འདིར་སྔོན་གྱི་མཁས་པ་རྣམས་གྱི་ལོ་རྒྱུས་ཚད་ལྡན་རྣམས་ལས་ཇི་ལྟར་གསུངས་པ་དག་དཔྱད་གཞིའི་ཚུལ་དུ་བྱས་ནས། ས་གནས་ཀྱི་རྒན་རབས་པ་རྣམས་ལ་རང་སའི་ལོ་རྒྱུས་ངག་ཐོག་ནས་བཅར་འདྲི་བྱས་པར་རྒྱུད་གཟོད་རང་ཉིད་ཀྱི་དཔྱད་བསྡུར་བྱས་ཏེ། ས་གནས་འདིའི་ལོ་རྒྱུས་རགས་རིམ་ཙམ་ཞིག་འབྲི་རྒྱུའི་གོ་སྐབས་རྙེད་སོན་བྱུང་བ་ཡིན་ལ། དེའང་ལོ་རྒྱུས་ཀྱི་ཡིག་ཆ་མང་པོ་ཞིག་བསགས་ནས་དཔེ་བལྟས་ཡུན་རིང་བྱས་ཏེ་ནང་དོན་ཞིབ་ཕྲ་རྣམས་སེམས་སུ་འཆར་ཐུབ་པའི་ངེས་ཤེས་མ་སྐྱེ་བར་དུ་བརྩོན་འགྲུས་དང་ལྷག་བསམ་ཟོལ་མེད་ཀྱི་ས་གནས་འདིའི་ལོ་རྒྱུས་དགའ་བའི་གྲོགས་པོ་ཡོངས་ལ་ལེགས་སྐྱེས་འབུལ་རྒྱུའི་དམིགས་ཡུལ་ལ་བརྟེན་ནས་ལོ་ངོ་སྟོང་ཕྲག་ལྷག་གི་ལོ་རྒྱུས་ལ་ཞིབ་འཇུག་གི་ཐབས་སྣ་ཚོགས་ཀྱི་ལམ་དུ་ཞུགས་ནས། ཕ་མེས་ཀྱི་མཛད་རྗེས་རྣམས་ས་འོག་གི་གཏེར་བཞིན་བག་ཉལ་དུ་མ་འཇོག་པར་རིག་པའི་བཅར་ཕོག་ཏུ་མངོན་སུམ་མིག་གི་དགའ་སྟོན་དུ་སྤེལ་བ་ནི་མི་ཚེའི་ཕྱེད་ཀ་སློབ་སྦྱོང་ལ་ཕུལ་བའི་གྲུབ་འབྲས་ལགས་པས། ལས་ཀྱི་ལྟེ་ཁྲག་གང་དུ་འཕོས་པའི་གནས་དེར་སྐྱེད་སྲིང་བྱས་པའི་ཟས་ཀྱི་འཕྲོད་བསྟེན་རྩམ་ཟན་གྱིས་གསོས་པའི་རིན་སྟོང་འཇལ་མ་སོང་བར་ཙམ་དུ་ད་ལན་དཔྱད་རྩོམ་འདིའི་ཞིབ་འཇུག་གི་གནས་བབས་དང་བསྟུན་ནས་རང་ཡུལ་གྱི་ལོ་རྒྱུས་ལ་གདེངས་འཇོག་བྱས་ཏེ་ཕུལ་བ་ཡིན་ལ། དེ་ཡང་ལོ་རྒྱུས་འདི་འབྲི་བ་ལ་དཔྱད་གཞིའི་ཡིག་ཆ་རྙེད་སོན་མ་བྱུང་བས་དཀའ་ཚེགས་ཆེན་པོ་འཕྲད་པ་ནི་སྔོན་གྱི་ཏྲེ་རབས་ཧོར་གྱིས་དབང་བསྒྱུར་བྱེད་ཕན་ཆོད་ཀྱི་ལོ་རྒྱུས་དུས་འགྱུར་གྱི་དབང་གིས་མིང་གི་ལྷག་མར་ཙམ་དུ་སོང་བས། ཁུངས་ཐུབ་ཀྱི་ཡིག་ཚང་ཤོག་ལྷེབ་ཙམ་ཡང་ལག་སོན་མ་བྱུང་བ་དང་། དེ་ཚུན་ཆད་ཀྱི་ལོ་རྒྱུས་ད་དུང་ཁ་ཚང་ཞིག་མི་འདུག་པས་དཔྱད་གཞིའི་ཡིག་ཆ་རྙེད་སོན་མ་བྱུང་བར་ཕྱེད་ཙམ་ཕྱིར་འགྱངས་བྱེད་དགོས་བྱུང་བ་ཡིན་ལ། ད་ལན་འདིར་སྔོན་ཏྲེ་ཡི་མི་རྒྱུད་གང་ནས་ཆད་པའི་ལོ་རྒྱུས་ལ་ཐོག་མར་ཞིབ་འཇུག་བྱས་ཏེ་ཏྲེ་རབས་རིམ་བྱུང་གི་མི་སྣའི་མཛད་རྗེས་དང་ས་གནས་སྲིད་སྐྱོང་སོགས་རིམ་པར་རྒྱུད་ནས་ཞིབ་འཇུག་གི་ཐབས་ལམ་བཙལ་ཡོད་ལ། དེ་ནས་ཏྲེ་རབས་སུམ་པ་རྒྱལ་པོའི་མངའ་འོག་ཏུ་ཡུན་རིང་ཚུད་པ་ནི་ལྷོ་ན་རྒྱལ་མོ་ཁྱི་ཁྱོ་ཅན་ཞེས་སྐབས་དེར་སུམ་པའི་སྲིད་འཛིན་གྱི་མིང་རྒྱལ་མོ་ཁྱི་ཁྱོ་ཅན་གྱིས་སྲིད་དབང་གིས་གང་དུ་ཁ་ལོ་བསྒྱུར་བར་བྱས་པའི་སའི་ཁྱོན་དང་། གང་ལ་དབང་བསྒྱུར་བྱས་པའི་སྟོབས་དང་གཟི་བརྗིད་མངའ་ཐང་སོགས་ཇི་ལྟར་རྒྱས་པའི་ཚུལ་སོགས་ལ་གཞིབས་ནས་ཞིབ་འཇུག་གི་ཁ་ཕྱོགས་གསལ་པོར་འདོན་པ་དང་། ཏྲེ་རབས་དེ་དག་ལ་སུམ་པ་རྒྱལ་པོའི་ལོ་རྒྱུས་ཐོག་སྲིད་དབང་གི་གོ་གནས་དང་ཐོབ་ཐང་ཇི་ལྟར་སྤྲོད་པའི་ཚུལ། སུམ་པའི་དམག་གི་རུ་དཔོན་བྱས་པའི་དཔའ་བོའི་མཚན་སྙན་ཇི་ལྟར་བླང་བའི་ཚུལ་སོགས་ལ་ཞིབ་འཇུག་གི་ཐབས་ལམ་འཚོལ་ནས་ལོ་རྒྱུས་ཀྱི་འཕྲང་ལམ་རེ་རེ་ལ་མཐའ་དཔྱད་ཀྱི་གོམ་པ་རེས་རྒལ་ནས། མི་རབས་ནས་མི་རབས་བར་རྒྱུད་པའི་མི་ལོ་སྟོང་ཕྲག་ལྷག་གི་ལོ་རྒྱུས་ཀྱི་རྒྱབ་ལྗོངས་ལ་ཕྱིར་མིག་ཏུ་བལྟས་པའི་ངོ་མཚར་གྱི་ལྟད་མོ་འདི་ཡལ་བར་དོགས་ནས། སྔོན་གྱི་མཁས་པ་མང་པོའི་ལོ་རྒྱུས་རྣམས་མགོ་མཇུག་སྦྲེལ་ཏེ་དཔྱད་ཞིབ་ཀྱི་ཐབས་ལམ་རྒྱུད་ནས་ནང་དོན་གཏན་འབེབས་བྱས་པ་ཞིག་ཡིན་ལ། དེ་ནས་རིམ་བཞིན་སུམ་པ་དང་བོད་བཙན་པོའི་བར་ཤ་ཡི་རི་བོ་དང་ཁྲག་གི་རྒྱ་མཚོ་བསྒྱུར་བའི་འཐབ་འཁྲུགས་ཀྱི་དུས་རིང་ནང་། དཔའ་བོའི་གཟུགས་བརྙན་བསྐྲུན་པའི་ཏྲེ་རབས་ཀྱི་དཔོན་རྒྱུད་ཉི་མ་དཀར་ལེབ་སུམ་པ་རྒྱལ་པོའི་རུ་བཞིའི་དམག་གི་ཁྲི་དཔོན་བསྐོ་བཞག་གནང་བ་དེར་ཤེས་རབ་དང་འཇོན་ཐང་གཉིས་ཀྱི་སྒོ་ནས་དཔའ་བོའི་དཔོན་ས་འཛིན་པའི་ལོ་རྒྱུས་ར་སྤྲོད་བྱེད་ཐུབ་ལ། དེར་བརྟེན་ཉི་མ་དཀར་ལེབ་ཁྲི་དཔོན་གྱི་མིང་དོན་མཚུངས་པའི་དཔའ་ངར་ལྡན་པ་ནི་བོད་བཙན་པོའི་མངའ་འོག་དབུས་གཙང་གི་དམག་ལ་རྒོལ་བརྡུང་ནན་མོར་བཏང་ཡོད་པའི་ལོ་རྒྱུས་དེ་ཉིད་ཀྱིས་གསལ་བཤད་བྱེད་ཐུབ། འོན་ཀྱང་སྐབས་དེར་སུམ་པའི་དམག་གི་སྟོབས་ཤུགས་ལ་བརྟེན་ནས་བོད་བཙན་པོའི་དཔུང་དམག་ཕྱིར་འཐེན་བྱེད་དགོས་པར་བྱུང་ནའང་། བཙན་པོའི་མངའ་འོག་གི་ཐབས་འཕྲུལ་སྣ་ཚོགས་ཀྱི་སྒོ་ནས་མཐར་སུམ་པའི་སྲིད་དབང་ཡོངས་རྫོགས་བཙན་པོའི་མངའ་འོག་ཏུ་ཚུད་པ་མ་ཟད་དེ་དང་དུས་མཚུངས་སུ་ཏྲེ་རབས་ཀྱང་བཙན་པོའི་འོག་ཏུ་སོང་བའི་ལོ་རྒྱུས་འདི་ལ་བལྟས་ན་རིག་པའི་མཚོན་གྱིས་རྒོལ་བ་འཇོམས་ཞེས་མཚོན་ཆའི་འཁོར་ལོ་བསྐོར་མ་དགོས་པར་རྣམ་དཔྱོད་ཁོ་ནས་དབང་དུ་འདུ་བ་ནི་ཤིན་ཏུ་ངོ་མཚར་བ་དང་ཡ་མཚན་པའི་གཏམ་དུ་སྣང་ངོ་།། དཔེར་ན་སྐབས་དེར་མནྜལ་ཐང་དུ་ཚོང་འདུས་དང་སྲིད་གཞུང་གི་ལྟེ་བར་བཟུང་ཡོད་པ་ནི། ཏྲེ་རབས་ལས། ཆུང་བའི་རིགས་ལ་ཏྲེ་བོ་བྱུང་། །ཏྲེ་མ་ཐང་ཚོང་འདུས་ཏྲེ་བོས་བཟུང་། །ཞེས་དང་། ཡང་། གནས་མནྜལ་ཚོང་འདུས་སྤྱད་ས་ཡིན། །སྐད་རིགས་མི་གཅིག་སྣ་དགུ་འཛོམས། །ཞེས་ཚོང་འདུས་བྱེད་སའི་གནས་མནྜལ་ཐང་ཡིན་པ་བསྟན་ཡོད་པ་དང་། ཡང་དེ་ཉིད་ལས། འབྲུ་ཏྲེ་བོ་སྟག་གི་བྱ་རོགས་དང་། །མཛེས་པ་ཕྱི་ཡི་རི་མོ་དང་། །མོན་པ་མཆེ་སྡེར་ཡ་མེད་དང་། །བཙུན་པ་ཏྲེ་བོ་སྟག་དམར་བཞི། །མནྜལ་ཐང་དུ་འཛོམས་པ་ཡིན། །ཞེས་སྲིད་གཞུང་དང་སྲིད་འཛིན་གྱི་ལྟེ་བ་ཡང་མནྜལ་ཐང་ཡིན་པ་བསྟན་ཡོད་པ་དང་། ཡང་ཏྲེ་རབས་ལས། ཏྲེ་རབས་ཁ་ཁྲིམས་ཀྱི་གནས་གཞི་ལ། །ལས་ཀ་ཐོབ་པའི་མི་གསུམ་བྱུང་། །ཏྲེ་བོ་ཐང་ཆེན་ཨ་འབེན་དེ། །ཁྲིམས་ར་བཅུ་ཡི་མགོ་གནོན་ཡིན། །ཞེས་སྐབས་དེར་ཏྲེ་བོ་ཐང་ཆེན་ཨ་འབེན་དེ་སུམ་པ་རྒྱལ་པོའི་ཁྲིམས་ཀྱི་དཔོན་སར་བཞག་སྟེ་ཁྲིམས་གཞུང་དྲང་ཞིང་ཁྲིམས་མགོ་བཙན་པས་ཁྲིམས་ར་བཅུའི་མགོ་གནོན་གྱི་དཔོན་ས་ཡང་གནས་མནྜལ་དུ་བསྐོས་བཞག་བྱས་ཡོད་པ་བསྟན་ཡོད་དོ།། ཡང་ཏྲེ་རབས་ལས། །འབྲུ་ཏྲེ་བོ་དགྲ་ལྷའི་མི་བདུན་ལ། །གསེར་ཕྲེང་པོ་ཏི་བཅུ་གསུམ་ཡོད། །ཅེས་རིག་གནས་དང་ཡོན་ཏན་གྱིས་དབང་བསྒྱུར་བྱེད་པའི་འབྲུ་ཏྲེ་བོ་དགྲ་ལྷའི་མི་བདུན་དེ་དག་གི་སྲིད་དབང་གང་དུ་བསྒྱུར་བའི་གནས་མནྜལ་ཐང་ཡིན་པར་གསར་པོ་རྟོགས་ཐུབ། དེ་ནས་བོད་བཙན་པོའི་དབང་བསྒྱུར་ཡུན་རིང་བྱས་པའི་མཐར་མངའ་རིས་སུ་རྒྱལ་ཁྲིམས་གསེར་གྱི་གཉའ་ཤིང་སྟེང་ནས་ཆགས། ཆོས་ཁྲིམས་དར་གྱི་མདུད་པ་མཐའ་ནས་ཞིག་སྟེ་འབངས་གྱེན་ལོག་གི་བོད་སིལ་བུར་འཐོར་བྱུང་བའི་དུས་དེར་ཏྲེ་རབས་ཀྱང་རིམ་གྱིས་འཐོར་ཞིག་ཏུ་སོང་ནས་ནང་ཆེན་དཔོན་རབས་མཆེད་ཚུལ་གྱི་ལོ་རྒྱུས་དང་། དེ་ནས་རིང་པོ་མ་ལོན་པར་ཏྲེ་རབས་དབྲ་ཡིས་དབང་བསྒྱུར་བྱས་པར་གྲགས་ཀྱང་། ཡུན་རིང་མ་འགོར་བར་དབྲ་དཔོན་ཧོར་གྱིས་གཡོ་འོག་ཏུ་ཚུད་ནས་མཐར་ཧོར་གྱིས་དབང་བསྒྱུར་བྱས་ཏེ་དབྲ་དཔོན་སྟེང་ཆེན་དགོན་དུ་ཡུས་བུད་ནས་མཐར་རྐྱེན་ངན་གྲོགས་སུ་སོང་བའི་ལོ་རྒྱུས་གསལ་བཤད་བྱས་ཡོད་ལ། ལོ་རྒྱུས་འདི་དག་ལས་སྟབས་ལེགས་པར་ཞིག་ལ་ཏྲེ་རབས་ཧོར་གྱི་དབང་བསྒྱུར་བྱེད་ཚུན་ཆད་ཀྱི་ལོ་རྒྱུས་ཡིག་ཆ་ཐ་ཐོར་ཡོད་པས་ཅུང་ཟད་ཕན་ཐོགས་པར་བྱུང་། དེ་ནས་ལོ་རྒྱུས་ཀྱི་དུས་རིམ་ནང་ཏྲེ་ཧོར་གྱི་ས་གནས་འདིར་གོང་གི་དཔོན་དང་འོག་གི་འབངས་ཡོངས་ལ་སྐྱིད་སྡུག་རེས་མོས་ཀྱི་འཚོ་བའི་རྒྱུད་རིམ་ནང་། ཞིབ་འཇུག་གི་ཐབས་ལམ་སྣ་ཚོགས་རང་ཤུགས་སུ་འཚོལ་རྙེད་བྱུང་བ་ནི་སྐབས་འདིའི་དཔྱད་རྩོམ་ལ་གསལ་འདེབས་ཀྱི་ཕན་ནུས་ཆེར་ལྡན་པར་བྱུང་ཞིང་། དེ་ནས་རང་ཉིད་ཀྱི་རྣམ་དཔྱོད་དང་དཔྱད་གཞིའི་ཡིག་ཆ་ཕན་ཚུན་བསྡུར་ནས་ལོ་རྒྱུས་ཀྱི་རྒྱབ་ལྗོངས་ལ་མཐའ་དཔྱད་ཀྱི་རིག་པའི་རྩལ་སྦྱངས་བར་བྱས་པའི་ཐབས་ལ་བརྟེན་ནས་ཞིབ་འཇུག་གི་ལམ་ཡངས་པོར་བྱེད་པ་ནི་སྐབས་འདིའི་དཔྱད་རྩོམ་འདི་ཉིད་ཀྱི་ལེགས་ཆ་ཐོན་པའི་ཉེ་རྒྱུ་དང་པོ་དེ་ཡིན། དེ་ནས་ཏྲེ་རབས་ཧོར་གྱི་དབང་བསྒྱུར་བྱས་ཟེར་བ་དེ་ཡང་དོན་དུ་ཧོར་སོགས་ཀྱི་བོད་སྤྱི་ལ་དམག་ཐེངས་གཉིས་གསུམ་རྒྱབ་པའི་ལོ་རྒྱུས་ཀྱི་ཁྱབ་ཁོངས་དུ་མ་འདུས་པ་མེད་མོད། འོན་ཀྱང་བྱེ་བྲག་ས་གནས་ཟུར་འཐེན་གྱི་གཏམ་དང་བསྟུན་ནས་ཡུལ་གྱི་གནས་བབ་གསལ་བཤད་བྱེད་པ་ནི་སྐབས་དེར་ཏྲེ་རབས་ཧོར་གྱི་དབང་བསྒྱུར་བྱེད་པ་ཆེད་དོན་དུ་བྱས་ཏེ་ལོ་རྒྱུས་སྤྱིའི་མཚན་གཞི་ས་གནས་བྱེ་བྲག་ཅིག་གི་མཚོན་པའི་བར་སྐབས་ཀྱི་གཏམ་རྒྱུད་དང་སྦྱར་བར་ཙམ་ཡིན་ཞེས་བཤད་ཐུབ་ལ། དེ་ཡང་དགོངས་གཞི་དགོས་པ་དངོས་ལ་རིག་པའི་གནོད་བྱེད་གསལ་བའི་ཕྱིར་དེབ་འདིའི་ཁ་བྱང་དང་ནང་དོན་གཅིག་ཏུ་སོང་བའི་ལོ་རྒྱུས་ཀྱི་བྱུང་རིམ་དཔྱད་བརྗོད་བྱས་ཡོད་པ་ཡིན་ལ། དེ་ནས་རིམ་བཞིན་ཧོར་སེར་ད་ར་ཁག་གི་དཔོན་རབས་མཆེད་ཚུལ་དང་ས་གནས་རྒྱ་སྐྱེད་མངའ་རིས་སྲིད་སྐྱོང་སོགས་རིམ་པར་རྒྱུད་ནས། ཆོས་ལུགས་དང་རིག་གནས་དར་སྤེལ་དགོན་སྡེ་གསར་འདེབས་དཔལ་འབྱོར་འཕེལ་འགྲིབ་སོགས་ཀྱི་ལོ་རྒྱུས་ལ་གཞིབ་ནས་ས་གནས་ཀྱི་འཚོ་བའི་རྒྱུད་རིམ་ར་སྤྲོད་བྱེད་པའི་ཐབས་ལམ་ལ་བརྟེན་ནས་ལོ་རྒྱུས་ཀྱི་ལྗང་མདོག་གསར་པ་མཚོན་པའི་དཔྱད་བརྗོད་བྱས་ཡོད་ལ། དེ་ཡང་སྐབས་དེའི་ཏྲེ་ཧོར་གྱི་ལོ་རྒྱུས་མཐའ་དཔྱད་བྱས་པ་འདིའི་ནང་གསར་གཏོད་ཀྱི་རིག་པའི་སྒྱུ་རྩལ་སྣ་ཚོགས་མཚོན་པར་ནི། བར་རྒལ་གྱི་དུས་རིམ་ནང་འཕེལ་རྒྱས་ཀྱི་བསམ་བློའི་འདུ་ཤེས་སྐྱེད་སྲིང་བྱས་ཏེ་དེང་རབས་ཀྱི་འཕེལ་རིམ་དང་བསྟུན་ནས་ལོ་རྒྱུས་ལ་གསལ་འདེབས་བྱས་ཡོད་པ་ཡིན་ནོ།།
