རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་ཚེས་26ཉིན་ཉིའུ་ཡུའེ་མཉམ་འབྲེལ་རྒྱལ་ཚོགས་སྤྱི་ཁྱབ་པུའུ་རུ་མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོ་ཕན་ཅི་ཝུན་དང་མཇལ་འཛོམས་གནང་།
  ཞི་ཅིན་ཕིང་གིས་བསྟན་དོན། ད་ཐེངས་ནི་ང་མཉམ་འབྲེལ་རྒྱལ་ཚོགས་སྤྱི་ཁྱབ་པུའུ་རུ་ཐེངས་དང་པོ་ཡོང་བ་ཡིན། རྒྱལ་ཁབ་ཁག་གི་འགོ་ཁྲིད་དང་ཉིའུ་ཡུའེ་རུ་མཉམ་འཛོམས་བྱས་པ་ནི་རྒྱ་ཆེའི་ཚོགས་མིའི་རྒྱལ་ཁབ་ཀྱིས་མཉམ་འབྲེལ་རྒྱལ་ཚོགས་ཀྱིས་རྒྱལ་སྤྱིའི་ལས་ཀའི་ཁྲོད་ནུས་པ་དེ་བས་ཆེ་བ་འདོན་པའི་རྒྱབ་སྐྱོར་དང་རེ་སྒུག་མཚོན་ཡོད། རྒྱལ་སྤྱིའི་སྤྱི་ཚོགས་ཀྱིས་མཉམ་འབྲེལ་རྒྱལ་ཚོགས་བཙུགས་ནས་ལོ་70འཁོར་བའི་གོ་སྐབས་དང་བསྟུན་ནས། ཕྱོགས་མང་རིང་ལུགས་ཀྱི་བགྲོད་ལམ་རྒྱུན་འཁྱོངས་དང་མཉམ་འབྲེལ་རྒྱལ་ཚོགས་ཀྱི་རྩ་འཛིན་གྱི་དམིགས་ཡུལ་དང་རྩ་དོན་སྲུང་སྐྱོབ་བྱེད་ཅིང་། མཉམ་འབྲེལ་རྒྱལ་ཚོགས་ཀྱི་དབང་གྲགས་དང་ནུས་པ་སྲུང་སྐྱོང་བྱས་ནས། ཐུན་མོང་ཐོག་འཛམ་གླིང་གི་ཞི་བདེ་སྲུང་སྐྱོང་དང་ཐུན་མོང་དུ་གོང་འཕེལ་འགྲོ་བར་སྐུལ་སྤེལ་གཏོང་དགོས།
  ཞི་ཅིན་ཕིང་གིས་ནན་གསུང་གནང་དོན། ཕྱོགས་སོ་སོས་མཉམ་འབྲེལ་རྒྱལ་ཚོགས་ཀྱིས་ལོ་ངོ་10ཡི་རིང་ལ་ཆབ་སྲིད་ཐོག་ནས་གླེང་ཆ་ཆེ་བའི་གནད་དོན་ཐག་གཅོད་རྒྱུ་རྒྱུན་འཁྱོངས་བྱེད་པར་རེ་སྒུག་བྱས་པ་དང་། མཉམ་འབྲེལ་རྒྱལ་ཚོགས་དང་དེའི་བདེ་འཇགས་ལས་འཛིན་ལྷན་ཚོགས་ཀྱིས་དབྱི་རན་གྱི་ཉིང་རྡུལ་གནད་དོན་གྱི་དགེ་མཚན་ལྡན་པའི་ཉམས་མྱོང་ལ་དཔེ་བལྟས་ནས། སྐད་ཆ་ཤོད་རེས་དང་གྲོས་མོལ་རྒྱུན་འཁྱོངས་བྱས་ཏེ་འབྲེལ་ཡོད་ས་ཁུལ་གྱི་གླེང་ཕྱོགས་མང་བའི་གནད་དོན་ཐག་གཅོད་བྱ་དགོས་པ་དང་། མཉམ་འབྲེལ་རྒྱལ་ཚོགས་ཀྱིས་གོ་ལ་ཧྲིལ་པོའི་འཕེལ་རྒྱས་ཀྱི་བྱ་གཞག་ལ་རྒྱུན་མཐུད་ངང་སྐུལ་འདེད་གཏོང་རྒྱུར་རེ་སྒུག་བྱེད་བཞིན་ཡོད། འཕེལ་རྒྱས་ལ་སྐུལ་འདེད་བྱེད་པའི་གནད་དོན་ཐོག་གི་ཆབ་སྲིད་དང་སྤྱོད་དྲང་གི་ལེགས་ཆ་བེད་སྤྱོད་ཡག་པོ་བྱས་ནས། འཕེལ་རྒྱས་གཏོང་བའི་ཁྱབ་ཁོངས་ནང་མཐུན་སྦྱོར་གྱི་གཏོང་འཇོག་ཇེ་ཆེར་བཏང་ཞིང་། འཕེལ་རྒྱས་གཏོང་བའི་གནད་དོན་ཐད་མུ་མཐུད་དུ་ཐུན་མོང་ཐོག་ཡིན་ཡང་ཁྱད་པར་ཡོད་པའི་རྩ་དོན་རེད་རྒྱུན་འཁྱོངས་བྱེད་དགོས། དར་རྒྱས་ཆེ་བའི་རྒྱལ་ཁབ་ཀྱིས་ལོ་རྒྱུས་དང་སྤྱོད་དྲང་གི་འགན་འཁྲི་འཁུར་དགོས་པ་དང་། འཕེལ་རྒྱས་འགྲོ་བཞིན་པའི་རྒྱལ་ཁབ་ལ་མ་དངུལ་དང་ལག་རྩལ་སོགས་ཀྱི་རྒྱབ་སྐྱོར་བྱེད་དགོས། མཉམ་འབྲེལ་རྒྱལ་ཚོགས་ཀྱིས་གོ་ལ་ཧྲིལ་པོའི་གནད་དོན་ཐད་སྣེ་ཁྲིད་ཀྱི་ནུས་པ་འདོན་སྤེལ་བྱེད་པར་རེ་སྒུག་བྱེད་ཡོད། མཉམ་འབྲེལ་རྒྱལ་ཚོགས་ནི་རྒྱལ་སྤྱིའི་འཇིགས་སྐུལ་ལ་ངོ་རྒོལ་བྱེད་པའི་མཉམ་ལས་ཀྱི་སྟེགས་བུ་ཡག་ཤོས་ཡིན་ལ། ཚོགས་མིའི་རྒྱལ་ཁབ་ཁག་གིས་མཉམ་འབྲེལ་རྒྱལ་ཚོགས་ཀྱི་བདེ་འཇགས་ལས་འཛིན་ལྷན་ཚོགས་ཀྱི་འབྲེལ་ཡོད་གྲོས་ཆོད་དང་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་གྱི་གོ་ལ་ཧྲིལ་པོའི་འཇིགས་སྐུལ་ལ་ངོ་རྒོལ་བྱེད་པའི་འཐབ་ཇུས་ལག་བསྟར་ནན་ཏན་བྱ་དགོས་པ་དང་། ཐབས་མང་མཉམ་སྤྱོད་ཀྱིས་འཇིགས་སྐུལ་རིང་ལུགས་ལ་རྡུང་རྡེག་གཏོང་དགོས།
  ཞི་ཅིན་ཕིང་གིས་ནན་གསུང་གནང་དོན། ཀྲུང་གོས་མཉམ་ལས་གཉིས་ཁེ་ལྟེ་བར་བྱས་པའི་རྒྱལ་སྤྱིའི་འབྲེལ་བ་གསར་པ་འཛུགས་པའི་དར་སྲོལ་གཏོད་པ་དང་། བློ་བརྟན་འགྱུར་མེད་ངང་ཞི་བདེ་འཕེལ་རྒྱས་ཀྱི་འགྲོ་ལམ་དུ་བགྲོད་པ་དང་། མཉམ་འབྲེལ་རྒྱལ་ཚོགས་ཀྱི་རྩ་འཛིན་རྨང་གཞིར་བྱས་པའི་དེང་རབས་ཀྱི་རྒྱལ་སྤྱིའི་སྒྲིག་ལམ་ལ་སྲུང་སྐྱོང་བྱ་རྒྱུར་གཞོལ་ནས། སྔར་བཞིན་མཉམ་འབྲེལ་རྒྱལ་ཚོགས་ལ་མུ་མཐུད་དུ་རྒྱབ་སྐྱོར་བྱེད་དེ་མཉམ་འབྲེལ་རྒྱལ་ཚོགས་བར་མཉམ་ལས་ཇེ་ཟབ་ཏུ་གཏང་དགོས།
  ཕན་ཅི་ཝུན་གྱིས་ཞི་ཅིན་ཕིང་གིས་ཀྲུང་གོའི་རྒྱལ་ཁབ་ཀྱི་ཀྲུའུ་ཞིའི་འགན་བཞེས་ནས་ཐེངས་དང་པོར་མཉམ་འབྲེལ་རྒྱལ་ཚོགས་ལ་འཚམས་འདྲི་བྱེད་པར་དགའ་བསུ་ཞུས། ཕན་ཅི་ཝུན་གྱིས་གསུང་དོན། ཀྲུང་གོ་ནི་རྒྱལ་སྤྱིའི་སྤྱི་ཚོགས་ཀྱི་ཁོངས་མི་གལ་ཆེན་ཞིག་ཡིན་ལ། མཉམ་འབྲེལ་རྒྱལ་ཚོགས་ཀྱི་གྲོས་རིམ་ལ་མེད་དུ་མི་རུང་བའི་རོགས་ཟླ་ཞིག་ཡིན། ཀྲུང་གོས་དུས་ཡུན་རིང་པོའི་ནང་འཛམ་གླིང་གི་ཞི་བདེ་འཕེལ་རྒྱས་ཀྱི་བྱ་གཞག་དང་རྒྱལ་སྤྱི་དང་ས་ཁུལ་གྱི་གནད་དོན་ལེགས་པོར་ཐག་གཅོད་བྱེད་རྒྱུའི་ཐད་ལ་དགེ་མཚན་ལྡན་པའི་ནུས་པ་འདོན་སྤེལ་བྱས་ཡོད་ལ། བྱས་རྗེས་མངོན་གསལ་དོད་པོ་ཕུལ་ཡོད། དེ་རིང་སྔ་དྲོའི་མཉམ་འབྲེལ་རྒྱལ་ཚོགས་ཀྱི་འཕེལ་རྒྱས་ཀྱི་མཐོ་རིམ་གྲོས་ཚོགས་ཐོག་ཀྲུའུ་ཞི་ཞི་ཅིན་ཕིང་གིས་སླར་ཡང་མཉམ་འབྲེལ་རྒྱལ་ཚོགས་ཀྱི་འཕེལ་རྒྱས་གྲོས་རིམ་གྱི་རྒྱབ་སྐྱོར་བྱེད་ཐབས་རབ་དང་རིམ་པ་ཁྱབ་བསྒྲགས་བྱས་ནས། མི་ལ་སྐུལ་ལྕག་ཐེབས་སུ་འཇུག ཀྲུང་གོ་ཕྱོགས་ཀྱི་རྒྱབ་སྐྱོར་ནི་མཉམ་འབྲེལ་རྒྱལ་ཚོགས་ལ་ཧ་ཅང་གལ་ཆེན་ཡིན། མཉམ་འབྲེལ་རྒྱལ་ཚོགས་ཀྱིས་ཀྲུང་གོ་དང་མཉམ་དུ་འཕེལ་རྒྱས་གྲོས་རིམ་ལ་སྐུལ་འདེད་གཏོང་བ་དང་། འབྲེལ་ཡོད་ས་ཁུལ་གྱི་གླེང་ཕྱོགས་མང་བའི་གནད་དོན་ཐག་གཅོད་བྱེད་པ། གནམ་གཤིས་འགྱུར་ལྡོག་སྐོར་གྱི་གྲོས་མཐུན་གསར་པའི་གྲོས་མོལ་བདེ་བླག་ངང་ལེགས་གྲུབ་བྱུང་བ་སོགས་ཀྱི་ཁྱབ་ཁོངས་སུ་མཉམ་ལས་བྱེད་ཤུགས་ཆེ་རུ་གཏོང་བར་རེ་བ་བྱེད་བཞིན་ཡོད།།