སྤྱི་ཟླ་12པའི་ཚེས་24ཉིན་བསྒྲགས་པའི་གསར་འགྱུར། སྤྱི་ཟླ་12པའི་ཚེས་21ཉིན། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཁེ་ཆང་གིས་པེ་ཅིན་ནས་རྒྱལ་ཡོངས་སྲིད་གཞུང་གི་དྲུང་ཡིག་ཆེན་མོ་དང་གཞུང་སྒྲུབ་ཐིང་གི་ཀྲུའུ་རིན་གྲོས་ཚོགས་ལ་ཞུགས་པའི་འཐུས་མི་ཡོངས་ལ་མཇལ་འཕྲད་གནང་བར་མ་ཟད་གསུང་བཤད་གལ་ཆེན་གནང་།

　　ལིས་ཁི་ཆང་གིས་ཐོག་མར་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཚབ་མཛད་དེ་རྒྱལ་ཡོངས་སྲིད་གཞུང་ཁོངས་གཏོགས་གཞུང་སྒྲུབ་ཐིང་གི་བློ་མཐུན་རྣམས་ལ་འཚམས་འདྲི་ཞུས་པ་དང་། ཚང་མས་སྲིད་གཞུང་བྱ་བ་རྒྱུན་ལྡན་དང་ཕན་འབྲས་མཐོ་བའི་སྒོ་ནས་འཁོར་སྐྱོད་བྱེད་པར་འགན་སྲུང་བྱས་པ་དང་ལོ་ཧྲིལ་བོའི་དཔལ་འབྱོར་དང་སྤྱི་ཚོགས་འཕེལ་རྒྱས་དམིགས་འབེན་དང་ལས་འགན་གཙོ་བོ་དག་ལེགས་འགྲུབ་བྱེད་པར་བྱས་རྗེས་ཆེན་པོ་བཞག་པར་བཀའ་དྲིན་ཆེ་ཞུས། ཁོང་གིས་ལོ་གསར་བའི་ནང་དུ་བཅོས་སྒྱུར་འཕེལ་རྒྱས་ཀྱི་ལས་འགན་ལྗིད་ཅིང་དཀའ་ཚེགས་ཆེ་བས། ངེས་པར་དུ་ཡིད་ཆེས་ཇེ་བརྟན་དུ་གཏང་བ་དང་དཀའ་ཁག་ཁྱད་དུ་སེལ་ནས་གསར་གཏོད་དང་མཐུན་སྦྱོར། ལྗང་བསྒྱུར། སྒོ་འབྱེད། མཉམ་སྤྱོད་བཅས་ཀྱི་འཕེལ་རྒྱས་འདུ་ཤེས་ལས་ཀ་སྣ་ཚོགས་ཀྱི་ཁྲོད་དུ་ལག་བསྟར་བྱེད་པ་དང་རིམ་པ་སོ་སོའི་སྲིད་གཞུང་གིས་དེའི་ཕྱོགས་སུ་དཔེ་སྟོན་གྱི་ནུས་པ་བཏོན་ཏེ་ཀྲུང་དབྱང་དཔལ་འབྱོར་བྱ་བའི་གྲོས་ཚོགས་ཀྱི་དགོངས་དོན་ཁྱོན་ཡོངས་ནས་ལག་བསྟར་བྱ་དགོས། དེ་མིན་འབྱོར་འབྲིང་སྤྱི་ཚོགས་ཕྱོགས་ཡོངས་ནས་འགྲུབ་པར་བྱེད་པའི་དམིགས་འབེན་ལ་དམིགས་ཏེ་འཕེལ་རྒྱས་དེ་ལས་འགན་དང་པོར་རྩིས་ཏེ་ལྷོད་གཡེང་དུ་མི་གཏོང་བ་དང་། དཔལ་འབྱོར་འཁོར་རྒྱུག་དེ་འོས་འཚམ་གྱི་བར་སྟོང་དུ་སྲུང་འཛིན་བྱ་དགོས། དེ་མིན་སྒྲིག་གཞི་རང་བཞིན་གྱི་བཅོས་སྒྱུར་ལ་སྐུལ་འདེད་གཏང་བ་དང་འཕེལ་རྒྱས་ཀྱི་སྒུལ་ནུས་གསར་བ་གསོ་སྐྱོང་དང་སྲོལ་རྒྱུན་སྒུལ་ནུས་སྒྱུར་བཀོད་དང་ཇེ་ཆེར་གཏང་ནས། དམངས་འཚོ་རྒྱུན་མཐུད་སྒོས་ལེགས་བཅོས་བཅོས་བྱེད་པར་སྐུལ་འདེད་གཏོང་བ་དང་ལོ་ལྔའི་འཆར་གཞི་བཅུ་གསུམ་འགོ་བཟང་བོ་ཞིག་ཚུགས་པ་མངོན་འགྱུར་བྱེད་དགོས་ཞེས་བསྟན། དེ་མིན་ཙུང་ལི་ལི་ཁེ་ཆང་གིས་སྲིད་གཞུང་བྱ་བའི་ཇུས་འདོན་ལས་རོགས་པ་བཟང་པོ་ཞིག་བྱ་དགོས་པ་དང་སྲིད་གཞུང་བྱ་བའི་ཞབས་ཞུ་བ་བཟང་པོ་ཞིག་བྱ་དགོས་པ། སྲིད་གཞུང་བྱ་བའི་ཕན་ཕྱོད་མཐོ་བའི་ལྟ་སྐུལ་བ་བཟང་པོ་ཞིག་བྱ་དགོས་ཞེས་གཞུང་སྒྲུབ་ཁང་གི་ལས་ཀའི་མ་ལག་བཟང་པོ་བསྒྲུབ་པའི་ཐད་ནས་གོང་གི་རེ་བ་གསུམ་བཏོན།།