སྤྱི་ཟླ་3པའི་ཚེས་21ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་པེ་ཅིང་མི་དམངས་ཚོགས་ཁང་ཆེན་མོ་རུ་འཇར་མན་གྱི་སྲིད་འཛིན་ཀའོ་ཁུ་དང་མཉམ་དུ་གྲོས་མོལ་གནང་། རྒྱལ་ཁབ་གཉིས་ཀྱི་དབུ་ཁྲིད་ཀྱིས་མུ་མཐུད་དུ་ཀྲུང་འཇར་བར་གྱི་ཕྱོགས་ཡོངས་ཀྱི་འཐབ་ཇུས་མཛའ་འབྲེལ་སྲ་བརྟན་དང་ཤུགས་སྣོན་བྱེད་པ་དང་། རྒྱལ་སྤྱིའི་འགྲན་རྩོད་ཁྲོད་སྔར་ལས་མཉམ་ལས་དམ་ཟབ་བྱེད་པར་མོས་མཐུན་བྱུང་། 
　　ཞི་ཅིན་ཕིང་གིས་ཀའོ་ཁུ་ཡིས་ཀྲུང་གོར་རྒྱལ་དོན་མཚམས་འདྲི་ཐེངས་དང་པོ་ཕེབས་པར་དགའ་བསུ་ཞུས། ཞི་ཅིན་ཕིང་གིས་བསྟན་དོན། མིག་སྔའི་ཀྲུང་གོ་དང་འཇར་མན་གྱི་བརྗེ་རེས་མཉམ་ལས་དམ་ཟབ་ཀྱི་ཚད་རིམ་ནི་ལོ་རྒྱུས་དུས་སྐབས་ཡོངས་ལས་བརྒལ། ཕྱོགས་གཉིས་ཀྱི་འབད་བརྩོན་འོག་ཀྲུང་འཇར་འབྲེལ་བའི་འཕེལ་རྒྱས་ཀྱི་ཆུ་ཚད་ཚད་རིམ་མཐོ་གྲས་ཤིག་ཏུ་སླེབས་ཏེ། ཆབ་སྲིད་ཐད་ཕན་ཚུན་ཡིད་ཆེས་རྒྱུན་མཐུད་ངང་མཐོར་འདེགས་དང་དངོས་དོན་མཉམ་འབྲེལ་མུ་མཐུད་དུ་གཏིང་ཟབ་སྤེལ་བ། རིག་གནས་སྤེལ་རེས་སྔར་ལས་རྒྱ་ཆེར་བསྐྱེད་དེ་རྒྱལ་སྤྱི་དང་ས་གནས་གནད་དོན་ཐད་ཀྱི་མཐུན་སྦྱོར་སྔར་ལས་ཇེ་མང་དུ་གཏང་ཞེས་བསྟན། 
　　ཞི་ཅིན་ཕིང་གིས་ཀའོ་ཁུ་ལ་ཀྲུང་གོའི་འཕེལ་རྒྱས་ཇུས་འགོད་དང་ཀྲུང་གོས་རྒྱུན་འཁྱོངས་བྱས་པའི་ཆབ་སྲིད་ལམ་ལུགས་། ཀྲུང་གོ་མི་དམངས་ཀྱིས་གདམ་གསེས་བྱས་པའི་འཕེལ་རྒྱས་ཀྱི་ལམ་བུ་སོགས་མཚམས་སྦྱོར་གནང་། 
　　ཀའོ་ཁུ་ཡིས་འཇར་ཀྲུང་རྒྱལ་ཁབ་གཉིས་ནི་སོ་སོ་ཡོ་རོབ་གླིང་དང་ཨེ་ཤ་ཡ་གླིང་གི་གལ་ཆེའི་རྒྱལ་ཁབ་ཡིན་ཏེ་རྒྱལ་ཁབ་གཉིས་ཀའི་མི་དམངས་ཀྱིས་ཞི་བདེ་དང་འཕེལ་རྒྱས་ལ་གཅེས་སྤྲས་བྱེད་བཞིན་ཡོད། འཇར་ཀྲུང་རྒྱལ་ཁབ་གཉིས་ཀྱི་སྤྱི་ཚོགས་ལམ་ལུགས་མི་མཐུན་རུང་ཕན་ཚུན་བརྩི་བཀུར་དང་ཕན་ཚུན་ཡིད་ཆེས་ཀྱི་རྨང་གཞིའི་སྟེང་ཕྱོགས་གཉིས་ཀའི་འབྲེལ་བ་མུ་མཐུད་དུ་འཕེལ་རྒྱས་གཏང་ཐུབ་པ་ཡིན། འཇར་མན་ཕྱོགས་ནས་ཡོ་རོབ་གླིང་དང་ཀྲུང་གོའི་མཉམ་ལས་འབྲེལ་བ་མུ་མཐུད་འཕེལ་རྒྱས་སུ་ཕྱིན་པར་སྐུལ་འདེད་གང་འདོད་ཅེས་བསྟན
　　གྲོས་མོལ་མཇུག་སྒྲིལ་རྗེས་རྒྱལ་ཁབ་གཉིས་ཀྱི་དབུ་ཁྲིད་མཉམ་དུ་ཀྲུང་འཇར་ན་གཞོན་བརྗེ་རེས་ལོའི་འགོ་ཚུགས་པའི་མཛད་སྒོར་ཞུགས། 
　　གྲོས་མོལ་གྱི་སྔོན་དུ་ཞི་ཅིན་ཕིང་གིས་མི་དམངས་ཚོགས་ཁང་ཆེན་མོའི་ཤར་སྒོ་མདུན་གྱི་ཐང་ཆེན་དུ་ཀའོ་ཁུ་ལ་དགའ་བསུའི་མཛད་སྒོ་སྤེལ།།