ཁྲོ་ལའི་ཕུག་ལམ་དང་གེ་སར་གནམ་ཐང་ཤར་གཏོང་ཐུབ་པས། སྡེ་དགེ་རྫོང་གི་འགྲིམ་འགྲུལ་སྟབས་ཇེ་བདེར་གྱུར། སྟབས་བདེ་ཅན་གྱི་གནམ་སའི་འགྲིམ་འགྲུལ་གྱི་ཁྱད་ཆོས་ཀྱིས་རྒྱལ་ཁབ་ཕྱི་ནང་གི་ཚོང་རའི་འབྲེལ་བ་སྔར་བས་དམ་ཟབ་ཏུ་བཏང་། སྡེ་དགེ་རྫོང་ཨུ་དང་སྲིད་གཞུང་གི་རྒྱབ་སྐྱོར་འོག སྨན་ཤོར་གྱིས་སྦྱོང་བརྡར་དང་། ཞིབ་འཇུག་གསར་སྤེལ། ཐོན་སྐྱེད། ལས་སྣོན། འགྲེམ་སྟོན། ཚོང་གཉེར། ཡུལ་སྐོར་བཅས་ཀྱི་བརྒྱུད་འབྲེལ་དཔེ་རྣམ་གྱི་ལག་ཤེས་བཟོ་རྩལ་རིག་གནས་གླིང་ཁུལ་གསར་དུ་གཏོད་རྒྱུ་རེད། 

     གསར་འགོད་པས་སྡེ་དགེ་རྫོང་དུ་རྒྱུས་ལོན་བྱུང་བ་ལྟར་ན། ཉེ་བའི་ལོ་ཤས་རིང་། རྒྱལ་ཁབ་དང་ཞིང་ཆེན། ཁུལ་རིམ་པའི་ཤུགས་ཆེན་པོའི་རྒྱབ་སྐྱོར་འོག རྒྱལ་ལམ་317དང་ཞིང་ཆེན་རིམ་པའི་གཞུང་ལམ་217པའི་རིམ་སྤོར་སྒྱུར་བཀོད་ཕྱོགས་ཡོངས་ནས་ལེགས་འགྲུབ་བྱུང་། ཁྲོ་ལའི་ཕུག་ལམ་བསྡོམས་པས་སྨི་5530གཏོད་ཟིན་པ་དང་། ད་ལོར་ཤར་གཏོང་ཐུབ་པའི་རེ་བ་འདུག རྒང་ཐོག་ཕུག་ལམ་དང་སྡེ་དགེ་ཕུག་ལམ་ཡང་ད་ལོ་ཤར་གཏོང་བྱེད་ཐུབ་པའི་རེ་བ་འདུག གེ་སར་གནམ་ཐང་འཛུགས་སྐྲུན་བྱེད་འགོ་ཚུགས་པ་དང་། སང་ལོར་མཁའ་སྐྱོད་ཐུབ་པའི་རེ་བ་ཡོད། གྲོང་གསེབ་གྱི་གཞུང་ལམ་སྤྱི་ལེ་345.71གསར་སྐྲུན་རྒྱ་སྐྱེད་བྱས་ཤིང་། སྡེ་དགེ་རྫོང་གི་གནམ་སའི་འགྲིམ་འགྲུལ་གྱི་རྐང་འཛིན་དྲ་བ་མགྱོགས་མྱུར་ངང་གྲུབ་བཞིན་འདུག 
     སྡེ་དགེ་རྫོང་གིས་གནམ་སའི་འགྲིམ་འགྲུལ་གྱི་སྟབས་བདེ་གནས་བབ་ལ་དམིགས་ནས། འགྲིམ་འགྲུལ་དཔལ་འབྱོར་ཁུལ་གཏོད་རྒྱུ་རེད། རིམ་པ་མང་པོའི་ཡུལ་སྐོར་ཐོན་རྫས་དང་ཚོང་རྫས་འཚོལ་ཞིབ་དང་གསར་སྤེལ་བྱས་ཤིང་། ཤུགས་ཆེན་པོས་ཐོན་ལས་སྐྱེད་སྲིང་དང་སྦྲེལ་མཐུད་ལ་སྐུལ་འདེད་བྱས་ནས། རིག་གནས་ཐོན་ཁུངས་ཀྱི་ལེགས་ཆ་མངོན་གསལ་དུ་གཏོད་པ་དང་། མངོན་གསལ་དོད་པོའི་ངང་ཁམས་པའི་རིག་གནས་གླིང་ཁུལ་དང་འབྲོག་པའི་ཡུལ་སྲོལ་གོམས་གཤིས་མཚོན་པའི་རིག་གནས་གླིང་ཁུལ། སྐྱེ་ཁམས་རིག་གནས་ཡུལ་སྐོར་བར་ཁྱམས་ཀྱི་གསོ་སྐྱོང་གོང་འཕེལ་དང་ཡུལ་སྐོར་ལམ་ཐིག་ལེགས་ཤོས་གཏོད་པར་དམ་འཛིན་ཡག་པོ་བྱས་ཏེ།  ཤུགས་ཆེན་པོའི་ངང་ཡིད་ལྷུང་ལྷ་མཚོའི་མཛེས་ལྗོངས་ས་ཁུལ་གསར་སྤེལ་དང་སྨན་ཤོར་ཡུག་ཁུལ་གྱི་མི་རིགས་ལག་ཤེས་བཟོ་རྩལ་གླིང་ཁུལ་གྱི་འཛུགས་སྐྲུན་ལ་སྐུལ་འདེད་བྱས་ནས། རྣམ་པ་མང་པོ་ཅན་གྱི་དམངས་སྲོལ་རིག་གནས་དང་ཐོན་ལས་ཕན་ཚུན་མཉམ་འདྲེས་དང་ཕན་ཚུན་སྐུལ་འདེད་བྱེད་པར་སྐུལ་འདེད་བཏང་། 
     སྡེ་དགེ་རྫོང་ཨུའི་ཧྲུའུ་ཅི་ཧོ་ཞའོ་ཁྲུན་གྱིས་བཤད་རྒྱུར། སྡེ་དགེ་རྫོང་གིས་ཞིང་འབྲེལ་མ་དངུལ་བསྡུ་སྒྲིག་བྱས་ནས། ཤུགས་ཆེན་པོས་གྲོང་ཚོ་གཅིག་ལ་ཐོན་རྫས་གཅིག་ཞེས་པའི་ཞིང་འབྲོག་ཡུལ་སྐོར་སྤྲོ་གསེང་གི་དཔེ་མཚོན་ཡུལ་ཚོ་དང་། ཞིང་འབྲོག་ལྟ་སྐོར་ཡུལ་སྐོར་གྱི་རྟེན་གཞི་ཁག་ཅིག་གསར་དུ་གཏོད་ནས་སྣ་མང་ཞིང་ལས་ཡུལ་སྐོར་གྱི་རྣམ་པ་ཆགས་སུ་འཇུག་རྒྱུ་དང་།  ཤུགས་ཆེན་པོས་མི་རིགས་རིག་གནས་ཐོན་ལས་འཕེལ་རྒྱས་སུ་གཏང་བ་དང་། གཏིང་ཟབ་སྒོས་ཁམས་པའི་རིག་གནས་དང་གེ་སར་རིག་གནས་ཀྱི་ཁྱད་ལྡན་ཐོན་ཁུངས་སྔོག་འདོན་བྱས་ནས། སྡེ་དགེ་པར་ཁང་གི་རིག་གནས་ཐོན་ལས་གླིང་ཁུལ་འཛུགས་སྐྲུན་བྱེད་པར་སྐུལ་འདེད་བྱས་པ་དང་། པར་ཁང་གི་གཟུགས་མེད་ཤུལ་བཞག་རིག་གནས་ཀྱི་རེ་འདུན་ཞུ་བའི་གོམ་སྟབས་ཇེ་མགྱོགས་སུ་གཏང་དགོས། ཁམས་པའི་ཁྱད་ཆོས་ལྡན་པའི་དམངས་སྲོལ་དང་གེ་སར་རིག་གནས་དམངས་སྲོལ་རྟེན་རྫས་བཤམས་སྟོན་ཁང་། གཟུགས་མེད་ཤུལ་བཞག་རིག་གནས་རྣམ་གྲངས་སོགས་ཀྱི་ཐོན་ཁུངས་བེད་སྤྱོད་གང་ལེགས་བྱས་ཏེ། ཤུགས་རྐྱེན་ཆེན་པོ་ལྡན་ཞིང་ཐོན་ལས་ཀྱི་རྣམ་པ་ཆགས་ཐུབ་པའི་གླུ་གར་དང་ཟློས་གར་རིགས་གསར་གཏོད་བྱེད་པ་དང་། རིག་གནས་ཐོན་ལས་ཀྱི་གཙོ་གནད་ཐོན་རྫས་ཁག་ཅིག་གསར་དུ་གཏོན་ནས། མི་རིགས་རིག་གནས་དང་སྐྱེ་ཁམས་ཡུལ་སྐོར་གསར་སྤེལ་གཏིང་ཟབ་པའི་སྒོ་ནས་མཉམ་འདྲེས་བྱེད་པར་སྐུལ་འདེད་བྱེད་པ་དང་། རིག་གནས་ཐོན་ལས་དེ་སྡེ་དགེའི་དཔལ་འབྱོར་གྱི་འཕར་གཞི་གསར་པར་གསོ་སྦྱོང་བྱེད་དགོས།
    མཛེས་སྡུག་བདེ་སྐྱིད་ཀྱི་གྲོང་སྡེ་གསར་པ་འཛུགས་སྐྲུན་བྱེད་པའི་ཁྲོད། མི་རིགས་ཀྱི་ཁྱད་ཆོས་དང་ས་གནས་ཀྱི་ཁྱད་ཆོས་འབུར་དུ་ཐོན་དགོས་ལ། ཐོན་ལས་དང་གྲོང་སྡེ་མཉམ་འདྲེས། ཡུག་གཅིག་སྐུལ་འདེད་གཏོང་རྒྱུ་རྒྱུན་འཁྱོངས་བྱས་ཏེ་ཟུར་སྣོན་རིན་ཐང་ཆེ་བའི་ཁྱད་ལྡན་སྤུས་ལེགས་ཀྱི་ཞིང་འབྲོག་ལས་དང་གྲོང་སྡེའི་ཡུལ་སྐོར་ལས་རིགས་འཕེལ་རྒྱས་སུ་བཏང་ནས། ཞིང་འབྲོག་མང་ཚོགས་ཀྱིས་ས་ཁུངས་ཡོངས་ཀྱི་ཡུལ་སྐོར་འཕེལ་རྒྱས་ཀྱི་འཐབ་ཇུས་ནང་དུ་གནད་སྨིན་དབུལ་སྐྱོར་གྱི་བྱ་ཐབས་རབ་དང་རིམ་པ་ལག་བསྟར་བྱས་པ་བརྒྱུད། ཞིང་འབྲོག་མང་ཚོགས་དབུལ་ཕོངས་ལས་ཐར་ཏེ་བདེ་སྐྱིད་འཚོ་བ་རོལ་དུ་འཇུག་དགོས།།