ཤར་ནས་སྐྱ་རེངས་ནམ་བརྡ་བཏང་། །
བྱ་མ་བྱེ་འུས་སྐད་གཅིག་བརྒྱབ། །
དེ་དུས་ཨ་འབྲོག་རྫི་འུ་བཞེངས། །
ལུས་ལ་ན་བཟའ་དཀར་འཇམ་བཞེས། །
ཞབས་ལ་ཞབས་ཕྱགས་རྩབ་ཧྲལ་བཞེས། །
དབུ་ལ་རྩིད་ཞྭ་ནག་པོ་བཞེས། །
ཕྱག་གཡས་འུར་རྡོ་ཁྲ་ཆུང་འཁྱེར། །
ར་ཕོའི་རས་སྒོ་ཤར་ལ་ཕྱེས། །
སྐད་གཅིག་མ་བརྒྱབ་སྐད་གཅིག་བརྒྱབ། །
རྒྱ་དམར་རྒྱ་ཕྲུག་སྐད་གཅིག་འབོད། །
དམར་ནག་ཁ་སྦྱར་རྒྱན་གཅིག་གཡོགས། །
ཕུར་པ་ཙན་དན་ཕུར་པ་བཏིབ། །
འདོགས་ཐིག་ཨ་ལོང་གསུམ་བརྩེགས་བཏགས། །
ཆ་རུ་ལྕགས་ཀྱི་འགུག་ལ་དྲངས། །
དང་པོ་གདང་ས་དཀར་ནག་བཀུག །
གཉིས་པ་ན་སྤང་མཚམས་ནས་བཀུག །
གཡས་རིའི་ལྡེབས་ནས་ཀི་གཅིག་བརྒྱབ། །
གཡོན་རིའི་ལྡེབས་ནས་ཤུ་གཅིག་བརྒྱབ། །
ཀི་མ་ཤུ་ལ་མདུད་གཅིག་བརྒྱབ། །
གཡག་གུ་རོག་པོའི་རྡིག་སྒྲ་བརྒྱབ། །
སིང་ལེའི་འབྲི་མོའི་ངུར་སྒྲ་བརྒྱབ། །
དེ་དུས་ཨ་འབྲོག་ཤེ་མ་ལངས། །
ལུས་ལ་ན་བཟའ་རྒྱ་དམར་བཞེས། །
དབུ་ལ་རྒྱ་གར་དབྱར་ཞྭ་བཞེས། །
ཞབས་ལ་ཞབས་ཕྱགས་འབུ་ལྷམ་བཞེས། །
ཕད་ཚྭ་ཕད་ཁུག་ལོགས་ལ་དྲངས། །
གཅིག་གཅིག་གཉིས་གཉིས་ཚང་གཅིག་བརྒྱབ། །
རོག་པོ་རོག་པོའི་གདང་གཅིག་བཏང་། །
སྐྱུང་ཀ་ཐང་ལ་བབས་འདྲ་ཡོད། །
ཁྲ་ཁྲ་ཁྲ་ཁྲའི་གདང་གཅིག་བཏང་། །
ཁྲ་ཁྲ་ཡོས་ཆ་བརྔོས་འདྲ་ཡོད། །
མདོངས་མོ་གདོངས་མོའི་གདང་གཅིག་བཏང་། །
མདོངས་མོ་སྐར་ཆེན་ཤར་འདྲ་ཡོད། །
ཁྱུང་བཟང་རོག་མོ་མདུན་དུ་བསྐོངས། །
དཔུང་ཐིག་ཁྲ་ཆུང་ལྕགས་རོགས་བརྒྱབ། །
ཕྱག་གཡས་པདྨའི་འདབ་བརྒྱད་འཁྱེར། །
ཁ་དེ་དང་པོ་བཏང་ཙ་ན། །༼བེའུ་སླུས༽
ལྷོ་སྤྲིན་བྱང་ལ་འཁྱུག་པ་འདྲ། །
ཁ་དེ་གཉིས་པ་བཏང་ཙ་ན། །
བེའུ་མགོ་ནག་པོས་ལྕོག་ལྕོག་བྱས། །
བེའུ་གཞུག་དཀར་པོའི་གཡབ་གཡུག་བརྒྱབ། །
ཕད་ཚྭ་དཀར་པོས་མགོ་སྐོར་བཏང་། །
ཆ་རུ་ལྕགས་ཀྱི་འགུག་ལ་དྲངས། །
པདྨའི་འདབ་བརྒྱད་ས་ལ་བཙུགས། །
ཕྱག་མཛུབ་བཅུ་ཡིས་རུབ་གཅིག་བརྒྱབ། །
དཀར་པོ་འོ་མའི་དྲག་ཆར་འབབ། །
དཀར་པོ་འོ་མའི་ལྡེམ་གཅིག་བརྒྱབ། །
དཀར་པོ་རྣ་པགས་ནང་དུ་བླུགས། །
ཨ་འབྲོག་རྫི་བུའི་རྒྱབ་ཏུ་བསྐུར། །
ཡིད་འགྲོ་སྔོན་མོའི་ཆུ་ལ་གཡུགས། །
ཐབ་རྡོ་ལྷ་རོགས་སྤུན་གསུམ་བཙུགས། །
དཀར་ཟོམ་རིགས་གསུམ་མགོན་པོ་བཙུགས། །
འོ་ཟ་༼ཟ་རུ༽ཚེས་བརྒྱད་ཟླ་བ་བཙུགས། །
འོ་དྲོས་མེ་དེ་བྱ་མགོ་ཙམ། །
བྱ་མགོ་ཙམ་ལ་ཚ་སྐྱོན་ཡོད། །
ཞོ་མོ་གྲང་པའི་ལྦུ་ལ་ལྟོས། །
ཐང་སྨད་ར་ཁྱུ་གློད་འདྲ་ཡོད། །
ཚ་གྲང་སྙོམས་པའི་ལྦུ་ལ་གཟིགས། །
ལྦུ་ཆེན་བརྒྱ་དང་ལྦུ་ཆུང་སྟོང་། །
ལྦུ་ཆེན་བརྒྱ་ཡིས་རང་ཚོད་ཟིན། །
ལྦུ་ཆུང་སྟོང་གིས་སེར་མིག་གསལ། །
གསེར་མིག་སེར་པོའི་མར་ལ་འགྱུར། །
དཀོན་མཆོག་རྣམས་ལ་མཆོད་པ་ཕུལ། །
ངན་སོང་རྣམས་ལ་སྦྱིན་པ་གཏོང་། །
དར་བའི་མེ་དེ་རི་རབ་ཙམ། །
རི་རབ་ཙམ་ལ་ཚ་སྐྱོན་མེད། །
ཕྱུར་བ་དཀར་པོའི་དུང་ལ་བཏང་། །
ཨ་འབྲོག་ང་ཚོའི་འཚོ་བ་བྱས། །
ཕྱུར་ཁུ་སྔོན་མོའི་གཡུ་ལ་བཏང་། །
ཁྱི་གུ་ནག་པོའི་འཚོ་བ་བྱས། །
