སྤྱི་ཟླ་2པའི་ཚེས་25ཉིན། རྒྱལ་ཡོངས་སྲིད་གྲོས་ཀྱི་ཀྲུའུ་ཞི་ཡུས་ཀྲེན་ཧྲེང་གིས་སྲིད་གྲོས་སྐབས་བཅུ་གཉིས་པའི་རྒྱལ་ཡོངས་ཨུ་ཡོན་ལྷན་ཁང་གི་ཀྲུའུ་ཞིའི་གྲོས་ཚོགས་ཐེངས་བཞི་བཅུ་བར་གཙོ་སྐྱོང་མཛད་པར་མ་ཟད་གསུང་བཤད་གནང་།

　　གྲོས་ཚོགས་ལས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་འབྲེལ་ཡོད་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་བརྒྱུད་སྒྲོག་བྱས་པ་དང་། སྲིད་གྲོས་སྐབས་བཅུ་གཉིས་པའི་རྒྱལ་ཡོངས་ཨུ་ཡོན་ལྷན་ཁང་གི་གྲོས་ཚོགས་ཐེངས་བཞི་བའི་གྲ་སྒྲིག་ལས་ཀའི་གནས་ཚུལ་ཡར་ཞུ་བྱས་པར་གསན། དེ་མིན་རྒྱལ་ཡོངས་སྲིད་གྲོས་ཀྱི་2016ལོའི་རྟོག་ཞིབ་ལས་ཀའི་བཀོད་སྒྲིག་ལ་གཞི་རྩའི་ཆ་ནས་གྲོས་འཆམ་བྱུང་།
　　ཡུས་ཀྲེན་ཧྲེང་གིས་2016ལོ་ནི་ཁྱོན་ཡོངས་ནས་འབྱོར་འབྲིང་སྤྱི་ཚོགས་འཛུགས་སྐྲུན་འགོ་རྩོམ་པའི་གནད་འགག་གི་དུས་རིམ་ལོ་ཡིན་པས། ཏང་དང་རྒྱལ་ཁབ་ཀྱི་ལས་ཀའི་ལས་འགན་སྔར་ལས་དཀའ་ཚེགས་ཆེ། རྒྱལ་ཡོངས་སྲིད་གྲོས་སྐབས་བཅུ་གཉིས་པའི་གྲོས་ཚོགས་ཐེངས་བཞི་བ་བདེ་བླག་ངང་ཚོགས་པར་དོན་སྙིང་གལ་ཆེན་ལྡན། ང་ཚོས་ངེས་པར་དུ་ནན་ཏན་སྒོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་ལག་བསྟར་བྱས་ཏེ་ཆབ་སྲིད་ཀྱི་འདུ་ཤེས་དང་། སྤྱི་ཡོངས་ཀྱི་འདུ་ཤེས། སྲོག་ཤིང་གི་འདུ་ཤེས། དཔེ་སྟོན་གྱི་འདུ་ཤེས་བཅས་ཇེ་དྲག་ཏུ་གཏང་དགོས་པ་དང་། དྲང་ཕྱོགས་ཀྱི་སྐུལ་ཤུགས་རྒྱུན་འཁྱོངས་བྱེད་པ། དྲང་ཕྱོགས་ནུས་ཚད་གཅིག་བསྡུ་བྱས་ཏེ། རང་རྒྱལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་སུ་གཏང་བའི་ཡིད་ཆེས་དང་སྟོབས་ཤུགས་ཇེ་དྲག་ཏུ་གཏང་དགོས་ཞེས་བསྟན།
　　ཡུས་ཀྲེན་ཧྲེང་གིས་གཅིག་ནས་ཡང་དག་པོའི་སྒོ་ནས་གནས་བབ་ཁོང་དུ་ཆུད་པར་བྱས་ཏེ་སྤོབས་པར་སྐུལ་སློང་དང་ཡིད་ཆེས་སྲ་བརྟན་དུ་བཏང་ནས་ལོ་ལྔའི་འཆར་གཞི་བཅུ་གསུམ་པ་གཏན་འབེབ་དང་ལག་བསྟར་ལེགས་པོ་བྱེད་པར་དམིགས་ཏེ་བློ་འདོན་ཇུས་འབུལ་དང་སྟོབས་ཤུགས་འདོན་དགོས། གཉིས་ནས་གཏིང་ཟབ་པའི་སྒོ་ནས་གྲོས་བསྡུར་བྱེད་པ་དང་དམངས་གཙོའི་ལྟ་སྐུལ་ལས་ཀར་ཤུགས་སྣོན་པ། དཔལ་འབྱོར་དང་སྤྱི་ཚོགས་འཕེལ་རྒྱས་སུ་གཏང་བའི་ཁྲོད་ཀྱི་གནད་དོན་གཙོ་བརོ་དམིགས་ཏེ་བསམ་འཆར་དང་གྲོས་གཞི་བཏོན་ཏེ་ཀྲུང་དབྱང་གི་ཇུས་གཞི་བཀོད་སྒྲིག་དོན་ཐོག་ཏུ་འཁྱོལ་བར་འགན་སྲུང་བྱ་དགོས།  གསུམ་ནས་ཏང་གི་ཚོགས་ཆེན་བཅོ་བརྒྱད་པའི་ཚུན་ལ་བློ་མཐུན་ཞི་ཅིན་ཕིང་སྤྱི་ཁྱབ་ཧྲུའུ་ཅི་ཡིན་པའི་ཀྲུང་དབྱང་གི་རྒྱལ་སྐྱོང་སྲིད་འཛིན་གྱི་འདུ་ཤེས་གསར་པ་དང་བསམ་བློ་གསར་པ། འཐབ་ཇུས་གསར་པ་བཅས་དྲིལ་སྒྲོག་བྱེད་པ་དང་། འབྱོར་འབྲིང་སྤྱི་ཚོགས་ཁྱོན་ཡོངས་ནས་འཛུགས་སྐྲུན་བྱེད་པའི་རླབས་ཆེན་དམིགས་འབེན་ལ་དམ་པོར་དམིགས་པ། མི་རིགས་མཐུན་སྒྲིལ་གྱི་བརྗོད་དོན་ཆེན་མོ་གཉིས་རྒྱུན་འཁྱོངས་བྱས་ཏེ་ཐུན་མོང་གི་འདུ་ཤེས་དང་བློ་གྲོས། སྟོབས་ཤུགས་བཅས་གཅིག་བསྡུ་བྱ་དགོས། བཞི་ནས་གཟབ་ནན་སྒོས་ཀྲུང་དབྱང་གི་གཏན་འཁེལ་བརྒྱད་ཀྱི་ནང་དོན་ལག་བསྟར་བྱེད་པ་དང་། ཚོགས་ཆེན་གྲ་སྒྲིག་གི་རྩ་འཛུགས་ལས་ཀ་ལེགས་པོར་བསྒྲུབ་ནས་གྲོས་ཚོགས་སྲོལ་བཟང་སྤྱོད་བཟང་དང་དངོས་གཉེར་ཕན་ཕྱོད་ལྡན་པ། བདེ་བླག་ངང་ལེགས་འགྲུབ་འབྱུར་བར་འགན་སྲུང་བྱ་དགོས།།