དཔའ་བརྟུལ་བཞི་པོའི་ཐོག་མར་ཉ་ཚ་ཡོད་པས་རྟ་ཁ་ཚུར་བསྒྱུར་ཏེ་གྲི་མགོ་ལ་འཇུས་ནས་ན་རེ། འོ་ན་ཧོར་སེར་ཤན་པ་བཞི། ཁ་གཏམ་སྦོམ་ལ་དྲངས་ན་ཡང་། ལག་ལེན་ཕྲ་ལ་ཐུག་རབས་ཡོད། ཕོ་ཁྱོད་ཚོས་ཅི་ནུས་ཅི་འཁྱོལ་དེ། གླིང་ཨ་ཕྲུག་གིས་མི་ནུས་དགྲ་ལ་སྒྱུར། ཟེར་ནས་གླུ་འདི་ལྟར་བླངས་པར་གདའ་འོ། །
གླུ་ཐ་ལ་ལ་མོ་ཐ་ལ་ལེན། །
གླུ་ཨ་ལ་ལ་མོ་ཨ་ལ་ལེན། །
གླུ་ཕ་རྒྱུད་ནམ་མཁའ་སྟོང་བའི་གླུ། །
སྟོང་བའི་གླུ་ཞིག་མི་ལེན་ཏེ། །
ནམ་མཁའ་མཐའ་དབུས་མེད་པའི་གླུ། །
མ་རྒྱུད་ཆུ་བོ་གཞུང་འབྱམས་གླུ། །
འབྱམས་པའི་གླུ་ཞིག་མི་ལེན་ཏེ། །
ཆུ་ལ་རྒྱུད་ཆད་མེད་པའི་གླུ། །
རང་རྒྱུད་རྩ་རླུང་འཕྲུལ་འཁོར་གླུ། །
འཕྲུལ་པའི་གླུ་ཞིག་མི་ལེན་ཏེ། །
རྩ་ལ་འགགས་པ་མེད་པའི་གླུ། །
ས་འདིའི་ས་ངོ་མ་ཤེས་ན། །
གཡག་ལ་སེར་པོའི་ཡར་སྟེང་ལ། །
དལ་ཆུང་ཁེར་སྐྱེས་ཡར་གཤམ་ན། །
ཆུ་ལུང་ན་ཐང་སྔོ་ཆུ་ཟེར། །
ཕོ་ང་དང་ང་ངོ་མ་ཤེས་ན། །
གླིང་སྟོད་གསེར་པ་མཆེད་བརྒྱད་ལ། །
སྡེ་ཡང་འཁོར་སྟག་རོང་དུག་མཚོ་ཡོད། །
མཁར་བཙན་པོ་ཕོ་རོག་སྙིང་རྫོང་ན། །
གླིང་ཆེ་རྒྱུད་སྟག་མོ་ཐང་གང་ལ། །
འཛུམ་དྲུག་ངོམ་ངེས་ཨ་བརྟན་ཡིན། །
གསེར་འཕྲུ་ཆགས་པའི་རུ་འདྲེན་ཡིན། །
དཔུང་པ་གཡོན་པའི་ཤ་རྒོད་རེད། །
རྐང་ཆུང་གཡོན་པའི་ངར་རྒོད་གདོང་ཡིན། །
ཁྲ་ཆུང་གཡོན་པའི་ཨ་འབྲས་ཡིན། །
བྱང་སྒོ་སྲུང་བའི་དཔའ་བོ་ཡིན། །
རང་ཆེ་མ་ཡིན་སྲིད་པས་བཀོད། །
ཁོ་རེ་ཧོར་སེར་ཤན་པ་བཞི། །
ཡང་སྒོས་སྟོང་ཤོང་འབྲུག་སྒྲ་བུ། །
ཡང་དག་པའི་གླུ་ལ་ཚུར་ཉོན་དང་། །
མེ་ཕོ་འབྲུག་གི་སོས་ཀ་ནས། །
ས་ཕོ་རྟ་ཡི་དཔྱིད་ཀའི་བར། །
ཧོར་གླིང་མི་ཚེ་སྡིག་ལ་བསྐྱལ། །
ཤི་བསད་གཉིས་ཀྱི་ལས་ལ་སྦྱངས། །
ཧོར་དཀར་ཆགས་པའི་ཁྲི་བཙུན་གཅིག །
གུར་སེར་པོའི་ནང་གི་བཅུད་དང་གཉིས། །
མགར་སྡེ་བའི་དཔྲལ་པའི་མིག་དང་གསུམ། །
སྙིང་ཁྲག་ས་ལ་ཕོ་ནས་ཐལ། །
དེ་དུས་འབྲུག་སྒྲ་གང་ལ་སོང་། །
གཡས་ཤོག་ཟི་ལ་ཆམ་ལ་ཕབ། །
གཡོན་རུའི་ཐང་ནག་རྩིས་ལ་ཕབ། །
རི་པའི་ཅོག་དམར་ཁྲག་ལ་བསྒྲེས། །
དེ་དུས་འབྲུག་སྒྲ་གང་ལ་སོང་། །
བྱེས་འགྲོའི་ཁ་དམར་མཐའ་ལ་འཕངས། །
ཟི་ར་ཐོག་རྒྱལ་གསོན་སྙིང་བླངས། །
ཐང་ནག་རྩེ་རྒྱལ་དམར་གསོད་བྱས། །
འབལ་ཆེན་གྲུ་གུ་གཡས་ལ་བསྒྲིལ། །
ནམ་མཁའ་སྦར་ཟིན་ས་ལ་བརྡབས། །
གུང་རྗེ་གཡུ་ཡག་དོང་ལ་བྲུབ། །
དེ་དུས་འབྲུག་སྒྲ་གང་ལ་ཡོད། །
འབུམ་དམག་དཔུང་བའི་དྭངས་རྩེ་རྣམས། །
གཅིག་མེད་གཉིས་མེད་རྩ་བ་ཕུད། །
དེ་དུས་འབྲུག་སྒྲ་གང་ལ་སོང་། །
མ་ཤི་གསོན་ལ་བསྡད་པས་ཀྱང་། །
རྒྱལ་པོ་གུར་དཀར་འཕྱི་ཁུང་གབ། །
ཤན་པ་རྨེ་རུའི་ཡ་ཐོད་ཤོར། །
མཆོང་ལྷ་སྨུག་པོ་ཝ་བྲོས་བརྒྱབ། །
གླང་པོ་ཁྲ་འབར་ལུང་གཞུང་བྲོས། །
དེ་དུས་འབྲུག་སྒྲ་མ་ཚོར་ལགས། །
འབུམ་དམག་བཅུ་གཉིས་དྭངས་རྩེ་ལ། །
རྒོད་ཡང་དག་རྒྱང་སྙན་ཐོས་པའི་མི། །
ཐང་རྩེ་གཡུ་འབྲུག་ཁོ་ཙམ་ཡིན། །
དེ་མིན་བུ་མོ་ཤ་སྟག་རེད། །
གནའ་མི་བོད་ཀྱི་གཏམ་དཔེ་ལ། །
མི་མཁས་པ་རྒྱ་བོད་བར་ན་གྲགས། །
མཁས་རྟགས་ལག་གིས་བླངས་པས་ཡིན། །
ཕོ་རྒོད་གནམ་སའི་བར་ན་གྲགས། །
རྒོད་ཡང་དག་ལག་གི་བླངས་རྟགས་ཡིན། །
དགོན་ཆེན་བླ་མ་རྒྱང་གྲགས་ཆེ། །
བྱིན་རླབས་མེད་ན་འདྲ་འདྲ་ཡིན། །
རི་ཁྲོད་སྒོམ་ཆེན་རྒྱང་གྲགས་ཆེ། །
ཉམས་རྟོགས་མེད་ན་འདྲ་འདྲ་ཡིན། །
སྡེ་ཆེན་དཔོན་པོ་རྒྱང་གྲགས་ཆེ། །
བཀའ་དྲིན་མེད་ན་འདྲ་འདྲ་ཡིན། །
དམག་ཁྲ་བོའི་རྒོད་པོ་རྒྱང་གྲགས་ཆེ། །
སྙིང་སྟོབས་མེད་ན་འདྲ་འདྲ་ཡིན། །
ཁོ་རེ་སྟོང་ཤོང་འབྲུག་སྒྲ་ཁྱོད། །
འབྲུག་འུར་སྒྲ་ཆེ་ཡང་སྟོང་སྒྲ་ཡིན། །
འབུམ་དམག་བཅུ་གཉིས་གཞི་དཀྱིལ་ན། །
འབྲུག་སྒྲ་གསོན་ཉིན་ག་ན་ཡོད། །
འབྲུག་སྒྲ་ན་ནིང་མིར་གྲགས་ནས། །
ད་ལོ་འབྲུག་སྒྲ་ཁྱི་དང་འདྲ། །
གླིང་དཀར་དཔའ་བརྟུལ་སུམ་ཅུ་འདིས། །
ཧོར་འབུམ་སྒར་གྲོས་ཡོས་བརྔོ་བརྔོ་བྱས། །
འབྲུག་སྒྲ་རྣ་བས་མ་ཚོར་ཨང་། །
གནམ་ནས་བྱུང་ན་གཤོག་པ་རྐྱོངས། །
ས་ནས་བུད་ན་སྡེར་མོ་སྟོན། །
དེ་མིན་ན་ཧོར་པའི་ཤན་ཆུང་ཁྱོད། །
རྐང་མཐིལ་རྡུལ་ལ་མི་རྩི་དོ། །
དེ་རིང་ཉི་མའི་སྔ་དྲོ་ལ། །
གླིང་དཀར་ཕུ་ནུ་སྤུན་བཞི་པོ། །
གསོན་ན་མི་ཚེ་སྡིག་ལ་སྐྱེལ། །
ཤི་ན་གཏམ་རྒྱུད་བོད་ལ་འཇོག །
ཅི་མ་ཡིན་ལ་སྡོད་མི་མིན། །
གླིང་སྐུ་རྗེ་ནོར་བུ་དགྲ་འདུལ་དཔོན། །
མ་བཞུགས་ཡར་ཁམས་བྱང་ལ་བྱོན། །
འཛམ་གླིང་ལྷོ་ཡི་དོན་ལ་རེད། །
གེ་སར་རྒྱལ་པོའི་སྐུ་ཇུས་དེ། །
གྲུ་བཞི་ལམ་མེ་མ་བཟུང་ན། །
གླིང་དཔའ་བརྟུལ་སྲོག་དམར་མཉམ་དུ་གཏོང་། །
དཔོན་ཇུས་ཤོར་བའི་གཡོག་པོ་དེ། །
མགོ་གང་ཐོན་བྱས་ན་ངོ་ཚ་ཉོ། །
ཚེ་གང་དཔོན་གོ་ཆོད་པ་དེ། །
ཉིན་གང་གཅིག་ལ་དྲིན་ལན་དགོས། །
གལ་ཏེ་ཕྱི་ནུར་བརྒྱབ་སྲིད་ན། །
ཕོ་དེ་ལ་ཁྱི་མིང་མི་ཐོགས་རི། །
སྙིང་ནག་གི་རྩ་བ་རུལ་བའི་རྟགས། །
ཁ་གང་བལྟས་དེ་ལ་དེ་འདྲ་མཐའ། །
ལ་གཞི་གླིང་དཀར་སྡེ་གཞིས་འདི། །
མ་ཟིན་དཔའ་བརྟུལ་སུམ་ཅུ་པོ། །
མི་གཅིག་ཀྱང་མ་ལུས་ཤི་ན་དགའ། །
འགྱོད་པ་མེད་ངེས་གསེར་འབུམ་དཔང་། །
དེ་རིང་མི་ནུས་ག་ལ་ཡོང་། །
དང་པོ་ཁྱོད་རང་ཤན་པ་བཞི། །
སྐྱེན་བསམ་ཡོད་ན་མདའ་མོ་འཕོངས། །
རྣོ་བསམ་ཡོད་ན་མདུང་རྩེ་ངོམ། །
ངར་བསམ་ཡོད་ན་མཚོན་སྔོན་གཡུགས། །
ངེད་རང་ཚ་ཞང་སྤུན་བཞི་པོས། །
གོ་བཙན་བཟུང་ནས་སྡོད་རྒྱུ་ཡིན། །
དེ་མཐར་ཅི་དགོས་ཅི་ལྟ་བྱེད། །
གོ་ན་རྣ་བའི་བདུད་རྩི་ལ། །
མ་གོ་གླུ་ཡི་འབྲེལ་བ་ཞུ། །
