ནེའུ་ཆུང་མ་ན་རེ། ཡ། གླུ་དེ་ཚོ་ཨ་ཁུའི་བདེན་གཏམ་རེད། །གླིང་ལྷ་སྡེའི་དོན་ལ་ཕན་ཟེར་ན། །ང་བུ་མོ་དམྱལ་བར་མངགས་ཀྱང་འགྲོ། །ལས་དེ་སྟེ་བྱ་ལན་ཐོན་ལན་འདིས། །ངས་འགྲོ་གོ་ཆོད་བསམ་ཡིད་ལ་མེད། །ཟེར་ནས་གླུ་འདི་ལྟར་བླངས་པར་གདའ་འོ། །
གླུ་ཐ་ལ་ལ་མོ་ཐ་ལ་ལེན། །
གླུ་ཨ་ལ་ལ་མོ་ཨ་ལ་ལེན། །
མ་རིགས་བཞིའི་མཁའ་འགྲོ་སྙིང་ཐག་ཉེ། །
རིགས་ལྔ་དཔའ་བོ་སྒྲུབ་ཐུག་ཉེ། །
བདེ་ཆེན་ཡུལ་ནས་བྱིན་གྱིས་རློབས། །
ཟག་མེད་བདུད་རྩིའི་དངོས་གྲུབ་སྩོལ། །
ས་འདིའི་ས་ངོ་མ་ཤེས་ན། །
ཤར་རྫོང་ཇ་མཁར་རིང་མོ་རེད། །
སེར་མོ་ང་ངོ་མ་ཤེས་ན། །
སྔོ་ལོ་སྟོན་པའི་ནེའུ་ཆུང་ཡིན། །
ཡང་ཆུང་ལུ་གུའི་ཚར་ཡག་མ། །
ཞེ་ཆུང་མེ་ཏོག་འཁྲུངས་ཡག་མ། །
སྒྲོལ་མ་ལྗང་གུའི་སྐྱེ་བ་ཡིན། །
ཟག་བཅས་མངོན་ཤེས་ཡོད་མི་ཡིན། །
རང་བསྟོད་མིན་ཏེ་ཡིན་ལུགས་གཏམ། །
ལྡོང་སྤྱི་དཔོན་རོང་ཚ་ཁྲ་རྒན་ལགས། །
གསོན་དང་ཞུ་རྒྱུ་འདི་འདྲ་ཡོད། །
ཞིང་གྲུ་བཞི་ལྗང་ལ་ཕན་སྲིད་ན། །
ནམ་མཁའི་སྤྲིན་པས་ཁེབས་ཀྱང་བཟོད། །
ལས་དེ་སྟེ་རླུང་དམར་སྐོར་ཚུབ་འདིས། །
ཆར་འབེབས་གོ་ཆོད་བསམ་ཡིད་ལ་མེད། །
ཇུས་ཁྲ་མོའི་དོན་ལ་ཕན་སྲིད་ན། །
མི་ཕོ་དམའ་འབེབས་སོང་ཡང་བཟོད། །
ལས་དེ་སྟེ་ཧོར་སེར་དཔུང་པ་འདིས། །
ལས་བྱས་གོ་ཆོད་བས་མ་ཡིད་ལ་མེད།།
གླིང་ལྷ་སྡེའི་དོན་ལ་ཕན་སྲིད་ན། །
ང་བུ་མོ་དམྱལ་ཟངས་འགྲིམས་ཀྱང་བཟོད། །
ལས་དེ་སྟེ་ཕྱི་ལག་ནང་རུལ་འདིས། །
འགྲོ་གོ་ཆོད་བསམ་པ་ཡིད་ལ་མེད། །
མེད་དོན་རྩ་བ་བཤད་པ་ན། །
མ་མདང་གསུམ་མར་གཉིས་དུས་ཚོད་ལ། །
སྔ་ཐུན་ཚོགས་དྲུག་སེམས་མ་བདེ། །
ཕྱི་ཐུན་རྒྱུ་དྲུག་གཉིད་མ་ཁུག །
ཐོ་རངས་སྡུར་བའི་འགྲིམས་ལམ་ལ། །
ལྷ་ཆབ་དཀར་པོའི་གཡས་གཡོན་ན། །
མེ་ཏོག་འདབ་དྲུག་དཀར་སྔོན་གཉིས། །
དོག་མོ་ས་ལ་འཁྲུངས་ནས་གདའ། །
སྔོན་མོ་ཧོར་ལ་ཕྱིན་པ་རྨིས། །
མ་ཁྱེར་ཚུར་ལ་བཙུགས་པ་རྨིས། །
དཀར་པོ་མ་ཕྱིན་འཕྲོག་པ་རྨིས། །
ལྕང་དཀར་ཕྱུག་མོའི་རྩེ་མོ་ནས། །
བྱ་ཁུ་བྱུག་གསུང་སྙན་གྲགས་པ་རྨིས། །
ནེ་ཙོས་མི་སྐད་གླེང་བ་རྨིས། །
ནེ་ཙོ་ཧོར་ལ་ཕྱིན་པ་རྨིས། །
མ་དགོས་ལྕང་དཀར་ནང་ལ་བཏང་། །
ཁུ་བྱུག་མ་ཕྱིན་འཕྲོག་པ་རྨིས། །
དེ་བཟང་རྨིས་རེད་དམ་ངན་རྨིས་རེད། །
མགོ་རིན་ཆེན་གཡུ་ཆུང་རྒྱན་ཆ་འདི། །
བཏགས་པ་མི་འདྲ་ཤོར་བ་འདྲ། །
ལུས་སྲབ་འཇམ་དམར་སྨུག་དར་གོས་འདི། །
གྱོན་པ་མི་འདྲ་འཕྲོག་པ་འདྲ། །
ཨ་འབྲུག་ལྷ་མོའི་ཚབ་འགྲོ་འདི། །
ཁྲིད་པ་མི་འདྲ་ཕྱིར་མངགས་འདྲ། །
ལ་ཆེན་ཡིན་ལུགས་བཤད་པ་ན། །
གུར་དཀར་སྟག་ཞུ་རྒྱལ་པོ་འདིས། །
གླིང་མཐོང་སྨོན་ཡེ་མེད་མ་ཐོན་བར། །
ཅི་མ་ཡིན་ལ་སྡོད་ལེ་མེད། །
དེ་བྱས་མ་རེད་དེ་བཀོད་གདའ། །
ཉི་མ་དམར་ཐག་ཆོད་འགྲོས་ལ། །
དཔུང་ཟིན་ཐུབ་པ་ལར་ནས་མེད། །
སྐྱ་རེངས་ནམ་མཁའི་སྒོ་འབྱེད་ལ། །
སྤར་མོས་ཁེབས་པ་ལར་ནས་མེད། །
ཚེ་སྔོན་ཐོད་པའི་རི་མོ་ལ། །
ཅི་ཡོད་བསུབ་རྒྱུ་ལར་ནས་མེད། །
གུར་དཀར་ཅི་བསམ་མ་གྲུབ་ན། །
གླིང་རུའི་བྱེད་རྒྱུ་ལར་ནས་མེད། །
འདྲ་ཨེ་བསམ་ཨ་ཁུ་སྤྱིན་དཔོན་ལགས། །
རེད་ཨེ་དགོངས་ཨ་ལྕེ་འབྲུག་མོ་ལགས། །
གོ་ན་རྣ་བའི་བདུད་རྩི་ལ། །
མ་གོ་གླུ་ཡི་འགྲེལ་བ་ཞུ། །
འདིར་བཞུགས་ཐུགས་ལ་དེ་ལྟར་ཞོག །
ཅེས་ཟེར། །
