2015ལོའི་ཟླ་བ་8པའི་ཚེས་24ཉིན་ནས་ཚེས་25ཉིན་བར་། ཀྲུང་དབྱང་གི་བོད་ལྗོངས་ལས་ཀའི་སྐོར་གྱི་བཞུགས་མོལ་ཚོགས་འདུ་ཐེངས་དྲུག་པ་དེ་རྒྱལ་ས་པེ་ཅིང་དུ་འཚོགས་ཤིང་། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུའི་ཀྲུའུ་ཞི་ཞི་ཅིན་ཕིང་ཚོགས་འདུར་ཕེབས་པ་དང་འབྲེལ་གསུང་བཤད་གལ་ཆེན་གནང་། ཞི་ཅིན་ཕིང་གིས་ཏེན་ཞའོ་ཕིང་གི་རིགས་པའི་གཞུང་ལུགས་དང་། མཚོན་བྱེད་གསུམ་གྱི་དགོངས་པ་གལ་ཆེན། ཚན་རིག་དང་མཐུན་པའི་འཕེལ་རྒྱས་ལྟ་བ་བཅས་མཛུབ་ཁྲིད་དུ་བྱས་ཏེ་ཕྱོགས་ཡོངས་བཞིའི་འཐབ་ཇུས་བཀོད་སྒྲིག་རྒྱུན་འཁྱོངས་དང་། ཏང་གི་བོད་སྐྱོང་ཇུས་ཆེན་རྒྱུན་འཁྱོངས་བྱས་ཏེ་མེས་རྒྱལ་གཅིག་གྱུར་སྲུང་སྐྱོང་དང་མི་རིགས་མཐུན་སྒྲིལ་ལ་ཤུགས་སྣོན་རྒྱག་རྒྱུ་དེ་ལས་ཀའི་དམིགས་ས་དང་ཤུགས་རྒྱག་གནས་སུ་བརྩིས་ཏེ་བློ་བརྟན་འགྱུར་མེད་ཀྱི་སྒོ་ནས་ཁ་བྲལལ་ལ་ངོ་རྒོལ་བྱེད་པའི་འཐབ་རྩོད་སྤེལ་བ་དང་། བློ་བརྟན་འགྱུར་མེད་ཀྱི་སྒོ་ནས་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་འདེད་གཏོང་བ། བློ་བརྟན་འགྱུར་མེད་ཀྱི་སྒོ་ནས་དམངས་འཚོ་འགན་ལེན་དང་ལེགས་སུ་གཏོང་བ། བློ་བརྟན་འགྱུར་མེད་ཀྱི་སྒོ་ནས་མི་རིགས་ཁག་འགྲོ་འོང་དང་། སྤེལ་རེས། མཉམ་འདྲེས་བཅས་ལ་སྐུལ་འདེད་གཏོང་བ་བཅས་བྱས་ཏེ་རྒྱལ་ཁབ་ཀྱི་བདེ་འཇགས་དང་ཡུན་རིང་བདེ་འགོད་འགན་ལེན་དང་། དཔལ་འབྱོར་དང་སྤྱི་ཚོགས་རྒྱུན་མཐུད་དང་། སྐྱོན་བྲལ་ངང་འཕེལ་རྒྱས་འགྲོ་རྒྱུ་འགན་ལེན། མི་རིགས་ཁག་གི་མི་དམངས་ཀྱི་དངོས་པོ་དང་རིག་གནས་ཀྱི་འཚོ་བའི་ཆུ་ཚད་རྒྱུན་ཆད་མེད་པར་མཐོ་རུ་འགྲོ་རྒྱུ་འགན་ལེན། སྐྱེ་ཁམས་ཁོར་ཡུག་བཟང་པོ་འགན་ལེན་བཅས་བྱ་དགོས་ཞེས་ནན་གསུང་གནང་།

　　ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཁེ་ཆང་གིས་བོད་ལྗོངས་དང་ཞིང་ཆེན་བཞིའི་བོད་རིགས་ས་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ཐད་ནས་གསུང་བཤད་གནང་བ་དང་། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ། རྒྱལ་ཡོངས་སྲིད་གྲོས་ཀྱི་ཀྲུའུ་ཞི་ཡུས་ཀྲེན་ཧྲེང་གིས་ཚོགས་འདུ་མཇུག་སྒྲིལ་སྐབས་གསུང་བཤད་གནང། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ་ཀྲང་ཏེ་ཅང་དང་། ལིའུ་ཡུན་ཧྲན། ཝང་ཆི་ཧྲན། ཀྲང་ཀའོ་ལི་བཅས་ཚོགས་ཞུགས་གནང་།

　　ཚོགས་འདུའི་ཐོག   ཀྲུང་གོ་གསར་པ་དབུ་བརྙེས་ཚུན་དང་ལྷག་པར་དུ་ཀྲུང་དབྱང་གི་བོད་ལྗོངས་ཀྱི་ལས་ཀའི་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པ་འཚོགས་ཚུན་གྱི་བོད་ལྗོངས་ཀྱི་ལས་ཀ་ལ་ཕྱོགས་ཡོངས་ནས་ཕྱིར་དྲན་བྱས་པ་དང་། མིག་སྔར་དང་ཕྱིན་ཆད་དུས་སྐབས་ཤིག་རིང་དུ་བོད་ལྗོངས་ཀྱི་ལས་ཀའི་མཛུབ་ཁྲིད་བསམ་བློ་དང་། དམིགས་ཚད་བླང་བྱ། བྱེད་ཐབས་གལ་ཆེན་བཅས་ཁ་གསལ་བཟོས་པ་དང་། བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་དང་ཡུན་རིང་བདེ་འགོད་ཀྱི་ལས་ཀར་སྔར་བས་སྐུལ་འདེད་གཏང་རྒྱུའི་ཐད་འཐབ་ཇུས་བཀོད་སྒྲིག་བྱས་ཡོད། ཚོགས་འདུའི་ཐོག་ད་དུང་སི་ཁྲོན་དང་། ཡུན་ནན། ཀན་སུའུ། མཚོ་སྔོན་བཅས་ཞིང་ཆེན་གྱི་བོད་རིགས་ས་ཁུལ་གྱི་འཕེལ་རྒྱས་དང་བརྟན་བརླིང་གི་ལས་ཀའི་ཐད་ཁྱོན་ཡོངས་ནས་བཀོད་སྒྲིག་བྱས།

　　ཞི་ཅིན་ཕིང་གིས་བོད་ཀྱི་ལས་ཀ་དེ་ཏང་དང་རྒྱལ་ཁབ་ཀྱི་ལས་ཀའི་ཁྱོན་ཡོངས་དང་འབྲེལ་བ་ཡོད་ཅིང་། ཏང་ཀྲུང་དབྱང་གིས་སྔར་ནས་བོད་ཀྱི་ལས་ཀ་ལ་ཚད་མཐོན་པོའི་མཐོང་ཆེན་བྱེད་བཞིན་ཡོད། ལོ་ངོ་60ལྷག་ཙམ་གྱི་ལག་ལེན་གྱི་བརྒྱུད་རིམ་ནང་དུ་ང་ཚོར་ཏང་གི་བོད་སྐྱོང་ཐབས་ཇུས་ཆགས་པ་དེ་ནི་ངེས་པར་དུ་ཀྲུང་གོ་གུང་ཁྲན་ཏང་གི་འགོ་ཁྲིད་རྒྱུན་འཁྱོངས་དང་། སྤྱི་ཚོགས་རིང་ལུགས་ཀྱི་ལམ་ལུགས་རྒྱུན་འཁྱོངས། མི་རིགས་ས་ཁོངས་རང་སྐྱོང་ལམ་ལུགས་རྒྱུན་འཁྱོངས་བཅས་བྱ་དགོས་པ་དང་། རྒྱལ་ཁབ་སྐྱོང་བར་ངེས་པར་དུ་མཐའ་མཚམས་སྐྱོང་དགོས་པ་དང་མཐའ་མཚམས་སྐྱོང་བར་སྔོན་ལ་བོད་བརྟན་བརླིང་ཡོང་བ་བྱེད་དགོས་པའི་འཐབ་ཇུས་དགོངས་པ་རྒྱུན་འཁྱོངས་བྱ་དགོས་པ་དང་། ཁྲིམས་ལྟར་བོད་སྐྱོང་དང་། དམངས་ཕྱུག་བོད་དར། ཡུན་རིང་བོད་སྐྲུན། མི་སེམས་གཅིག་འགྲིལ། རྨང་གཞི་བརྟན་པོར་གཏོང་བ་བཅས་ཀྱི་རྩ་དོན་གལ་ཆེན་རྒྱུན་འཁྱོངས་བྱེད་དགོས། ངེས་པར་དུ་བོད་ཀྱི་སྤྱི་ཚོགས་ཀྱི་འགལ་ཟླ་གཙོ་བོ་དང་དམིགས་བསལ་འགལ་ཟླ་ཁོང་དུ་བརྟན་པོར་ཆུད་པར་བྱས་ཏེ་དམངས་འཚོ་ལེགས་གཏོང་དང་། མི་སེམས་གཅིག་འགྲིལ་བྱ་རྒྱུ་དེ་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་འགོ་འཛུགས་ས་དང་དོན་ཐོག་ཏུ་འབབ་གནས་བྱས་ནས་ཏཱ་ལའི་རུ་ཚོགས་ལ་འཐབ་རྩོད་བྱེད་པའི་བྱེད་ཕྱོགས་སྲིད་ཇུས་ལ་འགྱུར་བ་མི་གཏོང་བ་རྒྱུན་འཁྱོངས་བྱེད་དགོས། ངེས་པར་དུ་ཏང་གི་མི་རིགས་སྲིད་ཇུས་དང་ཆོས་ལུགས་སྲིད་ཇུས་ཁྱོན་ཡོངས་ནས་དང་ཡང་དག་པའི་ངང་ལག་བསྟར་བྱས་ཏེ་མི་རིགས་མཐུན་སྒྲིལ་ལ་ཤུགས་སྣོན་རྒྱག་པ་དང་། མི་རིགས་ཁག་གི་མང་ཚོགས་ཀྱིས་རླབས་ཆེན་མེས་རྒྱལ་དང་། ཀྲུང་ཧྭ་མི་རིགས། ཀྲུང་ཧྭའི་རིག་གནས། ཀྲུང་གོ་གུང་ཁྲན་ཏང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་བཅས་ལ་ཁས་ལེན་ཚད་ཟམ་མི་ཆད་པར་ཟབ་ཏུ་གཏོང་དགོས། ངེས་པར་དུ་ཀྲུང་དབྱང་གི་ཐུགས་ཁུར་དང་རྒྱལ་ཡོངས་ཀྱི་རྒྱབ་སྐྱོར་དེ་དང་བོད་ལྗོངས་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་ཀྱི་དཀའ་སྤྱད་འབད་འཐབ་ཟུང་འབྲེལ་དམ་ཟབ་བྱས་ནས་རྒྱལ་ནང་དང་རྒྱལ་སྤྱིའི་ ཁྱོན་ཡོངས་གཉིས་ལ་གཅིག་གྱུར་སྒོས་འཆར་འགོད་བྱེད་པའི་ཁྲོད་དུ་བོད་ལྗོངས་ཀྱི་ལས་ཀ་ཁག་ཡག་པོ་སྒྲུབ་དགོས། ངེས་པར་དུ་རིམ་པ་ཁག་གི་ཏང་རྩ་འཛུགས་དང་ལས་བྱེད་པ། ཤེས་ལྡན་པའི་དཔུང་ཁག་འཛུགས་སྐྱོང་ལ་ཤུགས་སྣོན་བརྒྱབ་ནས་བོད་ལྗོངས་སུ་ཏང་གི་སྲིད་སྐྱོང་རྨང་གཞི་བརྟན་པོར་གཏོང་དགོས་ཞེས་གསུངས།

　　ཞི་ཅིན་ཕིང་གིས་ཁྲིམས་ལྟར་བོད་སྐྱོང་དང་། དམངས་ཕྱུག་བོད་དར། ཡུན་རིང་བོད་སྐྲུན། མི་སེམས་གཅིག་འགྲིལ། རྨང་གཞི་བརྟན་པོར་གཏོང་བ་བཅས་བྱ་རྒྱུ་དེ་ཏང་གི་ཚོགས་ཆེན་བཅོ་བརྒྱད་པའི་རྗེས་སུ་ཏང་ཀྲུང་དབྱང་གིས་བཏོན་པའི་བོད་ཀྱི་ལས་ཀའི་རྩ་དོན་གལ་ཆེན་དེ་རེད། ཁྲིམས་ལྟར་བོད་སྐྱོང་ཞེས་པ་ནི་རྩ་ཁྲིམས་དང་བཅའ་ཁྲིམས་ཀྱི་དབང་གྲགས་སྲུང་སྐྱོབ་བྱས་ནས་བཅའ་ཁྲིམས་ཀྱི་མདུན་དུ་མི་ཚང་མ་འདྲ་མཉམ་ཡིན་པ་རྒྱུན་འཁྱོངས་བྱེད་དགོས་པ་དེ་རེད། དམངས་ཕྱུག་བོད་དར་ཞེས་པ་ནི་རིགས་སོ་སོའི་མང་ཚོགས་ལ་བདེ་སྐྱིད་སྐྲུན་པར་སྐུལ་འདེད་གཏོང་བའི་ལས་ཀ་དེ་བོད་ལྗོངས་དར་རྒྱས་སུ་གཏོང་བའི་མགོ་རྩོམ་ས་དང་རྐང་འཛུགས་སར་བརྩིས་ནས། མི་རིགས་མཐུན་སྒྲིལ་དང་དམངས་འཚོ་ཇེ་ལེགས་སུ་གཏོང་བར་དམ་པོར་དམིགས་ནས་དཔལ་འབྱོར་འཕེལ་རྒྱས་ལ་ཡར་སྐུལ་དང་། སྤྱི་ཚོགས་ཁྱོན་ཡོངས་ནས་གོང་འཕེལ་དུ་གཏོང་བར་ཡར་སྐུལ། རིགས་སོ་སོའི་མང་ཚོགས་ཀྱིས་མཉམ་དུ་སྔར་ལས་བཟང་པོའི་སྒོ་ནས་བཅོས་སྒྱུར་འཕེལ་རྒྱས་ཀྱི་གྲུབ་འབྲས་ལོངས་སུ་སྤྱོད་པར་བྱ་རྒྱུ་དེ་རེད། ཡུན་རིང་བོད་སྐྲུན་ཞེས་པ་ནི་གཟབ་ནན་དང་བརྟན་པོའི་ངང་འཕེལ་རྒྱས་གཏོང་བའི་བྱེད་ཕྱོགས་རྒྱུན་འཁྱོངས་ཀྱིས་ལས་ཀ་མཐའ་དག་ཕུགས་ལ་དམིགས་པ་དང་བྱེད་ཐབས་མཐའ་དག་ལ་རྒྱུན་མཐུད་རང་བཞིན་ལྡན་དགོས་པ་དེ་རེད། མི་སེམས་གཅིག་འགྲིལ་ཞེས་པ་ནི་དངོས་པོའི་སྟོབས་ཤུགས་དང་བསམ་པའི་སྟོབས་ཤུགས་ཟུང་འབྲེལ་བྱས་ནས་མི་སེམས་དང་སྟོབས་ཤུགས་དེ་ལོ་བརྒྱ་གཉིས་ཀྱི་འབད་འཐབ་དམིགས་ཚད་མངོན་འགྱུར་བྱེད་པ་དང་། ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་གྱི་ཀྲུང་གོའི་ཕུགས་འདུན་མངོན་འགྱུར་བྱེད་པའི་ཐོག་གཅིག་འགྲིལ་བྱེད་དགོས་པ་དེ་རེད། རྨང་གཞི་བརྟན་པོར་གཏོང་བ་ཞེས་པ་ནི་རྩ་ལག་མཉམ་བཅོས་དང་རྩ་བཅོས་གལ་ཆེར་འཛིན་ནས་རྨང་གཞི་འདིང་བ་དང་། ཕུགས་ལ་ཕན་པའི་ལས་དོན་མང་ཙམ་བསྒྲུབས་ཏེ་གཞི་རིམ་རྩ་འཛུགས་སྟོབས་ཤུགས་ཇེ་ཆེར་གཏོང་བ་དང་། རྨང་གཞིའི་ལས་དོན་ངེས་པ་དོན་གྱིས་སྒྲུབ་དགོས་པ་དེ་རེད་ཅེས་ནན་གསུང་གནང་།

　　ཞི་ཅིན་ཕིང་གིས་བསྟན་དོན། བོད་ལྗོངས་ཀྱི་ལས་ཀའི་དམིགས་ས་དང་ཤུགས་འདོན་ས་དེ་ངེས་པར་དུ་མེས་རྒྱལ་གཅིག་གྱུར་ལ་སྲུང་སྐྱོང་དང་། མི་རིགས་མཐུན་སྒྲིལ་ལ་ཤུགས་སྣོན་པའི་སྟེང་འཇོག་དགོས་ལ། སྤྱི་ཚོགས་གནས་བབ་ཀྱི་རྒྱུན་མཐུད་བརྟན་བརླིང་དང། ཡུན་རིང་བརྟན་བརླིང་། ཁྱོན་ཡོངས་བརྟན་བརླིང་བཅས་མངོན་འགྱུར་བྱེད་པ་དེ་ལས་འགན་གལ་ཆེན་དུ་བརྩིས་ནས། ཕྱོགས་སོ་སོའི་ལས་ཀ་གཅིག་གྱུར་འཆར་འགོད་དང་ཕྱོགས་བསྡུས་ཤུགས་འདོན་བྱས་ནས་ཁ་བྲལ་ལ་ངོ་རྒོལ་བྱེད་པའི་འཐབ་རྩོད་ཀྱི་རང་འགུལ་དབང་ཆ་དམ་འཛིན་བྱེད་དགོས།

　　ཞི་ཅིན་ཕིང་གིས་རྒྱལ་ཡོངས་ཀྱི་ས་ཁུལ་གཞན་དག་དང་འདྲ་བར། བོད་ལྗོངས་དང་ཞིང་ཆེན་བཞིའི་བོད་རིགས་ས་ཁུལ་དེ་འབྱོར་འབྲིང་སྤྱི་ཚོགས་སྒོ་ཀུན་ནས་སྐྲུན་ཐུབ་པ་བྱེད་པའི་ཐག་གཅོད་རང་བཞིན་གྱི་དུས་མཚམས་སུ་སླེབས་ཡོད་པས། དམངས་འཚོ་ལེགས་བཅོས་དང་མི་སེམས་གཅིག་འགྲིལ་གྱི་འགོ་འཛུགས་ས་དང་དོན་ལ་བབས་ས་དེ་ཁོང་དུ་བརྟན་པོར་ཆུད་པར་བྱས་ནས་བོད་ལྗོངས་དང་ཞིང་ཆེན་བཞིའི་བོད་རིགས་ས་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་འདེད་ཤུགས་ཆེན་གཏོང་དགོས། གཞི་རྩའི་སྤྱི་པའི་ཞབས་ཞུར་སྐུལ་འདེད་ཤུགས་ཆེན་བཏང་ནས་གནད་འཁེལ་དབུལ་སྐྱོར་དང་གནད་འཁེལ་དབུལ་སྒྲོལ་མངོན་གསལ་དོད་པོ་བྱས་ནས་དབུལ་པོར་གྱུར་བའི་འགག་རྩའི་གནད་དོན་ངེས་པ་དོན་གྱིས་ཐག་གཅོད་བྱེད་པ་དང་། དམིགས་བསལ་དཀའ་ངལ་ཡོད་པའི་མི་ཚོགས་ཀྱི་འཚོ་བའི་གནས་བབ་གང་མགྱོགས་ལེགས་སུ་གཏོང་དགོས། སྤྱི་ཚོགས་རིང་ལུགས་ཀྱི་སྲོག་ཤིང་གི་རིན་ཐང་ལྟ་བའི་སློབ་གསོ་དེ་རིམ་པ་ཁག་དང་རིགས་ཁག་གི་སློབ་གྲྭའི་སློབ་ཚན་ནང་མཉམ་བསྲེས་བྱེད་པ་དང་། རྒྱལ་ཁབ་ཀྱི་ཐུན་མོང་དུ་སྤྱོད་པའི་སྐད་ཡིག་ཁྱབ་གདལ་བཏང་ནས། ཏང་གཅེས་རྒྱལ་གཅེས་ཀྱི་སྤྱི་ཚོགས་རིང་ལུགས་བྱ་གཞག་གི་འཛུགས་སྐྲུན་པ་དང་ཤུལ་འཛིན་པ་གསོ་སྐྱོང་ཧུར་ཐག་བྱེད་དགོས། དེ་བས་དགེ་མཚན་ལྡན་པའི་ལས་ཞུགས་སྲིད་ཇུས་ལག་བསྟར་བྱས་ནས་མི་རིགས་ཁག་གི་མང་ཚོགས་ཞིང་འབྲོག་ཁུལ་ནས་ཐོན་ཏེ་གྲོང་ཁྱེར་དང་གྲོང་རྡལ་དང་ཁེ་ལས་སུ་ལས་ཞུགས་དང་ཚོང་གཉེར་ལས་གཏོད་བྱེད་པར་འགྲོ་རྒྱུར་རོགས་རམ་དེ་བས་མང་བ་བྱེད་དགོས། སྐྱེ་ཁམས་སྲུང་སྐྱོང་ཨང་དང་པོར་འཇོག་རྒྱུ་རྒྱུན་འཁྱོངས་ཀྱིས་ཕྱོགས་བསྡུས་བྱེད་ཐབས་སྤྱད་དེ་མདོ་དབུས་མཐོ་སྒང་གི་མཁའ་རླུང་སྦགས་བཙོག་འབྱུང་ཁུངས་དང་། ས་ཞིང་བྱེ་འགྱུར་གྱི་ཚོད་འཛིན་དང་བཅོས་སྐྱོང་ལ་ཤུགས་སྣོན་པ། རྩྭ་ས་དང་བརླན་ས། རང་བྱུང་ནགས་ཚལ་བཅས་ཀྱི་སྲུང་སྐྱོབ་བྱེད་ཤུགས་ཇེ་ཆེར་གཏོང་དགོས། ཕྱིན་ཆད་ཀྱི་དུས་སྐབས་ཤིག་གི་ནང་དུ། བོད་ལྗོངས་དང་ཞིང་ཆེན་བཞིའི་བོད་ཁུལ་གྱིས་མུ་མཐུད་དུ་དམིགས་བསལ་གྱི་ནོར་སྲིད་དང་ཁྲལ་བསྡུ། དངུལ་གཏོང་། དངུལ་ལོར་སོགས་སྲིད་ཇུས་ལག་བསྟར་བྱ་དགོས། བོད་ལྗོངས་དང་ཞིང་ཆེན་བཞིའི་བོད་ཁུལ་གྱིས་རང་སྟོབས་རང་སྤེལ་དང་། དཀའ་སྤྱད་འབད་བརྩོན་རྒྱུན་འཁྱོངས་བྱེད་དགོས་པ་དང་། ཁྱོན་ཡོངས་ནས་བཅོས་སྒྱུར་གཏིང་ཟབ་དུ་སྤེལ་ཏེ། རྒྱུན་ཆད་མེད་པར་རིགས་སོ་སོའི་མང་ཚོགས་འཕེལ་རྒྱས་ཁྲོད་དུ་ཞུགས་ཚད་དང་གྲུབ་འབྲས་ཐོབ་པའི་ཚོར་བ་ཇེ་དྲག་ཏུ་གཏོང་དགོས་གསུངས།

　　ཞི་ཅིན་ཕིང་གིས་བསྟན་དོན། བོད་ལྗོངས་དང་ཞིང་ཆེན་བཞིའི་བོད་ཁུལ་ཡུན་རིང་བདེ་འགོད་མངོན་འགྱུར་བྱ་དགོས་ན། ངེས་པར་དུ་རྒྱུན་འཁྱོངས་ལྷོད་མེད་དང་ཡུན་རིང་བྱས་རྗེས་བཞག་ཏེ། ཡུན་རིང་གི་འཐབ་ཇུས་ལ་འཆར་གཞི་འཐེན་དགོས། རྨང་གཞིའི་རང་བཞིན་གྱི་བྱ་བ་ཞིབ་རྒྱས་དང་གཟབ་ནན་གྱིས་སྒྲུབ་ཏེ། ཁྲིམས་ལྟར་བཅོས་སྐྱོང་དང་། རང་འགུལ་གྱིས་བཅོས་སྐྱོང་། ཕྱོགས་བསྡུས་བཅོས་སྐྱོང་། མགོ་ཁུངས་བཅོས་སྐྱོང་བཅས་ཟུང་དུ་སྦྲེལ་ཏེ། རིགས་སོ་སོའི་ལས་བྱེད་པ་དང་མང་ཚོགས་རྣམས་རྒྱབ་རྟེན་བྱེད་དགོས། ཤུགས་ཆེན་པོས་མི་རིགས་མཐུན་སྒྲིལ་ལ་ཤུགས་བསྣན་ནས། མི་རིགས་སོ་སོའི་མང་ཚོགས་བར་ཕན་ཚུན་རྒྱུས་ལོན་ཟབ་མོ་དང་། ཕན་ཚུན་བར་རོགས་རམ་བྱེད་པ། ཕན་ཚུན་བར་སློབ་སྦྱོང་བཅས་བྱེད་དགོས། ཤུགས་ཆེན་པོས་ཀྲུང་ཧྭ་མི་རིགས་ཐུན་མོང་གི་འདུ་ཤེས་ཇེ་དྲག་ཏུ་བཏང་ནས། མི་རིགས་མཐུན་སྒྲིལ་ཡར་ཐོན་དྲིལ་བསྒྲགས་སློབ་གསོ་དང་གསར་སྐྲུན་བྱེད་སྒོ་རྒྱ་ཆེན་པོ་སྤེལ་དགོས། ཤུགས་ཆེན་པོས་བོད་བརྒྱུད་ནང་བསྟན་ཆོས་ལུགས་བྱ་བ་བཟང་པོར་བསྒྲུབས་ནས། བོད་བརྒྱུད་ནང་བསྟན་ཆོས་ལུགས་ལས་རིགས་ཀྱིས་རྒྱལ་གཅེས་ཆོས་གཅེས་ཀྱི་སྲོལ་རྒྱུན་བཟང་པོ་དར་སྤེལ་གཏང་དགོས་པ་དང་། དགོན་པའི་དོ་དམ་གྱི་ཡུན་རིང་ཕན་ཡོད་ནང་རྐྱེན་འཛུགས་པར་སྐུལ་འདེད་བཏང་ནས། བོད་བརྒྱུད་ནང་བསྟན་ཆོས་ལུགས་དེ་སྤྱི་ཚོགས་རིང་ལུགས་ཀྱི་སྤྱི་ཚོགས་དང་འཚམ་མཐུན་ཡོང་བའི་རེ་བ་ལྟར་ཆོས་ཀྱི་འདུལ་ཁྲིམས་ལ་འགྲེལ་བཤད་བྱེད་པར་རྒྱབ་སྐྱོར་བྱ་དགོས། རྒྱུན་འཁྱོངས་ལྷོད་མེད་ཀྱིས་མར་ལེ་རིང་ལུགས་ཀྱི་མེས་རྒྱལ་ལྟ་བ་དང་། མི་རིགས་ལྟ་བ། ཆོས་ལུགས་ལྟ་བ། རིག་གནས་ལྟ་བ་སོགས་དྲིལ་བསྒྲགས་སློབ་གསོའི་བྱེད་སྒོ་སྤེལ་ནས། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་བསམ་བློའི་འདུ་ཤེས་ཆགས་པར་བྱེད་དགོས། ཁྲིམས་ལྟར་བོད་ལྗོངས་བཅོས་སྐྱོང་བྱེད་པའི་རེ་བ་དངོས་འབེབས་བྱས་ནས། མེས་རྒྱལ་ཁ་བྲལ་དུ་གཏོང་བ་དང་། སྤྱི་ཚོགས་བརྟན་འཇགས་ལ་གཏོར་བརླག་གཏོང་བའི་བྱ་སྤྱོད་ཡོད་ཚད་ལ་ཁྲིམས་ལྟར་རྡུང་རྡེག་བྱ་དགོས་གསུངས།

　　ཞི་ཅིན་ཕིང་གིས་ནན་གྱིས་བསྟན་དོན། བོད་ལྗོངས་ཀྱི་ལས་ཀ་བཟང་པོར་སྒྲུབ་དགོས་ན། ངེས་པར་དུ་ཏང་གི་འགོ་ཁྲིད་རྒྱུན་འཁྱོངས་བྱ་དགོས་པ་དང་། ཏང་གི་འཛུགས་སྐྲུན་ལ་ཁྱོན་ཡོངས་ནས་ཤུགས་བསྣན་ཏེ། སྟོབས་ཤུགས་ཡོད་རྒུ་བཏོན་ནས་རིམ་པ་སོ་སོའི་འགོ་ཁྲིད་ཚན་ཁག་དང་ལས་བྱེད་པའི་ཤེས་ལྡན་མི་སྣའི་དཔུང་སྡེ། གཞི་རིམ་རྩ་འཛུགས་བཅས་འཛུགས་སྐྲུན་བཟང་པོ་བྱས་ཏེ། ཏང་གི་གསར་སྐྲུན་ནུས་ཤུགས་དང་གོང་བུར་སྒྲིལ་ཤུགས། འཐབ་འཛིང་སྟོབས་ཤུགས་བཅས་རྒྱུན་ཆད་མེད་པར་ཇེ་ཆེར་གཏང་དགོས། བོད་ལྗོངས་དང་ཞིང་ཆེན་བཞིའི་བོད་ཁུལ་དུ་རིམ་པ་སོ་སོའི་ལས་བྱེད་པས་ངེས་པར་དུ་བསམ་བློ་དང་ཆབ་སྲིད། བྱ་སྤྱོད་བཅས་ཀྱི་སྟེང་ནས་ཏང་ཀྲུང་དབྱང་དང་གཅིག་གྱུར་ཚད་མཐོན་པོར་བྱས་ཏེ། ཏང་དང་མི་དམངས་ལ་བློ་དཀར་བ་དང། བློ་བརྟན་འགྱུར་མེད་སྒོས་ཏང་གི་བྱེད་ཕྱོགས་དང་སྲིད་ཇུས་དོན་ཐོག་ཏུ་འཁྱོལ་བར་བྱ་དགོས། རིམ་པ་སོ་སོའི་ལས་བྱེད་པས་རང་ཉིད་ཀྱི་མིག་ཟུང་ལ་གཅེས་སྤྲས་བྱེད་པ་ལྟར་མཐུན་སྒྲིལ་ལ་གཅེས་སྐྱོང་བྱས་ནས། བསམ་བློ་གཅིག་ཏུ་འཁོར་བ་དང་སྟོབས་ཤུགས་གཅིག་ཏུ་འབུལ་བའི་རྣམ་པ་ཆགས་པར་བྱ་དགོས་གསུངས།

　　ཞི་ཅིན་ཕིང་གིས་བསྟན་དོན། མཐོ་སྒང་ནས་ལས་ཀ་སྒྲུབ་པར་ཆེས་དཀོན་པ་ནི་དབྱང་དབུགས་ཡིན་ལ། ཆེས་རྩ་ཆེ་བ་ནི་སྙིང་སྟོབས་ཡིན། ལོ་མང་པོའི་རིང་ལ། མི་རབས་ནས་མི་རབས་བར་གྱི་གུང་ཁྲན་ཏང་ཡོན་གྱིས་མི་རྣམས་ལ་དབང་བ་དང་མི་རྣམས་ཀྱིས་ལོངས་སུ་སྤྱོད་པའི་འཚོ་བ་བསྐྱུར་ཏེ། མཐོ་སྒང་ནས་གཞིས་ཆགས་པ་དང་། དཀའ་སྤྱད་འབད་འཐབ་སྒོས་བྱ་བ་སྒྲུབ་བཞིན་ཡོད། རྒྱ་ཆེའི་ཏང་ཡོན་དང་ལས་བྱེད་པས་ཕུལ་བྱུང་སྲོལ་རྒྱུན་དེ་དར་སྤེལ་བྱས་ནས། བོད་ལྗོངས་པ་རྒན་པའི་སྙིང་སྟོབས་དེ་ལ་དུས་རབས་གསར་བའི་ནང་དོན་རྒྱུན་ཆད་མེད་པར་སྣོན་དགོས། ཀྲུང་དབྱང་གིས་བོད་ལྗོངས་ཀྱི་ལས་བྱེད་པ་དང་ལས་བཟོ་བར་དུས་ནམ་ཡང་ཧ་ཅང་ཐུགས་ཁུར་བྱས་ཏེ། དམིགས་བསལ་གྱི་ཟླ་ཕོགས་སྲིད་ཇུས་དང་འབྲེལ་ཡོད་གཟིགས་སྐྱོང་སྲིད་ཇུས་གཏན་ལ་ཕབ་ཡོད། ཀྲུང་དབྱང་འབྲེལ་ཡོད་ལས་ཁུངས་ཀྱིས་ཧུར་ཐག་སྒོས་རྒྱབ་སྐྱོར་དང་། ཁོ་ཚོས་སེམས་ཁུར་བྱེད་པའི་གནད་དོན་ཐག་གཅོད་བཟང་པོ་བྱ་དགོས། བོད་ལྗོངས་ལ་ཁ་གཏད་རོགས་སྐྱོར་བྱེད་པའི་བྱ་བ་བཟང་པོར་སྒྲུབ་པ་དང་། བོད་ལྗོངས་ལ་རོགས་སྐྱོར་བྱེད་པའི་ལས་བྱེད་པའི་ཤེས་ལྡན་མི་སྣའི་གྲུབ་ཚུལ་ཇེ་ལེགས་སུ་བཏང་སྟེ། ཕུལ་བྱུང་ཤེས་ལྡན་མི་སྣ་ཆ་རྐྱེན་ཞན་པ་དང་གནས་ཚུལ་རྙོག་འཛིང་ཆེ་བའི་ས་ཁུལ་དུ་མངགས་ནས་སྦྱོང་བརྡར་བྱེད་དུ་འཇུག་དགོས། བོད་ལྗོངས་དང་ཞིང་ཆེན་བཞིའི་བོད་ཁུལ་གྱི་རྒྱ་ཆེའི་ལས་བྱེད་པ་དང་ལས་བཟོ་པས་ཏང་དང་རྒྱལ་ཁབ་ཀྱི་ཐུགས་ཁུར་དེ་ལས་ཀའི་སྒུལ་ཤུགས་སུ་བསྒྱུར་ནས། རང་སོ་སོའི་ལས་ཀའི་ལས་གནས་སྟེང་བྱས་རྗེས་སྔར་ལས་ཆེན་པོ་འཇོག་དགོས་གསུངས།

　　ལི་ཁེ་ཆང་གིས་བསྟན་དོན། འབྱུང་འགྱུར་གྱི་ལོ་ངོ་ལྔ་ལྷག་གི་རིང་དུ། བོད་ལྗོངས་ཀྱིས་རྒྱལ་ཡོངས་དང་མཉམ་དུ་འབྱོར་འབྲིང་སྤྱི་ཚོགས་ཁྱོན་ཡོངས་ནས་འགྲུབ་པར་བྱ་དགོས་པས། ལས་འགན་དཀའ་ཚེགས་ཆེ་ཞིང་ཧ་ཅང་ལྕི། བཅོས་བསྒྱུར་ཁྱོན་ཡོངས་ནས་ཟབ་སྤེལ་བྱེད་པ་དང་འཕེལ་རྒྱས་ཀྱི་རྣམ་པ་གསར་སྐྲུན་བྱ་དགོས་ན། ཟུང་འབྲེལ་ལྔ་བསྒྲུབ་ཐུབ་པར་བྱ་དགོས་ཏེ། དེ་དག་ནི་སྲིད་གཞུང་གི་ནུས་པ་དང་ཚོང་རའི་ནུས་པ། ཕྱིའི་སྟོབས་ཤུགས་ལ་བརྟེན་ནས་ནང་ཁུལ་གྱི་སྟོབས་ཤུགས་སྐུལ་སློང་བྱེད་པ། ཕྱི་ནང་ཕྱོགས་གཉིས་སུ་སྒོ་འབྱེད་པ། རྣམ་པ་གསར་བའི་གྲོང་རྡལ་ཅན་དང་ཞིང་སྡེ་གསར་པ་འཛུགས་སྐྲུན་བྱེད་པ། གསར་སྤེལ་འཛུགས་སྐྲུན་དང་སྐྱེ་ཁམས་སྲུང་སྐྱོང་བྱེད་པ་གཉིས་ཟུང་འབྲེལ་བཟང་པོ་བྱ་དགོས་ལ། སྟོབས་ཤུགས་ཡོད་རྒུ་བཏོན་ནས་དམངས་འཚོ་ལ་ཁག་ཐེག་དང་ལེགས་བཅོས་བྱེད་པའི་ཐད་འབད་བརྩོན་བྱས་ཏེ། ས་གནས་དང་བསྟུན་ནས་སྲིད་ཇུས་ལག་བསྟར་བྱེད་པ་དང་། མི་དང་བསྟུན་ནས་སྲིད་ཇུས་ལག་བསྟར་བྱས་ཏེ། སྟོབས་ཤུགས་ཆེན་པོས་དབུལ་སྐྱོར་ གཏོར་བརྒལ་གྱི་ལས་ཀ་བཟང་པོར་སྒྲུབ་པ་དང་ཐབས་ལམ་མང་པོར་བརྒྱུད་དེ་ལས་ཞུགས་རྒྱ་བསྐྱེད་གཏང་དགོས། སློབ་གསོའི་ལས་ཀའི་ཁྲོད་ཀྱི་མི་འདང་ས་མྱུར་དུ་ཁ་གསབ་བྱེད་པ་དང་། སྨན་པ་དང་སྨན་རྫས་དཀོན་པའི་རྣམ་པ་མྱུར་དུ་བསྒྱུར་བ། སྤྱི་ཚོགས་འགན་སྲུང་གི་བདེ་འཇགས་དྲ་བ་མྱུར་དུ་སྲ་བརྟན་དུ་གཏང་དགོས། ཁྱད་ཆོས་ཐོན་ལས་དང་རྨང་གཞིའི་སྒྲིག་ཆས། སྐྱེ་ཁམས་ཁོར་ཡག་སྲུང་སྐྱོབ་བཅས་ཕྱོགས་གསུམ་གྱི་ལས་ཀ་གཙོ་བོར་བཟུང་སྟེ། བོད་ལྗོངས་རང་སྟེང་གི་འཕེལ་རྒྱས་ནུས་པ་ཇེ་ཆེར་གཏང་དགོས། སྟོབས་ཤུགས་ཡོད་རྒུ་བཏོན་ནས་ཁྱད་ཆོས་ལྡན་པའི་ཞིང་ཕྱུགས་ལས་དང་དེའི་སྐོར་གྱི་བཟོ་ལས་འཕེལ་རྒྱས་སུ་གཏང་བར་ཤུགས་སྣོན་པ་དང་། འཛམ་གླིང་གི་གནས་སྐོར་དམིགས་ཡུལ་ས་ཁུལ་གཙོ་བོ་འཛུགས་སྐྲུན་བཟང་པོ་བྱེད་པ། ཚོང་ཟོག་ཉོ་ཚོང་འཁོར་རྒྱུག་ལས་རིགས་འཕེལ་རྒྱས་སུ་གཏང་བ་བཅས་བྱས་ནས། བོད་ལྗོངས་དེ་རང་རྒྱལ་གྱིས་ཨེ་ཤ་ཡ་ལྷོ་མའི་ས་ཁུལ་ལ་ཁ་ཕྱོགས་ནས་སྒོ་འབྱེད་པའི་ས་ཁུལ་གཙོ་བོ་ཞིག་ཏུ་བསྒྱུར་དགོས། ཕྱོགས་བསྡུས་འགྲིམ་འགྲུལ་སྐྱེལ་འདྲེན་མ་ལག་མྱུར་དུ་འཛུགས་སྐྲུན་བྱས་ནས། རྫོང་མཁར་ཚང་མར་སྣུམ་ལམ་བསྐྲུན་པ་དང་། ཆ་རྐྱེན་འཛོམས་པའི་ཡུལ་གྲོང་དང་སྲིད་འཛིན་གྲོང་སྡེར་སྔོན་ནས་གཞུང་ལམ་བསྐྲུན་དགོས། ཆུ་བེད་བཟོ་སྐྲུན་གཙོ་བོ་འཛུགས་སྐྲུན་བྱེད་པར་རོགས་སྐྱོར་བྱས་ནས། མང་ཚོགས་རྣམས་ཀྱིས་སེམས་བདེ་མོའི་ཆུ་གཙང་མ་འཐུང་ཐུབ་པར་ཁག་ཐེག་བྱ་དགོས། ནུས་ཁུངས་འགན་སྲུང་ནུས་པ་ཇེ་ཆེར་བཏང་སྟེ། ལྗོངས་ནང་ཁུལ་གྱི་གློག་དྲ་རྫོང་ཡོངས་སུ་ཁེབས་པར་བྱས་ནས། གློག་མེད་པའི་ཁྱིམ་ཚང་གི་གློག་གི་གནད་དོན་ཐག་གཅོད་བྱ་དགོས། གྲོང་ཁྱེར་གྱི་རྨང་གཞིའི་སྒྲིག་ཆས་མྱུར་དུ་འཛུགས་སྐྲུན་བྱས་ནས། མཐོ་སྒང་ས་ཁུལ་གྱི་དྲོད་འདོན་བཟོ་སྐྲུན་ལ་རོགས་སྐྱོར་བྱ་དགོས། ཆ་འཕྲིན་ཅན་དུ་བསྒྱུར་བའི་ཆུ་ཚད་མཐོར་འདེགས་སུ་བཏང་སྟེ། འཕྲིན་གཏོང་གི་ཆ་རྐྱེན་ཞན་པའི་ས་ཁུལ་དུ་ཧུར་ཐག་སྒོས་འཕྲིན་གཏོང་འཕེལ་རྒྱས་སུ་གཏོང་དགོས། སྐྱེ་ཁམས་བདེ་འཇགས་ལས་ཀ་གཙིགས་སུ་འཛིན་ནས། སྐྱེ་ཁམས་ཀྱི་ཕྱོགས་བསྡུས་ཁ་གསབ་ལམ་ལུགས་འཐུས་ཚང་དུ་བཏང་སྟེ། གངས་ལྗོངས་མཐོ་སྒང་ལ་སྲུང་སྐྱོབ་བཟང་པོ་བྱེད་པ་དང་། རྒྱལ་ཁབ་ཀྱི་སྐྱེ་ཁམས་བདེ་འཇགས་དྲ་བ་ཇེ་བརྟན་དུ་གཏོང་དགོས་གསུངས།

　　ལི་ཁེ་ཆང་གིས་ནན་གྱིས་བསྟན་དོན། ཀྲུང་དབྱང་གི་བོད་ལྗོངས་འཕེལ་རྒྱས་ལ་རོགས་སྐྱོར་བྱེད་པའི་ཤུགས་ཚད་སྔར་ལས་ཇེ་ཆེར་བཏང་སྟེ། དམིགས་བསལ་གྱི་རོགས་སྐྱོར་སྲིད་ཇུས་འཐུས་ཚང་དུ་གཏང་བ་དང་། ཡོང་སྒོ་ཚང་མ་རང་ལ་ཐོབ་པ་དང་ཁ་གསབ་རོགས་དངུལ་ཇེ་མང་དུ་གཏང་བ། ཆེད་དོན་རོགས་སྐྱོར་བྱེད་པ་བཅས་ཀྱི་ནོར་སྲིད་དཔྱ་ཁྲལ་གྱི་གཟིགས་སྐྱོང་སྲིད་ཇུས་མུ་མཐུད་དུ་ལག་བསྟར་བྱེད་དགོས། ཀྲུང་དབྱང་གི་དངུལ་གཏོང་ཤུགས་ཚད་ཇེ་ཆེར་གཏང་བ་དང་། དངུལ་ལོར་རོགས་སྐྱོར་ལ་ཤུགས་སྣོན་པ། ཁ་གཏད་རོགས་སྐྱོང་བྱ་བར་ཤུགས་སྣོན་དགོས། ཀྲུང་དབྱང་གི་ཞིང་ཆེན་བཞིའི་བོད་ཁུལ་གྱི་སྲིད་ཇུས་ལ་རོགས་སྐྱོར་བྱེད་པའི་ཤུགས་ཚད་ཇེ་ཆེར་གཏང་དགོས་ཤིང་། བོད་ལྗོངས་དང་ཞིང་ཆེན་བཞིའི་བོད་ཁུལ་མཐུན་སྦྱོར་སྒོས་འཕེལ་རྒྱས་སུ་འགྲོ་བར་གཅིག་གྱུར་སྒོས་འཆར་འགོད་དང་སྐུལ་འདེད་གཏང་བ་དང་། ཞིང་ཆེན་བཞིའི་བོད་ཁུལ་དང་ཞིང་ཆེན་རང་རང་མཐུན་སྦྱོར་སྒོས་འཕེལ་རྒྱས་སུ་འགྲོ་བར་གཅིག་གྱུར་སྒོས་འཆར་འགོད་དང་སྐུལ་འདེད་གཏང་བ། འབྲེལ་མཚམས་ས་ཁུལ་གྱི་གནད་དོན་གཙོ་བོ་གཅིག་གྱུར་སྒོས་འཆར་འགོད་དང་ཐག་གཅོད་བྱ་དགོས། སྟོབས་ཤུགས་ཡོད་རྒུ་བཏོན་ནས་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཚོད་འཛིན་བྱེད་པའི་གནད་དོན་ཐག་གཅོད་བྱེད་པ་དང་། སྤྱི་ཚོགས་ཀྱི་འཆམ་མཐུན་དང་བརྟན་བརླིང་ལ་སྲུང་སྐྱོབ་བྱས་ནས། མཉམ་དུ་བོད་ལྗོངས་དང་ཞིང་ཆེན་བཞིའི་བོད་ཁུལ་སྔར་ལས་འཛུགས་སྐྲུན་བཟང་པོ་བྱ་དགོས་གསུངས།

　　ཡུས་ཀྲེན་ཧྲེང་གིས་ཕྱོགས་བསྡོམས་གསུང་བཤད་གནང་བར་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱིས་བོད་ལྗོངས་ལས་ཀའི་མདུན་དུ་མངོན་པའི་གནས་བབ་ལ་ཚན་རིག་ལྟར་དབྱེ་ཞིབ་དང་། རིགས་གཞུང་གལ་ཆེན་དང་ལག་ལེན་གནད་དོན་རབ་དང་རིམ་པར་འགྲེལ་བཤད་གཏིང་ཟབ་མོ་བྱས་ཡོད་པས། དེར་ཆབ་སྲིད་རང་བཞིན་དང་སྤྱི་ཡོངས་རང་བཞིན། འཐབ་ཇུས་རང་བཞིན་ཆེན་པོ་ལྡན་ལ། དེ་ནི་མིག་སྔར་དང་རྗེས་ཕྱོགས་ཀྱི་དུས་སྐབས་ཤིག་གི་རིང་བོད་ལྗོངས་ལས་ཀ་བཟང་པོ་བསྒྲུབ་པའི་རྩ་བའི་གཞི་འཛིན་ས་ཡིན། གནད་དོན་གྱི་ཁ་ཕྱོགས་རྒྱུན་འཁྱོངས་དང་། རྩ་བའི་གནད་དོན་ཐད་ནས་ལང་ཕྱོགས་བརྟན་པོ་ཡིན་དགོས་ལ། འཕེལ་རྒྱས་གནད་དོན་ཐད་ནས་ཁ་ཕྱོགས་གསལ་པོ་ཡིན་དགོས་པ་དང་། དཀའ་ཁག་གནད་དོན་ཐད་ནས་ལན་གསལ་པོ་འདེབས་དགོས་ཤིང་། དངོས་ཡོད་གནད་དོན་གཙོ་བོར་བཟུང་ནས་ཐག་གཅོད་བྱ་དགོས་ཞེས་གསུངས།

　　ཡུས་ཀྲེན་ཧྲེང་གིས་ནན་གྱིས་བསྟན་དོན། གྲོས་ཚོགས་ཀྱི་དགོངས་དོན་ལག་ལེན་མཐར་ཕྱིན་བྱ་རྒྱུ་དེ་ཆབ་སྲིད་ཀྱི་ལས་འགན་གལ་ཆེན་ཞིག་ཏུ་བརྩིས་ནས། བྱ་བའི་སྤྱོད་ཚུལ་བཟང་པོ་དང་བརྟན་བརླིང་ཕན་ཡོད་ཀྱི་ལས་ཀའི་བྱེད་ཐབས་སྤྱད་དེ། ཀྲུང་དབྱང་གི་ཐབས་ཇུས་བཀོད་སྒྲིག་སྣ་ཚོགས་ལག་ལེན་མཐར་ཕྱིན་བྱེད་པ་དང་གྲུབ་འབྲས་བཟང་པོ་ཐོབ་པར་ཁག་ཐེག་བྱ་དགོས། བསམ་བློར་སྔར་ལས་གཅིག་གྱུར་བྱེད་པ་དང་། མེས་རྒྱལ་གཅིག་གྱུར་ལ་སྲུང་སྐྱོང་དང་མི་རིགས་མཐུན་སྒྲིལ་ལ་ཤུགས་སྣོན་བྱ་རྒྱུ་དེ་ལས་ཀའི་གཞི་འཛིན་ས་དང་ཤུགས་འདོན་སར་བྱས་ཏེ། ཁྱོན་ཡོངས་ནས་འབྱོར་འབྲིང་སྤྱི་ཚོགས་ལེགས་འགྲུབ་བྱེད་པའི་དམིགས་འབེན་གྱི་གཞི་རྩའི་ནང་དོན་ལ་ཚན་རིག་དང་མཐུན་པའི་སྒོ་ནས་རྒྱུས་ལོན་བྱ་དགོས། འགན་འཁྲི་སྔར་ལས་གསལ་པོ་བྱ་བ་དང་། བོད་ལྗོངས་དང་ཞིང་ཆེན་བཞིའི་བོད་ཁུལ་གྱིས་འགན་འཁྲི་མི་སྣ་དང་པོའི་འགན་ནུས་ལག་བསྟར་ནན་མོ་བྱས་ནས། རིམ་པ་སོ་སོའི་ཏང་ཨུ་དང་རྒྱ་ཆེའི་ཏང་ཡོན་ལས་བྱེད་པ་རྩ་འཛུགས་བྱས་ཏེ་གཅིག་བསྡུས་སྒོས་གྲོས་ཚོགས་ཀྱི་དགོངས་དོན་ལ་སློབ་སྦྱོང་བྱེད་པ་དང་། ཀྲུང་དབྱང་གི་འབྲེལ་ཡོད་སྡེ་ཁག་དང་བོད་ཁུལ་ལ་རོགས་སྐྱོར་བྱེད་པའི་ཞིང་ཆེན་དང་གྲོང་ཁྱེར། ཁེ་ལས་བཅས་ཀྱིས་རང་སྡེ་ཁག་དང་ལས་ཁུངས་ཀྱི་ལས་ཀ་དངོས་དང་ཟུང་འབྲེལ་བྱས་ནས་ལག་ལེན་མཐར་ཕྱིན་བྱེད་པའི་ཇུས་གཞི་ཞིབ་ཕྲ་བཟོ་དགོས། གཙོ་གནད་སྔར་ལས་འབུར་ཐོན་བྱས་ཏེ། བོད་ལྗོངས་དང་ཞིང་ཆེན་བཞིའི་བོད་ཁུལ་གྱི་འཕེལ་རྒྱས་ལ་བཀག་འགོག་བྱེད་པའི་གནད་དོན་གཙོ་བོ་དང་དཀའ་གནད་ཐག་གཅོད་བྱ་དགོས་ཞེས་གསུངས།

　　བོད་རང་སྐྱོང་ལྗོངས་དང་རྒྱལ་ཁབ་འཕེལ་རྒྱས་བཅོས་བསྒྱུར་ཨུ་ཡོན་ལྷན་ཁང་། ཧྲན་ཏུང་ཞིང་ཆེན་བཅས་ཀྱི་འགན་ཁུར་བློ་མཐུན་གྱིས་ཚོགས་ཐོག་ནས་གཏམ་བཤད་གནང་།

　　པེ་ཅིང་དུ་ཡོད་པའི་ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང་། ཀྲུང་དབྱང་ཧྲུའུ་ཅི་ཁྲུའུ་ཡི་ཧྲུའུ་ཅི། རྒྱལ་སྲིད་ཨུ་ཡོན། ཆེས་མཐོའི་མི་དམངས་ཁྲིམས་ཁང་གི་འགོ་གཙོ་སོགས་གྲོས་ཚོགས་སུ་ཞུགས།

　　བོད་རང་སྐྱོང་ལྗོངས་ཀྱི་ཏང་སྲིད་འགན་ཁུར་བློ་མཐུན་དང་། ས་ཆ་སོ་སོ་དང་གྲོང་ཁྱེར་སོ་སོ། འབྲེལ་ཡོད་སྡེ་ཁག་གི་འགན་ཁུར་བློ་མཐུན་གཙོ་བོ། སི་ཁྲོན་དང་ཡུན་ནན། ཀན་སུའུ། མཚོ་སྔོན་ཞིང་ཆེན་བཅས་ཀྱི་ཏང་སྲིད་འགན་ཁུར་བློ་མཐུན་གཙོ་བོ། བོད་རིགས་རང་སྐྱོང་ཁུལ་དང་འབྲེལ་ཡོད་སྡེ་ཁག་གི་འགན་ཁུར་བློ་མཐུན་གཙོ་བོ། གཞན་པའི་ཞིང་ལྗོངས་དང་གྲོང་ཁྱེར་གྱི་འགན་ཁུར་བློ་མཐུན། ཀྲུང་དབྱང་དང་རྒྱལ་ཁབ་ལས་ཁུངས་ཀྱི་འབྲེལ་ཡོད་སྡེ་ཁག  འབྲེལ་ཡོད་ཀྲུང་དབྱང་ཁེ་ལས་ཀྱི་འགན་ཁུར་བློ་མཐུན། ཕྱི་རྒྱལ་དུ་སྡོད་པའི་གཞུང་ཚབ་ཁང་གི་འབྲེལ་ཡོད་འགན་ཁུར་བློ་མཐུན། མི་དམངས་བཅིངས་འགྲོལ་དམག་དང་དྲག་ཆས་ཉེན་རྟོག་དམག་དཔུང་གི་འབྲེལ་ཡོད་འགན་ཁུར་བློ་མཐུན་སོགས་གྲོས་ཚོགས་སུ་ཞུགས།།