སྤྱི་ཟླ་3པིའ་ཚེས་26ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་མི་དམངས་ཚོགས་ཁང་ཆེན་མོའི་ནང་ཨུ་རུ་སུའི་སྲིད་འཛིན་གཞུང་སྒྲུབ་ཐིང་གི་ཀྲུའུ་རེན་དབྱེ་ཝན་ནོའོ་ཧྥུའུ་དང་མཇལ་འཕྲད་གནང་།
ཞི་ཅིན་ཕིང་གིས་ཀྲུང་གོ་དང་ཨུ་རུ་སུ་གཉིས་ནི་འཐབ་ཇུས་མཉམ་འབྲེལ་གྱི་གྲོགས་པོ་ཡིན། ཀྲུང་གོ་དང་ཨུ་རུ་སུའི་འཐབ་ཇུས་གྲོགས་པོའི་འབྲེལ་བ་གོང་འཕེལ་དུ་གཏང་རྒྱུ་ནི་རྒྱལ་ཁབ་གཉིས་ཀྱི་འཐབ་ཇུས་གདམ་གསེས་དང་སོ་སོའི་ཕྱི་འབྲེལ་གྱི་ཁ་ཕྱོགས་རེད། ཕྱོགས་གཉིས་ཀྱིས་ད་ལོར་མཉམ་དུ་《ཀྲུང་གོ་དང་ཨུ་རུ་སུའི་ཁྱིམ་མཚེས་མཛའ་མཐུན་མཉམ་ལས་ཆིངས་ཡིག》བཀོད་ནས་ལོ་འཁོར་བཅོ་ལྔ་ལོན་པར་རྟེན་འབྲེལ་ཞུ་པ་གོ་སྐབས་སུ་བརྩིས་ཏེ། ཀྲུང་གོ་དང་ཨུ་རུ་སུའི་མཛའ་མཐུན་མཉམ་ལས་རྒྱུན་འཛིན་དང་དར་སྤེལ་བཏང་ནས་རྒྱལ་ཁབ་གཉིས་ཀྱི་མི་དམངས་ལ་བདེ་སྐྱིད་བསྐྲུན་རྒྱུ་ནི་ང་ཚོའི་རེ་བ་ཡིན། ཕྱོགས་གཉིས་ཀྱིས་མཐོ་རིམ་འགྲོ་འོང་དམ་ཟབ་རྒྱུན་འཁྱོངས་བྱ་དགོས་པ་དང་ཀྲུང་གོ་དང་ཨུ་རུ་སུའི་འཕེལ་རྒྱས་འཐབ་ཇུས་ལ་མཐུད་སྦྲེལ་བྱེད་པར་དམིགས་ཏེ་ཕྱོགས་གཉིས་ཀྱི་ཁྱབ་ཁོངས་གཙོ་བོའི་དངོས་དོན་མཉམ་ལས་གཏིང་ཟབ་ཏུ་སྤེལ་དགོས། ཀྲུང་གོ་དང་ཨུ་རུ་སུའི་འཐབ་ཇུས་མཉམ་འབྲེལ་ནི་འཛམ་གླིང་དང་ས་ཁུལ་གྱི་ཞི་བདེ་བརྟན་འཇགས་ལ་སྲུང་སྐྱོབ་བྱེད་པའི་རྒྱུ་རྐྱེན་གཙོ་བོ་ཡིན་པས། ཕྱོགས་གཉིས་ཀྱིས་རྒྱལ་སྤྱི་དང་ས་ཁུལ་གྱི་ལས་དོན་ཁྲོད་མཐུན་སྦྱོར་ཟབ་མོ་བྱས་ཏེ། མཉམ་དུ་གནད་དོན་གལ་ཆེན་དག་ཆབ་སྲིད་ཀྱི་ལམ་ནས་ཐག་གཅོད་པའི་འཕེལ་རིམ་ལ་སྐུལ་འདེད་གཏང་དགོས་ཞེས་བསྟན།
དབྱེ་ཝན་ནོའོ་ཧྥུའུ་ཡིས་ཨུ་རུ་སུ་དང་ཀྲུང་གོའི་མཐོ་རིམ་འགྲོ་འོང་ཟབ་མོས་རྒྱལ་ཁབ་གཉིས་ཀྱི་ཕྱོགས་ཡོངས་ཀྱི་འཐབ་ཇུས་མཛའ་འབྲེལ་གྲོགས་པོའི་འབྲེལ་བ་གོང་འཕེལ་དུ་གཏང་བར་ཁྲིད་སྟོན་གྱི་ནུས་པ་གལ་ཆེན་ཐོན་ཡོད། དེང་སྐབས་རྒྱལ་ཁབ་གཉིས་ཀྱི་ཁྱབ་ཁོངས་སོ་སོའི་མཉམ་ལས་མགྱོགས་མྱུར་སྒོས་འཕེལ་རྒྱས་དང་རྒྱལ་སྤྱི་ལས་དོན་ཁྲོད་འབྲེལ་འདྲིས་མཐུན་སྦྱོར་དམ་པོ་བྱེད་བཞིན་ཡོད། ཨུ་རུ་སུའི་སྲིད་འཛིན་གཞུང་སྒྲུབ་ཐིང་གིས་ཀྲུང་གུང་ཀྲུང་དབྱང་གཞུང་སྒྲུབ་ཐིང་དང་མཉམ་དུ་འབད་བརྩོན་བྱས་ཏེ་རྒྱལ་ཁབ་གཉིས་ཀྱི་གཙོ་འཛིན་བར་བྱུང་བའི་ཐུན་མོང་གི་ལྟ་ཚུལ་ལག་བསྟར་བྱས་ནས་ཨུ་རུ་སུ་དང་ཀྲུང་གོའི་འབྲེལ་བ་གོང་འཕེལ་དུ་གཏང་བར་བྱས་རྗེས་འཇོག་འདོད་ཅེས་བསྟན།།
