ཟླ་བ11པའི་ཚེས13ཉིན། སི་ཁྲོན་ཞིང་ཆེན་རིག་དངོས་གནའ་རྫས་རྟོག་ཞིབ་ཞིབ་འཇུག་ཁང་ནས། དཀར་མཛེས་བོད་རིགས་རང་སྐྱོང་ཁུལ་འདབ་པ་རྫོང་ཕན་རོགས་གནའ་ཤུལ་གྱི་གནའ་རྫས་རྟོག་ཞིབ་སྔོག་འདོན་གྱི་བྱེས་ལས་ཐེངས་གསུམ་པ་ད་ལྟ་གཞི་རྩའི་ཆ་ནས་མཇུག་འགྲིལ་བ་རེད།

    ད་ཐེངས་ཀྱི་སྔོག་འདོན་བྱེད་རིང་སྟ་རེ་སོགས་ཨང་སྒྲིག་དངོས་དཔེ3000ལྷག་ཙམ་གསར་རྙེད་ཐུབ་པ་མ་ཟད། ད་དུང་ཕན་རོགས་གནའ་ཤུལ་གྱི་མཐའ་འཁོར་དུ་རྡོ་ཆས་རྙིང་པའི་སྐབས་ཀྱི་རྗེས་ཤུལ་མང་པོ་ཞིག་གསར་དུ་རྙེད་པས། གནའ་རྫས་རྟོག་ཞིབ་མི་སྣས་སྔ་དུས་ཀྱི་མིའི་རིགས་ས་བབ་མཐོ་བའི་ཁོར་ཡུག་དང་འཚམ་ཐབས་བྱེད་པའི་ལོ་རྒྱུས་བརྒྱུད་རིམ་ལ་ཞིབ་འཇུག་བྱེད་པར་དངོས་དཔང་གལ་ཆེན་མཁོ་འདོན་བྱས་ཡོད།
  ཕན་རོགས་གནའ་ཤུལ་ནི་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་འདབ་པ་རྫོང་བཅིངས་འགྲོལ་གྲོང་རྡལ་ཕན་རོགས་གྲོང་ཚོར་གནས་པ་དང་། ཤར་ངོས་ནས་འདབ་པ་རྫོང་གྲོང་བར་སྤྱི་ལེ2ཙམ་ཡོད། འདི་མཚོ་བོད་ས་མཐོའི་ཤར་ལྷོའི་སྣེ་རུ་གནས་པ་དང་ཆ་སྙོམས་རྒྱ་མཚོའི་ངོས་ལས་མཐོ་ཚད་སྨི3750ལས་བརྒལ་ཡོད། 2021ལོའི་ཟླ4པར་གནའ་རྫས་རྟོག་ཞིབ་སྔོག་འདོན་ལས་དོན་སྤེལ་འགོ་ཚུགས་པ་ནས་བཟུང་། གནའ་ཤུལ་དེའི་ས་འོག་ནས་སྟ་རེ་དང་གྲི་སྲབ་མོ་སོགས་ཨང་སྒྲིག་དངོས་དཔེ15000ལྷག་ཙམ་ཐོན་ཡོད་པ་དང་། དེ་ནི་གཞི་ཁྱོན་ཆེ་བ་དང་ས་རིམ་ཉར་ཚགས་བཟང་བ། རིག་གནས་ཀྱི་གོ་རིམ་གསལ་བ། ཤུལ་བཞག་དངོས་རྫས་སྣ་ཁ་ཕུན་སུམ་ཚོགས་པ། ལག་རྩལ་གྱི་ཁྱད་ཆོས་མངོན་གསལ་དོད་པ། རིག་གནས་ཀྱི་རྒྱུ་རྐྱེན་སྣ་མང་འཛོམས་པའི་རྡོ་ཆས་རྙིང་པའི་དུས་རབས་ཀྱི་ཐང་སྟོང་གནའ་ཤུལ་ཆེ་གྲས་ཤིག་ཡིན་པ་དང་། 2021ལོའི་ལོ་འཁོར་གྱི་རྒྱལ་ཡོངས་ཀྱི་གནའ་རྫས་རྟོག་ཞིབ་གསར་རྙེད་ཆེན་པོ་བཅུའི་ནང་བདེ་བླག་ངང་བདམས་ཐོན་བྱུང་བ་རེད།

      རྒྱལ་ཁབ་རིག་དངོས་ཅུས་ཀྱི་ཆོག་མཆན་ཐོབ་པ་བརྒྱུད། ད་ཐེངས་ཀྱི་སྔོག་འདོན་དེ2023ལོའི་ཟླ7པ་ནས་འགོ་བཙུགས་པ་དང་དུས་ཡུན་ཟླ4ལྷག་ཙམ་རིང་རྒྱ་ཁྱོན་སྨི་ངོས་གྲུ150ཙམ་སྔོག་འདོན་ཟིན་པ་དང་། ས་འོག་ནས་ཐོན་པའི་སྟ་རེ་སོགས་ཨང་སྒྲིག་དངོས་དཔེ་ཁྱོན3000ལྷག་ཙམ་རྙེད་ཡོད། དེས་གནའ་རྫས་རྟོག་ཞིབ་མི་སྣས་གནའ་ཤུལ་འདིའི་ས་ཁོངས་མི་འདྲ་བའི་ས་ཕུང་རིམ་གསོག་དང་ཤུལ་བཞག་དངོས་རྫས་ཀྱི་ཁྱབ་ཚུལ། རྡོ་ཆས་ལག་རྩལ་སོགས་ཤེས་རྟོགས་བྱེད་པར་རྒྱུ་ཆ་གསར་པ་མཁོ་འདོན་བྱས་ཡོད། འོད་འགྲེལ་འོད་འཇལ་གྱི་ལོ་རབས་རྩིས་པའི་མཇུག་འབྲས་གསར་ཤོས་ལ་གཞིགས་ན། མིག་སྔར་ཕན་རོགས་གནའ་ཤུལ་གྱི་རིག་གནས་བང་རིམ་གྱི་ལོ་རབས་དེ་དེའི་གོང་ཐོག་མ་ཚད་འཇལ་བྱེད་པའི་ལོ130000ལས་བརྒལ་ཟིན་པ་དང་། ལོ་རབས་རྩིས་པའི་མཇུག་འབྲས་གསར་ཤོས་དེ་སླད་ཕྱིན་ཁྱབ་བསྒྲགས་བྱ་རྒྱུ་རེད།
སི་ཁྲོན་ཞིང་ཆེན་རིག་དངོས་གནའ་རྫས་རྟོག་ཞིབ་ཞིབ་འཇུག་ཁང་རྡོ་ཆས་རྙིང་པའི་གནའ་རྫས་རྟོག་ཞིབ་ཞིབ་འཇུག་ཁང་གི་འགོ་འཛིན་གཞོན་པ་ཐན་ཕེ་དབྱང་གིས་ངོ་སྤྲོད་བྱས་པར་གཞིགས་ན། ལོ་གསུམ་བསྟུད་མར་ཚན་རིག་དང་མཐུན་པའི་འཚོལ་ཞིབ་བྱས་པ་བརྒྱུད། མིག་སྔར་གནའ་རྫས་རྟོག་ཞིབ་མི་སྣས་ཕན་རོགས་གནའ་ཤུལ་གྱི་ས་ཁོངས་མང་ཆེ་བ་དང་ས་བབ་ཆགས་ཚུལ་ཁག་གི་ས་རིམ་ཕུང་གསོག་ཐེབས་ཚུལ། དེ་བཞིན་ཤུལ་བཞག་དངོས་རྫས་ཁྱབ་ཚུལ་སོགས་རགས་ཙམ་ཁོང་དུ་ཆུད་ཡོད་། དཔེར་ན་ད་ལོར་ང་ཚོས་ས་ཁོངས་མི་འདྲ་བ་མང་པོ་སྔོག་འདོན་བྱས་ཡོད་ཅིང་། ས་ཁོངས་ཁ་ཤས་ཀྱི་ས་རིམ་ཕལ་ཆེར་སྨི་གཅིག་ལས་མེད་པ་དང་། ས་ཁོངས་ཁ་ཤས་ཀྱི་ས་རིམ་མཐུག་ཚད་ལ་སྨི་བདུན་བརྒྱད་ཙམ་ཡོད་པས། ཕན་རོགས་གནའ་ཤུལ་གྱི་ས་རིམ་ཁྱབ་ཚུལ་ལ་དུས་མཚུངས་ཡང་རྣམ་པ་མི་མཚུངས་པའི་གནས་ཚུལ་ཡོད་པར་གསལ་བཤད་བྱས་ཡོད། ང་ཚོས་ས་རིམ་འདི་ལྟ་བུར་འཚོལ་ཞིབ་བྱས་ནས་གནའ་ཤུལ་ཧྲིལ་པོའི་ནུས་པ་དབྱེ་ཁུལ་དང་གནའ་མིས་བྱེད་སྒོ་སྤེལ་བའི་ལོ་རབས་ཀྱི་སྒྲོམ་གཞི། གནའ་བོའི་ཁོར་ཡུག་གི་རྒྱབ་ལྗོངས་སོགས་འཛུགས་སྐྲུན་ཡག་པོ་བྱས་ཏེ། ས་རིམ་གྱི་གོ་རིམ་ཆ་ཚང་ཞིག་བཟོས་ནས་གནའ་ཤུལ་དེའི་དུས་རིམ་ཚང་མ་སྦྲེལ་ཐུབ་རྒྱུའི་བརྩོན་ལེན་བྱེད་ཀྱི་ཡོད། དེས་ང་ཚོས་མཚོ་བོད་ས་མཐོའི་གནའ་བོའི་ས་ཁམས་ཁོར་ཡུག་རིམ་འགྱུར་དང་གནའ་བོའི་གནམ་གཤིས་དྲོད་གྲང་གི་འཕར་ཆག དེ་བཞིན་གནའ་བོའི་མིའི་རིགས་ཀྱི་བྱེད་སྒོ་སྤེལ་ཡུལ་བཅས་ཤེས་རྟོགས་བྱེད་པར་ཕན་ཐོགས་ཆེན་པོ་ཡོད་ཅེས་བསྟན་ཡོད།

  དེའི་འཕྲོར་གནའ་རྫས་རྟོག་ཞིབ་མི་སྣས་མ་ལག་ལྡན་པའི་སྒོ་ནས་འདབ་པ་ཕན་རོགས་གནའ་ཤུལ་གྱི་གནའ་རྫས་རྟོག་ཞིབ་དཔྱད་ཡིག་ལེགས་སྒྲིག་ལས་དོན་སྤེལ་རྒྱུ་རེད། གཅིག་ནི་ས་འོག་ནས་ཐོན་པའི་རྡོ་ཆས་ལ་ལེགས་སྒྲིག་དང་ཞིབ་འཇུག་བྱ་རྒྱུ་སྟེ། རྡོ་ཆས་ཀྱི་དམར་དཔེ་ལ་ལྟ་ཞིབ་དང་རིགས་དབྱེ། ཚད་འཇལ་བཅས་བྱས་པ་བརྒྱུད་རྡོ་ཆས་ཀྱི་རིང་ཐུང་དང་རིགས་དབྱེ། ལག་རྩལ། ནུས་པ་སོགས་ཀྱི་ཆ་འཕྲིན་ལ་ཤེས་རྟོགས་བྱ་རྒྱུ་དང་། གཉིས་ནི་རིག་གཞུང་ཚན་ཁག་མང་པོས་ཞིབ་འཇུག་དངོས་དཔེར་ཚོད་ལྟ་ཁང་ནས་དབྱེ་ཞིབ་དང་ཞིབ་འཇུག་བྱ་རྒྱུ་སྟེ། གནའ་རྫས་རྟོག་ཞིབ་རིག་པ་དང་ལོ་རབས་རིག་པ། གནའ་བོའི་ཁོར་ཡུག་རིག་པ། འཁྱགས་རོམ་རིག་པ། གཏེར་སྦས་རིག་པ་སོགས་རིག་གཞུང་ཚན་ཁག་མི་འདྲ་བ་མཉམ་ཞུགས་བྱས་ནས། རྡོ་ཆས་དེ་ཚོའི་རྒྱབ་ན་ལུས་པའི་སྔ་དུས་མིའི་རིགས་ཀྱིས་ས་མཐོ་ས་ཁུལ་དུ་བྱེད་སྒོ་སྤེལ་བའི་བར་སྟོང་གི་རྣམ་པ་དང་། ཨེ་ཤ་ཡ་ཤར་མའི་ཨེ་ཤ་ལི་རིག་གནས་ཀྱི་ཁྱབ་སྤེལ། གནའ་བོའི་ཁོར་ཡུག་འགྱུར་ལྡོག་དང་མིའི་རིགས་འོས་འཚམ་ངང་འཚོ་གནས་བྱེད་པའི་སྐྱེ་ཁམས་ཀྱི་རྒྱབ་ལྗོངས། དེ་བཞིན་ལོ་རབས་རིག་པའི་འཇལ་ཚད་སོགས་ལ་སྔར་བས་ཤེས་རྟོགས་བྱ་རྒྱུ་རེད།  ཕན་རོགས་གནའ་ཤུལ་དང་འབྲེལ་བ་ཡོད་པའི་དུས་མཚམས་རང་བཞིན་གྱི་རིག་གཞུང་ཞིབ་འཇུག་གྲུབ་འབྲས་སྔོན་དཔག་བྱས་ན་སང་ལོར་སྤྱི་བསྒྲགས་བྱ་རྒྱུ་རེད་འདུག