ཁང་པ་བསྐྲུན་ཟིན་རྗེས་མང་ཚོགས་ཀྱི་གཞི་རྩའི་འཚོ་བ་དང་སྡོད་ཁང་འགན་སྲུང་གི་གནད་དོན་ཡང་ཐག་གཅོད་བྱས་ཡོད། འདི་ནི་གནོད་རྗེས་བསྐྱར་སྐྲུན་བྱ་རྒྱུའི་ཁྲོད་ཀྱི་འཕྲལ་བཅོས་ཡིན། ཇི་ལྟར་བྱས་ནས་བསྐྱར་སྐྲུན་གྱི་གོ་སྐབས་དང་བསྟུན་ནས་མང་ཚོགས་དང་ལྷག་པར་དུ་འབྲོག་པའི་རགས་གཉེར་ཅན་གྱི་ཐོན་སྐྱེད་བྱེད་སྟངས་དང་འཚོ་བ་སྐྱེལ་སྟངས་ལེགས་བཅོས་བྱ་བ་དང་།  དེ་ནས་མི་སེར་གྱི་ཡོང་འབབ་འཕར་སྣོན་ཡོང་བའི་བརྒྱུད་ལམ་གཏོད་དེ་མི་སེར་གྱི་རྒྱུན་མཐུད་ཡོང་འབབ་ཀྱི་དཀའ་གནད་ཐག་གཅོད་བྱ་རྒྱུ་དེ་ནི་བསྐྱར་སྐྲུན་ཁྲོད་ཀྱི་རྩ་བཅོས་ཡིན།
     འོས་འགན་ཆེན་པོ་འདི་གཉིས་ནི་11·22དར་མདོའི་ས་འགུལ་གནོད་རྗེས་བསྐྱར་སྐྲུན་ཁྲོད་ཀྱི་མེད་ཐབས་མེད་པའི་བརྗོད་གཞི་ཞིག་ཡིན། དེར་བརྟེན། ལོ་གཅིག་རིང་གི་དཀའ་སྤྱད་བསྐྱར་སྐྲུན་བྱས་པར་བརྒྱུད། ས་གནས་དེ་གའི་སྲིད་གཞུང་གིས་དམངས་འཚོ་སྔོན་དུ་འཇོག་པ་ཞེས་པའི་རྩ་དོན་གཞིར་བཟུང་ནས་བདེ་སྐྱིད་དང་མཛེས་སྡུག་ལྡན་པའི་གྲོང་སྡེ་གསར་པ་འཛུགས་སྐྲུན་དང་། ཐོན་ལས་ཀྱིས་རྒྱུན་མཐུད་འཕེལ་རྒྱས་ལ་སྐུལ་ཁྲིད་བྱེད་པའི་བསམ་ཕྱོགས་ཤིག་འཚོལ་ཞིབ་བྱས་པས་འདི་ལྟ་བུའི་བསྐྱར་སྐྲུན་གཙོ་གནད་དེ་ནི་གནད་དོན་ཐག་གཅོད་བྱེད་པའི་ཐབས་ལམ་ཡག་པོ་ཞིག་ཏུ་འགྱུར་ཡོད།།