སྤྱི་ཟླ་༡༡པའི་ཚེས་༢༤ཉིན། བསྟན་འཛིན་སྐ་བྲིས་གློག་རྡུལ་ཡིག་གཟུགས་འགྲེམ་སྤེལ་དང་ཁྱིམ་རྒྱུད་མེས་པོའི་བརྩམས་ཆོས་བཤམ་སྟོན་མཛད་སྒོ་ཁྲེང་ཏུའུ་གྲོང་ཁྱེར་ནས་འཚོགས་ཤིང་། ཁམས་པའི་བརྙན་འཕྲིན་ཁང་གི་འཕྲིན་སྦྱོར་ཀུན་འདུས་ཀྱི་སྟེགས་བུ་དག་བརྒྱུད་ནས་ཐད་གཏོང་བྱས་པ་རེད།

ཐེངས་འདིའི་མཛད་སྒོའི་ཐོག་མཚོ་བོད་མཐོ་སྒང་ཞིབ་འཇུག་ཚོགས་པའི་ལས་འཛིན་གཞོན་པ་བློ་བཟང་ལྷུན་གྲུབ་རྡོ་རྗེ་དང་། སི་ཁྲོན་རིག་གནས་ཐིང་གི་ཐིང་ཀྲང་གཞོན་པ་ཟུར་པ་ཚེ་རིང་མགོན་པོ། མཚོ་སྔོན་ཞིང་ཆེན་གེ་སར་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་ལྡོང་ནོར་སྡེ། མཚོ་སྔོན་དགེ་འོས་སློབ་གྲྭ་ཆེན་མོའི་སློབ་སྤྱི་གཞོན་པ་ཟུར་པ་རྒྱ་ཡེ་བཀྲ་བྷོ། ལོ་རྒྱུས་སྨྲ་བ་རྒྱལ་མོ་འབྲུག་པ་དང་། ཁ་སྒང་བཀྲ་ཤིས་ཚེ་རིང་སོགས་མཁས་པའི་དབང་པོ་མང་པོ་ཞུགས་ནས། བསྟན་འཛིན་སྐ་བྲིས་གློག་རྡུལ་ཡིག་གཟུགས་འགྲེམ་སྤེལ་དང་། གནའ་དེང་ཟུང་འབྲེལ། ཀྲུང་ཧྭ་མི་རིགས་ཀྱི་ཕུལ་བྱུང་སྲོལ་རྒྱུན་རིག་གནས་མ་ཉམས་གོང་འཕེལ་དང་། རྒྱུན་འཛིན་དར་སྤེལ་བྱ་རྒྱུའི་ཐད་ནས་དགོངས་འཆར་ལྷུག་བརྗོད་གནང་བ་རེད།

བོད་ཀྱི་ཡིག་གཟུགས་ནི་བོད་ཀྱི་སྐད་དང་རིག་གནས་ཀྱི་གྲུབ་ཆ་གལ་ཆེན་ཞིག་ཡིན་པ་དང་། བོད་ཀྱི་སྲོལ་རྒྱུན་ཡིག་གཟུགས་ནི་ཡིག་གཟུགས་མཁས་ཅན་བརྒྱད་ལས་ཡིག་གཟུགས་ཀྱི་བྲིས་རྒྱུན་ཆེན་པོ་བརྒྱད་ཆགས་པ་རེད། ༢༠༠༨ལོར་བོད་ཀྱི་ཡིག་གཟུགས་དེ་རྒྱལ་སྲིད་སྤྱི་ཁྱབ་ཁང་གི་ཆོག་མཆན་ཐོབ་པ་བརྒྱུད། ཁག་གཉིས་པའི་རྒྱལ་ཁབ་རིམ་པའི་གཟུགས་མེད་རིག་གནས་ཤུལ་བཞག་གི་མིང་གཞུང་ནང་བཅུག་ཡོད།

བསྟན་འཛིན་སྐ་བྲིས་ཀྱི་ཁྱད་ཆོས་གཙོ་བོ་ནི་འདོན་ཀློག་བདེ་བ་དང་མཛེས་ཆ་ལྡན་པ། ཤེས་སླ་བ་སོགས་ཁྱད་ཆོས་མང་པོར་ལྡན། དུས་རབས་ཀྱི་འཕེལ་ཕྱོགས་དང་བསྟུན་ཏེ། མེས་པོ་གོང་མའི་ཤུལ་བཞག་གི་ཕ་ནོར་རྩ་ཆེན་དག་མི་ཉམས་རྒྱུན་འཛིན་བྱེད་ཆེད། ལོ་འདི་དག་གི་རིང་ལ་དཀའ་སྤྱད་འབད་འབུངས་མང་དུ་བྱས་ནས། ལོ་ཆེན་སྐ་བ་དཔལ་བརྩེགས་དང་། གཏེར་སྟོན་ཨོ་རྒྱན་བསྟན་འཛིན་དང་གུ་དྲག་བསྟན་འཛིན་ཏེ་བསྟན་འཛིན་རྣམ་པ་གཉིས་ཀྱི་ཕྱག་བྲིས་འདི་ཉིད་ལ། བསྟན་འཛིན་སྐ་བྲིས་ཞེས་པའི་མཚན་གསོལ་ཏེ། དེང་རབས་གློག་རྡུལ་ལ་ཕབ་པའི་ཡིག་གཟུགས་བཞི་དང་། སྲོལ་རྒྱུན་གྱི་སྐུང་ཡིག་སྣ་མང་ཞིག་གསར་སྣོན་གྱི་ལག་རྩལ་སྤྱད་ནས་འཐུས་ཚང་བྱས་ནས། འཛམ་གླིང་ཡུལ་གྲུ་སོ་སོ་ན་བཞུགས་པའི་རྒྱ་ཆེའི་སྤྱོད་མཁན་རྣམ་པས་དྲྭ་ཐོག་ནས་རིན་མེད་སྒོས་ཕབ་ལེན་བྱེད་ཆོག་པ་གནང་འདུག

བྲིས་པ་འདི་གཉིས་ཀྱི་གསུང་ཆོས་གཙོར་མཛད་པའི་ཁྱིམ་རྒྱུད་བླ་རབས་རྣམས་ཀྱི་གསུང་ཐོར་བུ་དག་ཕྱོགས་གཅིག་ཏུ་བསྒྲིགས་ནས་ཕྱོགས་མཐར་སྤེལ་བ། ཁྱད་པར་དུ་ད་ལྟའི་བྲིས་རབས་གསུམ་པ་དག་ཕྱོགས་གཅིག་ཏུ་བསྡུས་ཏེ། ཕྱག་བྲིས་འདི་ཉིད་རྒྱུན་མི་ཆད་པའི་ཆེད་སློབ་བུ་དོན་གཉེར་ཅན་དག་ལ་ཟབ་སྦྱོང་གི་མཐུན་རྐྱེན་སྦྱར་ཏེ་བྲིས་རབས་བཞི་པ་ལྔ་པ་སོགས་སྤེལ་བ་བཅས་སྒོ་ཀུན་ནས་འབད་པ་ལྷོད་མེད་གནང་བཞིན་པའོ། །