དེ་ཡང་མི་རིགས་གང་དང་གང་ཞིག་ཡིན་ཡང་འཕེལ་རྒྱས་དང་སྔོན་ཐོན་ཕྱོགས་སུ་འགྲོ་དགོས་ན། ཐོག་མར་མི་རིགས་རང་ཉིད་ཀྱི་སྐད་ཡིག་རྨང་གཞིར་གནང་ཐོག་མི་རིགས་གཞན་གྱི་ལག་ཆ་བསྡུ་ལེན་བྱས་ན། ད་གཟོད་མི་རིགས་ཀྱི་གོམས་སྲོལ་དང་རིག་གནས་སོགས་འཕེལ་རྒྱས་འབྱུང་སྲིད། མི་རིགས་ཀྱི་རིག་གནས་ལ་མཐོང་ཆེན་དང་གུས་བཀུར་བྱེད་ནས་གོ་ལ་ཆེན་པོ་འདིའི་སྟེང་དུ་ཡུན་རིང་གནས་དགོས་ན་ཐོག་མར་མི་རིགས་རང་ཉིད་ཀྱི་སྐད་ཡིག་ལ་བརྟེན་དགོས།  དེ་ལྟར་ཡིན་ཡང་ད་ལྟའི་སྤྱི་ཚོགས་སུ་མི་རྣམས་ཀྱིས་བོད་ཡིག་ཤེས་བ་ཙམ་གྱིས་སྤྱི་ཚོགས་ལ་ཞབས་འདེགས་བཟང་པོ་ཞུ་མི་ཐུབ་ལ་རང་ཉིད་ལའང་མདུན་ལམ་རྒྱ་ཆེན་པོ་མེད་ཅེས་བསམ་བློ་མཁྲེགས་འཛིན་བྱས་ནས་བོད་ཡིག་གི་བྱ་བར་བརྩོན་པ་ཉིན་མོའི་སྐར་མ་བཞིན་དུ་ཧ་ཅང་དཀོན་པ་མིག་མཐོང་ལག་ཟིན་ཡིན་ཏེ། སློབ་གྲྭ་ཆེན་མོ་ལས་མཐར་ཕྱིན་ནའང་རྫོང་དང་གྲོང་ཁྱེར་ནས་བོད་ཡིག་གི་བྱ་བ་ལས་ས་མེད་པས་གཞི་རིམ་དུ་འགྲོ་དགོས་བ་སོགས་ཁུངས་ལུང་མེད་པའི་འཆལ་གཏམ་དག་བརྗོད་བཞིན་ཡོད། དེ་ཡང་དྲང་མོ་བཤད་ན། རང་རེ་བོད་ཀྱི་སྐད་ཡིག་ལ་བཀོལ་སྤྱོད་ཀྱི་ཁྱབ་རྒྱ་ཧ་ཅང་ཆུང་བ་འདི་བོད་ཡིག་གི་གོ་མ་ཆོད་པ་རྩ་བ་ནས་མ་ཡིན་ལ་བོད་ཡིག་ལ་རང་སྟེང་ནས་དོན་དངོས་ཀྱི་རིན་ཐང་མེད་པ་དེ་བས་ཀྱང་མིན། དངོས་སུ་བོད་པའི་རྗེས་རབས་པ་ང་ཚོས་གོ་མ་ཆོད་པ་རེད། ཅིའི་ཕྱིར་ཞེ་ན། འཛམ་གླིང་གི་སྔོན་ཐོན་སུ་གྲགས་པའི་ཨ་མེ་རི་ཀ་སོགས་སྔོན་ཐོན་རྒྱལ་ཁབ་རྣམས་ཀྱི་ཀྱང་བོད་ཀྱི་རིག་གཞུང་ལ་ཁུངས་ལུང་དང་ཚན་རིག་གི་རང་བཞིན་ལྡན་པ་ཁས་བླངས་བ་མ་ཟད། བོད་ཀྱི་སྐད་ཡིག་ཞིབ་འཇུག་དང་ཞིབ་འཇུག་བྱེད་པའི་ལས་ཁུངས་ཀྱང་དངོས་སུ་བཙུགས་ཡོད་པ་བཅས་ལ་གཞིགས་ན། བོད་ཡིག་གིས་འཛམ་གླིང་གི་སྟེགས་བུའི་སྟེང་གོ་གནས་གལ་ཆེན་བཟུང་ཡོད་པ་བདེན་དཔང་བྱེད་ཆོག གཞན་ད་དུང་མི་རིགས་འདི་གོ་ལ་འདིའི་སྟེང་དུ་ཡུན་རིང་དུ་གནས་དགོས་ན། གཙོ་བོ་མི་རིགས་རང་གི་སྐད་དང་ཡི་གེ་ལ་རག་ལས་ཡོད་པ་དང༌། བློ་མཐུན་སི་ཏ་ལེན་གྱིས་མང་ཚོགས་ཁྲི་འབུམ་མང་པོས་མི་རིགས་རང་ཉིད་ཀྱི་སྐད་དང་ཡི་གེ་བེད་སྤྱོད་བྱས་ན། མི་རིགས་དེའི་རིག་གནས་ལ་སོགས་པ་ཡར་ཐོན་ཆེན་པོ་ཡོང་ཐུབ་ཅེས་གསུངས་བ་མ་ཡིན་ནམ། དེ་ལྟར་ཡིན་ཡང༌། བོད་ལྭ་གྱོན་པའི་ཕྱི་གླིང་བ་སྐོར་ཞིག་གིས་བོད་ཀྱི་སྐད་ཡིག་ལ་ངན་སྨྲས་དང་མཐོང་ཆུང་བྱེད་པ་མ་ཟད།  རྗེས་ལུས་ཀྱི་ཡི་གེ་རེད་ཅེས་མཚང་འབྲུལ་བ་མཐོང་སྣང་སུ་གྲུབ། དེ་ནི་ཁོ་ཚོས་བོད་ཀྱི་སྐད་ཡིག་གི་རིན་ཐང་དང་ངོ་བོ། རྒྱབ་ལྗོངས་དང་གནས་བབས་སོགས་མ་རྟོགས་པ་ལས་བོད་ཀྱི་སྐད་ཡིག་འདི་རྗེས་ལུས་ཡིན་པ་ག་ལ་ཡིན། ངོ་མ་བོད་ཀྱི་སྐད་ཡིག་འདི་རྗེས་ལུས་ཡིན་པ་བདེན་ན།  སྔོན་ཐོན་རྒྱལ་ཁབ་རྣམས་ཀྱིས་མི་རིགས་གཞན་གྱི་རིག་གནས་མི་སྦྱངས་བར་རྗེས་ལུས་ཀྱི་ཡི་གེ་འདི་སྦྱངས་དོན་མེད་ལ། ཞིབ་འཇུག་དང་རྟོགས་དཔྱོད་བྱེད་པའི་དགོས་བ་དེ་བས་ཆུང༌།  ངས་འདི་ལྟར་བརྗོད་པ་ཕྱོགས་ཞེན་གྱི་བསམ་བློས་བཅིངས་བ་མིན་ལ་མི་རིགས་གཞན་གྱི་རིག་གནས་སྦྱངས་མི་དགོས་ཟེར་བ་དེ་བས་ཀྱང་ཡོད་པར་མ་ཡིན་ནོ།།