2015ལོའི་སྤྱི་ཟླ་11པའི་ཚེས་3ནས་ཚེས་6ཉིན་བར། ཁུལ་དང་རྫོང་གི་མཉམ་འབྲེལ་སྒྲོག་འགྲེལ་ཚོ་ཆུང་རྟའུ་རྫོང་སྦར་ཞབས་ཡུལ་ཤོག་དང་མ་ཟུར་ཡུལ་ཤོག་སོགས་སུ་བསྐྱོད་དེ། རིགས་པའི་གཞུང་ལུགས་དང་དོན་དངོས་ཟུང་འབྲེལ་བྱེད་པ་དང་། ལོ་རྒྱུས་དང་དངོས་ཡོད་ཟུང་འབྲེལ་བྱེད་པ། བོད་སྐད་དང་ས་གནས་དེ་གའི་སྐད་ཟུང་འབྲེལ་བྱེད་པ་རྒྱུན་འཁྱོངས་བྱས་ནས། དཔེར་མཚོན་གྱོད་གཞི་སྤྱད་དེ་གནས་ལུགས་བཤད་པ་དང་། དོན་དངོས་གསལ་སྟོན་བྱས་ཤིང་། རྣམ་པ་མང་པོའི་སྒོ་ནས་ཀྲུང་དབྱང་གི་བོད་ཀྱི་ལས་ཀའི་སྐོར་གྱི་བཞུགས་མོལ་ཚོགས་འདུ་ཐེངས་དྲུག་པ་དང་སི་ཁྲོན་ཞིང་ཨུའི་བོད་རིགས་ས་ཁུལ་གྱི་ལས་ཀའི་ཚོགས་འདུའི་（གཤམ་དུ་བསྡུས་མིང་ལ་ཚོགས་འདུ་གཉིས་ཞེས་འབོད）དགོངས་དོན་གྱི་མང་ཚོགས་ལས་ཀའི་ངོ་ཐུག་གདོང་འཕྲད་ཀྱིས་སྒྲོག་འགྲེལ་ལས་ཀ་སྤེལ་པ་རེད།
   མིག་སྔའི་བར། དཀར་མཛེས་ཁུལ་དང་རྟའུ་རྫོང་གི་མཉམ་འབྲེལ་སྒྲོག་འགྲེལ་ཚོ་ཆུང་དང་། ཡུལ་སྡོད་སྒྲོག་འགྲེལ་ལས་དོན་རུ་ཁག་ཡུལ་ཤོག་དང་། དགོན་པ། གྲོང་ཚོ། སློབ་གྲྭ་སོགས་སུ་བསྐྱོད་དེ་སྒྲོག་འགྲེལ་ཚོགས་ཆེན་ཐེངས་179སྤེལ་ཡོད་ལ། ལས་བྱེད་པ་དང་མང་ཚོགས་21300ལྷག་གིས་སློབ་སྦྱོང་བྱས་ཡོད། 2015ལོའི་སྤྱི་ཟླ་11པའི་ཚེས་1ཉིན་སྒྲོག་འགྲེལ་ལས་དོན་སྤེལ་འགོ་བཙུགས་པ་ནས་བཟུང་། རྫོང་ཡོངས་ཀྱི་གོང་འོག་ཚང་མ་ཧུར་ཐག་སྒོས་ཞུགས་ཤིང་། དགོངས་དོན་ངེས་ཤེས་དང་། སྟོབས་ཤུགས་གཅིག་སྒྲིལ། ཐུན་མོང་འཕེལ་རྒྱས། འཆམ་མཐུན་སྲུང་སྐྱོང་བྱས་ནས། ཕྱོགས་ཡོངས་ནས་སྒྲོག་འགྲེལ་ལས་དོན་གྱི་ཚ་རླབས་གསར་པ་འཕྱུར་བར་བྱས།