སྤྱི་ཚོགས་འགན་ཞུགས་རྒྱ་བསྐྱེད་དེ། སྤྱི་ཚོགས་འགན་བཅོལ་ཐེབས་རྩ་གཡོ་ལེན་བྱེད་པར་རྡུང་རྡེག་གཏང་ཆེད། ཉེ་ཆར་མཛོད་དགེ་རྫོང་མི་ཤུགས་ཐོན་ཁུངས་དང་སྤྱི་ཚོགས་འགན་ལེན་ཅུས་ཀྱིས་རྫོང་ལས་ཞུགས་ཅུས་དང་། རྫོང་སྤྱི་ཚོགས་འགན་ལེན་ཅུས། རྫོང་ཡུལ་གྲོང་སྡོད་དམངས་འགན་ལེན་ཅུས་བཅས་རྩ་འཛུགས་བྱས་ཏེ། ཚོང་ལས་སྡེ་ཁུལ་དང་སྐྱ་རེངས་སྡེ་ཁུལ་དུ་བསྐྱོད་ནས་རྒན་གསོ་དང་ལས་རྨས། ལས་ཤོར་འགན་བཅོལ་སོགས་སྤྱི་ཚོགས་འགན་བཅོལ་སྲིད་ཇུས་དྲིལ་སྒྲོག་བྱེད་སྒོ་སྤེལ།
དྲིལ་སྒྲོག་ཕན་འབྲས་འགན་ལེན་ཆེད། ཉིན་གཅིག་གི་སྔོན་ནས་སྡེ་ཁུལ་གྱི་སྐད་འཕྲིན་ཚོགས་པར་བྱེད་སྒོའི་བརྡ་ཐོ་བཏང་བ་དང་། དྲིལ་སྒྲོག་ས་གནས་ནི་རྨ་ཁུགས་དང་པོ་ཐང་ཆེན་གྱི་ཁ་གཏད་དུ་ཡོད་པའི་ཚོང་ལས་སྡེ་ཁུལ་གྱི་གཞུང་དོན་ཁང་བདམས་པས། མི་སྣ་འགྲོ་འོང་ཚད་ཆེ་ཞིང་བྱེད་སྒོའི་ཡུལ་དངོས་སུ་མི་ཚོགས་མང་བ། ལོ་ལོན་རྒན་པས་བུ་ཕྲུག་གི་ལས་ཤོར་དཔང་ཡིག་ཇི་ལྟར་ལེན་ཚུལ་འདྲི་མཁན་ཡོད་ལ། སྐབས་བསྟུན་ལས་ཞུགས་མི་སྣ་ཇི་ལྟར་འགན་བཅོལ་དུ་ཞུགས་ཚུལ་འདྲི་མཁན་སོགས་ཡོད་པས། ལས་སྒྲུབ་མི་སྣས་ངང་རྒྱུད་རིང་བོས་རེ་རེ་ལ་འགྲེལ་ལན་སྟེར་ཏེ། ཡུལ་དངོས་སུ་མི་ཐེངས200ལྷག་ལ་འགྲེལ་བཤད་གནང་བ་དང་། བོད་རྒྱ་སྐད་གཉིས་ཀྱི་སྒྲོག་ཤོག1200ལྷག་བཀྲམ།
ཐེངས་འདིའི་དྲིལ་སྒྲོག་བྱེད་སྒོ་སྤེལ་བ་བརྒྱུད། སྡོད་དམངས་ཀྱིས་རྒྱལ་ཁབ་ཀྱི་སྤྱི་ཚོགས་འགན་ཞུགས་སྲིད་ཇུས་རྒྱུས་ལོན་བྱེད་པར་རོགས་རམ་སྒོས། སྡོད་དམངས་ལ་སྤྱི་ཚོགས་འགན་ཞུགས་ཀྱི་གལ་ཆེན་རང་བཞིན་རྟོགས་སུ་བཅུག་སྟེ། སྡོད་དམངས་དང་མང་ཚོགས་ཀྱི་རྩ་བའི་ཁེ་ཕན་དང་ཁྲིམས་མཐུན་ཁེ་དབང་འགན་བླངས་ནས། སྡོད་དམངས་དང་མང་ཚོགས་ཀྱི་འགན་ཞུགས་ཧུར་སེམས་སྐུལ་སློང་སྒོས། སྤྱི་ཚོགས་འགན་བཅོལ་གྱི་ཐེབས་རྩའི་བདེ་འཇགས་སྲུང་སྐྱོང་གི་འདུ་ཤེས་ཇེ་ཆེར་བཏང་།
