རྒྱ་ཆེའི་མང་ཚོགས་ཀྱི་དྲ་རྒྱའི་བདེ་འཇགས་འདུ་ཤེས་ཇེ་ཟབ་ཏུ་གཏོང་ཆེད། བདེ་འཇགས་དང་སྐྱོན་བྲལ། ཡ་རབས། འཆམ་མཐུན་བཅས་ཡིན་པའི་དྲ་སྦྲེལ་ཁོར་ཡུག་བསྐྲུན་དགོས། ཟླ་9པའི་ཚེས་11ཉིན། མཛོད་དགེ་རྫོང་གིས་དྲ་རྒྱའི་བདེ་འཇགས་ནི་མི་དམངས་ཀྱི་ཆེད་དུ་ཡིན་པ་དང་དྲ་རྒྱའི་བདེ་འཇགས་ནི་མི་དམངས་ལ་བརྟེན་དགོས་ཞེས་པའི་བརྗོད་དོན་དྲ་རྒྱའི་བདེ་འཇགས་བྱེད་སྒོ་སྤེལ།  འབྲེལ་ཡོད་སྡེ་ཁག་གི་ལས་དོན་མི་སྣས་དྲིལ་བསྒྲགས་གང་ལེགས་བྱས་ཏེ། རྒྱ་ཆེའི་སྡོད་དམངས་ལ་དྲ་རྒྱའི་བདེ་འཇགས་ཀྱི་ཉེན་ཁ་ལས་གཡོལ་ནས། དྲ་རྒྱའི་བདེ་འཇགས་ཁོར་ཡུག་ལེགས་འཛུགས་ལ་ཤུགས་སྣོན་བྱས།

རྫོང་མཁར་གྱི་ཁྲོམ་གཞུང་དུ་ལས་དོན་མི་སྣས་སྒྲོག་ཤོག་བཀྲམ་པ་བརྒྱུད་འགྲོ་འོང་མང་ཚོགས་ལ་གློག་འཕྲིན་དྲ་རྒྱའི་ཁ་བསླུས་དང་ཡིད་རྟོན་དངུལ་བུན་རྫུན་བཟོ། དངུལ་འཇོག་རྒྱུ་གཉེར་སོགས་ཀྱི་མགོ་སྐོར་བྱེད་ཐབས་ཁྱབ་གདལ་བཏང་ནས། ཚང་མར་དྲན་སྐུལ་གནང་དོན། དུས་དང་རྣམ་པ་ཀུན་ཏུ་གློག་འཕྲིན་ཁ་བསླུས་ལ་སྔོན་འགོག་བྱེད་དགོས་པ་མ་ཟད། རྒྱུས་མངའ་མེད་པའི་ཁ་པར་དང་འཕྲིན་ཐུང་ལ་ཡིད་ཆེས་མི་རུང་། ཆ་རྒྱུས་མེད་པའི་མིར་སྒོར་བསྐུར་མི་རུང་།

མཛོད་དགེ་རྫོང་གི་མང་ཚོགས་ཀྲང་ཅིན་ཧེང་གིས་བཤད་རྒྱུར། བྱེད་སྒོ་འདིར་ཞུགས་ནས་ང་ལ་ཕན་འབྲས་མང་པོ་ཐོབ་བྱུང་། ཁ་པར་དུ་ཡོང་ཁུངས་མི་གསལ་བའི་དྲ་ཚིགས་བཀོལ་མི་རུང་བ་དང་། གང་བྱུང་དུ་མཉེན་ཆས་ཕབ་ལེན་བྱེད་མི་རུང་། ཁ་པར་ངོས་ཀྱི་ཚད་ལྡན་མཉེན་ཆས་ཕབ་ལེན་མཉེན་ཆས་བརྒྱུད་ཕབ་ལེན་བྱེད་དགོས། དྲ་ལམ་ནས་དངོས་པོ་ཉོ་དུས་མཉེན་ཆས་ཆེ་གྲས་ནས་ཉོ་དགོས་པ་ལས། ཉོ་སྒྲུབ་མཉེན་ཆས་ཆུང་ངུ་ནས་ཉོ་མི་རུང་། དྲ་ལམ་ཁེ་བཟང་རག་པར་རྔམ་ནས་གང་བྱུང་དུ་ཐོ་འགོད་བྱེད་མི་རུང་། དེ་ལྟར་ན་རང་ཉིད་ཀྱི་ཆ་འཕྲིན་ཕྱིར་སྒྲོག་པའི་ཉེན་ཁ་ཡོད། ང་ཚོས་རང་ཉིད་ཀྱི་ཆ་འཕྲིན་གསང་བ་སྲུང་དགོས།

བྱེད་སྒོར་ལས་དོན་མི་སྣས་ད་དུང་མི་དམངས་མང་ཚོགས་ཀྱིས་ཚད་མཐོའི་དོ་ཁུར་བྱེད་པའི་མི་སྒེར་གྱི་ཆ་འཕྲིན་སྲུང་སྐྱོང་དང་གློག་འཕྲིན་དྲ་རྒྱའི་ཁ་བསླུས། གཞོན་ནུ་ལོ་ཆུང་གི་དྲ་རྒྱ་སྲུང་སྐྱོང་སོགས་ཀྱི་གནད་དོན་ལ་དམིགས་ཏེ། མང་ཚོགས་ལ་དྲ་རྒྱའི་བདེ་འཇགས་ཀྱི་བཅའ་ཁྲིམས་ཁྲིམས་སྲོལ་དང་དྲ་རྒྱའི་བདེ་འཇགས་ཀྱི་ཁ་བསླུས།  ཞེ་གནག་མཉེན་ཆས་སྔོན་འགོག་དང་མི་སྒེར་གྱི་ཆ་འཕྲིན་སྲུང་སྐྱོང་སོགས་ཀྱི་ཤེས་བྱ་འགྲེལ་བཤད་བྱས། སྐད་འཕྲིན་དང་QQསོགས་སྤྱི་ཚོགས་འབྲེལ་བའི་མཉེན་ཆས་བདེ་འཇགས་ངང་སྤྱོད་པར་འགྲེལ་ལེགས་པོ་བརྒྱབ་པས་བློ་བདེ་འབྲེལ་འདྲིས་བྱེད་པར་འགན་སྲུང་བྱས།

ཀྲུང་གོ་ཞིང་ལས་དངུལ་ཁང་མཛོད་དགེ་རྫོང་ཡན་ལག་དངུལ་ཁང་གི་ལས་དོན་མི་སྣ་པདྨ་བཀྲ་ཤིས་ཀྱིས་བཤད་རྒྱུར། ང་ཚོ་ཀྲུང་གོ་ཞིང་ལས་དངུལ་ཁང་གིས་དངུལ་རྩའི་ཞབས་ཞུ་མཁོ་འདོན་བྱེད་པ་མ་ཟད། དྲ་རྒྱའི་བདེ་འཇགས་དར་སྤེལ་གཏོང་མཁན་གཙོ་བོ་ཡིན། ང་ཚོ་ཁ་བསླུས་སྔོན་འགོག་གི་དྲིལ་སྒྲོག་བྱེད་སྒོ་སྣ་ཚོགས་ནང་ཞུགས་ནས།  ཚོང་མགྲོན་དང་སྤྱི་ཚོགས་ལ་དྲ་རྒྱའི་ཁ་བསླུས་སྔོན་འགོག་གི་ཆ་འཕྲིན་བརྒྱུད་སྒྲོག་བྱས།

མཛོད་དགེ་རྫོང་སྤྱི་བདེ་ཅུས་ཀྱི་མི་དམངས་ཉེན་རྟོག་པ་གྲགས་པ་རྣམ་རྒྱལ་གྱིས་བཤད་རྒྱུར། དྲ་རྒྱའི་བདེ་འཇགས་ནི་མི་ཚང་མ་དང་འབྲེལ་བ་ཡོད་པས། ང་ཚོ་མཛོད་དགེ་རྫོང་གི་མི་ཚང་མས་དྲ་རྒྱའི་དོགས་ཟོན་འདུ་ཤེས་ཇེ་ཟབ་ཏུ་གཏོང་དགོས།

མཛོད་དགེ་རྫོང་ཡིད་རྟོན་མཉམ་འབྲེལ་ཁང་གི་ལས་དོན་མི་སྣ་མཁའ་འགྲོ་མཚོ་ཡིས་བཤད་རྒྱུར། ཐེངས་འདིའི་བྱེད་སྒོ་སྤེལ་བ་བརྒྱུད་གཙོ་བོ་རྒྱ་ཆེའི་ཚོང་མགྲོན་རྣམས་ལ་དྲན་སྐུལ་བྱས་དོན། རྒྱུན་ལྡན་གྱི་འཚོ་བ་དང་ལས་ཀའི་ཁྲོད་རྒྱུས་མངའ་མེད་པའི་དྲ་ཚུགས་ལ་གང་བྱུང་དུ་འཛུལ་མི་རུང་བ་དང་། མཉེན་ཆས་གང་བྱུང་དུ་སྒྲིག་འཇོག་མི་རུང་བ། མཁོ་བ་གསུམ་དང་མི་མཁོ་བ་གསུམ་གྱི་དོགས་ཟོན་འདུ་ཤེས་བརྟན་པོ་བཅངས་ནས་རང་ཉིད་ཀྱི་དངུལ་ཁུག་ཡག་པོ་སྲུང་དགོས།

ཉེ་བའི་ལོ་ཤས་རིང་། མཛོད་དགེ་རྫོང་གིས་མང་ཚོགས་ལ་མིག་མཐོང་ལག་ཟིན་གྱི་ལས་ཀའི་དམིགས་ཚད་ལྟར། བསམ་ཕྱོགས་ཆེར་བསྐྱེད་དང་བྱེད་ཐབས་གསར་གཏོད་བྱས་ཏེ།  དྲ་རྒྱའི་བདེ་འཇགས་དྲིལ་སྒྲོག་བྱེད་སྟངས་གསར་སྒྱུར་སྒོས་དྲིལ་སྒྲོག་བྱེད་ཤུགས་ཆེ་ཏུ་བཏང་ནས། དྲ་རྒྱའི་བདེ་འཇགས་ཤེས་བྱ་ཁྱིམ་ཚང་ཁྲི་སྟོང་མང་པོར་ཁྱབ་གདལ་བཏང་སྟེ་རྫོང་ཡོངས་ཀྱི་དྲ་རྒྱའི་བདེ་འཇགས་དྲིལ་སྒྲོག་ལས་དོན་གྱི་རྣམ་པ་གསར་པ་བཏོད། །