སྤྱི་ཟླ་4པའི་ཚེས་12ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་མི་དམངས་ཚོགས་ཁང་ཆེན་མོའི་ནང་ནི་ཇེ་རི་ཡའི་སྲིད་འཛིན་པོ་ཧ་ལི་དང་གྲོས་མོལ་མཛད། རྒྱལ་ཁབ་གཉིས་ཀྱི་འགོ་ཁྲིད་ཀྱིས་ཀྲུང་གོ་དང་ནི་ཇེ་རི་ཡའི་འཐབ་ཇུས་མཛའ་མཐུན་འབྲེལ་བ་སྐས་རིམ་གསར་པ་ཞིག་ཏུ་འཕེལ་བར་སྐུལ་འདེད་གཏང་སྟེ་རྒྱལ་ཁབ་གཉིས་ཀྱི་མི་དམངས་ལ་སྔར་ལས་མང་བའི་ཁེ་ཕན་བསྐྲུན་པར་ཐག་གཅོད་མཛད།
    ཞི་ཅིན་ཕིང་གིས་ད་ལོ་ནི་ཀྲུང་གོ་དང་ནི་ཇེ་རི་ཡ་གཉིས་ཀྱིས་འབྲེལ་བ་བཙུགས་ནས་ལོ་འཁོར་45ལོན་པའི་ལོ་རེད། ལོ་ངོ་45ཡི་རིང་ལ། ཕྱོགས་གཉིས་ཀྱི་ཐུན་མོང་གི་འབད་བརྩོན་འོག རྒྱལ་ཁབ་གཉིས་ཀྱི་ཁྱབ་ཁོངས་སོ་སོའི་མཛའ་མཐུན་གཉིས་ཕན་མཉམ་ལས་ལ་གཡུར་དུ་ཟ་བའི་འབྲས་བུ་བླངས། འཛམ་གླིང་སྣ་མང་ཅན་དང་དཔལ་འབྱོར་འཛམ་གླིང་ཅན་གྱི་རྒྱུན་མཐུད་སྐུལ་འདེད་ཀྱི་ཁོར་ཡུག་ཆེན་མོའི་འོག ཀྲུང་གོ་དང་ནི་ཇེ་རི་ཡའི་ཁྱབ་ཁོངས་སོ་སོའི་མཛའ་མཐུན་གཉིས་ཕན་མཉམ་ལས་གཏིང་ཟབ་ཏུ་སྤེལ་བ་ནི་རྒྱལ་ཁབ་གཉིས་དང་རྒྱལ་ཁབ་གཉིས་ཀྱི་མི་དམངས་ཀྱི་རྩ་བའི་ཁེ་ཕན་དང་རྒྱང་དམིགས་ཁེ་ཕན་དང་མཐུན་པར་མ་ཟད། ཧྥེ་གླིང་དང་འཛམ་གླིང་གི་ཞི་བདེ་དང་བརྟན་བརླིང་། འཕེལ་རྒྱས་བཅས་མངོན་འགྱུར་བྱུང་བར་ཡང་ཕན་ནུས་གལ་ཆེན་འདོན་ངེས་ཞེས་བསྟན། 
    པོ་ཧ་ལི་ཡིས་ནི་ཇེ་རི་ཡ་དང་ཀྲུང་གོས་འབྲེལ་བ་བཙུགས་ནས་ལོ་འཁོར་45ལོན་པར་དགའ་སྤྲོ་སྐྱེས་བཞིན་ཡོད་ལ། རྒྱལ་ཁབ་གཉིས་ཀྱི་འབྲེལ་བའི་འཕེལ་རྒྱས་ལ་གཡུར་དུ་ཟ་བའི་གྲུབ་འབྲས་བླངས་པ་དང་ཁྱབ་ཁོངས་སོ་སོའི་མཉམ་ལས་རྒྱུན་ཆད་མེད་པར་གཏིང་ཟབ་ཏུ་ཕྱིན། ནི་ཇེ་རི་ཡ་ཕྱོགས་ནས་ཀྲུང་གོས་ཡུན་རིང་བོར་རྨང་གཞིའི་སྒྲིག་བཀོད་འཛུགས་སྐྲུན་གྱི་ཐད་ལ་རོགས་སྐྱོར་ཆེན་པོར་གནང་བར་བཀའ་དྲིན་ཞུ་བཞིན་ཡོད། ནི་ཇེ་རི་ཡ་ཕྱོགས་ནས་རྒྱལ་ཁབ་གཉིས་ཀྱི་གྲོས་མཐུན་ལག་བསྟར་བྱས་ཏེ་ཀྲུང་གོའི་ཞིང་ལས་དང་གཏེར་ལས། རྨང་གཞིའི་སྒྲིག་བཀོད། མི་ཤུགས་ནུས་ཁོངས་སོགས་ཁྱབ་ཁོངས་ཀྱི་གཉིས་ཕན་མཉམ་ལས་རྒྱ་སྐྱེད་ནས་ནི་ཇེ་རི་ཡ་རྒྱལ་ཁབ་ཀྱི་དཔལ་འབྱོར་སྣ་མང་ཅན་གྱི་འཕེལ་རྒྱས་དང་ལས་ཞུགས་ཀྱི་སྐུལ་འདེད་ལ་སྟོབས་ཤུགས་འདོན་འདོད་པར་མ་ཟད། ཀྲུང་གོའི་རྒྱལ་སྤྱིའི་ལས་དོན་ཁྲོད་ཀྱི་མཉམ་ལས་ལ་ཤུགས་སྣོན་བྱ་འདོད་ཅེས་བསྟན།།