སྤྱི་ཟླ་10ཚེས་21ཉིན། དཀར་མཛེས་ཁུལ་འབའ་ཐང་རྫོང་གིས་ཞིང་འབྲོག་མང་ཚོགས་ཀྱི་སྲོལ་རྒྱུན་ལག་ཤེས་འགྲན་བསྡུར་སྤེལ་འགོ་བཙུགས་ཡོད་པ་དང་། འབའ་ཐང་རྫོང་གི་ཤང་གྲོང་ཁག་ནས་ཡོང་བའི་ལག་ཤེས་བཟོ་རྩལ་པ་42ཀྱིས་ལག་ཤེས་འདྲ་མིན་དང་ལག་ཆ་སྣ་ཚོགས་འཁྱེར་ནས་དགའ་སྤྲོའི་ངང་འགྲན་སྡུར་ལ་ཞུགས་པར་སླེབས་ཡོད།

ཤེས་རྟོགས་བྱུང་བར་གཞིགས་ན། འགྲན་བསྡུར་ཆེན་མོ་དེ་ཚེས་25ཉིན་བར་སྤེལ་རྒྱུ་ཡིན་ཞིང་། གཙོ་བོར་ཤིང་བཟོ་དང་འཚེམ་བཟོ། འཁེལ་འཐག །མཛེས་རིས། ས་རྡོའི་བཟོ་རྩལ་བཅས་ཁག་ལྔའི་འགྲན་བསྡུར་བྱ་རྒྱུ་དང་། དམངས་ཁྲོད་ལག་ཤེས་བཟོ་རྩལ་ལྟེ་བར་བཟུང་སྟེ་ས་གནས་ཀྱི་དམངས་ཁྲོད་བཟོ་རྩལ་གྱི་ཐོན་ཁུངས་འཚོལ་ཞིབ་དང་། འགྲན་བསྡུར་གྱི་རྣམ་པར་བརྟེན་ནས་ས་གནས་ཀྱི་དམངས་ཁྲོད་བཟོ་རྩལ་གྱི་སྤྱོད་སྒོ་ཇེ་ལེགས་དང་ཇེ་ཡངས་སུ་གཏོང་རྒྱུ་རེད། འགྲན་ཞུགས་པ་རྣམས་ལ་སྒོར་ཁྲི་བཅུ་ལྷག་གི་གཟེངས་བསྟོད་བྱ་དགའ་གྲ་སྒྲིག་བྱས་ཡོད་པར་མ་ཟད། ད་དུང་འབའ་ཐང་གི་ཤང་གྲོང་བཟོ་བོ་ཞེས་པའི་མཚན་སྙན་སྩོལ་རྒྱུ་རེད་ལ། འབའ་ཐང་དམངས་ཁྲོད་སྒྱུ་རྩལ་ལས་ཤག་དང་འབའ་ཐང་དམངས་ཁྲོད་སྒྱུ་རྩལ་འཛུགས་སྐྱོང་རྣམ་གྲངས་རུ་ཁག་སོགས་སུ་ཞུགས་པའི་གོ་སྐབས་ཀྱང་ཡོད།

གསར་སྐྲུན་རང་བཞིན་གྱི་བརྗེ་སྒྱུར་དང་གསར་གཏོད་རང་བཞིན་གྱི་འཕེལ་རྒྱས་རྒྱུན་འཁྱོངས་བྱ་དགོས་ཞེས་པ་ནི་ཏང་གི་ཚོགས་ཆེན་ཉི་ཤུ་པའི་སྙན་ཞུའི་ནང་བཏོན་པའི་ཀྲུང་ཧྭ་ཡི་ཕུལ་བྱུང་སྲོལ་རྒྱུན་རིག་གནས་རྒྱུན་འཛིན་བྱེད་པའི་བླང་བྱ་གལ་ཆེན་ཞིག་ཡིན། འབའ་ཐང་རྫོང་གིས་བླང་བྱ་འདི་ལག་བསྟར་དོན་འཁྱོལ་བྱ་ཆེད་ཆེད་མངགས་འགྲན་བསྡུར་འདི་སྤེལ་བ་ཞིག་ཡིན་པ་དང་། དེས་གཅིག་ནས་དམངས་ཁྲོད་བཟོ་རྩལ་ལ་དུས་རབས་གསར་པའི་གསོན་ཤུགས་རྒྱས་པར་བྱེད་པ་དང་། གཉིས་ནས་དམངས་ཁྲོད་བཟོ་རྩལ་དེ་ཤེས་དཔལ་ལྡན་པའི་ཡུལ་སྲོལ་དར་སྤེལ་དང་ཤང་གྲོང་དར་རྒྱས་ལ་རམ་འདེགས། རིག་གནས་ཀྱི་བློ་སྤོབས་ཆེ་རུ་གཏོང་བ། མི་རིགས་ཀྱི་སྙིང་སྟོབས་གཅིག་ཏུ་འགྲིལ་བར་བྱེད་པ་བཅས་ཀྱི་གཞི་རྟེན་གལ་ཆེན་ཞིག་ཏུ་འགྱུར་ཐབས་བྱས་ཡོད། 

དམངས་ཁྲོད་བཟོ་རྩལ་ནི་ཀྲུང་ཧྭ་ཡི་ཕུལ་བྱུང་སྲོལ་རྒྱུན་རིག་གནས་ཀྱི་གྲུབ་ཆ་གལ་ཆེན་ཞིག་ཡིན་པ་མ་ཟད། མང་ཚོགས་ཀྱི་འཚོ་བའི་ཁྲོད་ལས་བྱུང་བའི་ཤེས་རབ་ཀྱང་ཡིན། དེ་ས་གནས་ཀྱི་སྤྱི་ཚོགས་འབྲེལ་བ་དང་ལོ་རྒྱུས་རིག་གནས། རང་བྱུང་སྐྱེ་ཁམས་སོགས་དང་དམ་པོར་འབྲེལ་ཡོད། 

ཉེ་བའི་ལོ་ཤས་རིང་། འབའ་ཐང་རྫོང་གིས་འབའ་ཐང་རང་ལ་གཞི་ཚུགས་ཤིང་གོང་འཕེལ་བྱུང་བའི་ཐོན་ཁུངས་རྣམས་སྔོག་འདོན་དང་དེ་དག་ལ་ནུས་པ་སྩོལ་རྒྱུར་གཞོལ་བཞིན་ཡོད། མིག་སྔའི་བར། བྱ་གཞག་མཉམ་གཏོད་རོགས་ཟླ་17ཡིད་འགུག་བྱས་ཡོད་པ་དང་། ས་གནས་ཀྱི་ལས་སྒུག་གཞོན་ནུ་13ལས་ཞུགས་ཐུབ་རྒྱུར་སྐུལ་ཁྲིད་བྱས་པ། སྤྱི་ཚོགས་གཙོ་གཟུགས་9ཡིད་འགུག་དང་དེར་གཞི་ཚུགས་པར་བྱས་ཤིང་། 2023ལོར་ཁྲོམ་རའི་ཚོང་གཉེར་ཡོང་འབབ་ཁྱོན་སྒོར་ཁྲི་356མངོན་འགྱུར་བྱུང་ཡོད། 2024ལོར་ས་གནས་ཀྱི་ཐོན་ལས་རྣམ་གྲངས་7ལ་ཇུས་འགོད་མཛེས་སྤྲོས་བྱས་ཏེ་ལག་བསྟར་བྱས་པར་ཁྱོན་མ་དངུལ་སྒོར་ཁྲི་5105བཏང་བ་དང་། ས་ཁོངས་ཀྱི་ཁྱད་ལྡན་སྤྱི་པའི་སྤུས་རྟགས“སྐྱིད་པའི་འབའ་ཐང”ཞེས་པ་བཏོད་པ་དང་འབྲེལ། སྤུས་རྟགས་དེར་བརྟེན་ནས་སྣེ་ཁྲིད་དང་གཉེར་སྐྱོང་མཐའ་འཁྱོངས་བྱས་ཏེ། ཞོར་གཏོགས་ཀྱི“སྐྱིད་པའི་གནས་ཚང་”དང“ཨ་མ་སྐྱིད་པོ”ཞེས་པ་སོགས་ཚུད་པའི་ས་གནས་དེ་གའི་ཁྱད་ལྡན་ཐོན་རྫས་ཀྱི་སྤུས་རྟགས་3རིམ་བཞིན་བཏོད་ཡོད། །