རྒྱལ་ཡོངས་བོད་ཀྱི་སྒྲུང་ཐུང་འགྲན་བསྡུར་སྐབས་དྲུག་པའི་བྱ་དགའ་སྤྲོད་པའི་མཛད་སྒོའི་ཡུལ་དངོས།

སྤྱི་ཟླ་10པའི་ཚེས་16ཉིན་གྱི་ཕྱི་དྲོར། རྒྱལ་ཡོངས་བོད་ཀྱི་སྒྲུང་ཐུང་འགྲན་བསྡུར་སྐབས་དྲུག་པའི་བྱ་དགའ་སྤྲོད་པའི་མཛད་སྒོ་དང《མཚོ་སྔོན་བོད་ཡིག་གསར་འགྱུར།》མཐོ་རིམ་སློབ་གྲྭར་སྐྱོད་པའི་བྱ་འགུལ་དེ་མཚོ་སྔོན་དགེ་འོས་སློབ་གྲྭ་ཆེན་མོར་སྤེལ་ཞིང་། མཚོ་སྔོན་བོད་ཡིག་གསར་འགྱུར་ཁང་གི་སྤྱི་ཁྱབ་རྩོམ་སྒྲིག་པ་བན་དེ་ཚེ་རིང་དང་། མཚོ་སྔོན་ཞིང་ཆེན་རྩོམ་པ་པོ་མཐུན་ཚོགས་ཀྱི་ཀྲུའུ་ཞི་གཞོན་པ། མཚོ་སྔོན་གེ་སར་སྒྲུང་སྲུང་སྐྱོང་ཞིབ་འཇུག་ལྟེ་གནས་ཀྱི་ཀྲུའུ་རེན་འགྱུར་མེད་རྡོ་རྗེ། མཚོ་སྔོན་དགེ་འོས་སློབ་ཆེན་མི་རིགས་དགེ་འོས་སློབ་གླིང་གི་ཧྲུའུ་ཅི་ཆན་མིང་རིན་སོགས་ཀྱིས་གཙོས་པའི་འབྲེལ་ཡོད་འགོ་ཁྲིད་དང་དཔྱད་འདེམ་པ། སྐུ་མགྲོན་སོགས་མི་200ལྷག་མཛད་སྒོར་ཞུགས་ཡོད།

མཚོ་སྔོན་བོད་ཡིག་གསར་འགྱུར་ཁང་གི་སྤྱི་ཁྱབ་རྩོམ་སྒྲིག་པ་བན་དེ་ཚེ་རིང་གིས་གསུང་བཤད་གནང་བཞིན་པ།

རྒྱལ་ཡོངས་བོད་ཀྱི་སྒྲུང་ཐུང་འགྲན་སྡུར་སྐབས་དྲུག་པའི་རྩོམ་ཡིག་དཔྱད་འདེམས་ཀྱི་བླང་བྱ་ནི་བསམ་བློའི་རང་བཞིན་དང་སྒྱུ་རྩལ་རང་བཞིན་ཟུང་དུ་འབྲེལ་ཞིང་། འདྲ་མཉམ་དང་དྲང་བདེན་སྲོག་ཏུ་འཛིན་པ་དེ་ཡིན་ལ། འགྲན་བསྡུར་ཚར་རྗེས་རྩོམ་སྒྲིག་པ་ཚོས་ཡང་ཡང་གྲོས་མོལ་བྱས་མཐར། རྩོམ་རིག་ལས་གནས་སུ་མིང་དུ་གྲགས་པའི་རྩོམ་པ་པོ་དང་དཔྱད་བརྗོད་པ། རྩོམ་སྒྲིག་པ། སློབ་གྲྭ་ཆེན་མོའི་དགེ་རྒན་སོགས་མི་བདུན་ཏེ། ནུབ་བྱང་མི་རིགས་སློབ་གྲྭ་ཆེན་མོའི་དགེ་རྒན་བདུད་ལྷ་རྒྱལ་དང་། རྩོམ་པ་པོ་འབྲོང་བུ་རྡོ་རྗེ་རིན་ཆེན།《སྦྲང་ཆར།》རྩོམ་སྒྲིག་ཁང་གི་ཆོས་སྐྱོང་། ཀྲུང་གོའི་བོད་རིག་པ་ཞིབ་འཇུག་ལྟེ་གནས་ཀྱི་ལྷ་བྱམས་རྒྱལ། མཚོ་སྔོན་དགེ་འོས་སློབ་གྲྭ་ཆེན་མོའི་དགེ་རྒན་ཚེ་དཔལ་སྟོབས་ལྡན། ཀན་སུའུ་མི་རིགས་དགེ་འོས་སློབ་ཆེན་གྱི་དགེ་རྒན་དཔལ་ལྡན་རྒྱ་མཚོ། མཚོ་སྔོན་མི་རིགས་སློབ་གྲྭ་ཆེན་མོའི་དགེ་རྒན་པད་མ་རྣམ་རྒྱལ་བཅས་ལས་གྲུབ་པའི་དཔྱད་འདེམས་ཚོ་ཆུང་སྒྲིག་འཛུགས་བྱས་ཤིང་། 《མཚོ་སྔོན་བོད་ཡིག་གསར་འགྱུར།》སྟེང་བཀོད་ཟིན་པའི་རྩོམ་ཡིག་རྣམས་དཔྱད་འདེམས་པ་བདུན་པོའི་ཕྱག་ཏུ་ཕུལ་ཏེ་ཞིབ་པར་གཟིགས་གནང་ཡོད།

རྒྱལ་ཡོངས་བོད་ཀྱི་སྒྲུང་ཐུང་འགྲན་བསྡུར་སྐབས་དྲུག་པའི་བྱ་དགའ་སྤྲོད་པའི་མཛད་སྒོའི་ཡུལ་དངོས།

སྤྱི་ལོ་2024ལོའི་ཟླ་8པའི་ཚེས་13ཉིན་དཔྱད་འདེམས་ཚོགས་པས་དྲང་པོ་དྲང་གཞག་སྒོ་ནས་དཔྱད་འདེམས་གནང་རྗེས་འགྲན་བསྡུར་གྱི་ཨང་རིམ་གསལ་བསྒྲགས་གནང་བ་རེད། ཐེངས་འདིའི་བྱ་དགའ་ཨང་དང་པོ་ནི་ཚེ་རིང་བསམ་འགྲུབ་ཀྱི《ངང་སྒུག》དང་། ཨང་གཉིས་པ་ནི་དུར་སྲི་ཡི《གསང་བའི་སྒྲོམ་ཆུང་ནང་གི་མུ་ཏིག》དང་བཙུན་ཐར་རྒྱལ་གྱི《དམར་རྒན།》གཉིས། ཨང་གསུམ་པ་ནི་གཡུ་སྒྲོན་འཚོའི《སྨག་རུམ་ཁྲོད་ཀྱི་འབོད་པ།》དང་ནམ་མཁའ་བཀྲ་ཤིས་ཀྱི《རླབས་ཀྱི་རྩེ་མོ།》གཅུང་བསྟན་བཟང་གི《ཆུ་ལྷམ།》གསུམ་བཅས་ཡིན་པ་རེད།

ད་ལོའི་རྒྱལ་ཡོངས་བོད་ཀྱི་སྒྲུང་ཐུང་འགྲན་བསྡུར་ནི་མཚོ་སྔོན་བོད་ཡིག་གསར་འགྱུར་ཁང་དང་མཚོ་སྔོན་ཞིང་ཆེན་རྩོམ་པ་པོ་མཐུན་ཚོགས། མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་ཞིན་ཧེ་རྫོང་རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས་བཅས་ཀྱིས་མཉམ་དུ་གཉེར་བའི་རྒྱལ་ཡོངས་རང་བཞིན་གྱི་རྩོམ་རིག་འགྲན་བསྡུར་ཞིག་ཡིན་ལ། ཐེངས་འདིའི་རྩོམ་ཡིག་འགྲན་བསྡུར་གྱི་རྩོམ་ཡིག་སྤེལ་ཡུན་ནི་སྤྱི་ལོ་2023ལོའི་ཟླ་3པའི་ཚེས་1ཉིན་ནས་2024ལོའི་ཟླ་6པའི་ཚེས་30ཉིན་བར་ཏེ་བསྡོམས་པས་ལོ་གཅིག་དང་ཟླ་བ་དྲུག་ཡིན་ཞིང་། དེའི་རིང་བོད་ལྗོངས་དང་མཚོ་སྔོན། སི་ཁྲོན། ཀན་སུའུ་སོགས་ལས་སྒྲུང་ཐུང་200ལྷག་འབྱོར་ཡོད་ལ། དེ་དག་རེ་རེ་བཞིན་རྩོམ་སྒྲིག་པས་ཞིབ་ཀྱིས་བཀླགས་ཤིང་ཞུས་ཐེངས་དང་པོ་དང་གཉིས་པ། མཐའ་ཞུས་སོགས་བཏང་བ་བརྒྱུད《མཚོ་སྔོན་བོད་ཡིག་གསར་འགྱུར།》སྟེང་རྩོམ་ཡིག་འབྱོར་བའི་སྔ་གཞུག་ལྟར་བསྡོམས་པས་རྩོམ་ཡིག་61སྤེལ་ཡོད།

བྱ་དགའ་ཨང་དང་པོ་ཐོབ་མཁན་ལ་བྱ་དགའ་སྤྲོད་བཞིན་པ།

བྱ་དགའ་ཨང་གཉིས་པ་ཐོབ་མཁན་ལ་བྱ་དགའ་སྤྲོད་བཞིན་པ།

བྱ་དགའ་ཨང་གསུམ་པ་ཐོབ་མཁན་ལ་བྱ་དགའ་སྤྲོད་བཞིན་པ།

ཐེངས་འདིའི་རྩོམ་ཡིག་འགྲན་བསྡུར་ལ་མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་ཞིན་ཧེ་རྫོང་གི་སྦྱིན་བདག་སྐལ་བཟང་ཐུབ་བསྟན་ལགས་ཀྱིས་མ་དངུལ་གྱིས་རྒྱབ་སྐྱོར་ཆེན་པོ་གནང་ཞིང་། མཚོ་སྔོན་ཧྲན་ཡོན་ལམ་ཟམ་འཛུགས་སྐྲུན་ཚད་ཡོད་ཀུང་སིས་རོགས་སྒྲུབ་གནང་། བྱ་དགའ་ཐོབ་མཁན་ཨང་དང་པོ་ལ་སྒོར་10000དང་། ཨང་གཉིས་པ་ལ་སོ་སོར་སྒོར་8000 ཨང་གསུམ་པར་སོ་སོར་སྒོར་6000བཅས་སྤྲད་ཡོད། བརྩམས་ཆོས་དེ་དག་གིས་རྩོམ་རིག་གི་ཕྱོགས་ནས་བོད་འབྲེལ་ས་ཁུལ་གྱི་མཛེས་སྡུག་ལྡན་པའི་འཚོ་བ་ཞིབ་འབྲི་བྱས་ཡོད་པ་མ་ཟད། ཕུན་སུམ་ཚོགས་པའི་མི་སྒེར་གྱི་བརྩེ་སེམས་དང་ཐུན་མོང་མ་ཡིན་པའི་མཛེས་རིག་གི་མཐོང་རྒྱར་བརྟེན་ནས་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་རྒྱལ་ཡོངས་དང་འབྲེལ་བ་ཡོད་པའི་བོད་འབྲེལ་ས་ཁུལ་ལ་ཆབ་སྲིད་དང་། དཔལ་འབྱོར། རིག་གནས། སྤྱི་ཚོགས། འབྱུང་ཁམས། གྲོང་གསེབ་དར་སྤེལ་སོགས་ཕྱོགས་གང་ཅིའི་ཐད་ནས་ཐོབ་པའི་གྲུབ་འབྲས་ཆེན་པོར་བསྔགས་བརྗོད་བྱས་ཡོད། 

དེ་དང་ཆབས་ཅིག མཚོ་སྔོན་བོད་ཡིག་གསར་འགྱུར་ཁང་གིས་མཚོ་སྔོན་དགེ་འོས་སློབ་གྲྭ་ཆེན་མོའི་མི་རིགས་དགེ་འོས་སློབ་གླིང་གི་སློབ་མར་མཚོ་སྔོན་བོད་ཡིག་གསར་འགྱུར་ཐོག་ཆེད་དུ་རྩོམ་ཡིག་ཆེད་བསྒྲིགས་པར་ངོས་བཟོས་ནས་ཁོང་ཚོར་རྩོམ་རིག་གསར་རྩོམ་གྱི་ཞིང་ས་བསྐྲུན་ཞིང་ཚགས་པར་སྦྱིན་པར་མ་ཟད། སློབ་གྲོགས་ཉི་ཤུ་ལ་ཕུལ་བྱུང་དཔེ་ཀློག་པའི་དཔང་ཡིག་བསྩལ་བ་དང་མུ་མཐུད་གསར་རྩོམ་དང་དཔེ་ཀློག་གི་ལས་ལ་ཧུར་ཐག་ངང་འཇུག་པར་སྐུལ་ལྕག་བྱས་ཡོད། །