སྤྱི་ཟླ་11པའི་ཚེས་8ཉིན། སྲིད་གྲོས་སྐབས་བཅུ་གཉིས་པའི་རྒྱལ་ཡོངས་ཨུ་ཡོན་ལྷན་ཁང་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་ཐེངས་བཅུ་གསུམ་པ་ཚེས་བརྒྱད་ཉིན་པེ་ཅིང་ནས་མཇུག་སྒྲིལ།
ཀྲུང་གུང་ཀྲུང་དབྱང་ཆབ་སྲིད་ཅུས་རྒྱུན་ལས་ཨུ་ཡོན། རྒྱལ་ཡོངས་སྲིད་གྲོས་ཀྱི་ཀྲུའུ་ཞི་ཡུས་ཀྲེན་ཧྲེང་གིས་གྲོས་ཚོགས་ལ་གཙོ་སྐྱོང་མཛད་པར་མ་ཟད་གསུང་བཤད་གནང་། ཐེངས་འདིའི་རྒྱུན་ལས་གྲོས་ཚོགས་ཀྱི་འོས་འགན་གཙོ་བོ་ནི་ཀྲུང་གོ་གུང་ཁྲན་ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་ལྔ་བའི་དགོངས་དོན་ལ་སློབ་སྦྱོང་དང་ལག་བསྟར་བྱེད་རྒྱུ་རེད། ཀྲུང་གུང་ཀྲུང་དབྱང་གིས་ཐེངས་འདིའི་གྲོས་ཚོགས་ལེགས་པོ་ཞིག་བསྡུ་བར་མཐོང་ཆེན་ཚད་མཐོན་པོ་གནང་། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཁེ་ཆང་གདན་དྲངས་པ་ལྟར་གྲོས་ཚོགས་འགོ་རྩོམ་པའི་ཚོགས་འདུར་ཞུགས་པར་མ་ཟད་སྙན་ཞུ་ཕུལ། རྒྱུན་ལས་ཨུ་ཡོན་ལྷན་ཁང་གི་ཁོངས་མི་ཡོངས་ཀྱིས་ནན་ཏན་གྱིས་ཡིག་ཆར་སློབ་སྦྱོང་དང་གཏམ་བཤད་སྤེལ། དེ་མིན་ཚང་མས་མཐའ་གཅིག་ཏུ་ཚང་འཛོམས་གྲོས་ཚོགས་ཐེངས་ལྔ་བའི་དགོངས་དོན་དང་ཀྲུང་དབྱང་གི་བྱེད་ཕྱོགས་སྲིད་ཇུས་ལ་བློ་བརྟན་འགྱུར་མེད་ཀྱིས་སྲུང་སྐྱོབ་དང་། སྔར་ལས་ལྷག་པའི་སྒོ་ནས་ཕན་འབྲས་ལྡན་པའི་འགན་ནུས་ལག་བསྟར་དང་བློ་འདོན་བྱ་རྒྱུ་ཡིན་ཞེས་བསྟན།
ཡུས་ཀྲེན་ཧྲེང་གིས་ཚང་འཛོམས་གྲོས་ཚོགས་ཐེངས་ལྔ་བའི་དགོངས་དོན་ལ་གཏིང་ཟབ་པའི་སྒོ་ནས་སློབ་སྦྱོང་བྱེད་པ་དང་བསམ་བློ་དང་བྱ་སྤྱོད་ཀྲུང་དབྱང་གི་ཇུས་ཆོད་བཀོད་སྒྲིག་སྟེང་གཅིག་གྱུར་ཡོང་བར་བྱ་རྒྱུ་ནི་ད་སྐབས་དང་རྗེས་ཕྱོགས་ཀྱི་དུས་སྐབས་ཤིག་གི་མི་དམངས་སྲིད་གྲོས་ཀྱི་ཆབ་སྲིད་འོས་འགན་གལ་ཆེན་ཞིག་རེད། མི་དམངས་སྲིད་གྲོས་ཀྱིས་འགན་ནུས་བཏོན་ཏེ། ལོ་ལྔའི་འཆར་གཞི་བཅུ་གསུམ་པའི་རྩ་གནད་ཀྱི་སྒྲིག་གཞི་གཏན་འཁེལ་དང་ལག་བསྟར་བྱ་བའི་ཕྱོགས་ལ་ནུས་པ་གང་ཡོད་འདོན་དགོས། གཅིག་ནས་རང་རྒྱལ་སྤྱི་ཚོགས་རིང་ལུགས་ཀྱི་ཐོག་མའི་དུས་སྐབས་ཀྱི་གཞི་རྩའི་རྒྱལ་ཁབ་གནས་ཚུལ་ལ་གཏིང་ཟབ་པའི་སྒོ་ནས་ངེས་ཤེས་ཡོད་པར་བྱ་དགོས་པ་དང་། ཐོག་མཐའ་བར་གསུམ་དུ་འཐབ་ཇུས་ཀྱི་གཏན་འཁེལ་ནུས་ཤུགས་འགན་སྲུང་དང་དཀའ་ཁག་སྣ་ཚོགས་ཁྱད་དུ་བསད་དེ་དཔལ་འབྱོར་སྤྱི་ཚོགས་རྒྱུན་མཐུད་ངང་འཕེལ་རྒྱས་སུ་འགྲོ་བར་སྐུལ་འདེད་གཏང་དགོས། གཉིས་ནས་རང་རྒྱལ་གྱི་དཔལ་འབྱོར་འཕེལ་རྒྱས་ཀྱི་རྣམ་པ་གསར་པའི་དུས་རིམ་རང་བཞིན་གྱི་ཁྱད་ཆོས་ལ་ངོས་འཛིན་བྱས་ཏེ་རྣམ་པ་གསར་པར་ཞིབ་འཇུག་དང་འོས་བསྟུན་བྱ་དགོས། དེ་མིན་རྣམ་པ་གསར་པའི་དཔལ་འབྱོར་འཕེལ་རྒྱས་ཀྱི་སྣེ་ཁྲིད་སྒྲིག་ལུགས་དང་འཕེལ་རྒྱས་རྣམ་པ་གྲུབ་པར་སྐུལ་འདེད་གཏང་དགོས། གསུམ་ནས་འཕེལ་རྒྱས་ཀྱི་སྤུས་ཀ་དང་ཕན་འབྲས་ཇེ་མཐོར་གཏོང་རྒྱུ་དེ་གོ་གནས་གལ་ཆེན་དུ་འཛིན་རྒྱུ་རྒྱུན་འཁྱོངས་བྱས་ཏེ། ཁེ་ལས་ཀྱི་ཕན་འབྲས་གནད་དོན་ལ་ཞིབ་འཇུག་བྱེད་པ་དང་འགན་ནུས་ལྷག་མ་སོགས་ཀྱི་ཐབས་ཇུས་ཐག་གཅོད་བྱ་དགོས། བཞི་ནས་ཁྱོན་ཡོངས་ནས་འབྱོར་འབྲིང་སྤྱི་ཚོགས་མངོན་འགྱུར་བྱ་བའི་མ་ལག་འཐུས་ཚང་དུ་གཏང་བ་དང་། འཕེལ་རྒྱས་ཀྱི་མཐུན་སྦྱོར་རང་བཞིན་དང་ཆ་སྙོམས་རང་བཞིན་མཐོར་འདེགས་སུ་གཏང་དགོས། ལྔ་ནས་ཉེན་ཁ་ཆེ་བའི་འགོག་སྲུང་ནུས་པ་དང་ཆུ་ཚད་མཐོར་འདེགས་སུ་གཏང་དགོས། སྔོན་ནས་ཁ་གཏད་ཀྱི་ཇུས་འགོད་གཏན་འཁེལ་བྱས་ནས་མ་ལག་རང་བཞིན་དང་ས་ཁུལ་རང་བཞིན་གྱི་མི་འབྱུང་བ་ཁག་ཐེག་བྱ་དགོས་ཞེས་བསྟན།
ཡུས་ཀྲེན་ཧྲེང་གིས་ཚང་འཛོམས་གྲོས་ཚོགས་ཐེངས་ལྔ་བའི་དགོངས་དོན་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་རབ་དང་རིམ་པའི་དགོངས་དོན་མཛུབ་སྟོན་དུ་བཟུང་སྟེ། སྲིད་གྲོས་ཀྱིས་ནན་ཏན་སྒོས་ད་ལོའི་ལས་ཀ་སྤྱི་བསྡོམས་དང་སང་ལོའི་བྱ་བར་འཆར་གཞི་འགོད་དགོས། ལོ་ལྔའི་འཆར་གཞི་བཅུ་གསུམ་པ་བདེ་བླག་ངང་ལག་བསྟར་དང་ཇུས་འགོད་བྱས་ཏེ་ལས་ཀ་ནན་ཏན་སྒོས་བསྒྲུབ་དགོས། སྔར་ལས་ལྷག་པའི་སྒོ་ནས་མི་དམངས་སྲིད་གྲོས་དེ་འཐབ་ཕྱོགས་གཅིག་གྱུར་གྱི་རྩ་འཇུགས་ནུས་པ་འདོན་སྤེལ་བྱས་ཏེ་དམངས་གཙོ་ལྟ་སྐུལ་ལམ་ལུགས་ཅན་ལ་སྐུལ་འདེད་གཏང་དགོས། གཏིང་ཟབ་པའི་སྒོ་ནས་སྲིད་གྲོས་རང་ངོས་ཀྱི་གནད་དོན་ལ་དབྱེ་ཞིབ་བྱས་ཏེ་ལོ་ལྔའི་འཆར་གཞི་བཅུ་གསུམ་པའི་སྒྲིག་གཞིའི་གཏན་འཁེལ་དང་ལག་བསྟར་དེ་སང་ལོའི་རྒྱལ་ཡོངས་སྲིད་གྲོས་ཀྱི་འགན་ནུས་ལག་བསྟར་གཙོ་བོ་བྱ་དགོས་ཞེས་བསྟན།
ཚོགས་འདུའི་སྟེང་《སུན་ཀྲུང་ཧྲན་སྐུ་འཁྲུངས་ནས་ལོ་འཁོར་150ལོན་པའི་རྗེས་དྲན་བྱེད་སྒོ་སྤེལ་བའི་སྐོར་གྱི་ཐག་གཅོད།》ལ་གྲོས་འཆམ་བྱུང་།།
