མཐོ་ལ་དགུང་སྔོན་གནམ་འདི་མཐོ།།
བྱིང་ལ་ཐང་དཀར་རྒོད་འདི་བྱིང༌།།
མཐོ་བྱིང་འཛོམས་པའི་སྐུ་རེ་བསྟོད།།
བདེ་ལ་དཀར་ཡག་ཐང་འདི་བདེ།།
མགྱོགས་ལ་ཁ་དཀར་རྐྱང་འདི་མགྱོགས།།
བདེ་མགྱོགས་འཛོམས་པའི་སྐུ་རེ་བསྟོད།།
དཔའ་ལ་དམར་ཡག་སྟག་འདི་དཔའ།།
ཕྱུག་ལ་ཙན་དན་ནགས་འདི་ཕྱུག།
དཔའ་ཕྱུག་འཛོམས་པའི་སྐུ་རེ་བསྟོད།།
མི་རྒྱུད་དེད་དེ་ཡོང་ནི་ཡིན།།
རྒྱ་རྫོང་ནགས་ཀྱི་བྱ་བརྒྱ་ཚོ།།
སིལ་ཏོག་ལོ་མའི་བར་ནས་འཁོར།།
ངས་སིལ་ཏོག་དེད་དེ་ཡོང་ནི་མིན།།
བྱ་བརྒྱ་དེད་དེ་ཡོང་ནི་ཡིན།།
སྐྱེད་མོའི་ཚལ་གྱི་བུང་བ་ཚོ།།
མེ་ཏོག་བཀྲ་བའི་བར་ནས་འཁོར།།
ངས་མེ་ཏོག་དེད་དེ་ཡོང་བ་མིན།།
བུང་བ་དེད་དེ་ཡོང་བ་ཡིན།།
ཁྲོམ་པའི་གྲལ་གྱི་ན་ཟླ་ཚོ།།
ཟས་ཆང་བཤམས་པའི་བར་ནས་འཁོར།།
ངས་ཟས་ཆང་དེད་དེ་ཡོང་ནི་མིན།།
མི་རྒྱུད་དེད་དེ་ཡོང་བ་ཡིན།།
སྙིང་སྟོབས་མེད་ན་དཀའ་མོ་རེད།།
སྟག་དར་མ་མཚལ་གྱི་ཐིག་ལེ་ཅན།།
གོས་གོང་བའི་ཁ་ལ་སྤྲོད་རྐྱང་རེད།།
མིན་ཨ་ལ་ན་ཟླ་ཀུ་རེ་ཡིན།།
དཔའ་སྙིང་སྟོབས་མེད་ན་དཀའ་མོ་རེད།།
ཕ་ཕྱུག་པོའི་བུ་མོ་འཛུམ་ཡག་མ།།
རྒྱན་བཏགས་ནས་གནས་ལ་འགྲོ་རྐྱང་རེད།།
མིན་ཨ་ལ་ན་ཟླ་ཀུ་རེ་ཡིན།།
མ་ཁོག་ཤེས་མེད་ན་དཀའ་མོ་རེད།།
སྐད་སྙན་པའི་གླུ་བ་ལས་ཅན་པོ།།
མགོ་ཝ་མོ་གོན་ནས་རྩེ་རྐྱང་རེད།།
མིན་ཨ་ལ་གླུ་བ་ཀུ་རེ་ཡིན།།
གླུ་མེད་ན་དེ་ཡང་དཀའ་མོ་རེད།།
མ་བུ་མོ་ཞིག་ལ་འཛོམ་རྒྱུ་ན།།
བྱ་ངང་བ་སེར་པོའི་ཡག་བཞིན་འདི།།
བན་སེར་མོ་ཞིག་ལ་འཛོམ་རྒྱུ་ན།།
རྒྱབ་ཆོས་གོས་མི་དགོས་རང་གྲུབ་རེད།།
གླག་ཁྲ་མོ་འཕུར་བའི་བདེ་མྱུར་འདི།།
སྟག་ཤ་ར་ཞིག་ལ་འཛོམ་རྒྱུ་ན།།
སྐེད་གྲི་ཆུང་མི་དགོས་རང་གྲུབ་རེད།།
བྱ་རྨ་བྱའི་རྒྱབ་ཀྱི་ཐིག་ལེ་འདི།།
མ་བུ་མོ་ཞིག་ལ་འཛོམ་རྒྱུ་ན།།
རྒྱན་གཡུ་བྱུར་མི་དགོས་རང་གྲུབ་རེད།།
ས་དལ་དུས་ན་ཟླ་འགྲིག་མཐུན་གྱིས།།
བུ་བུ་མོས་ཉོན་དང་གླུ་རེ་ལེན།།
ཡུལ་ཕ་མ་གཉིས་ལ་བརྩི་བཀུར་གྱིས།།
ཡུལ་ཕ་མ་དགུང་གི་ཉི་ཟླ་འདྲ།།
ཕྱིར་འཁོར་རེ་འཆར་ཁ་དཀའ་མོ་རེད།།
སོས་དལ་དུས་ན་ཟླ་འགྲིག་མཐུན་གྱིས།།
སྤུན་ན་ཟླ་ལ་ཁའི་དགོ་བ་འདྲ།།
ཕྱིར་འཁོར་རེ་འདུ་ཁ་དཀའ་མོ་རེད།།
གླུ་དཀའ་རབ་བཤད་ན་དེ་འདྲ་རེད།།
རྗེ་ལྷ་སྐུ་བཞེངས་པའི་ལྷ་བཟོ་ཚོ།།
གསེར་གྱོང་ལ་མ་གཏོང་ཏན་ཏན་གྱིས།།
གསེར་ས་རྡོའི་བར་ནས་རྙེད་ནོ་རེད།།
ཆུ་བྱེ་མའི་ནང་ནས་བཙགས་ནི་རེད།།
གསེར་དཀའ་རབ་བཤད་ན་དེ་འདྲ་རེད།།
ནས་རི་ཞོལ་ཁུག་ལ་བཏབ་ནོ་རེད།།
རྫ་མའི་རྔུལ་ཆུ་བསོགས་ནི་རེད།།
ཆང་དཀའ་རབ་བཤད་ན་དེ་འདྲ་རེད།།
ཕྱི་ཁྲོམ་པའི་གྲལ་གྱི་ཨ་ཁུ་ཚོ།།
འུར་མ་རྒྱག་གླུ་ལ་ཉན་ཡག་གྱིས།།
གླུ་རིག་པའི་སྟེང་ནས་བསྒྲིགས་ནོ་རེད།།
སྐད་མིད་ཐག་ནང་ནས་བཀུག་ནི་རེད།།
གླུ་དཀའ་རབ་བཤད་ན་དེ་འདྲ་རེད།།
ཕྱུག་པོའི་རྒྱུ་ལ་མ་སྨོན་དང༌།།
ཕྱུག་རྒྱུ་ནོར་རྩྭ་མགོའི་ཟིལ་བ་འདྲ།།
རྟག་མི་རྟག་གཉི་ག་ཡོད་ནི་རེད།།
ལས་རྒྱུ་འབྲས་མེད་ཚུལ་དེ་འདྲ་རེད།།
མེད་པོའི་བུ་ལ་མ་འཕྱ་དང༌།།
མེད་ཟེར་བ་འཛམ་གླིང་ཉི་མ་འདྲ།།
ཤར་མི་ཤར་གཉི་ག་ཡོད་ནི་རེད།།
ལས་རྒྱུ་འབྲས་མེད་ཚུལ་དེ་འདྲ་རེད།།
བླ་མ་དཔོན་པོ་གྲྭ་བ་གསུམ།།
ཆོས་ཀུན་རིག་གསུང་ནོ་བླ་མ་རེད།།
ཤ་ཚོན་པོ་ཟ་ནོ་དཔོན་པོ་རེད།།
ཁུར་ལྕི་མོ་འཁུར་ནོ་གྲྭ་བ་རེད།།
ལས་རྒྱུ་འབྲས་མེད་ཚུལ་དེ་འདྲ་རེད།།
ཨ་ནེ་མནའ་མ་བུ་མོ་གསུམ།།
ཇ་ཁོལ་མགོ་འཐུང་ནོ་ཨ་ནེ་རེད།།
གཡུ་བྱུ་རུ་འདོགས་ནོ་བུ་མོ་རེད།།
ཁྱིམ་ལས་ཀ་ལས་ནོ་མནའ་མ་རེད།།
ལས་རྒྱུ་འབྲས་མེད་ཚུལ་དེ་འདྲ་རེད།།
མ་བུ་མོ་སློང་ན་ངོ་ལ་ལྟོས།།
རྟ་འདོ་བ་ཉོ་ན་དྲུག་ལ་ལྟོས།།
ཤ་དང་ཤེད་མོ་དྲུག་ན་ཡོད།།
འགྲོས་དང་གོམ་པ་ཞོར་ན་ཡོད།།
