སྤྱི་ཟླ་3པའི་ཚེས་22ཉིན། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཀྲང་ཀའོ་ལི་ཡིས་ཀྲུང་ནན་ཧའེ་ནས་ཨུ་རུ་སུའི་རང་བྱུང་སོལ་རླངས་བཟོ་ལས་སྤྱི་གཉེར་ཁང་གི་སྤྱི་གཉེར་པ་མི་ལུ་དང་མཇལ་ཕྲད་གནང་། 
        ཀྲང་ཀའོ་ལི་ཡིས། རྒྱལ་ཁབ་གཉིས་ཀྱི་དབུ་ཁྲིད་ཀྱི་འཐབ་ཇུས་མཛུབ་སྟོན་འོག་ཀྲུང་ཨུའི་དངོས་དོན་མཉམ་ལས་དང་ལྷག་པར་དུ་ནུས་ཁུངས་མཉམ་ལས་ཀྱི་ཐད་ནས་རྒྱུན་ཆད་མེད་པར་གྲུབ་འབྲས་གསར་པ་ཐོབ་ཡོད། ནུས་ཁུངས་མཉམ་ལས་ལ་འཐབ་ཇུས་རང་བཞིན་དང་ཡུན་གནས་རང་བཞིན་ལྡན་པས་ཕྱོགས་གཉིས་ཀྱིས་འཛུགས་སྐྲུན་བྱས་ཟིན་པའི་རྣམ་གྲངས་གཉེར་སྐྱོང་ཡག་པོ་བྱེད་དགོས་པ་མ་ཟད་ད་དུང་ཧུར་ཐག་གིས་མཉམ་ལས་རྣམ་གྲངས་གསར་པ་འཚོལ་ཞིབ་བྱ་དགོས་ཞེས་བསྟན། 
 མི་ལུ་ཡིས། ཨུ་རུ་སུས་ཀྲུང་གོའི་བར་གྱི་ནུས་ཁུངས་མཉམ་ལས་ལ་མཐོང་ཆེན་ཆེན་པོ་བྱེད་བཞིན་ཡོད་དེ་འཆར་གཞི་ལྟར་བདེ་བླག་ངང་རང་བྱུང་སོལ་རླངས་ཀྱི་ཤར་ཐིག་སྦུབས་ལམ་འཛུགས་སྐྲུན་བྱེད་བཞིན་པ་དང་། ཀྲུང་གོའི་ཕྱོགས་དང་མཉམ་དུ་ཧུར་ཐག་གིས་ནུབ་ཐིག་སྦུབས་ལམ་རྣམ་གྲངས་ཐད་ཀྱི་ཚོང་གྲོས་ལ་གྲོས་མོལ་བྱས་ཏེ་ཕྱོགས་གཉིས་ཀྱི་ནུས་ཁུངས་ཀྱི་མངའ་ཁོངས་སོ་སོའི་འཐབ་ཇུས་མཉམ་ལས་ཀྱི་ཆུ་ཚད་མཐོ་རུ་གཏང་འདོད་ཅེས་བསྟན།།