ནུབ་ཁའི་རི་རྩེ་ནས།
ས་སྲོད་ཀྱི་ཡོལ་བ་བཏང་རྗེས།
འོད་ཀྱི་ཞགས་པ་ཡང་ག་ལེར་ཆད་སོང་།
མཚན་སྨག་གི་ལྭ་བ་སྟུག་པོས།
ངའི་ཕྱི་ནང་གི་ཁོར་ཡུག་ཡོངས་སུ་བཏུམས་རྗེས།
འཇིག་རྟེན་ནི་ཧ་ཅང་ལྷིང་འཇགས་ཤིག་ཏུ་གྱུར།
རླུང་བུའི་ཤུར་སྒྲ་ཙམ་ཡང་དབེན་དུས།
ད་གཟོད།
ངའི་སེམས་ཀྱི་ཁོང་གསེང་དུ།
ཞི་དུལ་ལས་སྨིན་པའི་ཁྱོད་རང་ག་ལེར་འཛུལ་བྱུང་།
གནག་སྣུམ་གྱི་སྐྲ་ལོ་བསྐྱོད་ནས།
མདངས་འཚེར་བའི་མིག་ཟུང་བཙུམས་ནས།
དགོད་སླ་བའི་མཆུ་སྒྲོས་འགུལ་ནས།
ལང་ཚོའི་མཛེས་སྡུག་དང་།
ཡིད་འོང་གི་རྣམ་པ་ཡོངས་སུ་ཕྱུང་སྟེ།
ངའི་དང་གའི་སྙིང་ཆུང་ལ་ཡང་ཡང་འཁོར་བྱུང་ཨང་།
འདི་ལྟར།
ངས་མགོ་བོ་སྔས་མལ་དུ་བཅོལ་ཏེ།
སེམས་ཀྱི་རྣམ་ཤེས་རྩེ་གཅིག་ལ་གཏད་ནས།
ཁྱོད་ཀྱི་ཡོད་ཚད་ལ་ཞིབ་ཏུ་བསྒོམས་ན།
ཐུན་གསུམ་གྱི་རྨི་ལམ་ཁྲོད་དུ།
ཁོ་བོ་ཁྱོད་དང་མཇལ་ནས་འགྲོགས་ཐུབ་ཅིང་།
ཕྲ་ཞིང་མཉེན་པའི་ཁྱོད་ཀྱི་ལག་ཟུང་ལ་ཡང་།
སེམས་ཆུང་ངང་རེག་ཐུབ་པ་བྱུང་སོང་།
དེ་བས།
ཁྱོད་ཀྱིས་ང་ལ་སྦྲེལ་བའི་ལག་འཇུ་དེ་མ་གཏོང་རོགས།
ཁྱོད་ཀྱིས་ང་ལ་བྱིན་པའི་འཛུམ་ཞལ་དེ་མ་འགྱུར་རོགས།
ངའི་སེམས་ཀྱི་དྲན་ཤིང་ལགས།
