གླུ་ཐ་ལ་ལ་མོ་ཐ་ལ་རེད། །
གླུ་ཨ་ལ་ལ་མོ་ཨ་ལ་རེད། །
གླུ་རེ་རེ་མི་ལེན་ཀ་མེད་རེད། །
རེ་རེ་མ་བླངས་ཚོད་ཡོད་རེད། །
སྐྱིད་ན་ཇ་ཆང་མཚར་གླུ་ཡིན། །
སྡུག་ན་རང་སེམས་སྐྱོ་གླུ་རེད། །
ས་འདིའི་ས་ངོ་མ་ཤེས་ན། །
ཧོར་གཡག་ལ་སེར་པོའི་གཡས་ཟུར་རེད། །
ང་དང་ང་ངོ་མ་ཤེས་ན། །
རྟ་འདོ་བ་དངོས་གྲུབ་ལྡེམ་པ་ཡིན། །
ཚ་ཞང་འདན་མ་བྱང་ཁྲ་ལགས། །
ཁྱོད་དང་འུ་གུ་མི་རྟ་གཉིས། །
རྒྱ་གར་ཡུལ་ནས་མཉམ་ཆས་ཡིན། །
རྒོད་ཞན་ཡོད་དོན་ཅི་ལ་ཡོད། །
སྐྱེས་མཆོག་ནོར་བུ་དགྲ་འདུལ་ཁོང་། །
དངོས་ཡོད་འཛམ་གླིང་རྒྱལ་པོ་རེད། །
དངོས་མེད་ཐུགས་རྗེ་ཆེན་པོ་རེད། །
དཔའ་དགྲ་ལྷ་ཝེར་མ་རང་ཆས་རེད། །
ཆོས་སྐྱོང་སྲུང་མ་རང་འཁོར་རེད། །
ཁྱོད་སྟེང་གི་མི་ལ་མགོན་སྐྱབས་མཛོད། །
འདོ་རྗེ་རྐྱང་རྒོད་གཡེར་བ་དེ། །
ཕྱི་བལྟས་བྱོལ་སོང་རྟ་ཡི་ཚུལ། །
ནང་ནས་སངས་རྒྱས་དགོངས་པ་ཅན། །
སྣང་བ་མཐའ་ཡས་སྤྲུལ་བ་ཡིན། །
འོད་ཟེར་སྣ་ཚོགས་ལམས་སེ་ལམ། །
མཛེས་པའི་འཇའ་ཚོན་འཁྱིལ་ལི་ལི། །
བསེར་མ་རླུང་གི་བང་ཁ་ཡོད། །
འདམ་ཆགས་བྱ་ཡི་གཤོག་རྩལ་ཡོད། །
སེངྒེ་དཀར་མོའི་རྩལ་ཤུགས་ལྡན། །
འདོ་རྗེའི་ཟེ་སྔོན་གཡས་གཡོན་ན། །
དགྲ་ལྷ་དུང་སྐྱོང་དཀར་པོ་འཁོར། །
རྣ་རྩེ་རྒོད་ཀྱི་ཐིག་ཕྲན་ལ། །
གསལ་བྱེད་སྒྲོན་མའི་སོ་བ་འཁོར། །
དཔུང་བ་རླུང་གི་འཁོར་ལོ་ལ། །
ཚེ་ལྷ་ངར་མའི་དགྲ་ལྷ་འཁོར། །
འདོ་བ་བདེ་བའི་རྨིག་བཞི་ལ། །
མགྱོགས་པ་རླུང་གི་དགྲ་ལྷ་འཁོར། །
སྤུ་རྩེ་རེ་ལ་ལྷ་རེ་འཁོར། །
རྟ་ང་ལ་མི་སྐྱོབ་སུ་ལ་སྐྱོབ། །
རྟ་འདོ་བ་ང་ཡི་མགོན་སྐྱབས་མཛོད། །
ཐུགས་མ་གཡེལ་རྐྱང་རྒོད་གཡེར་བ་མཁྱེན། །
ཚ་ཞང་འདན་མ་བྱང་ཁྲ་ལགས། །
འཛིང་ལུགས་ཅི་དགོས་ཁྱོད་རང་ཤེས། །
རྒྱུག་ལུགས་ཅི་བྱེད་ང་རང་ཤེས། །
ཉིན་རེའི་ཉིན་ལ་རྒྱུག་དུས་སུ། །
ཐང་དཀར་ཉིན་ལམ་གཅོད་འདྲ་བྱེད། །
སྲིབ་རིའི་སྲིབ་ལ་རྒྱུག་དུས་དེར། །
ཐང་སྨུག་སྲིབ་ལམ་གཅོད་འདྲ་རྒྱུག །
ཉིན་སྲིབ་བར་ན་རྒྱུག་དུས་དེར། །
གླག་རོག་ནག་གཟན་ལ་བཅུམས་འདྲ་རྒྱུག །
སེམས་དཀར་པོ་ཆོས་བཞིན་འགྲུབ་པར་ཤོག །
སྟེང་མི་ལ་རྨས་ཕོག་མ་འགྲོ་དགོས། །
འོག་རྟ་ལ་ཆག་གྲུམ་མ་འགྲོ་དགོས། །
སྡང་དགྲ་བོའི་གཡས་རུ་གནོན་པར་ཤོག །
གླིང་དཀར་པོའི་བསྟན་པ་ཚུགས་པར་ཤོག །
གོ་ན་རྣ་བའི་བདུད་རྩི་ལ། །
མ་གོ་གླུ་ཡི་འགྲེལ་བ་ཞུ། །
དཔའ་ཚ་ཞང་ཡིད་ལ་དེ་ལྟར་ཞོག །
