རྒྱལ་ཁབ་ཀྱི་རིག་གནས་ཤུལ་བཞག་སྲུང་སྐྱོང་དང་རྒྱུན་འཛིན་གྱི་བསམ་ཕྱོགས་ལག་ལེན་དུ་བསྟར་ནས། མི་རིགས་རིག་གནས་ཤུལ་བཞག་སྔོག་འདོན་དང་ལེགས་སྒྲིག ཞིབ་འཇུག་བཅས་བྱེད་ཤུགས་ཆེ་རུ་གཏོང་ཆེད། ཉེ་ཆར་སི་ཁྲོན་ཞིང་ཆེན་མི་རིགས་ཆོས་ལུགས་ཨུ་ལྷན་ཏང་ཙུའུ་ཡི་ཁོངས་མི་ཀྲུའུ་རེན་གཞོན་པ་མ་ཧྥེ་དང་བཅས་པ་མཛོད་དགེ་རྫོང་སྟག་ཚ་དགོན་དང་བོད་སྨན་ཁང་དུ་ཕེབས་ནས། གནའ་གཞུང་ཡོངས་ཁྱབ་ཞིབ་བཤེར་དང་བོད་སྨན་བྱ་གཞག་སྐུལ་འདེད་གཏོང་བའི་ལས་དོན་ལ་རྟོག་ཞིབ་གནང་།
རྟོག་ཞིབ་ཚོ་ཆུང་ལ་སྟག་ཚ་དགོན་པའི་དོ་དམ་མི་སྣས་སྤྲོ་སེམས་འཁོལ་བའི་སྣེ་ལེན་བྱས། དགོན་པའི་དཔེ་མཛོད་ཁང་དུ་རྟོག་ཞིབ་ཚོ་ཆུང་གིས་གནའ་གཞུང་ཉར་ཚགས་བྱས་ཚུལ་ལ་ཉན་ནས་ཡིག་ཚགས་ལྟ་ཀློག་བྱས། དེར་ནང་བསྟན་གྱི་གསུང་རབ་དང་ལོ་རྒྱུས་ཡིག་ཚགས། མཚན་ཉིད་རིག་པ་བཅས་ཚུད་པ་མ་ཟད། ད་དུང་གནམ་རིག་དང་རྩིས་རིག གསོ་རིག་སོགས་ཁྱབ་ཁོངས་མང་པོའི་ཤེས་བྱ་ཡང་ཚུད་ཡོད་པས། ཀྲུང་ཧྭ་མི་རིགས་ཀྱི་རིག་གནས་བང་མཛོད་ཁྲོད་ཀྱི་མཆོག་ནོར་དུ་གྱུར་ཡོད། རྟོག་ཞིབ་ཁྲོད་ཆེད་མཁས་པ་རྣམས་ཀྱིས་པར་བརྒྱབ་ནས་ཟིན་ཐོར་བཀོད་པ་བརྒྱུད་གནའ་གཞུང་ལ་གྲངས་གཞི་ཅན་གྱི་འཚོལ་བསྡུ་བྱས་ཏེ་རྗེས་སོགས་ཀྱི་ཞིབ་འཇུག་དང་སྲུང་སྐྱོབ། བེད་སྤྱོད་བཅས་ལ་རྨང་གཞི་བརྟན་པོ་བཏིང་ཡོད།
བོད་སྨན་ཁང་དུ་རྟོག་ཞིབ་ཚོ་ཆུང་གིས་སྨན་སྡེབ་ཁང་དང་སྨན་བཅོས་ཁུལ་དུ་ལྟ་ཞིབ་བྱས་ཏེ། བོད་སྨན་སྨན་རྒྱུའི་འདེབས་འཛུགས་དང་སྨན་རྒྱུ་འཐུ་བ། ལས་སྣོན་དང་ནད་ཐོག་བཀོལ་སྤྱོད་སོགས་ཀྱི་གནས་ཚུལ་ལ་རྒྱུས་ལོན་ཞིབ་ཕྲ་གནང་། ཡུལ་དངོས་ནས་བོད་སྨན་དེང་རབས་ཅན་དང་རྒྱལ་སྤྱི་ཅན་གྱི་འཕེལ་རྒྱས་ཐབས་ལམ་ལ་དམིགས་ནས། བོད་སྨན་ཆེད་མཁས་པ་དང་སྤེལ་རེས་བྱས་ཏེ་བོད་སྨན་ཤེས་ལྡན་མི་སྣ་གསོ་སྐྱོང་དང་ཚན་ཞིབ་གྲུབ་འབྲས་གཞན་སྒྱུར་ལ་སྐུལ་འདེད་གཏོང་བ་སོགས་ཀྱི་གནད་དོན་ཐད་དགེ་མཚན་ལྡན་པའི་བསམ་འཆར་བཏོན།
ཐེངས་འདིའི་དགོན་པའི་གནའ་གཞུང་ཡོངས་ཁྱབ་ཞིབ་བཤེར་དང་བོད་སྨན་སྨན་ཁང་གི་བོད་སྨན་རྟོག་ཞིབ་བྱེད་སྒོ་ནི་རང་རྫོང་གི་རིག་གནས་ཤུལ་བཞག་སྲུང་སྐྱོང་དང་རྒྱུན་འཛིན་ལས་དོན་ལ་ཞིབ་བཤེར་བྱེད་ཐེངས་གལ་ཆེན་ཞིག་ཡིན་པ་མ་ཟད། མི་རིགས་རིག་གནས་དར་རྒྱས་གོང་འཕེལ་ལ་སྐུལ་འདེད་གཏོང་བའི་གསོན་ཉམས་ལྡན་པའི་ལག་ལེན་ཞིག་ཀྱང་ཡིན་པས། རྗེས་སོའི་སྲུང་སྐྱོང་དང་རྒྱུན་འཛིན་ལས་དོན་ལ་རྨང་གཞི་བརྟན་པོ་བཏིང་ཡོད།
