སྤྱི་ཟླ་11པའི་ཚེས་5ཉིན། དཀར་མཛེས་ཁུལ་གྱི་2024ལོའི“119མེ་ཟོན་དྲིལ་བསྒྲགས་ཟླ་བའི”གཙོ་དོན་བྱེད་སྒོའི་འགོ་ཚུགས་མཛད་སྒོ་དར་མདོ་གྲོང་ཁྱེར་མཛའ་གཞས་ཐང་ཆེན་དུ་སྤེལ།

ད་ལོའི་མེ་ཟོན་དྲིལ་བསྒྲགས་ཟླ་བའི་གཙོ་དོན་ནི“དམངས་ཡོངས་ཀྱིས་མེ་ཟོན་བྱས་ནས་ཚེ་སྲོག་གཙིགས་སུ་འཛིན་པ”དེ་ཡིན། བྱེད་སྒོ་དེ་ནི་ཏང་གི་སྐབས་ཉི་ཤུ་པའི་ཀྲུང་ཨུའི་ཚང་འཛོམས་གྲོས་ཚོགས་ཐེངས་གསུམ་པའི་སྙིང་དོན་སློབ་སྦྱོང་དང་ལག་ལེན་མཐར་ཕྱིན་བསྟར་བ། ཉེན་མེད་ཐོན་སྐྱེད་དང་མེ་ཟོན་བདེ་འཇགས་སྐོར་གྱི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་བྱེད་པ། བསམ་བློ་དང་བྱ་སྤྱོད་དེ་ཀྲུང་དབྱང་དང་ཞིང་ཆེན། ཁུལ་བཅས་ཀྱི་ཐབས་ཇུས་བཀོད་སྒྲིག་ཐོག་གཅིག་གྱུར་ཏན་ཏིག་ཡོང་བ་བྱེད་པ། སྤྱི་དམངས་ཀྱི་མེ་ཟོན་བདེ་འཇགས་འདུ་ཤེས་དང་རང་སྲུང་རང་སྐྱོབ་ནུས་པ་སྔར་བས་ཆེ་རུ་གཏོང་བ། མེ་ཟོན་བདེ་འཇགས་ཀྱི་འགན་འཁྲི་དོན་འཁྱོལ་བྱ་རྒྱུར་སྐུལ་འདེད་གཏོང་བ། ཉེན་མེད་དང་འཕེལ་རྒྱས་ལ་སྤྱི་འདོམས་བྱ་རྒྱུ་མཐའ་འཁྱོངས་བཅས་བྱས་ཏེ་མེ་ཟོན་བདེ་འཇགས་ཀྱི་དྲིལ་བསྒྲགས་བྱེད་པའི་རྣམ་པ་ཟབ་མོ་ཞིག་ཧུར་ཐག་གིས་གཏོད་རྒྱུ་དེ་རེད།

བྱེད་སྒོ་དེ་ཁུལ་ཨུ་དྲིལ་བསྒྲགས་པུའུ་དང་ཁུལ་མེ་ཟོན་རོགས་སྐྱོབ་ཉིང་ལག་རུ་ཁག་གིས་གཙོ་སྒྲུབ་བྱས་པ་དང་། ཁུལ་སྤྱི་བདེ་ཅུས་དང་ཁུལ་འཚུབ་བསྟུན་དོ་དམ་ཅུས། དཀར་མཛེས་ཁུལ་ནགས་ཚལ་མེ་ཟོན་ཉིང་ལག་རུ་ཁག་སོགས་སྡེ་ཚན་གྱིས་རོགས་སྒྲུབ་བྱས།

འགོ་ཚུགས་མཛད་སྒོར་ཞབས་བྲོ་དང་གླུ་ལེན་སོགས་ལེ་ཚན་གྱིས་མང་ཚོགས་ཀྱི་ཡིད་དབང་བཀུག །བྱེད་སྒོ་སྤེལ་ཡུལ་དུ“ཏང་དང་མི་དམངས་ལ་སྙན་སེང་ཞུ་བའི”དཀར་མཛེས་མེ་ཟོན་གྱི་ལོ་ངོ་དྲུག་གི་པར་རིས་འགྲེམས་སྟོན་དང་“བྱ་སྤྱོད་སྟོང་དང་ལས་དོན་བརྒྱ”ཡི་མཉམ་འགུལ་དྲིལ་བསྒྲགས་འགྲེམས་སྟོན། “དམངས་ཡོངས་ཀྱིས་མེ་ཟོན་བྱས་ནས་ཚེ་སྲོག་གཙིགས་སུ་འཛིན་པའི”གཙོ་དོན་འགྲེམས་སྟོན་སོགས་ཀྱི་ནང་དོན་ཡག་པོ་ཡོད་པ་རེད།

ཤེས་རྟོགས་བྱུང་བར་གཞིགས་ན། ལམ་ལུགས་བསྒྱུར་བཅོས་བྱས་ནས་ལོ་དྲུག་གི་རིང་དཀར་མཛེས་ཁུལ་མེ་ཟོན་རོགས་སྐྱོབ་ཉིང་ལག་རུ་ཁག་གིས་ཁུལ་ཨུ་དང་ཁུལ་སྲིད་གཞུང་གི་འགོ་ཁྲིད་འོག་ཁུལ་ཨུའི་སྤྱིའི་ལས་ཀའི་རྣམ་པ་གཞིར་བཟུང་ནས་ཤུགས་ཡོད་རྒུས་ཉེན་ཁ་འགོག་པ་དང་རྒྱལ་ཁ་ལེན་པ། རྨང་གཞི་བརྟན་དུ་གཏོང་བ། བརྟན་བརླིང་འགན་ལེན་བཅས་བྱས་པས་དཔུང་ཁག་གི་རྣམ་པ་མུ་མཐུད་དུ་ལེགས་སུ་ཕྱིན་པ་དང་མེ་སྐྱོན་གྱི་དུས་བབ་མུ་མཐུད་བརྟན་དུ་ཕྱིན། རོགས་སྐྱོབ་ནུས་པ་རྒྱུན་མཐུད་ངང་ཆེ་རུ་ཕྱིན་པ་དང་། གཞི་རིམ་གྱི་རྨང་གཞི་རྒྱུན་མཐུད་ངང་བརྟན་དུ་ཕྱིན་པ་རེད། རིམ་ཁག་སྡེ་ཚན་ཁག་གི་ཐུན་མོང་འབད་བརྩོན་འོག་མེ་ཟོན་བདེ་འཇགས་ཀྱི་འགན་འཁྲིའི་ལམ་ལུགས་སྔར་བས་ནན་དུ་བཏང་བ་དང་མང་ཚོགས་ཀྱི་མེ་ཟོན་བདེ་འཇགས་འདུ་ཤེས་ཡོངས་ཁྱབ་ངང་ཟབ་ཏུ་ཕྱིན་ནས་རང་ཁུལ་གྱི་སྤྱི་ཚོགས་ཁྱོན་ཡོངས་ནས་བརྟན་ལྷིང་དང་མི་དམངས་བདེ་སྡོད་ལས་བརྩོན་ཡོང་ཆེད་མེ་ཟོན་བདེ་འཇགས་ཀྱི་ཁོར་ཡུག་བཟང་པོ་ཞིག་བཏོད་པ་རེད། །