སྐབས་དང་པོའི་《གངས་དཀར་རི་བོ།》དུས་དེབ་ཀྱི་བོད་ཡིག་རྩོམ་པ་པོའི་བགྲོ་གླེང་ཚོགས་འདུའི་ཡུལ་དངོས།
སྤྱི་ཟླ་5པའི་ཚེས་26ཉིན། དཀར་མཛེས་བོད་རིགས་རང་སྐྱོང་ཁུལ་རིག་རྩལ་ལྷན་ཚོགས་དང་གསེར་རྟ་རྫོང་དྲིལ་བསྒྲགས་ལས་ཁུངས་གཉིས་ཀྱིས་རྩ་འཛུགས་བྱས་པའི་སྐབས་དང་པོའི་《གངས་དཀར་རི་བོ།》དུས་དེབ་ཀྱི་བོད་ཡིག་རྩོམ་པ་པོའི་བགྲོ་གླེང་ཚོགས་འདུ་དེ་གསེར་རྟ་རྫོང་སློབ་འབྲིང་དུ་འཚོགས།
དཀར་མཛེས་བོད་རིགས་རང་སྐྱོང་ཁུལ་རིག་རྩལ་ལྷན་ཚོགས་དང་གསེར་རྟ་རྫོང་སྲིད་གཞུང་།རྫོང་དྲིལ་བསྒྲགས་ལས་ཁུངས་བཅས་ཀྱི་དབུ་ཁྲིད་རྣམས་དང་། 《གངས་དཀར་རི་བོ།》དུས་དེབ་ཀྱི་རྩོམ་སྒྲིག་པ། གསེར་རྟ་རྫོང་གཙོ་བོར་བྱས་པའི་རྩོམ་པ་པོ་བརྒྱ་ལྷག་ཙམ་ཚོགས་འདུར་ཞུགས། ཚོགས་ཐོག་ཏུ་ཁུལ་རིག་རྩལ་ལྷན་ཚོགས་ཀྱི་གཙོ་འཛིན་སྐལ་བཟང་འགྱུར་མེད་དང་།《གངས་དཀར་རི་བོ།》དུས་དེབ་ཀྱི་གཙོ་སྒྲིག་པ་འཇིགས་མེད་ཕུན་ཚོགས་གཉིས་ཀྱིས་《གངས་དཀར་རི་བོ།》དུས་དེབ་ཀྱི་ལོ་རྒྱུས་དང་རྩོམ་པ་པོའི་གནས་ཚུལ། གསར་རྩོམ་བྱེད་ཚུལ་བཅས་ཀྱི་སྐོར་ལ་གསུང་བཤད་གནང་། ཚོགས་འདུའི་ཉིན་གཉིས་ཀྱི་རིང་ལ་མཚོ་སྔོན་ནས་གདན་ཞུ་བྱས་པའི་སྒྲུང་གཏམ་པ་ཨ་སྨྱོན་བཀྲ་ཤིས་དོན་གྲུབ་དང་སྙན་ངག་པ་གཅན་མེ་སྟག གསེར་རྟའི་གེ་སར་རིག་གནས་ཆེད་མཁས་པ་ཞི་ཆུང་བཅས་ཀྱིས་འཆད་ཁྲིད་གནང་རྒྱུ་དང་རྩོམ་པ་པོ་རྣམས་ཀྱིས་རྩོམ་རིག་སྐོར་ནས་བགྲོ་གླེང་བྱ་རྒྱུ་རེད། །
