སྤྱི་ཟླ་10པའི་ཚེས་20ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་དབྱིན་ཇིའི་གྲོས་ཚོགས་སྟེང་གཏམ་བཤད་གནང་། ཀྲུང་དབྱིན་བར་གྱི་བརྗེ་རེས་ལ་ཤུགས་སྣོན་དང་རྒྱལ་ཁབ་གཉིས་ཀྱི་མི་དམངས་ཕན་ཚུན་བར་གྱི་ངོས་འཛིན་དང་རྒྱབ་སྐྱོར། མཛའ་བརྩེ་བཅས་གོང་འཕེལ་དུ་གཏང་སྟེ་རྒྱལ་ཁབ་གཉིས་ཀྱི་མཉམ་ལས་འབྲེལ་བ་སྐས་རིམ་གསར་པ་ཞིག་ཏུ་འཕེལ་བར་སྐུལ་འདེད་གཏང་དགོས་ཞེས་བསྟན།
ཞི་ཅིན་ཕིང་གིས་དབྱིན་ཇིར་འཚམས་འདྲིར་ཡོང་བའི་ཉིན་དང་པོར་ངས་ཀྲུང་དབྱིན་བར་གྱི་གསོན་ཤུགས་ལྡན་པའི་འབྲེལ་བ་ཚོར་ཞིང་རྒྱལ་ཁབ་གཉིས་ཀྱི་མི་དམངས་ཀྱི་བརྩེ་བ་ཟབ་མོ་དེ་མྱངས་བྱུང་། ཐེངས་འདིའི་འཚམས་འདྲི་བརྒྱུད་ཀྲུང་དབྱིན་བར་གྱི་འབྲེལ་བ་སྐས་རིམ་གསར་བ་ཞིག་ཏུ་བསྙེག་ཐུབ་པར་ཡིད་ཆེས་ཀྱིས་ཁེངས་ཡོད་ཅེས་བསྟན།
ཞི་ཅིན་ཕིང་གིས་དབྱིན་ཇི་ནི་ཆེས་ཐོག་མར་ཚབ་གྲོས་ལམ་ལུགས་ལ་འཚོལ་ཞིབ་བྱས་པའི་རྒྱལ་ཁབ་རེད། ཀྲུང་གོ་ལའང་གནའ་ནས་བཟུང་དམས་གཙོ་དང་ཁྲིམས་ལུགས་ཀྱི་བསམ་བློ་གྱ་ནོམ་པ་ཞིག་ཡོད། ད་ལྟ་ཀྲུང་གོ་མི་དམངས་ཀྱིས་ཕྱོགས་ཡོངས་ནས་ཁྲིམས་ལྟར་རྒྱལ་ཁབ་སྐྱོང་བའི་ཐབས་ཇུས་ལག་བསྟར་བྱེད་བཞིན་ཡོད་ལ། ཀྲུང་གོའི་སྲོལ་རྒྱུན་ཁྲིམས་ལུགས་བསམ་བློ་ལས་ནང་བཅུད་བསྡུ་ལེན་བྱེད་པའི་ཞོར་ལ་འཛམ་གླིང་གི་རྒྱལ་ཁབ་སོ་སོའི་ཁྲིམས་སྐྱོང་ཐད་ཀྱི་ལེགས་ཆའང་ནང་འདྲེན་བྱེད་བཞིན་ཡོད། འདིའི་དམིགས་ཡུལ་ནི་ཁྲིམས་ལུགས་ཀྱི་མདུན་དུ་མི་རྣམས་འདྲ་མཉམ་ཡིན་པ་རྒྱུན་འཁྱོངས་དང་མགྱོགས་མྱུར་ངང་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ཁྲིམས་སྐྱོང་མ་ལག་འཛུགས་སྐྲུན་བྱེད་པར་སྐུལ་འདེད་གཏང་ཆེད་ཡིན། ཚན་རིག་དང་མཐུན་པར་ཁྲིམས་འཛུགས་པ་དང་གཟབ་ནན་ངང་ཁྲིམས་ལག་བསྟར་བྱེད་པ། སྲིད་ཁྲིམས་དྲང་བདེན་དང་དམངས་ཡོངས་ཀྱིས་ཁྲིམས་བརྩི་བར་སྐུལ་འདེད་གཏང་ངེས། འདིའི་ཐད་ནས་ཀྲུང་དབྱིན་གཉིས་ཀྱི་ཁྲིམས་འཛུགས་སྡེ་ཁག་བར་བསམ་བློ་བརྗེ་རེས་བྱེད་ཆོག་པ་རེད་ཅེས་བསྟན།
ཞི་ཅིན་ཕིང་གིས་ཀྲུང་གོ་གསར་པ་དབུ་བརྙེས་པའི་ཚུན་ལ་དབྱིན་ཇི་ནི་ཀྲུང་གོ་གསར་པ་ཁས་བླངས་པའི་ནུབ་གླིང་གི་རྒྱལ་ཁབ་དང་པོ་དང་། ཀྲུང་གོ་དང་ཕྱོགས་ཡོངས་མཉམ་ལས་འབྲེལ་བ་བཙུགས་པའི་ཡོ་རབ་མནའ་འབྲེལ་གྱི་རྒྱལ་ཁབ་དང་པོའང་ཡིན། དེ་མིན་ཞང་ཀང་ལས་གཞན་པའི་ཕྱིའི་རྒྱལ་གྱི་དམངས་སྒོར་བརྗེ་ཚོང་ལྟེ་གནས། ཀྲུང་གོའི་ཕྱི་འགྲིམས་སློབ་མ་བསྡུས་པ་ཆེས་མང་བ་དང་ཁུང་ཙེ་སློབ་གླིང་འཛུགས་གཉེར་བྱས་པར་ཆེས་མང་བའི་རྒྱལ་ཁབ་རེད། དབྱིན་ཇི་ནི་ད་དུང་ཆེས་ཐོག་མར་དམངས་སྒོར་གྱི་རྒྱལ་བུན་འགྲེམ་སྤེལ་བྱས་པའི་ནུབ་གླིང་གི་རྒྱལ་ཁབ་དང་ཆེས་ཐོག་མར་ཡ་གླིང་གི་རྨང་གཞིའི་སྒྲིག་བཀོད་ཀྱི་དངུལ་འཇོག་དངུལ་ཁང་ལ་རེ་ཞུ་བྱེད་མཁན་རེད། ཀྲུང་དབྱིན་འབྲེལ་བའི་འཕེལ་རྒྱས་དེ་རྒྱལ་ཁབ་གཉིས་ཀྱི་མི་དམངས་ཀྱི་ཕན་ཚུན་དང་ལེན་དང་རྒྱབ་སྐྱོར། མཛའ་འབྲེལ་བཅས་དང་འབྲེལ་བ་དམ་པོ་ཡོད་པ་རེད། ང་ཚོ་འཚོ་སྡོད་བྱས་པའི་དེང་གི་དུས་རབས་ནི་ཞི་བདེ་དང་འཕེལ་རྒྱས་བརྗོད་དོན་ཡིན་པའི་དུས་རབས་ཤིག་ཡིན་པར་མ་ཟད། རྒྱལ་ཁབ་སོ་སོ་མཉམ་འབྲེལ་དང་ལྷན་དུ་འཕེལ་རྒྱས་སུ་འགྲོ་བའི་དུས་རབས་ཤིག་ཀྱང་རེད། རླབས་ཆེན་གྱི་དུས་རབས་འདིར་ཀྲུང་དབྱིན་གཉིས་ཀྱིས་ཕྱོགས་ཡོངས་མཉམ་ལས་འབྲེལ་བའི་གོ་སྐབས་དམ་འཛིན་བྱས་ཏེ་མཉམ་ལས་འབྲེལ་བར་ཤུགས་བྱ་སྣོན་དགོས་ཞེས་བསྟན།།
