དེ་རིང་སྤྱི་ཟླ་བཅུ་གཅིག་ཚེས་གཅིག་རེད། །
རེས་གཟའ་ཕུར་བུ་ཧོར་རྩིས་བཅོ་བརྒྱད་རེད། །
ཉིན་འདིར་སྙིང་གི་ན་ཟུག་ཐང་ལ་བྱོ། །
དྲན་དང་སྐྱོ་བའི་དངན་པ་བྲག་ལ་རྡེབ། །

སེམས་ལ་སྐྱོ་ངལ་མ་ལེན་ངང་བཟང་མ། །
གདོང་ལ་མིག་ཆུ་མ་གཏོང་ངོ་ཡག་མ། །
ཡར་ལྟོས་གནམ་གྱི་སྤྲིན་དཀར་དུམ་བུ་དེ། །
བརྩེ་སེམས་མ་འགྱུར་གནས་པའི་བདེན་དཔུང་ཡིན། །

ལོ་ཟླ་འགྱང་འདུག་མ་བསམ་གཤིས་འཇམ་མ། །
ལམ་ཐག་རིང་འདུག་མ་བསམ་མིག་ཡངས་མ། །
མདུན་ན་ལྷང་ལྷང་བཞུར་བའི་ཆུ་བོ་དེ། །
དམ་བཅའ་མ་འགྱུར་གནས་པའི་རྟགས་མཚན་ཡིན། །

སེམས་པ་སྐྱོ་འདུག་མ་ཟེར་གཟུགས་བཟང་མ། །
ཆིག་རྐྱང་སུན་འདུག་མ་ཟེར་སྙིང་སྡུག་མ། །
དབྱིངས་ན་བསིལ་བསིལ་འཚེར་བའི་ཟླ་གམ་དེ། །
ཡིད་ཆེས་མ་འགྱུར་གནས་པའི་རྟེན་སོ་ཡིན། །
ད་འདིར་ཁྱོད་ལ་བཤད་པའི་སྐད་བརྡ་དེ། །
སེམས་པ་སྦུག་ནས་བསྒྲགས་པའི་ང་རོ་ཡིན། །
དྲན་པ་གཞུང་ནས་མཆེད་པའི་ཟེགས་མ་ཡིན། །
ནང་ཁྲོལ་རློན་པ་གསེབ་ཀྱི་དྭངས་མ་ཡིན། །

གངས་རི་ཕྱེ་མར་འདྲ་བོའི་གཡས་ཟུར་ན། །
ཆུ་མིག་བདུད་རྩིའི་འདྲ་བོའི་འགྲམ་ངོགས་ན། །
སྙིང་ལ་ལྷུག་གེར་འཛུམ་པའི་བཞིན་ཡག་མ། །
མཚོ་ཁའི་མེ་ཏོག་འདྲ་ཞིག་བཞད་ཡོད་ཤག། 

སྤྲིན་པ་དར་རྡང་འདྲ་བོའི་ཟམ་འོག་ན། །
སྐྱི་བསེར་བལ་ཁ་འདྲ་བོའི་རྒྱུ་ཕྱོགས་ན། །
ལུས་གཟུགས་མདའ་སྙུག་འདྲ་བའི་རོགས་ལོ་མ། །
དམ་བཅའ་ཚིག་ཏུ་གནས་པར་བལྟས་ཡོད་ཤག། 

མཛུབ་དཀྲིས་གསེར་གྱི་རིན་ལ་མ་འཁྲེན་ཅིང་། །
སྡུག་བསྔལ་བམ་ཁ་མཐུག་པོར་མ་བཟུར་བར། །
བཞིན་རས་ཟླ་གོར་འདྲ་བོ་འདིར་བལྟས་ཏེ། །
མིག་གཉིས་ལྷེམ་མེར་འགུལ་བཞིན་གནས་ཡོད་ཤག། 

རི་ལུང་ཁུག་ཀྱོག་བརྒྱུད་དུས་དྲན་གྱིན་ཡོད། །
ཆར་རླུང་ཟིལ་ཐིགས་ལྷུང་དུས་འབོད་ཀྱིན་ཡོད། །
རང་ཡུལ་དཀྱིལ་འཁོར་འདྲ་བོའི་ནང་ཁོག་ན། །
དགའ་བ་སྙིང་གི་གཞུང་ནས་འབར་གྱིན་ཡོད། །

ཁྲ་ཆུང་མིག་རྡོ་མ་བཙུམ་བལྟས་ནས་ཡོད། །
ལག་ངར་དྲོན་མོ་མ་བརྐུམ་བསྲིངས་ནས་ཡོད། །
བརྩེ་ཞེན་སྙིང་གི་མདུད་པ་བརྒྱབ་ནས་ཡོད། །
མི་འགྱུར་ཚིག་ལ་མནའ་ཆེན་བསྐྱལ་ནས་ཡོད། །