གླུ་ཐ་ལ་ལ་མོ་ཐ་ལ་ལེན། །
གླུ་ཨ་ལ་ལ་མོ་ཨ་ལ་ལེན། །
གླུ་ལེན་ལོང་བྱུང་ན་མི་དཀར་སྟེ། །
ལེན་པའི་མགོ་བོ་དཀའ་མོ་གདའ། །
ངག་འགུགས་ལོང་བྱུང་ན་མི་འཚེར་ཏེ། །
འགུགས་པའི་རྟིང་པ་མི་འཁྱོང་དོ། །
ཚིག་བཅད་ལོང་བྱུང་ན་མི་འགྱོད་དེ། །
ཚིག་མཐའ་ཕུང་གི་རང་བཞིན་རེད། །
འབུམ་པའི་རྒྱ་ཚ་ཞལ་དཀར་ལགས། །
གནའ་མི་བོད་ཀྱི་གཏམ་དཔེ་ལ། །
ཕོ་རབ་འཁྱོགས་ན་སྦ་འཁྱོག་ཟེར། །
ཉི་མས་དྲོས་ན་གར་སྲོང་རེད། །
ཕོ་འབྲིང་འཁྱོགས་ན་རང་འཁྱོག་ཟེར། །
ཚ་གྲང་འཛོམས་ན་ཅི་ཡང་རུང་། །
ཕོ་མཐའ་འཁྱོགས་ན་རྡོ་འཁྱོག་ཟེར། །
རྡོ་གོར་མོ་འཁྱོགས་ན་བཅོས་ཐབས་མེད། །
དཔེ་དེ་དང་ཁྱད་པར་ག་ན་ཡོད། །
མ་སྐལ་ཅིག་ལ་བསམ་བསམ་ན། །
ཕ་རུས་ས་ལ་རྡེབ་ཉེན་གདའ། །
སྔ་སོར་ལེགས་ཉེས་བལྟས་བལྟས་ནས། །
ཕྱི་སོའི་རྟིང་པ་རྡོ་ལ་ཐུག །
ཡང་དག་དོན་ལ་བསྒྲིལ་བ་ན། །
ཞལ་དཀར་ལྕགས་སྲོག་ཐོབ་པ་མིན། །
ལྷའུ་མར་ལ་གྲུབ་པ་མིན། །
རྒྱ་བྱ་རླུང་ལ་བྱས་པ་མིན། །
རྨ་བྱ་ཡན་པར་བཞག་པ་མིན། །
སྲོག་དམར་སྦོམ་ཕྲ་དར་བ་མིན། །
ཕོ་ལ་རྒོད་ཞན་སྲིད་པ་མིན། །
ཁྲབ་དཀར་སྲབ་འཐུག་ག་ན་ཡོད། །
རལ་གྲི་རྣོ་རྡུགས་ཅི་ལ་དར། །
སྟག་དོང་མདའ་ལ་རིང་ཐུང་མེད། །
གཟིག་ཤུབས་གཞུ་ལ་སྲ་སྙི་མེད། །
ཨ་ཆེན་ཧོར་དང་མདོ་ཁམས་གླིང་། །
གནམ་ས་ལྟ་བུའི་ཁྱད་པར་ཡོད། །
གུར་དཀར་དཔོན་དང་གེ་སར་གཉིས། །
མངའ་ཐང་བྱས་ཀྱང་གུར་དཀར་ཆེ། །
བསོད་ནམས་བྱས་ཀྱང་གུར་དཀར་ཆེ། །
ཁྲིམས་དང་ལས་ཀ་ཧོར་ལ་དར། །
འདྲ་འདྲ་མི་ཚད་མཉམ་པ་མེད། །
ཕྱི་ཐག་ཐུང་པས་ཇོ་རུ་ཐོགས། །
བཀྲ་ལག་ཚ་བས་ནག་བཙོག་ཐོགས། །
དགེ་སྡིག་མེད་པའི་མནའ་གཟན་བཏགས། །
གེ་སར་ཟེར་བ་རང་འདོད་ཡིན། །
སྐྱིད་སྡུག་མེད་པའི་རྒྱ་ཚ་ལ། །
གླེན་པ་ལུག་གི་མགོ་བོ་ཐོགས། །
ཞལ་དཀར་ཟེར་བ་ངོ་བསྟོད་ཡིན། །
དེ་རིང་ཉི་མའི་དཀར་ལམ་ན། །
ང་ཐར་པ་གཏིང་ནས་མ་ཐོབ་ཀྱང་། །
ཤི་མདའ་མི་འཕེན་ཀ་མེད་ཡིན། །
འགྱོད་བསམ་ལྷ་འུའི་ཡིད་ལ་མེད། །
སྐེ་བྲེགས་འོ་མ་མིན་པ་མེད། །
འཇིག་རྟེན་བོད་ཀྱི་ས་ཆ་ལ། །
སྡར་མས་རྒོད་པོ་བརྟུལ་བ་མང་། །
འཇམ་པོས་རྩུབ་མོ་བཅོམ་པ་མང་། །
རི་བོང་སྐྱེ་ཚུལ་ཆུང་ན་ཡང་། །
སེང་ཕྲུག་ཧ་ལ་འཕངས་པར་གྲགས། །
དམར་མོའི་མེ་སྟག་ཆུང་ན་ཡང་། །
ལྷ་རི་གཉན་པོ་བསྲེགས་པར་གྲགས། །
ཞེའུ་ཁྱི་ལ་བརྙས་ན་ཡང་། །
རྒོད་པོའི་ཉྭ་ཡུ་མཆོར་བ་ཡོད། །
དེ་ཚོ་རྣ་བའི་བཅུད་ལ་ཞོག །
ཧོར་སེར་ཐེའུ་རང་དཀར་ནག་གསུམ། །
གཞུ་ཡར་མཆོག་འཚོས་ལ་མར་མཆོག་སྲུངས། །
འཆང་ཁ་ཟུངས་ལ་མདའ་སྣེ་དྲོངས། །
དཀར་པོ་སྐྱ་ལ་ཧོ་མ་ཡ། །
གཉོམ་ཆུང་ལྷ་འུའི་དབུ་འཕང་བསྟོད། །
བཙན་པོ་ཚོད་མེད་ས་ལ་རྡོབས། །
ད་ཚོད་དབང་ཐང་རྫོགས་རན་ཡིན། །
ད་ཚོད་རྣོ་ངར་རྡུགས་རན་ཡིན། །
གོ་ན་རྣ་བའི་བདུད་རྩི་ལ། །
མ་གོ་གླུ་ཡི་འབྲེལ་བ་ཞུ། །
རྒྱ་ཚའི་ཐུགས་ལ་དེ་འདྲ་ཞོག །
