ཀླུང་ནང་རྒྱལ་སྤྱིའི་ཡུལ་སྐོར་གྲོང་རྡལ་ཆུང་བ་ནི་རྒྱལ་ཁབ་རིམ་པའི་གཞུང་ལམ་318པའི་འགྲམ་དུ་ཆགས་པ་དང་། དེ་ནི་ཀོང་ཏུང་དང་བོད་ལྗོངས་གཉིས་ཀྱིས་ལག་གདང་སྦྲེལ་ནས་འཛུགས་སྐྲུན་བྱས་པ་སྟེ། བོད་ཀྱི་རིག་གནས་དང་། རང་བྱུང་སྐྱེ་ཁམས། དྭངས་གཙང་དང་ལྷིང་འཇགས། དེང་རབས་ཀྱི་དར་སྲོལ་བཅས་སྲོག་ཤིང་འདུན་པ་བྱས་ཏེ་འཛུགས་སྐྲུན་བྱས་པའི་རྒྱལ་སྤྱིའི་ཡུལ་སྐོར་གྲོང་རྡལ་ཆུང་བ་ཞིག་རེད། ཀོང་ཏུང་ཞིང་ཆེན་སྲིད་གཞུང་གིས་ཁེ་ལས་མང་པོ་དང་ལག་གདང་སྦྲེལ་ནས་མ་དངུལ་ཧ་ལམ་སྒོར་དུང་ཕྱུར་38བཏང་ནས། དུས་ཡུན་ལོ་དྲུག་ལ་འཛུགས་སྐྲུན་བྱས་ཤིང་། ཀོང་ཏུང་ཞིང་ཆེན་གྱི་བོད་སྐྱོར་ལས་གཞི་གཙོ་གནད་དང་ཡུལ་སྐོར་ཐོན་ལས་ཀྱིས་དབུལ་སྐྱོར་གནད་སྨིན་བྱེད་པའི་ལས་གཞི་ཡིན་ལ། བོད་རང་སྐྱོང་ལྗོངས་ཀྱི་ཡུལ་སྐོར་གསར་གཏོད་ལས་གཞི་གཙོ་གནད་ཀྱང་ཡིན་པ་རེད།