རྟ་ནོར་ལུག་དང་ཉི་ཟླའི་དཀྱིལ་འཁོར་དང་། །

བཀྲ་ཤིས་རྟགས་བརྒྱད་ལ་སོགས་ཅིག་ཅར་དུ། །

ལྡེབས་ངོས་བཞད་པར་སྒྱུ་མ་ཡིན་དོགས་ཀྱང་། །

མ་ཡིན་འབྲོག་པའི་ཕྱག་སོར་ལྕི་བའི་རྩལ། །

ཉེ་ཆར། ནག་ཆུ་གྲོང་ཁྱེར་གསེར་རྙེད་ཆུས་ཤོ་མོང་ཤང་གདོང་སྦུག་གྲོང་ཚོའི་འབྲོག་པ་མང་ཚོགས་ཀྱིས་ལྕི་བའི་སྒྱུ་རྩལ་གསར་གཏོད་ཀྱི་དམིགས་བསལ་འགྲན་བསྡུར་ཞིག་སྤེལ་ཡོད་པ་རེད།

མཚོ་འཕགས་ཆ་སྙོམས་སྨི་4500ཡན་ཟིན་པའི་ནག་ཆུར་ལོའི་ཆ་སྙོམས་དྲོད་ཚད་-6℃ནས་-8℃བར་ཡིན་པས། མེ་བཏང་ནས་དྲོད་ལེན་པའམ་གཡོས་སྦྱོར་བྱེད་པ་ནི་ཁ་ཚ་དགོས་གཏུག་ཅིག་རེད། དེས་ན་རྩྭ་ཐང་སྟེང་གི་ནོར་གནག་གི་ལྕི་བ་ནི་འབྲོག་པ་རྣམས་ཀྱི་ཐོབ་པར་སླ་བའི་འབར་རྒྱུ་ཡིན་པར་མ་ཟད། ད་དུང་འབྲོག་ཁྱིམ་ཕལ་པའི་འཛུགས་སྐྲུན་གྱི་རྒྱུ་ཆ་ཡང་ཡིན། 

ལས་ལ་བརྩོན་ཞིང་སྤྱང་གྲུང་ལྡན་པའི་འབྲོག་པ་ཁ་ཤས་ཀྱིས་རང་ཁྱིམ་གྱི་སྒོ་འགྲམ་དུ་བཀྲ་ཤིས་པའི་རི་མོ་སྣ་ཚོགས་འཁོད་པའི་ལྕི་བའི་གྱང་བརྩིགས་ནས། སྤྱོད་གོ་ཆོད་ལ་ལྟ་ན་སྡུག་པ་ཞིག་ཡོད་པས་རྩྭ་ཐང་ཐོག་གི་ཐུན་མོང་མ་ཡིན་པའི་མཛེས་ལྗོངས་ཤིག་ཏུ་གྱུར་ཡོད།

མང་ཚོགས་ཀྱིས་རང་ཉིད་ཀྱི་འབད་བརྩོན་དང་བློ་གྲོས་ལ་བརྟེན་ནས་བདེ་སྐྱིད་ཀྱི་འཚོ་བ་གཏོད་རྒྱུར་སྔར་བས་སྐུལ་སྤེལ་གཏོང་ཆེད། གྲོང་ཚོ་དེ་གར་བཅའ་སྡོད་ལས་དོན་རུ་ཁག་དང་གྲོང་ཚོའི“ཨུ་ལྷན་གཉིས”ཀྱི་ཚན་ཁག་དང་མང་ཚོགས་ཚོས་གྲོས་བསྡུར་བྱས་པ་བརྒྱུད། ད་ཐེངས་ཀྱི་ལྕི་བའི་སྒྱུ་རྩལ་གསར་གཏོད་ཀྱི་གདེང་འཇོག་བྱེད་སྒོ་སྒྲིག་འཛུགས་བྱས་པ་རེད། 

དེའི་སྟབས་ཀྱིས། རྩྭ་ཐང་ཐོག་གི་ལྕི་བ་དག་འབྲོག་པའི་ཕྱག་སོར་གྱི་རྩེ་ན་བཞད་པའི་སྒྱུ་རྩལ་གྱི་མེ་ཏོག་ཏུ་གྱུར་ནས་རྩྭ་ཐང་དང་འབྲོག་ཁྱིམ་ལ་བརྒྱན། འབྲོག་པ་ཚོས་བཟོས་པའི“ལྕི་བའི་སྒྱུ་རྩལ”གྱི་བརྩམས་ཆོས་དེ་དག་ལྟ་ན་མཛེས་ལ་བབ་ཆགས་པ་དང་། བོད་བྱང་ཐང་འབྲོག་ཁུལ་ནས་རྙེད་པའི་བྲག་བརྐོས་རི་མོའི་གནའ་བོའི་ཉམས་འགྱུར་ཟབ་མོ་ལྡན་ཡོད་ལ། དེའི་ཁར་བཀྲག་མདངས་འཚེར་བའི་ཚོས་མདོག་བྱུགས་པས། དགུན་དུས་ཀྱི་བོད་བྱང་ཐང་གི་འབྲོག་སྡེར་དམིགས་བསལ་གྱི་མཛེས་ཉམས་ཤིག་བྱིན་ཡོད།

བྱེད་སྒོ་སྤེལ་རིང་གྲོང་ཚོར་བཅའ་སྡོད་རུ་མི་དང་། གྲོང་ཚོའི་ལས་བྱེད་པ། གྲོང་མི་བཅས་ཀྱིས་མཉམ་དུ“ལྕི་བའི་སྒྱུ་རྩལ”གྱི་བརྩམས་ཆོས་ལ་དཔྱད་འདེམ་བྱས་པ་རེད། ཨང་རིམ་ལྟར་སྒོ་རྩིས་ཚོང་ཁང་གི་ཆ་བསགས་སྤྲོད་རྒྱུ་དང་། བྱ་དགའ་ཐོབ་མཁན་མང་ཚོགས་ཀྱིས་གྲོང་ཚོའི་ནང་གི་ཆ་བསགས་དེ་དག་སྤྱད་ནས་སྒོ་རྩིས་ཚོང་ཁང་དུ་འཚོ་བའི་མཁོ་ཆས་གང་འདོད་ལྟར་བརྗེ་ཉོ་བྱ་ཆོག་པ་རེད།

གདོང་སྦུག་གྲོང་ཚོར་བཅའ་སྡོད་བོད་རང་སྐྱོང་ལྗོངས་སྲིད་གཞུང་གཞུང་དོན་ཐིང་གི་ལས་བྱེད་པ་སྐལ་བཟང་ཟླ་བ་ཡིས་ད་ཐེངས་ཀྱི་བྱེད་སྒོར་མང་ཚོགས་ཞུགས་ཚད་མང་བ་དང་ངལ་རྩོལ་ཁྲོད་ལྕི་བ་དེ་སྒྱུ་རྩལ་གྱི་རྣམ་པའི་ཐོག་ནས་ཚང་མར་མངོན་པར་བྱས་པས་ཁོར་ཡུག་མཛེས་སུ་ཕྱིན་པར་མ་ཟད། མང་ཚོགས་ཀྱི་མཛེས་སྡུག་ལྡན་པའི་འཚོ་བར་བཅངས་པའི་འདུན་པ་དེ་བས་ཆེ་རུ་ཕྱིན་སོང་ཞེས་བཤད། 

གདོང་སྦུག་གྲོང་ཚོའི་ལྕི་བ་སྒྱུ་རྩལ་གྱི་བྱ་དགའ་རིམ་པ་དང་པོ་ཐོབ་མཁན་ཟླ་སྒྲོན་གྱིས་ད་ཐེངས་ཀྱི་ལྕི་བ་གསར་གཏོད་འགྲན་བསྡུར་ཁྲོད་རང་ཉིད་ལ་བྱ་དགའ་རིམ་པ་དང་པོ་ཐོབ་པས་ཧ་ཅང་དགའ་པོ་བྱུང་ཞེས་བཤད་པ་དང་། ཁོང་གིས་ལག་ཏུ་གཟེངས་རྟགས་ཁྱེར་ནས་དགའ་སྤྲོའི་ངང་འབྲོག་པ་ཞིག་ཡིན་པའི་ངོས་ནས་ང་ཚོས་འབྲོག་ཁུལ་དང་། འབྲོག་ར། སྒོ་ཕྱུགས་བཅས་ལ་བརྟེན་ནས་འཚོ་དགོས་ལ་འདི་དག་ལའང་བརྩེ་སེམས་ཀྱིས་ཁེངས་ཡོད། བྱེད་སྒོ་སྤེལ་རིང་ང་ཚོས་ངལ་རྩོལ་ལ་བརྟེན་ནས་འབྲོག་ཁུལ་གྱི་མཛེས་སྡུག་ལྡན་པའི་འཚོ་བར་སྨོན་འདུན་ཞུ་ལུགས་མཚོན་པར་བྱས་ཡོད་ཅེས་བཤད། 

སྒོ་ཁའི་འགྲན་བསྡུར་ཆུང་ཆུང་ལ་ནུས་པ་ཆེན་པོ་ཐོན་པ་དང་ཤེས་དཔལ་ཆ་བསགས་གི་སྒོ་རྩིས་ཚོང་ཁང་ཆུང་ངུས་གཞི་རིམ་གྱི་བཅོས་སྐྱོང་ཆེན་པོར་སྐུལ་མ་ཐེབས་ཡོད། གདོང་སྦུག་གྲོང་ཚོའི་ལྕི་བའི་སྒྱུ་རྩལ་གསར་གཏོད་གདེང་འཇོག་བྱེད་སྒོ་དེས་འབྲོག་ཁུལ་གྱི་ཕུལ་བྱུང་སྲོལ་རྒྱུན་རིག་གནས་སྔོག་འདོན་དང་། ཕ་ཡུལ་དྲིལ་བསྒྲགས། ཕ་ཡུལ་འཛུགས་སྐྲུན་བཅས་བྱས་ཡོད་ལ། ཡུལ་སྲོལ་ཡ་རབས་ཀྱི་གཉེན་ཤུགས་ལ་བརྟེན་ནས་གྲོང་གསེབ་དར་རྒྱས་གཏོང་བའི་ཁོར་ཡུག་སྲ་བརྟན་དུ་གཏོང་བའི་ནུས་པ་ཆེན་པོ་ཐོན་ཡོད་པ་རེད།

བོད་བྱང་ཐང་གི་འབྲོག་སྡེ་ཆུང་ཆུང་ཞིག་གི“ལྕི་བའི་སྒྱུ་རྩལ”ལ་གཞན་དང་མི་འདྲ་བའི་ཁྱད་ཆོས་ཤིག་མངོན་ཡོད། །