གླུ་ཐ་ལ་ལ་མོ་ཐ་ལ་ལེན། །
གླུ་ཨ་ལ་ལ་མོ་ཨ་ལ་ལེན། །
མ་རིགས་ལྔའི་མཁའ་འགྲོ་སྙིང་ཐག་ཉེ། །
སྡེ་ལྔ་དཔའ་བོ་མཐུ་སྟོབས་ཅན། །
ཚོགས་ཟག་མེད་དགའ་སྟོན་འགྱེད་དུ་གསོལ། །
ས་འདིའི་ས་ངོ་མ་ཤེ་ན། །
ཡར་ཁམས་བྱང་མའི་རི་བརྒྱད་ན། །
བདུད་གླིང་མུན་པའི་དཀྱིལ་འཁོར་རེད། །
ཕྱོགས་བཞི་མཁར་བཞི་བརྡུངས་པ་འདི། །
ཤར་ན་ཤ་རིའི་གནམ་རྫོང་ཆགས། །
ཨ་ཁྱུང་ཀེ་རིའི་ཕ་མཁར་རེད། །
ལྷོ་ན་དགོ་རྭའི་སྨུག་དཀྲིས་བརྡུངས། །
མི་ཁྱུང་སྒུ་རུའི་ཕོ་བྲང་རེད། །
ནུབ་ན་ཟངས་མཁར་ཟུར་དགུ་བརྡུངས། །
ཀླུ་བཙན་རྒྱལ་པོའི་སྐུ་མཁར་རེད། །
བྱང་ན་ལྕགས་ར་རྩེ་དགུ་ཆགས། །
ཁྲོམ་ཤོག་མེ་བཟའི་བཞུགས་གནས་རེད། །
ཡང་ཐོག་ཉི་མའི་འཁོར་འདབ་རེད། །
ང་དང་ངོ་མ་ཤེས་ན། །
ལྷོ་རྒྱལ་འཛམ་གླིང་ས་ཆ་ན། །
གྲགས་པ་ཅན་ལ་སྤུན་བདུན་ཡོད། །
ཨ་སྔོན་དགུང་ལ་གྲགས་ཆེ་བ་། །
ཁྲི་གདུགས་ཉི་མ་མིན་པ་མེད། །
བར་སྣང་ཁམས་ལ་གྲགས་ཆེ་བ། །
གཡུ་འབྲུག་སྔོན་མོ་མིན་པ་མེད། །
དོག་མོ་ས་ལ་གྲགས་ཆེ་བ། །
ཇོ་བོ་ཤཱཀྱ་མིན་པ་མེད། །
ཁྲ་མོ་གླིང་ལ་གྲགས་ཆེ་བ། །
སེང་ལྕམ་འབྲུག་མོ་མིན་པ་མེད། །
ནག་པོ་རྒྱ་ལ་གྲགས་ཆེ་བ། །
ཀོང་ཇོ་ཨ་ཀོན་མིན་པ་མེད། །
སེར་པོ་ཧོར་ལ་གྲགས་ཆེ་བ། །
མགར་བཟའ་ཆོས་སྒྲོན་མིན་པ་མེད། །
ཡར་ཁམས་བྱང་ལ་གྲགས་ཆེ་བ། །
ང་ཁྲོམ་ཤོག་མེ་བཟའ་མིན་པ་མེད། །
ངོ་ཤེས་ན་སེར་མོ་འབུམ་སྐྱིད་ཡིན། །
སེང་ཁྲི་པདྨའི་གདན་སྟེང་ན། །
འཇའ་ཚོན་སྣ་ལྔའི་གུར་ཁྱིམ་ན། །
སྐུ་མི་འགྱུར་སེང་ཆེན་རྒྱལ་པོ་ལགས། །
བློན་ཁ་ཆག་གླུ་ཞུས་ཅི་འདྲ་རེད། །
གཏམ་སྐད་ཆ་གསར་བཤད་ག་འདྲ་གདའ། །
ཡོང་མ་མྱོང་བྱ་དཀར་སྤུན་གསུམ་འདི། །
ལྷ་བྱ་རེད་དམ་འདྲེ་བྱ་རེད། །
ཐན་ལྟས་རེད་དམ་དངོས་གྲུབ་རེད། །
ས་གང་གི་ཕྱོགས་ནས་བྱུང་ལེ་རེད། །
ཡང་མིན་ན་རྒྱལ་མཆོག་གེ་སར་དཔོན། །
སྐུ་རི་རྒྱལ་སྙུང་ལེ་མ་རེད་དམ། །
ཐུགས་མཉམ་པར་ཞོག་ལ་ཁ་རོག་བཞུགས། །
གཏམ་མང་པོ་དྲི་བཤད་བྱེད་མི་འདོད། །
ཞུ་ག་དར་བློན་པོ་ཕྱིང་སྔོན་ཅན། །
ཁྱོད་གླུ་ཆུང་ལེན་དོན་ཅི་ལ་ཡིན། །
ཕ་ཤི་ར་མདའ་སུ་འདྲ་གདའ།།
མ་བསད་སྟོང་ལེན་སུ་ལ་བབས། །
རོང་ཡུལ་མཐིང་ཐང་ས་ཆ་ན། །
དམག་མུ་གེ་ཅི་ཚུགས་བྱུང་ལེ་རེད། །
ནམ་མཁའི་བྱ་དཀར་སྤུན་གསུམ་པོ། །
བདུད་ལུང་མུན་པའི་ས་ཆ་ན། །
གནམ་ལ་ཉི་ཟླ་ཤར་དབང་མེད། །
སྐར་ཕྲན་འགྲོ་ས་ག་ན་ཡོད། །
བར་ན་བྱ་ཆེན་ལྡིང་ས་མེད། །
ཁྱོད་བྱ་ཆུང་འཕུར་ས་ག་ན་ཡོད། །
ཤ་ཡོད་ཤ་ཁྲལ་ང་ལ་དགོས། །
སྒྲོ་ཡོད་སྒྲོ་ཁྲལ་ང་ལ་དགོས། །
བྱ་འཕུར་གནམ་ལ་འཕུར་ཞན་འདྲ། །
བྱ་བླ་ས་ལ་མི་རྡེབ་རི། །
དེ་ན་རྒྱལ་པོ་སྐུ་ཚེ་ལགས། །
གསེར་མདོང་གཡུ་ཡི་མགུལ་དཀྲིས་ཅན། །
རོང་ཡུལ་སྟོད་ཀྱི་ས་ཆ་ན། །
ཁོ་བློན་པོའི་ཕ་མ་གཉིས་པོ་དེས། །
དཔོན་ཀླུ་བཙན་འཚམ་ཞུས་ཕུལ་ལེ་ཡིན། །
ད་རིང་མིན་པ་ངོམ་མ་མྱོང་། །
ནང་བཅུད་སྐྱེམས་འབར་རྩེ་དྭངས་འདི། །
ལོ་ཆང་སྟེང་ལ་ཟླ་ཆང་བསྣན། །
རྒུན་ཆང་ཟུར་ལ་འབྲས་ཆང་བསྲེས། །
བུར་སྨུག་སྦྲང་གིས་དྲོ་བ་བསྒྱུར། །
ཡ་མཚན་འཕྲུལ་གྱི་ཆང་ཞུས་འདིས། །
སྐྱེམས་འབར་དབུ་འཕང་གཞན་ལས་མཐོ། །
ཡང་མིན་ན་མར་གསར་ཇ་ཞུས་བྱེད། །
ཤང་དཀར་བཅུད་ཀྱིས་རིག་པ་དྭངས། །
སྐུ་རྗེ་ནོར་བུ་དགྲ་འདུལ་དཔོན། །
མ་མཁའ་འགྲོའི་ཐུགས་སྲས་རིན་པོ་ཆེ། །
ཞལ་ངོ་བཅོ་ལྔའི་ཟླ་བ་ལ། །
གནམ་ནག་ལང་དོན་ཅི་ལ་ཡོད། །
སྤྱན་མིག་ཐོ་རངས་སྐར་ཆེན་ལ། །
གློག་དམར་འཚུབ་དོན་ཅི་ལ་ཡོད། །
དགོངས་པ་བྱང་ཆུབ་སེམས་དཔའ་ལ། །
ཁྲོ་བ་བཞེངས་དོན་ཅི་ལ་ཡོད། །
ཐུགས་ཕོག་སྤྱན་ཟུར་འགྲོ་དོན་མེད། །
ག་དར་བློན་པོ་ཕྱིང་སྔོན་ཅན། །
ཁྲ་གྲུ་བཞི་གྱོད་ཀྱི་སྒོ་མོ་ནས། །
འཕུང་དཀྲུག་གླུ་ལེན་ཅི་ལ་བྱེད། །
བཟའ་ཁ་གཏོར་བཤིབ་ཅི་ལ་བྱེད། །
ཁ་རོག་སྡོད་དང་འཕྲལ་ཕུགས་བདེ། །
ཁྱེད་རིགས་རྒྱལ་བློན་གཉིས་པོ་དེ། །
མི་བཞུགས་འབྱོན་བསམ་ཡོད་པ་ན། །
དམུ་རྗེ་ཀླུ་བཙན་རྒྱལ་པོ་དེ། །
རང་མལ་རང་ཚུགས་ཁྲིད་ནས་ཤོག །
དེ་མིན་གླེང་རྒྱུ་ཅི་ཡང་མེད། །
གོ་ན་རྣ་བའི་བདུད་རྩི་ལ། །
མ་གོ་གླུ་ཡི་འགྲེལ་བ་ཞུ། །
རྒྱལ་བློན་ཐུགས་དེ་འདྲ་ཞོག །
