སློབ་སྐབས་གསར་བ་མགོ་ཚུགས་པས། སློབ་གྲྭ་ཡོངས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་སྲུང་སྐྱོང་གང་ལེགས་སྒོས། ཡོངས་ཁྱབ་ནས་སློབ་རའི་བདེ་འཇགས་དོ་དམ་ལ་ཤུགས་སྣོན་བྱས་ཏེ། སློབ་གྲྭས་སློབ་རའི་བདེ་འཇགས་དང་བཟའ་ཆས་བདེ་འཇགས། མེ་འགོག་བདེ་འཇགས་བཅས་ཀྱི་རྐང་འཛིན་ལས་འགན་དོན་དུ་འཁྱོལ་བར་སྐུལ་འདེད་གཏོང་ཆེད། ཟླ8པའི་ཚེས23ཉིན། འབྲིང་བ་ཡུལ་ཚོའི་མི་དམངས་སྲིད་གཞུང་གིས་ཡུལ་ཚོའི་མངག་གཏོང་ཁང་དང་འཕྲོད་བསྟེན་ཁང་གཉིས་དང་མཉམ་འབྲེལ་སྒོས། འབྲིང་བ་ཡུལ་ཚོའི་ལྟེ་བའི་སློབ་ཆུང་དུ་བསྐྱོད་དེ་སློབ་རའི་བདེ་འཇགས་ཞིབ་བཤེར་ལས་སྒོ་སྤེལ།
གཅིག་ནས་མེ་འགོག་བདེ་འཇགས་གཙིགས་སུ་བཟུང་བ། སློབ་ཁྲིད་ཐོག་ཁང་དང་ཞག་སྡོད་ཐོག་ཁང་སོ་སོ་དང་། སློབ་གྲྭའི་ཟ་ཁང་དང་ཚོད་ལྟ་ཁང་སོགས་ཀྱི་མེ་འགོག་སྒྲིག་ཆས་ཆ་ཚང་མིན་དང་། ཇུས་འགོད་ཚད་ལྡན་ཡིན་མིན། ཁ་འགྲེམ་བགྲོད་ལམ་དང་བདེ་འཇགས་ཐོན་སྒོ་ཤར་བགྲོད་ཐུབ་མིན་བཅས་ཀྱི་གནས་ཚུལ་དང་། ལས་སྒྲུབ་མི་སྣར་མེ་གསོད་ཤེས་བྱ་དང་ནུས་རྩལ་ལྡན་མིན་ལ་ཞིབ་བཤེར་གང་ལེགས་བྱས།
བཟའ་ཆས་བདེ་འཇགས་གཙིགས་སུ་བཟུང་བ། ཡུལ་དངོས་ནས་སློབ་གྲྭའི་ཟ་ཁང་གི་ཟས་ཀྱི་གདོད་མའི་རྒྱུ་ཆའི་སྤུས་ཀ་དང་བཟའ་ཆས་ཉར་ཚགས་གནས་ཚུལ་ལ་ལྟ་ཞིབ་སྒོས། བཟའ་ཆས་ཀྱི་མཛོད་ཁང་དང་ཟ་ཁང་སོགས་ཁྱབ་ཁོངས་ཀྱི་བདེ་འཇགས་དང་གཙང་སྦྲའི་གནས་ཚུལ་སོགས་ལ་རེ་རེ་བཞིན་ཞིབ་བཤེར་བྱས་ཏེ། སྒྲིག་འགལ་གྱི་ལས་གཉེར་སྤྱོད་ཚུལ་ཡོད་མེད་དང་། ཟ་མའི་རྒྱུ་ཆ་སོ་སོར་ཕྱེ་ཏེ་ཐུམ་རྒྱག་བྱས་མིན་དང་ཟས་བཙོས་མ་དང་བཙོས་མ་མ་ཡིན་པ་སོ་སོར་ཕྱེ་མིན་སོགས། རྒྱུན་སྲོལ་གྱི་གཙང་སྦྲའི་སྐོར་ལ་བླང་བྱ་བཏོན།
སློབ་རའི་བདེ་འཇགས་གཙིགས་སུ་བཟུང་བ། སློབ་རའི་ཉེ་འཁོར་གྱི་བདེ་འཇགས་འགན་ལེན་བྱེད་ཐབས་ལ་ལྟ་ཞིབ་སྒོས། སློབ་མའི་ཞག་སྡོད་ཁང་གི་སྒོ་དང་དྲ་མིག་ཐད་ནས་བག་ཉལ་རྐྱེན་ངན་ཡོད་མེད་དང་། འབར་རླངས་འཛག་ཤོར་བྱུང་མིན་སོགས་ཀྱི་གནས་ཚུལ་ལ་ཞིབ་བཤེར་གང་ལེགས་གནང་།
ཐེངས་འདིའི་སློབ་མགོ་གསར་ཚུགས་ཀྱི་བདེ་འཇགས་ཞིབ་བཤེར་ལས་སྒོ་སྤེལ་བ་བརྒྱུད། སློབ་གྲྭའི་བདེ་འཇགས་ཐད་ཀྱི་བག་ཉལ་རྐྱེན་ངན་ལ་རིམ་བཤེར་དག་ཐེར་བྱས་པར་མ་ཟད། སློབ་གྲྭ་ཡོངས་ཀྱི་བདེ་འཇགས་ཐོན་སྐྱེད་འདུ་ཤེས་སྔར་ལས་ཇེ་ཆེར་བཏང་། རྗེས་སོར་ཡུལ་ཚོ་དེས་རྒྱུན་ལྡན་ཅན་ལྟར་བདེ་འཇགས་ཐོན་སྐྱེད་ལས་དོན་དམ་འཛིན་སྒོས། སྔོན་འགོག་གཙོར་འཛིན་དང་ཕྱི་ནང་མཉམ་བཅོས་རྒྱུན་འཁྱོངས་བྱས་ཏེ། རྒྱུན་མི་ཆད་པར་ཡུལ་ཚོ་དེའི་བདེ་འཇགས་ཐོན་སྐྱེད་ལས་ཀའི་ཆུ་ཚད་ཇེ་མཐོར་བཏང་ནས། མངའ་ཁོངས་ཀྱི་སློབ་གྲྭ་དང་སྡོད་དམངས་ཀྱི་བདེ་འཇགས་འགན་ལེན་རྒྱུ་རེད།
