཉིན་གྱི་ཞོགས་པར། དཀར་མཛེས་རྫོང་ཤར་ཕྱོགས་ཡུལ་ཤོག་སྡེ་ཆེན་གྲོང་ཚོའི་འབྲོག་པ་ཟླ་བ་དང་། ཁོ་དང་སྡེ་པ་གཅིག་པའི་ཟླ་བ་རྒྱ་མཚོ་དང་རིན་ཆེན་རྒྱ་མཚོ་སོགས་ཀྱི་རྒྱུགས་རྟ་བདུན་གར་སོང་ཆ་མེད་དུ་གྱུར་ཞིང་། བསྟུན་མར་ཉིན་གཉིས་ལ་བཙལ་ཡང་མ་རྙེད་པས། 2023ལོའི་ཟླ་2པའི་ཚེས10ཉིན་ཤར་ཕྱོགས་ཡུལ་ཤོག་སྤྱི་བདེ་མངག་གཏོང་ཁང་ལ་གྱོད་དོན་སྙན་སེང་ཞུས།

        སྙན་སེང་ཞུས་རྗེས་དཀར་མཛེས་རྫོང་ཤར་ཕྱོགས་ཡུལ་ཤོག་མངག་གཏོང་ཁང་གིས་སི་ཁྲོན་དང་བོད་ལྗོངས། མཚོ་སྔོན། ཀན་སུའུ་བཅས་ཞིང་ཆེན་བཞི་བརྒྱུད་དེ་ཉིན་ཞག་བཞི་ལ་བཙལ་མཐར། ཉིང་ཞ་གྲོང་ཁྱེར་ཏིའོ་ཆི་ཡུལ་ཤོག་གི་རྟ་བཙོང་སའི་ཚོང་ར་ཞིག་ནས་ཧྥུ་ཅན་ལ་རྟ་མང་པོ་སྐྱེལ་འདྲེན་བྱེད་བཞིན་པའི་རླངས་འཁོར་ཞིག་གི་ནང་དུ་ཤར་ཕྱོགས་ཡུལ་ཤོག་ནས་བོར་བའི་རྟ་བདུན་པོ་རྙེད་ཅིང་། འབྲོག་པ་མང་ཚོགས་ལ་སྒོར་ཁྲི་བདུན་ལྷག་གི་གྱོང་གུད་ཐེབས་སུ་མ་བཅུག་པ་རེད། དེ་ནས་2023ལོའི་ཟླ་2པའི་ཚེས་17ཉིན་རྟ་བདུན་པོ་ཉིང་ཞ་ནས་ཕྱིར་དཀར་མཛེས་ལ་བསྐྱལ་ཡོང་བ་དང་། བོད་ལུགས་ལོ་སར་གྱི་སྔོན་ཏེ། 2023ལོའི་ཟླ་2པའི་ཚེས་19ཉིན་གྱི་ཕྱི་དྲོར་རྟ་བདུན་པོ་རྟ་བདག་གི་ལག་ལ་འཕྲོད། མིག་སྔར་གྱོད་དོན་ཐག་གཅོད་བྱེད་བཞིན་པའི་སྒང་རེད།