༄༅། །རྒྱལ་པོ་ལོ་གསར།
ཚེས་གཉིས་ཉིན་རྒྱལ་པོ་ལོ་གསར་ཞེས་གཞུང་གི་དགུང་གསར་མཛད་སྒོ་དངོས་གཞི་ཡིན་པས་དེ་ཉིན་གཞུང་ཞབས་སྐྱ་སེར་རྣམས་ཀྱི་ཐོག་ནང་གཟན་ཡན་རྩེ་ཕོ་བྲང་དུ་མཛད་སྒོར་བཅར་དགོས་པའི་ཁར། ཡབ་གཞིས་སྐུ་ངོ་རྣམས་ཀྱང་གདན་ཞུ་གནང་གི་ཡོད་པ་དང་། ལྷ་སྡོད་གོར་ཁའི་སྐུ་ཚབ་དང་འབྲུག་ལོ་ཆག་པ་སོགས་ཀྱང་དགུང་གསར་རྟེན་འབྲེལ་ཞུ་བར་བཅར་སྲོལ་ཡོད་པ་བཅས་མཛད་སྒོ་དང་དབུ་ཚུགས་ཏེ་གསོལ་ཇ་དང་པོ་བསྐྱགས་ཟིན་པ་དང་། ཡོངས་འཛིན་སྐུ་བགྲེས་ཀྱིས་མཎྡལ་ལ་ལྗགས་བཤད་དང་འབྲེལ་གོང་ས་ཆེན་པོར་མཎྡལ་སྐུ་གསུང་ཐུགས་རྟེན་དང་འབྲེལ་རྣམ་གྲྭ་གསུང་ཞབས་པའི་ཞལ་འདོན་ཚིག་མཚམས་དང་བསྟུན་རྟགས་བརྒྱད། རྫས་བརྒྱད་རིམ་འབུལ་མཛད། དེ་ནས་མཛད་བཅར་ཡོངས་རྫོགས་མཇལ་ཁ་ཞུས་རྗེས་གཞུང་གི་དགུང་གསར་ལེགས་འབུལ་སྤྱན་ལམ་དུ་བསྟར་འབུལ་ཞུས་པ་དང་མུ་མཐུད་བཀྲ་ཤིས་ལྷུན་བླ་བྲང་སོགས་བླ་བྲང་ཆེ་ཁག་དང་། གོར་འབྲུག་སོགས་ཀྱི་དགུང་གསར་ལེགས་འབུལ་རིམ་བཞིན་བསྟར་འབུལ་ཞུས། དེ་ནས་རྩེ་ཞོད་ཞབས་གསར་བ་བཞིས་གསར་མཇལ་ཞུ་རྒྱུ་བཅས་ཀྱི་བར་སེང་དུ་གསོལ་ཇ། བཞེས་འབྲས། གསོལ་བསྐང་ཞེས་གསོལ་ཚིགས་སོགས་རིམ་འབུལ་དང་། གར་ཕྲུག་པས་གར་འདྲ་མིན་ཁག་གསུམ་དང་། འབྲས་གླིང་གཞིས་ཁོངས་ནས་གནའ་ལུགས་ཀྱི་གཞས་འཆམ་འཁྲབ་འབུལ་ཞུ་བཅས་མཛད་སྒོ་གཟབ་ཅིང་རྒྱས་པ་གནང་གི་ཡོད་པ་འདིར་མཚོན་པ་ཙམ་ལས། ཞིབ་ཕྲ་འགོད་ཀྱིས་མིང་ལང་།
