——དྲུག་གཅིག་བྱིས་པའི་དུས་ཆེན་ལ།
ཁེར་བུ།
ང་ཡི་གཤོག་པ་ཕྱིར་སྤྲོད་རོགས
ཐ་ན་ཉིན་གཅིག་ཙམ་ཡིན་རུང
ང་ནི་སྐར་ཚོགས་དང་ལྷན་དུ་བསྡད་དེ
འཇའ་ཚོན་ལ་ཐེམ་སྐས་ག་ཚོད་ཡོད་པ་བརྩི་འདོད་ཅིང
སྤྲིན་པ་ལེབ་མོ་དག་གས་ནས་ཁ་བར་འགྱུར་ཚུལ་ལ་བལྟ་འདོད
ད་དུང་ངས་རང་གི་ཚོན་མདོག་གི་སྨྱུ་གུ་སྤྱད་ནས
ཉི་མ་ལ་གྲིབ་བསིལ་དགུག་བྱེད་ཀྱི་ཉི་གདུགས་ཤིག་བྲི་འདོད་ཅིང
ཟླ་བ་ལ་མཚན་མོའི་མཁའ་དབྱིངས་སུ་འགྲོ་རོགས་ཤིག་ཀྱང་བྲི་འདོད
ང་ཡི་གཤོག་པ་ཕྱིར་སྤྲོད་རོགས
ཐ་ན་ཉིན་གཅིག་ཙམ་ཡིན་རུང
ང་ནི་རྩྭ་ལྗང་དང་ལྷན་དུ་འགྲོགས་ཏེ
ཕྱེ་མ་ལེབ་དང་སྦྲང་མ་ཆུང་ཆུང་ལ
ཆུ་མོ་བརྒལ་བྱེད་ཀྱི་ཟམ་པ་ཞིག་གཟུག་འདོད་ཅིང
འབུ་ཐོམ་བུ་ལ་ཁ་སྤུ་སྐྱེས་པའི་རྒྱུ་མཚན་སྦལ་བ་ཨ་མར་དྲི་འདོད
མཇུག་མཐར་ངས་ཤོག་ངོས་སུ་སའི་གོ་ལ་ཆེན་པོ་ཞིག་བྲི་འདོད་ཅིང
འབུ་ཐོམ་བུ་བཞིན་དུ་མཇུག་མ་རིང་བོ་ཞིག་ཀྱང་བྲི་འདོད
༢༠༡༥.༦.༡ཉིན་གྱི་དགུང་མོར།
གནམ་སྔོན་པོར་སྐས་ཤིག་ཡོད།
གནམ་སྔོན་པོར་སྐས་ཤིག་ཡོད
ཉིན་མོའི་དུས་སུ
ཡར་འཛེགས་པར་ཕྱིན་ནས
ཨ་སྔོན་དེ
མེ་ལོང་བཞིན
གྲལ་དག་གཙང་དག་ཅིག་ཏུ་ཕྱིས་ཆོག་ཅིང
དབྱར་ཚ་བ་ཆེ་དུས
སྤྲིན་དཀར་གྱི་བླ་བྲེ་སྲབ་བུར་འཐེན་ཆོག
གནམ་སྔོན་པོར་སྐས་ཤིག་ཡོད
མཚན་མོའི་དུས་སུ
ཡར་འཛེགས་པར་ཕྱིན་ནས
སྐར་ཚོགས་དག
གློག་སྒྲོན་བཞིན
ཁྲ་ཆིལ་དགུ་ཆིལ་དུ་བཀད་ཆོག་ཅིང
མཚན་མུན་པ་མཐུག་དུས
ཟོར་དབྱིབས་ཀྱི་ཟླ་བ་སྒོར་སྒོར་དུ་བཅོས་ཆོག
༢༠༡༥.༨.༡
