སྤྱི་ཟླ་12པའི་ཚེས་5ཉིན། ཛཾ་ལྷའི་ནོར་གླིང་གི་སྣ་མང་རིག་གནས་སྒྱུ་རྩལ་འགྲེམ་སྟོན་ཀོང་ཏུང་ཞིང་ཆེན་ཁྲའོ་ཀྲོའུ་མཛེས་རྩལ་ཁང་ནས་འགོ་ཚུགས། ཐེངས་འདིའི་འགྲེམ་སྟོན་ཉིན་སོ་གསུམ་རིང་སྤེལ་རྒྱུ་དང་། ཀྲུང་གོའི་དམངས་ཁྲོད་སྒྱུ་རྩལ་གྱི་ཕ་སའི་མཚན་སྙན་ཐོབ་པའི་འཛམ་ཐང་གི་མངོན་མིན་རིག་གནས་ཀྱི་བརྩམས་ཆོས་བརྒྱ་ལྷག་བཤམས་སྟོན་བྱས་ཏེ། ལྟད་མོ་ཚོར་གངས་ཅན་མཐོ་སྒང་གི་ལོ་རྒྱུས་ཀྱི་བྲོ་བ་མ་ཉམས་པའི་རིག་གནས་དགྱེས་སྟོན་རོལ་མྱོང་བྱེད་དུ་འཇུག་པ་རེད།
ཐེངས་འདིའི་ཛཾ་ལྷའི་ནོར་གླིང་གི་སྣ་མང་རིག་གནས་སྒྱུ་རྩལ་འགྲེམ་སྟོན་ནི་འཛམ་ཐང་རྫོང་དང་ཀོང་ཏུང་བར་ས་ཁུལ་མཉམ་ལས་ཀྱི་རིག་གནས་དྲིལ་བསྒྲགས་དང་སྤེལ་རེས་བྱེད་སྒོ་ཐོག་མ་ཡིན་ལ། འཛམ་ཐང་མངོན་མིན་རིག་གས་བརྒྱུད་སྦྱོང་ལྟེ་གནས་ཀྱིས་ལོ་མང་རིང་ས་གནས་སོ་སོ་ནས་མངོན་མིན་རིག་གནས་འགྲེམ་སྟོན་གྱི་རྒྱུན་བསྐྱངས་པ་ཡིན་པར་མ་ཟད། མི་རིགས་མཐུན་སྒྲིལ་ཡར་ཐོན་བྱ་གཞག་གི་མིག་དཔེ་ལྟ་ས་ཡང་ཡིན་པ་རེད།
འཛམ་ཐང་རྫོང་གིས་མངོན་མིན་རིག་གནས་སྒྱུ་རྩལ་རྒྱུན་འཛིན་བྱེད་པ་དང་ཆབས་ཅིག །དུས་རབས་ཀྱི་འགྲོས་དང་བསྟུན་ནས་སྲོལ་རྒྱུན་མཛེས་རྩལ་དང་ལག་རྩལ་སོགས་མངོན་མིན་རིག་གནས་ཀྱི་ཐོན་ཁུངས་བེད་སྤྱོད་གང་ལེགས་བྱས་ཏེ། ཚོང་ལས་དང་ཐོན་ལས་ཅན་སྔོག་འདོན་བྱེད་པ་དང་། མངོིན་མིན་རིག་གནས་ལ་གསོན་ཤུགས་གསར་པ་བསྩལ་བའི་འཕེལ་རྒྱས་ལམ་བུ་འཚོལ་སྙེག་བྱས་ནས། རིག་གནས་ལ་བརྟེན་ནས་འཕེལ་རྒྱས་གཏོང་བ་དང་། རིག་གནས་དང་ཡུལ་སྐོར་མཉམ་འདྲེས་ཟབ་མོ་བྱས་ཏེ། གྲོང་གསེབ་དར་རྒྱས་དང་ས་གནས་དཔལ་འབྱོར་འཕེལ་རྒྱས་ལ་རམ་འདེགས་གནང་བཞིན་ཡོད།
ཐེངས་འདིའི་མངོན་མིན་རིག་གནས་བརྩམས་ཆོས་འགྲེམ་སྟོན་ཐོག །ཐང་ག་དང་རྫ་ཆས། ཤིང་བརྐོས། ཟངས་ཆས། གཙེག་དྲུབ། བོད་ཤོག །བོད་སྤོས། སྨན་རྫས། ས་གདན། བོད་ལྭ་སོགས་ཁྱབ་ཁོངས་མང་པོ་འདུས་ཡོད། བརྩམས་ཆོས་རེ་རེའི་ཐོག་ནས་འཛམ་ཐང་གི་མངོིན་མིན་རིག་གནས་རྒྱུན་འཛིན་མཁན་གྱི་ལག་རྩལ་ཉིང་བཅུད་མཚོན་ཡོད། དེ་དག་མངོན་མིན་རིག་གནས་ཀྱི་སྲོལ་རྒྱུུན་ལག་རྩལ་ཙམ་མ་ཡིན་པར་རིག་གནས་བརྩམས་ཆོས་གསར་གཏོད་ཀྱི་གྲུབ་འབྲས་ཀྱང་ཡིན་པ་རེད། །
