ཉེ་ཆར། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུའི་ཀྲུའུ་ཞི་ཞི་ཅིན་ཕིང་གིས་ཕུའུ་ཨེར་མི་རིགས་མཐུན་སྒྲིལ་དམ་འཇོག་རྡོ་རིང་མདུན་དུ་དམ་འཇོག་བྱེད་མཁན་གྱི་འཐུས་མིའི་རྗེས་རབས་པར་འཕྲིན་ལན་སྤྲིངས་གནང་ནས། ཁོང་ཚོར་བྱམས་བརྩེའི་ངང་སྐུལ་ལྕག་གནང་བ་མ་ཟད་ཐུགས་རེ་ནན་པོ་ཡང་བཅོལ་གནང་ཡོད།

ཞི་ཅིན་ཕིང་གིས། 1951ལོར། ཁྱེད་ཚོའི་མི་རབས་གོང་མ་ཚུད་པའི་མི་རིགས་ཁག་གི་འཐུས་མིས་རྡོ་རིང་བཙུགས་ཏེ། བློ་གཅིག་སེམས་གཅིག་ངང་ཏང་གི་རྗེས་སུ་འབྲངས་བའི་དམ་བཅའ་བཞག་ཡོད། ལོ་70ལྷག་ཙམ་རིང་། མི་རིགས་ཁག་གི་མང་ཚོགས་ཀྱིས་ཏང་ལ་བློ་ཁ་ཕྱོགས་པ་དང་མཐུན་སྒྲིལ་འབད་འཐབ་བྱས་ནས། མཐའ་མཚམས་ས་ཁུལ་གྱི་དཔལ་འབྱོར་དང་སྤྱི་ཚོགས་གོང་འཕེལ་འགྲོ་བར་སྐུལ་འདེད་བཏང་བར་ལོ་རྒྱུས་རང་བཞིན་གྱི་གྲུབ་འབྲས་ཐོབ་པ་དང་། མི་རིགས་མཐུན་སྒྲིལ་ཡར་ཐོན་གྱི་གསོན་ཉམས་དོད་པའི་ལེའུ་བརྩམས་ཡོད་ཅེས་བསྟན་གནང་ཡོད།

ཞི་ཅིན་ཕིང་གིས། ཀྲུང་ཧྭ་མི་རིགས་ནི་ཁྱིམ་ཚང་ཆེན་མོ་ཞིག་ཡིན་པ་དང་། མི་རིགས་ང་དྲུག་ནི་ཕན་ཚུན་མཛའ་ཞིང་བརྩེ་བའི་ཁྱིམ་ཚང་གཅིག་གི་མི་ཡིན། ཁྱེད་ཚོས་མི་རབས་གོང་མའི་སྲོལ་རྒྱུན་གཟི་བརྗིད་དར་སྤེལ་བཏང་ཐོག དམ་འཇོག་རྡོ་རིང་གི་གཏམ་རྒྱུད་དེ་བས་ལེགས་པའི་སྒོ་ནས་མུ་མཐུད་རྩོམ་པ་དང་། མི་རིགས་མཐུན་སྒྲིལ་གྱི་གཏམ་བཟང་མི་རབས་ནས་མི་རབས་བར་བརྒྱུད་སྤེལ་བྱ་རྒྱུའི་རེ་བ་ཡོད། མི་རིགས་ཁག་གི་མི་དམངས་ཚང་མས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སེམས་ལ་བརྟན་པོར་ངེས་པ་དང་ཁྲག་རྒྱུན་མཉམ་འདྲེས་ཀྱིས་མེས་རྒྱལ་གྱི་མངའ་ཁོངས་བརྟན་སྲུང་དང་མཛེས་སྡུག་ལྡན་པའི་ཁྱིམ་གཞིས་ཐུན་མོང་ཐོག་བསྐྲུན་ནས། མི་རིགས་མཐུན་སྒྲིལ་ཡར་ཐོན་གྱི་མེ་ཏོག་ཇི་ཙམ་བཞད་པ་དེ་ཙམ་གྱིས་མཛེས་སྡུག་ལྡན་པར་འགྱུར་བ་བྱེད་དགོས་ཞེས་ནན་སྟོན་གནང་ཡོད།

1950ལོར། ཡུན་ནན་ཕུའུ་ཨེར་ཀྲོན་ཆུས་ཀྱི་མི་རིགས་ཁག་གི་འཐུས་མི་གདན་ཞུས་ལྟར་པེ་ཅིང་དུ་ཀྲུང་གོ་གསར་པ་དབུ་བརྙེས་ནས་ལོ་གཅིག་འཁོར་བའི་དྲན་གསོའི་བྱེད་སྒོར་ཞུགས་པ་དང་། མའོ་ཙེ་ཏུང་སོགས་ཏང་དང་རྒྱལ་ཁབ་ཀྱི་དབུ་ཁྲིད་པས་བྱམས་བརྩེའི་ངང་མཇལ་འཕྲད་གནང་ཡོད། 1951ལོའི་གནམ་ལོ་གསར་ཚེས་སྐབས་སུ་ཕུའུ་ཨེར་ཀྲོན་ཆུས་ཀྱི་མི་རིགས་ཁག་གི་མང་ཚོགས་ཀྱིས་དམ་འཇོག་ཚོགས་ཆེན་འཚོགས་པ་དང་། གྲངས་ཉུང་མི་རིགས་ཀྱི་ཡུལ་གོམས་གཤིས་ལུགས་ལྟར་དམ་འཇོག་རྡོ་རིང་བཙུགས་ཏེ། “བློ་གཅིག་སེམས་གཅིག་དང་མཐུན་སྒྲིལ་མཐར་ཕྱིན་པ་བྱས་ནས། ཀྲུང་གོ་གུང་ཁྲན་ཏང་གི་འགོ་ཁྲིད་འོག འདྲ་མཉམ་དང་རང་དབང་། བདེ་སྐྱིད་བཅས་ཀྱི་ཁྱིམ་ཚང་ཆེན་མོ་ཞིག་སྐྲུན་ཆེད་འབད་འཐབ་བྱ་རྒྱུའི་དམ་བཅའ་བཞག”ཅིང་། མི་རིགས་ཁག་གི་འཐུས་མི་48ཀྱིས་རྡོ་རིང་ཐོག་མིང་རྟགས་བཀོད་ཡོད། ཉེ་དུས། ཕུའུ་ཨེར་མི་རིགས་མཐུན་སྒྲིལ་དམ་འཇོག་རྡོ་རིང་མདུན་དུ་དམ་འཇོག་བྱེད་མཁན་གྱི་འཐུས་མིའི་རྗེས་རབས་པས་སྤྱི་ཁྱབ་ཧྲུའུ་ཅི་ཞི་ཅིན་ཕིང་ལ་འཕྲིན་ཡིག་སྤྲིངས་ཏེ། ས་གནས་དེ་གའི་མི་རིགས་ཁག་གི་མང་ཚོགས་ཀྱིས་ཏང་གི་དབུ་ཁྲིད་འོག་བདེ་སྐྱིད་ཀྱི་འཚོ་བར་རོལ་ཚུལ་སྙན་སེང་ཞུས་པ་དང་། དམ་ཚིག་བློ་ལ་བརྟན་པོར་བཅངས་ནས་ཏང་གི་རྗེས་སུ་འབྲངས་བ་དང་མི་རིགས་མཐུན་སྒྲིལ་དང་མཐའ་མཚམས་དར་རྒྱས་ཆེད་སྟོབས་ཤུགས་ལེགས་སྐྱེས་སུ་འབུལ་རྒྱུའི་ཆོད་སེམས་མཚོན་པར་བྱས་ཡོད། །