དེང་དུས་འགའ་ཞིག་གིས་རྒྱལ་རོང①དང་དྭགས་པོ(སི་ཁྲོན་ཕྱོགས་ཀྱི་ཆུ་དཀར་ དང་ཆུ་ནག་རྒྱུད)སོགས་བོད་རིགས་མ་རེད་ཅེས་སྨྲ་བ་ནི། ཁུངས་མེད་བྱུང་རྒྱལ་དུ་སྨྲ་བ་ ཡིན་ལ།  སི་ཁྲོན་ཕེན་ཝུ་ས་ཁུལ་གྱི་དྭགས་པོ་ནི། བོད་ལྗོངས་ཀྱི་དྭགས་ཀོང་ནས་མཆེད་ཅིང་།  དེང་སྐབས་རྔ་བ་བོད་རིགས་རང་སྐྱོང་ཁུལ་དང་།  མེན་དབྱང་ཀྲོན་ཆུས་ཀྱི་ས་མཚམས་སུ་ཡོད་ལ།  ཕིན་ཝུ་རྫོང་གི་ཁོངས་སུ་གཏོགས། འོན་ཀྱང་ལན་ཕིན་གྱི་བོད་རིགས་དང་འདབས་འབྲེལ་ཞིང་།  གོམས་འདྲིས་གཤིས་ལུགས་ཆོས་ལུགས་ཚང་མ་ནན་ཕིན་རྫོང་དང་ཟུང་ཆུ་ རྫོང་གི་བོད་རིགས་ལྟར་ཡིན་པར་མ་ཟད། གནའ་དུས་ནས་བོད་རིགས་སུ་བརྩི་བ་ལ་སྐད་ཆ་ཅུང་ཟད་ཀྱང་མེད་མོད།  ཉེ་ལམ་དྭགས་པོ་བོད་རིགས་མ་རེད།  ཏའེ་རིགས་རེད་ཅེས་པའི་ ཁུངས་མེད་ཀྱི་གཏམ་ཞིག་བསྒྲགས་ཡོང་བར་མ་ཟད།  ད་དུང་ཁམས་ཀྱི་བོད་མི་ཟེར་བའི་ བོད་རིགས་སྐོར་གཅིག་བོད་རིགས་མ་རེད། བོད་མི་མི་རིགས་རེད་ཅེས་ལོགས་སུ་བཀར།  མུ་ ལི②སོགས་ཀྱང་བོད་རིགས་མིན་པར་བྱེད་རྩིས་ཀྱི་བྱ་བ་ཧུར་བརྩོན་གྱིས་སྒྲུབ་བཞིན་གདའ།

1978ལོའི་ཟླ་བརྒྱད་པའི་ནང་ལ། ཀྲུང་གོ་སྤྱི་ཚོགས་ཚན་རིག་ཁང་གི་མི་རིགས་ཞིབ་འཇུག་ཁང་དང་། སི་ཁྲོན་ཞིང་ཆེན་དངོས་མང་བཤམས་སྟོན་ཁང་སོགས་འབྲེལ་ཡོད་ཀྱི་མི་སྣ་ཞུགས་ཡོད་པའི་ཞིབ་འཇུག་ཚོགས་པ་ཞིག་དྭགས་པོའི་ས་ཁུལ་དུ་སོང་སྟེ་ཟླ་གཅིག་ཙམ་ལ་ཞིབ་འཇུག་བྱས།  ཚང་མའི་ལྟ་ཚུལ་གཅིག་པ་མིན་ཡང་ཞིབ་འཇུག་གི་ཡར་ཞུའི་ཡིག་ཆ་ ཞིག་སྡེ་ཁག་སོ་སོར་བཀྲམ།  དེའི་ནང་དོན་ནི་དྭགས་པོ་བོད་རིགས་མིན་པའི་སྒྲུབ་བྱེད་ བཀོད་ནས།  ཏའེ་རིགས་རེད་ཅེས་ཐག་བཅད་མོད།  ཏའེ་རིགས་ཡིན་པའི་སྒྲུབ་བྱེད་ཚིག་ གཅིག་ཀྱང་མེད།  བོད་མིན་པའི་སྒྲུབ་བྱེད་རྣམས་ཀྱང་།  བོད་རིགས་ཡིན་པའི་སྒྲུབ་བྱེད་དུ་ སོང་འདུག་སྟེ།  རིམ་བཞིན་བཤད་ན་འདི་ལྟར། 

　གཅིག དྭགས་པོའི་སྐད་ཀན་ལྷོའི་གཙོས་ཀྱི་སྐད་དང་མི་འདྲ་བས་བོད་མ་རེད་ཟེར།  དེ་ལ་འདི་ལྟར་བརྗོད་པར་བྱ་སྟེ།  

      སྤྱིར་བོད་སྐད་ལ་རྩ་བ་གཅིག་ཡིན་ནའང་ས་ཆ་རྒྱ་ཆེ་ཞིང་མི་སྡེ་འཐོར་བཀྲམ་ཆེ་བའི་  དབང་གིས་སྒྲ་མི་འདྲ་བར་གྱུར་ལ།  ས་ཆ་ལ་ལར་བོད་སྐད་བརྡ་རྙིང་གི་ཐོག་ནས་སྒྲ་ གདངས་ཇེ་ཟབ་དང་ཇེ་ལྕིར་སོང་བའི་སྟེང་ནས་འགྱུར་ཡོད་པ་རྒྱལ་རོང་གི་སྐད་ལྟ་བུ་ དང་།   འགའ་ཞིག་བརྡ་རྙིང་གི་ཐོག་ནས་བརྡ་གསར་དུ་འགྱུར་བ་དབུས་གཙང་གི་སྐད་ལྟ་བུ།  འགའ་ཞིག་རང་ས་ནས་འགྱུར་ཚབས་ཆེ་བ་མགོ་ལོག་ཉ་མཚོའི་སྐད་ལྟ་བུ་དང་།  འཛམ་ ཐང③རྫོང་གཅིག་གི་ནང་དུའང་བོད་རིགས་ཡིན་ནའང་ཕན་ཚུན་སྐད་མི་འདྲ་བར་གྱུར་ ནས་གོ་བརྡ་འཕྲོད་དཀའ་བ་ཁ་ཤས་ཡོད། དེ་དག་ཨེ་བདེན་ལྟོས་དང་ཤེས། ཀན་སུའུ་བསང་ཆུ་རྫོང་གཅིག་གི་ནང་དུའང་འབྲོག་སྐད་ལ་སྔོན་རྗེས་ཀྱི་སྒྲ་གདངས་གསལ་ཞིང་དག་ཆ་ཆེ་བ་དང་།  རོང་ཕྱོགས་ལ་སྔོན་རྗེས་ཀྱི་སྒྲ་གདངས་ཧ་ཅང་གསལ་པོ་མིན་ཞིང་།  མཐོ་དམན་ རིང་ཐུང་གི་ཁྱད་པར་ཅུང་ཟད་ཡོད་པ་ལྟ་བུ་རེད། དེས་ན་ཀན་ལྷོའི་བོད་སྡེ་འགའ་ཞིག་གི་སྐད་དང་མི་མཐུན་པས།  བོད་སྐད་མིན་ནོ་ཞེས་བཤད་ག་ལ་ཐུབ།  བོད་སྐད་མི་ཤེས་པའི་མི་ ཞིག་གིས་ཟླ་གཅིག་ལྷག་གི་རིང་ལ་བོད་སྐད་ཀྱི་རང་བཞིན་ཁོང་དུ་ཆུད་དོ་ཞེས་བཤད་རྒྱུ་ ནི་དཀའ་སྙམ་ལ། ཀན་ལྷོའི་གཙོས་ཀྱི་སྐད་དང་མི་འདྲ་བའི་བོད་སྐད་མང་། དྭགས་པོའི་སྐད་ཀྱི་ནང་དུ་ཀན་ལྷོའི་སྐད་དང་མི་མཐུན་ས་མང་ནའང་། ནན་ཕིན་དང་། ཟུང་ཆུའི་བོད་མིའི་སྐད་དང་མཐུན་ས་མི་ཉུང་།  ལྟོས་དང་ཤེས།  

     དྭགས་པོའི་མི་མང་ཤོས་ཀྱིས་བོད་ཡིག་མི་ཤེས་པས་བོད་མ་རེད་ཟེར་བ་ལ་འདི་ལྟར། ཡི་ གེ་ཡང་བོད(སྤྱི་ཚོགས་རྙིང་པར)ཀྱི་ས་ཆ་མང་ཆེ་བར་སློབ་གྲྭ་མེད་པས།  ཡི་གེ་དང་རིག་ གནས་སློབ་མཁན་གཙོ་ཆེར་བླ་གྲྭ་དང་ཆོས་ལུགས་པ་ཡིན་པ་ལས།  མི་སེར་གཞན་པ་ཕལ་ཆེར་གྱིས་ཡི་གེ་མི་ཤེས་ཤིང་། གསུང་རབ་ཀྱི་དོན་མི་གོ། དྭགས་པོའི་ཡུལ་དུའང་དེ་དང་འདྲ་བར་བོན་པོ་དང་སྔགས་པ་རྣམས་ཀྱིས་སློབ་པ་ལས། མི་སེར་གཞན་པ་ཕལ་ཆེར་གྱིས་མི་སློབ།  བོད་ཀྱི་ས་ཆ་མང་ཆེ་བར་སྔོན་དུས་བོད་ཡིག་ནི་ཆོས་ཀྱི་བྱ་བར་བེད་སྤྱོད་པ་ལས་གཞན་དུ་བེད་སྤྱོད་མཁན་ཉུང་། དྭགས་པོའི་ས་ཆར་ཡང་དེ་དང་འདྲ། ཁྱེད་ཅག་གིས་བཤད་པ་འདིས་ཀྱང་དྭགས་པོའི་མིའི་གོམས་གཤིས་དེ་བོད་སྤྱི་དང་མཐུན་པ་ཤེས་ཐུབ་བོ།  ། 

　གཉིས།  ཐོན་སྐྱེད་བཀས་བཀོད་རྒྱུད་འཛིན་གྱི་འབྲེལ་བར་གཏོགས་པ་དང་།  གདོད་ མའི་སྤྱི་ཚོགས་ཀྱི་ལྷག་འཕྲོ་ཡོད་པས་བོད་མིན་ཟེར་བ་ལ་འདི་ལྟར།   

     མཐའ་མཚམས་ཀྱི་བོད་རིགས་མང་ཆེ་བའི་སར། ཐོན་སྐྱེད་བཀས་བཀོད་རྒྱུད་འཛིན་གྱི་        ཐོན་སྐྱེད་འབྲེལ་བར་གཏོགས་པ་དང་། གདོད་མའི་སྤྱི་ཚོགས་ཀྱི་ལྷག་འཕྲོ་ཅུང་ཟད་ཙམ་ ཡང་ཡོད་དེ།  དཔེར་ན།  དམུ་དགེ་དང་།  རྔ་བ།  ཟུང་ཆུ་སོགས་སུ།  ས་བདག་དང་།  ཞིང་ཕྱུག་གིས་བཤུ་གཞོག་བྱེད་སྟངས་སོགས་གཙོ་བོ་ནི་བུན་སྐྱེན་མིན་ལ། གླ་བཀོལ་ཡིན་པ་དྭགས་པོ་དང་འདྲ་སྟེ།  རྒྱུན་གླ་ལས་གཞན།  དཔྱིད་གླ(དཔྱིད་རྨོའི་གླ་པ)སྟོན་གླ(སྟོན་བསྡུའི་ གླ་པ)ལྟ་བུ་དུས་ཐུང་གི་གླ་པ་ཡོད་པ་དྭགས་པོ་དང་འདྲ་བ་ཡིན།  

　རྨོད་ཟོག་གཙོ་ཆེར་མཛོ་ཡིན་པ་དང་། ཁྱིམ་བགོས་ལ་ཞིང་སྐལ་དང་ཕྱུགས་སྐལ་སྟེར་བ།  གཉེན་སྒྲིག་གི་རྫོངས་པ་ལའང་སྟེར་བ། ནགས་ཚལ་དང་རྩྭ་ས་སྡེ་པ་སྤྱི་ལ་དབང་བ།  ས་རྒོད་ བརྐོས་ཆོག་པ་སོགས་ཀྱང་གོང་སྨོས་ཀྱི་བོད་རིགས་འདུས་སྡོད་ས་ཆ་རྣམས་སུ་དྭགས་པོ་ དང་འདྲ་འདྲ་རེད།  ཞིང་འདེབས་སྐབས་ཀྱང་བོད་རིགས་འདུས་སྡོད་ཀྱི་ས་ཆ་དག་ཏུ་སྡེ་ པས་མཉམ་ལས་བྱེད་པ་དང་།  ཁྱིམ་ཁ་ཤས་ཀྱིས་མཉམ་ལས་བྱེད་པ།  ཁྱིམ་གཉིས་རེས་ལས་ སྡེབ་བྱེད་པ། རྨོད་ཕྱུགས་ཡོད་པ་དང་མེད་པས་ལས་སྡེབ་བྱེད་པ་སོགས་དམུ་དགེ།  ཤར་ ཁོག ཏ་ཁོག་སོགས་མཐའ་མཚམས་ཀྱི་བོད་སྡེ་ཚང་མ་ཡང་དེ་འདྲ་ཡིན་ལ། དྭགས་པོ་ཡང་ དེ་འདྲ་ཡིན་པ་ཁྱེད་ཅག་གིས་བཤད་པ་ལྟར་རེད།  

     དྭགས་པོ་ཙམ་དུ་མ་ཟད། མཐའ་མཚམས་ཀྱི་བོད་རིགས་འདུས་སྡོད་ཀྱི་ཡུལ་དུ་མ་ཞིག་ ཏུ་ཐོན་སྐྱེད་བྱེད་སྟངས་རྗེས་ལུས་ཡིན་པས་བཀས་བཀོད་རྒྱུད་འཛིན་གྱི་ལམ་ལུགས་ཧ་ ཅང་སྨིན་པའི་ཚོད་དུ་མ་སླེབས་པ་མང་པོ་ཡོད།  དཔེར་ན།  འཛམ་ཐང་མཐའ་ཁུལ་གྱི་བོད་ རྣམས་ལྟ་བུའོ།  ། 

　གསུམ།    གྱོད་བཤད་ལུགས་ཀྱིས་བོད་མ་རེད་ཟེར་བ་ལ་འདི་ལྟར།

ཟུང་ཆུའི་ས་ཆ་ཁ་ཤས་དང་། དམུ་དགེ་ཆུ་ནག་སོགས་སུ་ཁ་པ་འགོ་པ④དང་།  མི་རྒན་ གྲགས་ཅན་གྱིས་གྱོད་བཤད་པ་དང་། གཟུ་ཟན་མགོ་རྡུང⑤ཟེར་བའི་རྒྱུ་ཟས་སྤྱོད་རྒྱུ་དང་།  ཁྲིམས་ལུགས་ཀྱི་ཡི་གེ་མེད་པ་སོགས་དྭགས་པོ་དང་འདྲ་འདྲ་རེད།  ཡིན་མིན་ལྟོས་དང་ཤེས།  བོད་རིགས་འདུས་སྡོད་ཀྱི་ས་ཆ་ཡིན་པ་འདྲའང་བཀས་བཀོད་རྒྱུད་འཛིན་གྱི་ལམ་ལུགས་ དར་བ་དང་།  སྡེ་ཤོག་གི་ལམ་ལུགས་ཡིན་པ་སོགས་འདྲ་མིན་སྣ་ཚོགས་ཡོད་དེ།  དཔེར་ན།  དབུས་གཙང་གི་ལམ་ལུགས་དང་།  ཨ་མདོ་མཐའི་ལམ་ལུགས་མི་འདྲ་བ་དང་།  ཟུང་ཆུ་རྫོང་ གཅིག་པུ་ལ་མཚོན་ནའང་མཁར་གྱི་ཐག་ཉེའི་ལམ་ལུགས་དང་། མཁར་ལས་ཅུང་ཟད་རིང་བའི་ས་ཆའི་ལམ་ལུགས་མི་འདྲ་བ་ལྟ་བུ་རེད།

བཞི།    དྭགས་པོའི་རྒྱན་ཆ་དང་བཟའ་བཏུང་ཁང་པའི་བཟོ་སྐྲུན་སོགས། ཕྱིང་ཞྭ་གྱོན་ པས་བོད་མ་རེད་ཟེར་བ་ལ་འདི་ལྟར།  

ཕྱིང་ཞྭ་ནི་བོད་སྤྱིའི་ལུགས་ཡིན་ཏེ། ལྷ་རྨ་ཆེན་གྱི་སྐུ་ཕྱིང་ཞྭ་ཅན་བཟོ་བ་ནི། བོད་རང་གི་ཆ་ལུགས་ཡིན་པར་དེབ་ཐེར་དཀར་པོ་དང་ཀླུ་སྒྲུབ་དགོངས་རྒྱན་ལས་བཤད། འབྲོག་པས་ཕྱིང་ཞྭ་མགོ་མདོང་གྱོན་པ་དང་།  རོང་པས་ཕྱིང་ཞྭ་ཟླུམ་པོ་མཐའ་ཤན་ཅན་གྱོན་པ་རེད།  དྭགས་པོའི་ཞྭ་དང་འདྲ་བ་གྱོན་མཁན་སྔར་དམུ་དགེ་དང་ཏ་ཁོག་སོགས་ལ་ཡོད་པར་མ་ ཟད།  དབུས་ཀྱི་དྭགས་པོས་ཀྱང་ཕྱིང་ཞྭ་དེ་ལྟ་བུ་གྱོན་པ་རེད།  ཞྭ་ཐོག་ཏུ་བྱ་སྒྲོ་འཛུགས་པས་ བོད་མ་རེད་ཟེར།  ཞྭ་ཐོག་ཏུ་བྱ་སྒྲོ་འཛུགས་པའང་བོད་ཀྱི་ལུགས་ཡིན་ཏེ།  སློབ་དཔོན་ པདྨའི་དབུ་ཞྭ་བྱ་སྒྲོ་ཅན་གྱོན་པའི་སྐུ་འབྲི་བའང་བོད་རང་གི་ལུགས་ལྟར་བྲིས་པ་དང་།  གླིང་སེང་ཆེན་གྱི་སྐུ་འབྲི་ཚེ་བྱ་སྒྲོ་ཅན་གྱི་ཞྭ་གྱོན་པ་འབྲི་བ་དང་། སྐུ་རྟེན་དང་ལྷ་པའི་རྨོག་ཞྭའི་ཐོག་ཏུ་བྱ་སྒྲོ་མང་པོ་འཛུགས་པ་ནི་བོད་རང་གི་ཆ་ལུགས་རེད།  གནའ་སྲོལ་དཔའ་བོ་ ལ་རྒོད་ཀྱི་སྒྲོ་དང་། སྡར་མ་ལ་ཁྭ་ཏའི་སྒྲོ་འདོགས་པའི་སྲོལ་ཡང་ཡོད།  དབུས་ཀྱི་བླ་མ་རིག་ འཛིན་རྒོད་འཕྲུ་ཅན་ཟེར་བའང་ཞྭ་ལས་བཏགས།  དེས་ན་ཕྱིང་ཞྭ་གྱོན་པ་དང་།  མགོ་ལ་བྱ་ སྒྲོ་འཛུགས་པའང་བོད་ཀྱི་ལུགས་ཡིན་པ་བཤད་མ་དགོས།  གསོ་མའི⑥ལྭ་གྱོན་པས་བོད་མ་ རེད་ཟེར། གསོ་མའི་ལྭ་བ་གྱོན་པའང་བོད་ཀྱི་ཆ་ལུགས་ཡིན་ཏེ།  རོང་ཁུལ་གསོ་མ་ཐོན་པའི་ ས་ཆར་གསོ་ལྭ་གྱོན་པ་དང་།  ཕྱུགས་ལུག་ཅུང་ཟད་མང་བའི་སར་ཕྱུགས་སྤུའི་ལྭ་བ་གྱོན་པ་ དང་། འབྲོག་ཁུལ་དུ་ཕྱིང་པའི་གོས་དང་སློག་པ་གྱོན་པ་རེད། དྭགས་པོའི་ཕོའི་རིགས་ཀྱི་གོས་ཅུང་ཟད་བབ་ཆགས་པ་དང་། མོའི་རིགས་ཀྱིས་གོས་དང་རྒྱན་གཟབ་མཆོར་བྱེད་པའང་བོད་སྤྱིའི་ལུགས་རེད། སྐྱེས་པའི་རུམ་ཆེ་བ་དང་བུད་མེད་ཀྱིས་རལ་མཐུད⑦འཕེན་པ།  སྐེད་ རགས་ཁྲ་བོ་དང་རས་སྐེད་བཅིངས་པ།  དུང་དང་འགྲོན་བུ་འདོགས་པ།  གོས་ཀྱི་ཕུ་ཐུང་ ཡངས་པ་དག་མདོ་སྨད་ཀྱི་ཐེ་བོ་དང་ཧོར་གཙང་སོགས་བོད་ཡུལ་སོ་སོར་ཡོད་པར་མ་ཟད།  བོད་ཡུལ་དབུས་ཀྱི་ཆ་ལུགས་ཀྱང་རེད། རྐང་དཀྲིས་བཅིངས་པ་ཡང་ས་རོང་རྩུབ་སའི་བོད་མི་དག་གི་ཆ་ལུགས་ཡིན་ཏེ། མདོ་སྨད་ཀྱི་དྭགས་པོ་མ་ཟད།  ཆུ་ནག་རྒྱུད་དང་།  རྒྱལ་མོ་ཚ་བ་ རོང་སོགས་དང་གཞན་པ་ས་རོང་རྩུབ་ས།  དཔེར་ན།  དབུས་ཀྱི་དྭགས་པོ།  ཀོང་པོ།  སྤོ་བོ་ སོགས་ཀྱིས་ཀྱང་བཅིངས་པ་རེད། སྐྲ་ལ་སྣུམ་འབྱུག་པའང་བོད་ཀྱི་གོམས་སྲོལ་ཡིན་ཏེ། འབྲོག་པས་མར་འབྱུག་པ་དང་།  རོང་པས་ཕག་ཞག་འབྱུག་པ་ལྟ་བུའོ།  །

　ཟས་ཀྱང་ཡུག་པོ་དང་། བྲ་བོ། ཡུང་མ། ⑧ཚོད་མ་སོགས་ཟ་བ་ནི་བོད་ཀྱི་རོང་ཁུལ་རྒྱ་ཆེན་ པོའི་གོམས་གཤིས་རེད།  ད་སྐབས་ཀྱང་ཟུང་ཆུའི་སྨད་རྒྱུད།  ཆུ་ནག་རྒྱུད།  རྒྱལ་མོ་རྔུལ་ཆུའི་ རྒྱུད་སོགས་ཀྱི་བོད་མིའི་ས་ཆར་ལྟོས་དང་ཤེས།  བོད་ཀྱི་འབྲོག་ཕྱོགས་སུ་ཤ་ཟ་རྒྱུ་མོད་པ་ དང་།  རོང་ཕྱོགས་སུ་ཤ་ཟ་རྒྱུ་ཉུང་བ་དང་།  རྟ་ཤ བོང་ཤ ཁྱི་ཤ་མི་ཟ་བ་ནི་བོད་སྤྱིའི་གོམས་ གཤིས་རེད།  འབྲོག་ཕྱོགས་གྲང་ངར་ཆེ་སར་ཤ་རྗེན་ཟ་ཡང་།  རོང་ཕྱོགས་སུ་དྭགས་པོ་ལྟར་ ཤ་རྗེན་ཆེར་མི་ཟ། མར་ཆུར་ལ་དགའ་མི་དགའ་རོང་འབྲོག་དང་སྟོད་སྨད་ལ་ཁྱད་པར་ཡོད།  ཤར་ཇ⑨མི་འཐུང་བས་བོད་མ་རེད་ཟེར།  ཤར་ཇ་ནི་ཁམས་དང་དབུས་གཙང་གི་བོད་ མིས་ཀྱང་མི་འཐུང་།  རྒན་གཞོན་གྱི་བརྩི་འཇོག་དང་།  ཕོ་མོའི་བརྩི་འཇོག་ཀྱང་བོད་རིགས་ གཞན་དག་དང་དྭགས་པོ་འདྲ།  དཀྱིལ་དྲུང་གིས་འདུག་པ་དང་།  ཤ་ཕོས་གཏུབ་པ་དང་།  ཕྱེ་ མོས་བསྣོ་བ་སོགས་ཀྱང་བོད་སྤྱིའི་གོམས་སྲོལ་རེད།  ཁང་པ་རྡོ་ཁང་གྲུ་བཞི། ལྷོ་ཕྱོགས་སུ་ ཁེབ་ཐོག་གམ་ཉིན་ར་ཡོད་པ། ཤིང་གི་ཁེར་སྐས་ཡོད་པ།  ཁང་འོག་ཏུ་ཕྱུགས་དང་ཁང་སྟེང་ དུ་མི་འདུག་པ་དག་བོད་ཀྱི་ལུགས་སྲོལ་ཡིན་པ་ཟུང་ཆུ།  ཆུ་ནག  དམུ་དགེ།  རྔ་བ།  མཚོ་སྔོན་སོགས་ལ་ལྟོས་དང་ཤེས།

　ཁྲ་སྒམ་གྱི་སྟེང་དུ་མཆོད་པ་བཤམས་པ། ཁྲ་སྒམ་ནང་དུ་དཀར་ཡོལ་དེམ་སོགས་སྒྲིག་པ།  དཀྱིལ་དུ་མེ་ཐབ་ལྕགས་སྒྱེད་རྐང་གསུམ་དང་།  ཐབ་ཀའི་གོང་ངམ་བྱང་དུ་བཟའ་དཔོན་ འདུག་པ་དང་།  ཁང་ཐོག་ཏུ་མཆོད་ཁང་།  ཡང་ཐོག་ཏུ་རྩྭ་དང་ཕུབ་མ་འཇོག་པ།  ནུབ་མོ་ བཟའ་དཔོན་དང་རྒན་པ་ལས་གཞན་རྣམས་ཐབ་ཀྱི་མཐར་ཉལ་བ།  ཁང་ཐོག་གཤགས་མ་ སྟེ་གཤགས་པའི་ཤིང་ལེབ་ཀྱིས་འགེབས་པ་སོགས་བོད་ལུགས་རེད།  ཐེ་བོ།  ཅོ་ནེ།  ཟུང་ཆུ།  དམུ་དགེ་སོགས་སུ་ད་ལྟའང་དེ་ལྟར་རེད། འགོ་པ་དང་། ཕྱུག་པོ་ལས་གཞན་ལ་ཨོང་སྟེགས⑩དང་མདུན་ཅོག་ཀྱང་མེད་པ་བོད་གཞན་དང་འདྲ།  

　གཉེན་སྒྲིག་དང་། དུར་འདེབས་ཀྱང་དྭགས་པོའི་ལུགས་དེ་བོད་སྤྱི་དང་འདྲ།  དཔེར་ན།  དམུ་དགེ་དང་།  ཤར་ཁོགམཚོ་སྔོན་གྱི་ས་ཆ་འགར་ཡང་དགུན་མེར་སྲེག་པ་དང་།  དབྱར་ས་ དུར་དང་ཆུ་དུར་བྱེད་པ་རེད། དེའི་རྒྱུ་མཚན་ཡང་དབྱར་རོ་བསྲེགས་ན་ཡུལ་ལྷ་གཞི་བདག་གི་ཐུགས་མི་དགྱེས་པས་ལོ་ཏོག་ལ་གནོད་ཟེར་ནས་ས་དུར་ཆུ་དུར་བྱེད། དྭགས་པོའི་ཆོས་ ལུགས་ཀྱང་བོད་ཀྱི་གནའ་ཆོས་བོན་པོ་རེད། བོན་པོ་ལ་སྔ་དར་དང་ཕྱི་དར་གཉིས་ཡོད།  སྔ་ དར་ལ་ཁྱིམ་སྔགས་དང་ཕྱི་དར་ལ་རབ་བྱུང་ཡང་ཡོད། དྭགས་པོའི་སྟོད་ལ་རབ་བྱུང་ཡོད་པ་རེད།  བོད་ཀྱི་རབ་བྱུང་དགོན་པར་འཚོགས་ཚེ་གཟན་ཤམ་གྱོན་ནས་ཆོས་འདོན་པ་དང་།  ཚོགས་ཆོས་གྲོལ་རྗེས་གྲོང་སོང་ནས་ཞིང་ལས་བྱེད་པ་དེ་ཤར་པ་སོགས་དང་དྭགས་པོ་འདྲ། ཡུལ་འདི་ཕྱོགས་ནས་བོན་པོ་མཁས་པ་མང་པོ་བྱུང་མྱོང་བའི་སྐོར་གྱི་ལོ་རྒྱུས་ཤར་ཁོག་གི་ བོན་དགོན་རྣམས་ཀྱི་གདན་རབས་བསྟན་རྩིས་དག་ནའང་གསལ།  རི་བྲག་སོགས་མཆོད་ པས་བོད་མ་རེད་ཟེར། གནའི་བོན་ལུགས་ལ། ཉི་ཟླ་སྐར་གསུམ་མཆོད་ཡུལ་དུ་བྱེད་པར་མ་ ཟད།  རི་བྲག་ནགས་ཚལ་ལ་སོགས་པར་གནས་པའི་ལྷ་མཆོད་པ་ཡིན་པ་ཨོ་རྒྱན་གླིང་པའི《བཀའ་ཐང་ཤེལ་བྲག་མ》ལས་ཀྱང་རྒྱས་པ་ཞིག་གསུངས་སོ། །  རི་མགོར་ལབ་རྩེ་བརྩིགས་ནས་ལབ་རྩེ་བསྟོད་པ་དང་།  བསང་གཏོང་བ་སོགས་ཀྱང་དྭགས་པོ་དང་འདྲ་བར་བོད་སྤྱིལ་དར་སོ་ཤིན་ཏུ་ཆེ།  དམར་མཆོད་བྱེད་པའང་གནའི་བོན་ལུགས་ཡིན་ཏེ།  གནའ་དུས་ཟླ་གཉིས་པའི་ནང་དམར་མཆོད་བྱེད་པ་ཡིན་མོད། ཆོས་དར་ནས་ཆོས་དར་བའི་ཡུལ་དུ་དམར་མཆོད་བྱེད་པ་མཚམས་བཅད་ཟིན་པ་ཡང་བཀའ་ཐང་ན་གསལ།  ཟླ་དང་པོ་ ནས་སྨོན་ལམ་ཆེན་མོ་འཚོགས་པ་དང་མཉམ་དུ།  ཁྱིམ་པ་རྣམས་ཀྱིས་ཀྱང་ཕྱག་མཆོད་ བསྐོར་བ་སོགས་ཀྱི་དགེ་སྒྲུབ་བྱེད་པར་བསྒྱུར།  འོན་ཀྱང་དྭགས་པོའི་ཡུལ་དེར་ཆོས་རགས་ རིམ་ཙམ་ལས་མ་དར་བར་བོད་ཀྱི་གནའ་ལུགས་ལྟར་ཟླ་གཉིས་པའི་ནང་དམར་མཆོད་ དང་།  ཟླ་ལྔ་པའི་བཅོ་ལྔའི་ཉིན་ལྷ་མཆོད་པ་རེད།  དྭགས་པོ་མ་ཟད།  ཤར་པ་དང་ཁམས་ཀྱི་ ས་ཆ་འགའ་ཞིགདམུ་དགེ་སོགས་བོད་ཀྱི་ས་ཆ་གཞན་དུའང་དེ་ལྟར་ཡིན་ཏེ།  སྡེ་པ་འགའ་ ཞིག་གིས་དེའི་ཉིན་ཟོག་བཤས་ཏེ་དམར་མཆོད་བྱེད།  ཟླ་བདུན་པའི་ནང་སྟོན་བསྡུའི་སྔོན་ ཟོག་བཤས་ནས་ལྷ་མཆོད་ཅིང་སྤྲོ་སྐྱིད་བྱེད་པ་གནའ་སྲོལ་ཡིན། བཅིངས་འགྲོལ་རྗེས་སུའང་།  སྟོན་བསྡུའི་སྔོན་དུ་ཕྱུགས་ལུག་བཤས་ཏེ།  སྤང་ཐང་དུ་ཉིན་ཤས་ལ་སྤྲོ་སྐྱིད་བྱེད་པ་རྔ་བ་ དང་བླ་བྲང་སོགས་སུ་ད་དུང་ཡང་ཡོད།  སྟོན་བསྡུའི་རྗེས་སུ་ཟླ་བཅུ་པ་ཡར་མར་ལ་སྟོན་ བསྡུ་རྫོགས་པའི་དགའ་སྟོན་དུ་ལྷ་མཆོད་བྱེད་པའི་སྲོལ་ཡོད་པ་བཞིན་དུ།  ཕྱུགས་ལུག་ བཤས་ནས་རི་མགོར་སྤྲོ་སྐྱིད་བྱེད་པའི་སྲོལ་རྔ་བ་སོགས་སུ་ད་ལྟའང་ཡོད།  དེས་ན་དྭགས་ པོའི་ལམ་ལུགས་དེ་ཡང་བོད་ཀྱི་གོམས་གཤིས་ཤིག་རེད།  རྒྱའི་གོམས་གཤིས་ཀྱི་ཤན་ཞུགས་ པའི་དུས་སྟོན་གཅིག་དང་གཉིས་རེ་ཡོད་པ་དྭགས་པོ་མ་ཟད། བོད་སྤྱི་དང་ཁྱད་པར་དུ་ཟུང་ཆུ་སོགས་མཐའ་མཚམས་ཀྱི་བོད་ལའང་ཡོད།  

　ཐབ་དང་མཆོད་ལྷ་ལ་གཙང་སྦྲ་བྱེད་པ་དང་། ནད་པ་ཁྱིམ་དུ་ཡོད་དུས་འགྲུལ་པ་འོང་ དུ་མི་འཇུག་པ་དང་། གལ་ཏེ་ཡོང་དགོས་བྱུང་ཚེ་གདོན་འདྲེ་འགོག་པའི་ཆེད་དུ་མདུན་དུ་མེ་རོ་འཕེན་པ་དང་།  ནད་པ་ཁྱིམ་དུ་ཡོད་ཚེ། ཉེ་གནས་དང་།  རང་གི་ཁྱིམ་མི་ཐག་རིང་ནས་ འོངས་ཚེ།  ཡང་མདུན་དུ་མེ་རོ་འཕེན་པ་སོགས་ཀྱང་།  བོད་སྤྱིའི་གོམས་གཤིས་རེད།  

ཆབ་སྲིད་ཀྱི་གོ་གནས་ལ་མ་བལྟོས་པར།  ལོ་ན་རྒན་པ་ལ་བརྩི་བཀུར་བྱེད་པ།  རྔོན་པ་དག་གིས་རྔོན་ཁྱི་ལ་གཅེས་སྤྲས་བྱེད་པ།  ཁྱིམ་ལས་གཙོ་བོར་བུད་མེད་ཀྱིས་བྱེད་པ།  བུད་མེད་ཀྱིས་ཞིང་ལས་བྱེད་ཀྱང་།  རྨོད་ལས་སྐྱེས་པས་བྱེད་པ་སོགས་ཀྱིས་བོད་མ་ཡིན་པ་ བསྒྲུབ་མི་ནུས་ཏེ།  བོད་སྤྱིའི་གོམས་སྲོལ་ཡིན་པར་མ་ཟད་མི་དཔའ་བོ་དང་ཡ་རབས།  ཡོན་ ཏན་ཅན་ལ་བརྩི་བཀུར་དང་བྱ་དགའ་སྟེར་བ། གཤིས་ངན་དང་མ་རབས་ལ་ཆད་པ་གཅོད་པ། བུད་མེད་ཀྱིས་ཁྱིམ་ལས་ཙམ་ཞིག་བསྒྲུབ་རྒྱུ་ལས་ཆབ་སྲིད་ཀྱི་ལས་ཀ་ལ་ཁ་གྲག་མི་ཆོག་པ་སོགས་སྲོང་བཙན་དང་ཁྲི་སྲོང་སོགས་ཀྱི་ཁྲིམས་ཡིག་ཏུའང་གསལ་པོར་བཀོད་ཡོད་པས།  དྭགས་པོའི་ལམ་ལུགས་ཙམ་ཞིག་ག་ལ་ཡིན།  ཆ་ལུགས་ནི་ཡུལ་སོ་སོར་མི་འདྲ་བ་ཅུང་ཟད་ རེ་ཡོད་མོད། གཞི་རྩའི་ཐོག་གཅིག་པར་ལྟར། དྭགས་པོའི་ཆ་ལུགས་གཞི་རྩའི་ཐོག་བོད་ཀྱི་ཆ་ལུགས་རེད།  རང་བཞིན་འཇམ་པས་བོད་མ་ཡིན་ཟེར་ག་ལ་རུང་།  བོད་མི་དག་རང་བཞིན་ འཇམ་པོ་རེད།  རང་བཞིན་ཧ་ཅང་འཇམ་པའི་བོད་མི་གཞན་ཡང་ཡོད།  གླུ་ཚིག་ནི་བོད་ཀྱི་ ཡུལ་གྲུ་སོ་སོར་ཁྱད་ཆོས་རེ་ཡོད་པས།  གླུ་ཚིག་མ་ཟད་སྐད་ཀྱི་གདངས་ལའང་ཡུལ་སོ་སོར་ ཡང་ལྕིའི་ཁྱད་པར་ཡོད།  རུས་མི་བརྗོད་པར་མིང་ནས་འབོད་པ་བོད་བྱིངས་ཀྱི་ལུགས་རེད།  གོམས་གཤིས་ལ་མི་རིགས་གཞན་གྱི་ཤན་ཤོར་ནས་འདྲེས་པའི་རང་བཞིན་བོད་རིགས་ གཞན་ལའང་ཡོད་དེ། བྱང་ཕྱོགས་ཀྱི་རྒྱ་བོད་མཚམས་ཀྱི་བོད་མིའི་སྐད་ཀྱི་ནང་དང་གོམས་གཤིས་ལ་བྱང་རྒྱའི་ཤན་ཡོད་པ་དང་། ལྷོ་ཕྱོགས་ཀྱི་རྒྱ་བོད་མཚམས་ཀྱི་བོད་མིའི་སྐད་དང་ གོམས་འདྲིས་ནང་། དེ་དག་གི་དེ་ཚོ་འདྲེས་ནས་ཡོད་པ་ལྟ་བུ་རེད། དེ་ལྟར་བོད་རིགས་མིན་པའི་སྒྲུབ་བྱེད་རྣམས་བོད་རིགས་ཡིན་པའི་སྒྲུབ་བྱེད་དུ་སོང་འདུག ཆོས་ལུགས་ཐད་བོན་ པོ་ཞེས་པའི་བོད་ཡིག་དེ། བོད་ཀྱི་ཡུལ་གྲུ་སོ་སོའི་སྒྲ་གདངས་ལ་ཁྱད་པར་ཡོད་དེ།  དཔེར་ན།  འབྲོག་ཁུལ་དག་ཏུ།  བོན་པོ་ཞེས་པ་དེ།  རྒྱ་ཡིག苯波འདིའི་སྒྲ་དང་ཅུང་འདྲ་བས།  རྒྱ་ཡིག་ལ་དེ་འབྲི་བ་མང་།  ནན་ཕིན།  ཟུང་ཆུ།  ཆུ་ནགཁམས་ཀྱི་དོང་ཁུག་སོགས་སུ་བོན་པོ་ ཞེས་པའི་སྒྲ་དེ། རྒྱ་ཡིག་གི北布ཞེས་པའི་སྒྲ་དང་ཐག་ཉེ།  དེར་བརྟེན་ཞིབ་འཇུག་པ་འགས།  ཆོས་ལུགས་བོན་པོ་མ་རེད北布རེད་ཅེས་ཐག་བཅད། དེ་ལྟ་བུའི་ཆོས་ལུགས་དེའི་སྟོན་པ་སུ་རེད།  སྤེལ་མཁན་སུ་རེད།  ཐོག་མར་ས་གང་ནས་དར་བ་རེད།  འོ་ན་ཟུང་ཆུ་དང་།  ནན་ཕིན་ གྱི་བོན་དག་ཀྱང་ཆོས་ལུགས་དེ་རེད་དམ།  དེ་དག་གི་ངག་ལམ་ནས།  བོན་པོ་ཞེས་པ北布ཞེས་པའི་སྒྲ་དང་ཐག་ཉེ་བ་དྭགས་པོའི་སྒྲ་དང་འདྲ་འདྲ་འབྱུང་བའི་ཕྱིར།  དེས་ན་འདིའི་ ཞིབ་འཇུག་བྱེད་ཚུལ་ནི།  རྩོད་སྒྲུབ་ཀྱི་དངོས་གཙོ་སྨྲ་བའི་ལུགས་ཤིག་ག་ལ་ཡིན་ཏེ།  ཟླ་ གཅིག་ཙམ་གྱིས་ཚང་མ་ཁོང་དུ་ཆུད་ཁུལ་བྱས་ཏེ་ཐག་བཅད་འདུག ཐ་ན་དྭགས་པོ་དང་ ཉེ་བའི་ནན་ཕིན་དང་ཟུང་ཆུ་སོགས་ཀྱི་བོད་ཀྱི་གོམས་གཤིས་ལུགས་སྲོལ་དག་ཀྱང་མ་ མཐོང་མ་ཤེས་འདུག་སྟེ།  དེ་དག་དང་གཅིག་པ་གཅིག་རྐྱང་གི་གོམས་འདྲིས་ལུགས་སྲོལ་ རྣམས་ཁྱེར་ཡོང་ནས།  བོད་རིགས་མིན་པའི་སྒྲུབ་བྱེད་བྱས་འདུགགཞན་གོ་ཐོས་ཁུངས་ལྡན་ལ་ཞིབ་འཇུག་པ་རྣམས་ཀྱིས་དྭགས་པོའི་ས་ཆ་ན་རྡོ་རིང་ཡོད་པའི་ངོས་ལ་རྒྱ་ཡིག་མ་ཡིན་པའི་ཡི་གེ་ཡོད་པ་དང་། བོད་ཡིག་གི་གླེགས་བམ་རྙེད་པ་རེད་ཟེར། འོན་ཀྱང་ཡར་ཞུའི་ཡིག་ཆའི་ནང་དུ་སྒྲ་ཙམ་ཡང་མ་བཤད།  དེ་དག་གི་པར་བླངས་ནས་ཁྱེར་ཡོང་ན།  དེང་དུས་ལོ་ རྒྱུས་ཞིབ་འཇུག་ལ་མཁོ་ཡང་།  མ་མཐོང་མ་རིག་པའི་ཚུལ་དུ་འཇམ་མོག་གེ་འདུག རྡོ་རིང་ གི་ཡི་གེ་དེ་ཡང་བོད་ཀྱི་གནའ་ཡིག་ཡིན་རྒྱུ་རེད་སྙམ།  

　མདོར་ན། རྩོད་སྒྲུབ་ཀྱི་རིགས་པས་མི་རིགས་ཀྱི་ཁྱད་པར་འབྱེད་པའི་རྩ་བའི་རྩ་དོན་ལ་བསྟུན་ཏེ། གོང་དུ་བཤད་པའི་ཞིབ་འཇུག་གི་དཔྱད་གཞི་ལ་བརྟེན་ནས་དབྱེ་འབྱེད་བྱས་ན།  དྭགས་པོའི་མིའི་སྐད་ལུགས།  གོམས་གཤིས།  རྒྱུན་སྲོལ།  ཐོན་སྐྱེད་རྣམ་པ།  སྤྱི་ཚོགས་ཀྱི་རྩ་ འཛུགས་སོགས་གང་ཐད་ནས་བོད་རིགས་དང་ཐུན་མོང་བ་ཤས་ཆེ་བས།  དྭགས་པོ་བོད་ རིགས་ཡིན་པའི་སྒྲུབ་བྱེད་དང་ཁུངས་བཙུན་ལ། ཏའེ་རིགས་ཡིན་པའི་ཁུངས་ཅུང་ཟད་ཀྱང་མེད་དོ།  །