སྤྱི་ཟླ་3པའི་ཚེས་20ཉིན། ཀྲུང་གོའི་འཕེལ་རྒྱས་མཐོ་རིམ་གླེང་སྟེགས་ཀྱི་2016ལོའི་ལོ་ཚོགས་པེ་ཅིང་དུ་ཚོགས་འགོ་ཚུགས། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན། རྒྱབ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཀྲང་ཀའོ་ལི་འགོ་ཚུགས་པའི་མཛད་སྒོར་ཞུགས་ཏེ་གསུང་བཤད་གནང་།
ཀྲང་ཀའོ་ལི་ཡིས་འདས་ཟིན་པའི་ལོ་ལྔ་ནི་ཀྲུང་གོ་འཕེལ་རྒྱས་ལ་མཚོན་ན་སྤྱིར་བཏང་མ་ཡིན་པའི་ལོ་ལྔ་རེད། ང་ཚོས་ལོ་ལྔའི་འཆར་གཞི་བཅུ་གཉིས་པའི་ཇུས་འགོད་ཀྱི་ལས་འགན་གཙོ་བོ་ལེགས་འགྲུབ་བྱུང་ཏེ་འཕེལ་རྒྱས་ཀྱི་གྲུབ་འབྲས་གཡུར་དུ་ཟ་བ་ཞིག་བླངས་ཡོད། བློ་མཐུན་ཞི་ཅིང་ཕིང་སྤྱི་ཁྱབ་ཧྲུའུ་ཅི་ཡིན་པའི་ཀྲུང་གོ་ཀྲུང་དབྱང་གིས་བཏོན་པའི་གསར་གཏོད་དང་མཐུན་སྦྱོར། ལྗང་མདོག སྒོ་འབྱེད། མཉམ་སྤྱོད་བཅས་ཀྱི་འཕེལ་རྒྱས་གསར་པའི་འདུ་ཤེས་ནི་ལོ་ལྔའི་འཆར་གཞི་བཅུ་གསུམ་པ་དང་དེ་ལས་དུས་ཡུན་རིང་པའི་ཀྲུང་གོའི་འཕེལ་རྒྱས་ཀྱི་བསམ་ཕྱོགས་དང་འཕེལ་རྒྱས་ཀྱི་ཁ་ཕྱོགས། འཕེལ་རྒྱས་ཀྱི་ཤུགས་འདོན་ས་བཅས་གཅིག་བསྡུས་སྒོས་མཚོན་པར་བྱས་ཤིང་། ང་ཚོས་གསར་གཏོད་ཀྱི་འཕེལ་རྒྱས་རྒྱུན་འཁྱོངས་བྱས་ནས་ཤུགས་ཆེན་པོས་འཕེལ་རྒྱས་ཀྱི་སྤུས་ཚད་དང་ཕན་ནུས་རོགས་འདེགས་སུ་གཏང་དགོས་པར་མ་ཟད། མཐུན་སྦྱོར་འཕེལ་རྒྱས་རྒྱུན་འཁྱོངས་བྱས་ནས་ཆ་སྙོམས་ཀྱི་འཕེལ་རྒྱས་སྒྲིག་གཞི་གྲུབ་པ་གཙོ་བོ་འཛིན་དགོས་པ་དང་ལྗང་མདོག་འཕེལ་རྒྱས་རྒྱུན་འཁྱོངས་བྱས་ཏེ་སྐྱེ་ཁམས་ཁོར་ཡུག་ལེགས་བཅོས་གཙོ་བོར་འཛིན་དགོས། སྒོ་འབྱེད་འཕེལ་རྒྱས་རྒྱུན་འཁྱོངས་བྱས་ནས་མཉམ་ལས་མཉམ་རྒྱལ་མངོན་འགྱུར་བྱུང་པ་གཙོ་བོར་འཛིན་དགོས། མཉམ་སྤྱོད་འཕེལ་རྒྱས་རྒྱུན་འཁྱོངས་བྱས་ནས་མི་དམངས་ཀྱི་བདེ་སྐྱིད་སྐྲུན་པ་གཙོ་བོར་བཟུང་སྟེ་དུས་ལྟར་ཁྱོན་ཡོངས་ནས་འབྱོར་འབྲིང་སྤྱོ་ཚོགས་བསྐྲུན་ཐུབ་པ་ཁག་ཐེག་བྱ་དགོས་ཞེས་བསྟན།
སྐབས་འདིའི་ཀྲུང་གོའི་འཕེལ་རྒྱས་མཐོ་རིམ་གླེང་སྟེགས་ནི་རྒྱལ་སྲིད་སྤྱི་ཁྱབ་ཁང་འཕེལ་རྒྱས་ཞིབ་འཇུག་ལྟེ་གནས་ཀྱིས་གཙོ་སྐྱོང་གནང་པ་དང་བརྗོད་དོན་གཙོ་བོ་ནི་ལོ་ལྔའི་འཆར་གཞི་གསར་པའི་དུས་སྐབས་ཀྱི་ཀྲུང་གོ་ཡིན་ཏེ། རྒྱལ་ཁབ་ཕྱི་ནང་ནས་ཡོང་པའི་ཆེད་མཁས་པ་དང་ཁེ་ལས་པ། སྲིད་གཞུང་གི་འགོ་ཁྲིད། རྒྱལ་སྤྱི་སྒྲིག་གཞིའི་འཐུས་མི་བཅས་འགོ་ཚུགས་མཛད་སྒོར་ཞུགས། །
