ད་ལོའི་སྤྱི་ཟླ་7པའི་ཚེས་1ཉིན་ནི་གངས་ལྗོངས་ཉི་གཞོན་དྲ་བ་བཙུགས་ནས་ལོ་10འཁོར་བའི་ཉིན་མོ་རེད། ཉིན་དེར་ཁྲེང་ཏུའུ་རུ་སི་ཁྲོན་ཏང་གི་འཛུགས་སྐྲུན་དུས་དེབ་ཁང་གིས་གངས་ལྗོངས་ཉི་གཞོན་དྲ་བ་བཙུགས་ནས་ལོ་10འཁོར་བ་དང་གངས་ལྗོངས་ཉི་གཞོན་བརྙན་ཐུང་དྲ་བའི་སྒོ་འབྱེད་མཛད་སྒོ་སྤེལ། སི་ཁྲོན་མི་རིགས་དཔེ་སྐྲུན་ཁང་གི་ཧྲེ་ཀྲང་ཨ་སྔགས་ཚེ་རིང་བཀྲ་ཤིས་དང་ཧྲེ་ཀྲང་གཞོན་པ་འོད་ཟེར། སྔར་གྱི་དཀར་མཛེས་ཉིན་རེའི་ཚགས་པར་ཁང་གི་སྤྱི་ཁྱབ་རྩོམ་སྒྲིག་པ་ཏུང་ཧྥུང་། ལྷོ་ནུབ་མི་རིགས་སློབ་ཆེན་གྱི་སློབ་དཔོན་ཆེན་མོ་ཐུབ་བསྟན་ཕུན་ཚོགས་དང་རྫ་པ་ཚེ་རིང་འགྱུར་མེད། སི་ཁྲོན་རླུང་འཕྲིན་རྒྱང་བསྒྲགས་ཁང་གི་མང་རའི་རྒྱལ་མཚན། ཁམས་པའི་བརྙན་འཕྲིན་ཁང་གི་ཟླ་བ་ཚེ་རིང་། དེ་མིན་ལྟག་ཆོས་འཕེལ་དང་འཇུ་རབ་གསལ་སོགས་ཀྱི་སྒྱུ་རྩལ་པ་དང་འཕྲིན་སྦྱོར་གསར་པའི་ལས་གཉེར་པ་དག་མཉམ་དུ་འཛོམས་ཏེ། བོད་འབྲེལ་གྱི་གཞུང་ཕྱོགས་དྲ་བ་དང་འཕྲིན་སྦྱོར་གསར་པའི་ཐད་ཀྱི་བྱ་བ་སྤེལ་སྟངས་དང་། བརྙན་བཟོ་སྟངས་ཐད་ནས་བགྲོ་གླེང་གཏིང་ཟབ་བྱས།

གངས་ལྗོངས་ཉི་གཞོན་བོད་རྒྱ་སྐད་གཉིས་དྲ་བ་བཙུགས་ནས་ལོ་བཅུའི་རིང་དྲ་སྦྲེལ་ཁྱབ་སྤེལ་གྱི་གོ་སྐབས་དམ་འཛིན་བྱས་ཏེ། བོད་འབྲེལ་དྲིལ་བསྒྲགས་ཀྱི་ཤུགས་རྐྱེན་ཐེབས་ཤུགས་ཆེ་རུ་བཏང་ཞིང་། བོད་འབྲེལ་ནང་དོན་གྱི་ཤོང་ཚད་རྒྱ་ཆེར་བཏང་བ། བོད་འབྲེལ་ཁྱབ་སྤེལ་བྱེད་སྟངས་གསར་གཏོད་བཅས་བྱས་ཡོད།

གངས་ལྗོངས་ཉི་གཞོན་བོད་རྒྱ་སྐད་གཉིས་དྲ་བས་ཀྲུང་དབྱང་གི་སྲིད་དོན་གལ་ཆེན་གྱི་བྱེད་ཕྱོགས་དང་། ལྷག་པར་དུ་བོད་འབྲེལ་ས་ཁུལ་གྱི་སྲིད་ཇུས་དུས་ཐོག་ཏུ་སློབ་སྦྱོང་དང་ལག་བསྟར་དོན་འཁྱོལ་བྱ་རྒྱུར་གཞོལ་ནས། ཞིང་ཨུའི་ལྟེ་བའི་ལས་དོན་དང་བོད་འབྲེལ་ལས་དོན་བཀོད་སྒྲིག་བརྒྱུད་བསྒྲགས་དང་། རང་རྒྱལ་གྱི་མི་རིགས་དང་ཆོས་ལུགས་སྲིད་ཇུས། དཔལ་འབྱོར། སྤྱི་ཚོགས། རིག་གནས་སོགས་ཁྱབ་ཁོངས་ཀྱི་སྔོན་སྐྱོད་ཆ་འཕྲིན་བརྒྱུད་བསྒྲགས་དང་། སི་ཁྲོན་གྱི་བོད་འབྲེལ་ས་ཁུལ་གྱི་མཛེས་ལྗོངས་དང་། ཁྱད་ལྡན་རིག་གནས། དམངས་སྲོལ་གོམས་གཤིས། དེ་བཞིན་འཕེལ་རྒྱས་ཀྱི་གྲུབ་འབྲས་ངོམས་དང་ངོམ་བཞིན་ཡིན།

དེ་ཡང་གངས་ལྗོངས་ཉི་གཞོན་བོད་རྒྱ་སྐད་གཉིས་དྲ་བའི་ལེ་ཚན་གྱི་ཆ་ནས་གསར་འགྱུར་དང་། རིག་གནས། རྩོམ་རིག །སྒྱུ་རྩལ། ཤེས་བྱ། མི་སྣ་སོགས་ཀྱིས་གྲུབ་ཅིང་། གསར་འགྱུར་གལ་ཆེན་སྒྲོག་གཏོང་ཁྲོད་རྗེས་སུ་མི་ལྷག་པ་དང་མི་རིགས་ཀྱི་རིག་གནས་རྒྱུན་འཛིན་ཁྲོད་གསར་གཏོད་བྱེད་པ། བོད་ལུགས་གསོ་རིག་དང་བདེ་ཐང་ཤེས་བྱ་སྤེལ་བར་དབང་གྲགས་རང་བཞིན་དང་ཡང་དག་རང་བཞིན་ལ་སྣང་ཆེན་བྱེད་པ། མི་སྣའི་གནས་ཚུལ་ཇི་མ་ཇི་བཞིན་དུ་བརྗོད་པ་སོགས། གངས་ལྗོངས་ཉི་གཞོན་དྲ་བ་ནི་བོད་འབྲེལ་ཁྱབ་སྤེལ་གྱི་ཤེས་བྱའི་བང་མཛོད་ཅིག་ཏུ་གྱུར་ནས། རྒྱལ་ཁབ་ཕྱི་ནང་གི་བོད་རིགས་སྤུན་ཟླ་ཚོས་རྒྱ་ཁྱབ་ངང་དོ་ཁུར་བྱེད་ཀྱི་ཡོད།

ལོ་བཅུའི་རིང་། གངས་ལྗོངས་ཉི་གཞོན་དྲ་བ་སི་ཁྲོན་ནས་ཕྱི་རྒྱལ་དུ་ཁྱབ་ཅིང་། རྒྱལ་ནང་གི་སྤྱོད་མཁན་རྒྱལ་ཡོངས་ཀྱི་བོད་འབྲེལ་ཞིང་ཆེན་དང་རང་སྐྱོང་ལྗོངས་ལྔ་ལ་ཁྱབ་པ་དང་། ཕྱི་རྒྱལ་གྱི་ཀློག་མཁན་ལ་རྒྱ་གར་དང་། ཨ་རི། བལ་པོ་སོགས་ཀྱི་རྒྱལ་ཁབ་དང་ས་ཁུལ་100ལྷག་ཏུ་ཁྱབ་ཡོད་པར་མ་ཟད། ཕྱི་རྒྱལ་གྱི་ཀློག་མཁན་གྱིས་སྤྱིའི་ཀློག་མཁན་གྱི་བརྒྱ་ཆའི་30ཡས་མས་ཟིན་ཡོད།

ལོ་བཅུའི་རྗེས་ཀྱི་དེ་རིང་། གངས་ལྗོངས་ཉི་གཞོན་གྱིས་མཉམ་འདྲེས་ཁྱབ་སྤེལ་གྱི་རྒྱབ་ལྗོངས་འོག་བརྙན་ཐུང་ཅན་གྱི་འཕེལ་ཕྱོགས་དང་བསྟུན་ནས་བརྙན་ཐུང་དྲ་བ་བཙུགས་པ་དང་། བརྙན་ཐུང་གི་ལོ་རེའི་ཀློག་གྲངས་མི་གྲངས་དང་ཐེངས་གྲངས་ཁྲི་1000ལས་བརྒལ་ཡོད།

ད་ལྟའི་བར། གངས་ལྗོངས་ཉི་གཞོན་འཕྲིན་སྦྱོར་ཀུན་འདུས་ལྟེ་གནས་ལ་གངས་ལྗོངས་ཉི་གཞོན་དུས་དེབ་དང་། ཁ་བཏགས་དཀར་པོའི་དུས་དེབ། གངས་ལྗོངས་ཉི་གཞོན་བོད་རྒྱ་དྲ་བ་དང་མགྲོན་སྣེ། འཕྲིན་སྟེགས་བཅས་ཚུད་པའི་གསར་འགྱུར་ཁྱབ་སྤེལ་ལས་སྟེགས་ཡོད་པར་མ་ཟད། བོད་ཡིག་ཀློག་རྡུལ་དུས་དེབ་ལས་སྟེགས་དང་ཡིག་བསྒྱུར་མ་ལག་བཅས་ལས་སྟེགས་གསུམ་ཅན་གྱི་འཕྲིན་སྦྱོར་ཀུན་འདུས་ཀྱི་ཁྱབ་སྤེལ་རྣམ་པ་ཆགས་ཏེ། 2023ལོར་ཀློག་གྲངས་ཁྲི་3000ལས་བརྒལ་ཡོད།

ལོ་བཅུའི་རིང་། གངས་ལྗོངས་ཉི་གཞོན་དྲ་བ་མེད་པ་ནས་ཡོད་པ་དང་། ཡོད་པ་ནས་དར་རྒྱས་བྱུང་ཞིང་། ཀྱག་ཀྱོག་དང་ཐུན་མིན་གྱི་ལམ་བུ་བརྒྱུད་དེ་བོད་འབྲེལ་དྲ་བའི་ཁྱབ་སྤེལ་དང་འཕེལ་རྒྱས་ལ་ནུས་པ་མི་དམན་པ་བཏོན་ཡོད།

ལོ་བཅུ་ནི་འགོ་གསར་པ་ཚུགས་ས་ཞིག་ཀྱང་ཡིན་ཏེ། གངས་ལྗོངས་ཉི་གཞོན་དྲ་བས་བརྙན་ཐུང་དྲ་བ་རིམ་སྤོར་དང་ནང་དོན་ངོམས་སྟངས་གསར་གཏོད་དང་། ལག་རྩལ་གྱི་རིམ་པ་མཐོ་རུ་བཏང་ནས་བོད་འབྲེལ་གསར་འགྱུར་དྲ་བའི་ཁྲོད་ཚད་བརྒལ་དེ་བས་ཆེན་པོ་ཐུབ་པར་འབད་རྒྱུ་ཡིན་པ་རེད། །