༄༅། །རླངས་འཁོར་གྱི་རྗེས་སུ་རྒྱུག་པ།
མགྲོན་པོ་གང་ཡོད་པའི་སྤྱི་སྤྱོད་རླངས་འཁོར་ཞིག་གི་རྗེས་ན་མི་གཟུགས་ཐུང་ཞིག་རླངས་འཁོར་གྱི་རྗེས་ལ་རྒྱུག་བཞིན་ཡོད། རླངས་འཁོར་ཐུར་ལམ་ཞིག་ཏུ་བསླེབས་ཏེ་ཇེ་མགྱོགས་སུ་སོང་བ་ན། རླངས་འཁོར་ནང་གི་མགྲོན་པོ་ཞིག་གིས་སྒེའུ་ཁུང་ལས་ཕྱིར་བུད་དེ་རླངས་འཁོར་གྱི་རྗེས་སྙེགས་མཁན་དེར་ད་ཁྱོད་རང་མ་བརྒྱུག ཁྱོད་རང་རླངས་འཁོར་གྱི་རྗེས་ཆོད་ནི་མ་རེད་ཅེས་བཤད་པ་ན། མི་དེས་དབུགས་ཧལ་ཞོར་དུ་ང་རང་ངེས་པར་དུ་རྗེས་ལ་ཆོད་དགོས། ང་རང་རླངས་འཁོར་འདིའི་ཁ་ལོ་པ་ཡིན་པ……ཞེས་བཤད་དོ། །༄༅། །བརྗེད་སླ་བ།
ནད་པ་ཞིག་གིས་སྨན་པ། ཉེ་ཆར་ངའི་ཡིད་འཛིན་ཉིན་རེ་ནས་ཉིན་རེར་ཇེ་སྡུག་ཏུ་འགྲོ་བཞིན་ཡོད་ཅེས་པ་ན། སྨན་པས་ཁྱོད་ཀྱིས་རང་གི་ཡིད་འཛིན་ཇེ་སྡུག་ཏུ་འགྲོ་བཞིན་པའི་ཚུལ་དེར་དཔེ་གསོན་པོ་ཞིག་འཇོག་ཐུབ་བམ་ཞེས་དྲིས། ནད་པས་དཔེར་ན། ང་རང་རླངས་འཁོར་ལ་འདུག་སྐབས་ནམ་ཡིན་ཡང་པ་སེ་ཉོ་རྒྱུ་བརྗེད་འགྲོ་བ་དང་། ཟ་ཁང་ལ་སོང་ཚེ་ཟས་རིན་སྟེར་རྒྱུ་བརྗེད་འགྲོ་ཞེས་བཤད། སྨན་པས་རེད། དེ་ན་ཁྱོད་ཀྱིས་ཐོག་མར་ངའི་སྨན་རིན་ང་ལ་སྤྲོད་དང་ད་གཟོད་ངས་ཁྱོད་ལ་སྨན་བཅོས་བྱ་ཞེས་བཤད་དོ། །
༄༅། །མེས་རྒྱལ།
སློབ་ཁྲིད་སྐབས་སུ་དགེ་རྒན་གྱིས་བློ་གྲོས། མེས་རྒྱལ་ཞེས་པར་གོ་བ་ཇི་ལྟར་ལེན་དགོས་ཞེས་དྲིས་མ་ཐག བློ་གྲོས་མྱུར་མོར་ཡར་ལངས་ཏེ་རྒན་ལགས། མེས་རྒྱལ་ཞེས་པ་དེར་རང་གི་ཨ་མ་ལྟ་བུར་གོ་བ་ལེན་དགོས་ཞེས་ལན་བཏབ། སྐབས་དེར་དགེ་རྒན་གྱིས་ཁྱོད་ཀྱིས་ལན་བཏབ་པ་ཤིན་ཏུ་འགྲིག་ཅེས་བསྟོད་པ་བྱེད་ཞོར་དུ། ཡང་བསྐྱར་སློབ་གྲོགས་བཀྲ་ཤིས་ལ་དྲི་བ་དེ་བཏོན་ཏེ་ལན་འདེབས་སུ་བཅུག སློབ་གྲོགས་བཀྲ་ཤིས་ཀྱང་མྱུར་མོར་ཡར་ལངས་ཏེ་རྒན་ལགས། མེས་རྒྱལ་ཞེས་པ་དེ་བློ་གྲོས་ཀྱི་ཨ་མར་གོ་བ་ལེན་དགོས་ཞེས་ལན་བཏབ་བོ། །
