ཧིན་དྷུའི་ཆོས་ལུགས་ནི་དུས་རབས ༨ པའི་ནང་རྒྱ་གར་རང་ས་ནས་དར་ཁྱབ་དུ་སོང་བའི་ཆོས་ལུགས་ཅིག་ཡིན། རྒྱ་གར་དུ་ཕོ་ལོ་མུན་ཟེར་བའི་ཆེས་གནའ་བོའི་ཆོས་ལུགས་དེ་དང་སངས་རྒྱས་ཆོས་ལུགས་གཉིས་ལས་ཧིན་དྷུའི་ཆོས་ལུགས་བྱུང་བར་འདོད།ཆོས་ལུགས་འདི་ལའང་ལས་རྒྱུ་འབྲས་དང་སྐྱེ་བ་སྔ་ཕྱི་ཡོད་པར་འཛིན་པ་མ་ཟད། བྱ་བ་བཟང་སྒྲུབ་ངན་སྤང་གི་སྲོལ་ཡང་དག་ཡང་ཡོད། ད་དུང་མི་རྣམས་ཀྱིས་ལྷ་ཆེན་པོ་གསུམ་སྟེ་ཧྥན་ཐེན་དང་ཧྲི་ཕོ། ཕེས་ཧྲི་ནེ་ཟེར་བ་གསུམ་སྐྱབས་གནས་ཀྱི་ལྷ་ཡིན་པར་དང་། དེའི་ཕྱིར་རྒྱ་གར་དུ་བྲམ་ཟེའི་རིགས་སོགས་ནི་ལྷ་དེ་དག་གི་རིགས་ཡིན་པས་དེ་ལས་སྐྱེས་པའི་མི་རྣམས་ཤིན་ཏུ་བཟང་པོརའདོད་པ་དང་། གདོལ་བ་ཤན་པའི་རིགས་སོགས་དེ་ལས་ལྡོག་སྟེ་དམན་པར་བརྩི་བ་སོགས་མིའི་གྲལ་རིམ་མཆོག་དམན་འཛིན་པའི་ལྟ་བ་ཧ་ཅང་ཛ་དྲག་ཆེ། ཡ་མཚན་པ་ཞིག་ལ་བ་ལང་དཀར་པོ་སོགས་ནི་ལྷ་གང་དེའི་བཞོན་པ་ཡིན་པས་དད་གུས་ཚད་མེད་ངང་མཆོད་འབུལ་ཡང་ཡང་གནང་བ་དང་། ར་ལུག་ནག་པོ་སོགས་སྲོག་ཆགས་གཞན་པ་འགའ་རེ་ནི་དམར་གསོད་དུ་བཏང་ནས་ལྷ་མོར་མཆོད་འབུལ་བྱེད་པའི་ལུགས་སྲོལ་ཡོད། དེང་སྐབས་ཡང་ས་ཁུལ་མི་ཉུང་བ་ཞིག་ན་ར་ལུག་གསོད་པའི་བྱ་འགུལ་རྒྱ་ཆེན་པོ་སྤེལ་ཏེ། མི་རྣམས་ཀྱིས་ཉིན་དེར་ར་ལུག་གསོན་པོའི་སྐེ་བཅད་དེ་ལྷ་མོ་ལ་མཆོད་འབུལ་བྱེད་པ་སོགས་ནི་ཁོ་ཚོའི་འཚོ་བའི་ནང་མེད་ཐབས་མེད་པའི་བག་ཆགས་མཐུག་པོ་ཞིག་ཏུ་ཆགས་ཡོད། རྒྱ་གར་རང་གནས་ཀྱི་མི་བརྒྱ་ཆའི ༨༠ ཆོས་ལུགས་འདིར་དད་གུས་ཡོད་པ་དང་། ད་ཆའི་འཛམ་གླིང་མི་གྲངས་ལ་གཞིགས་ན་དད་གུས་བྱེད་མཁན་དུང་ཕྱུར ༨ ཙམ་དང་མིའི་རིགས་ཀྱི་བརྒྱ་ཆའི ༡༣ ཟིན་ཡོད་པས་མི་གྲངས་ཀྱི་ཆ་ནས་འཛམ་གླིང་སྟེང་གི་ཆོས་ལུགས་ཨང་གསུམ་པར་རང་བཞིན་གྱིས་འཕགས་ཡོད།
