ཉེ་ཆར། སྡེ་དགེའི་འགུ་གཟི་དགོན་གྱི་གཙོ་ཁང་གི་ཟུར་ཞིག་གློ་བུར་དུ་རྡིབ་རྗེས་ལྡེབས་རིས་རྙིང་པ་ཚོ་ཞིག་གསར་དུ་བུད་པའི་འདྲ་པར་ཁ་ཤས་རྫོང་སར་བློ་གྲོས་ཕུན་ཚོགས་ཀྱིས་གསར་འགོད་པའི་འཕྲིན་ཕྲན་དུ་བསྐུར་བྱུང་། མ་ཚད་ཁོང་ལོ་བཅུའི་སྔོན་དུ་འགུ་གཟི་དགོན་དུ་ཕེབས་སྐབས་རི་མོ་དེ་དག་མཐོང་མྱངས་ཤིང་། ཁོང་གིས་བལྟས་ན་རི་མོ་དེ་དག་ལ་བཀའ་གདམས་རྙིང་མའི་རི་མོའི་ཤན་ཞུགས་ཆེ་བས་ལོ་རྒྱུས་ཡུན་རིང་པོ་ལྡན་པས་ཧ་ཅང་རིན་ཐང་ཆེ་ཚུལ་དགོན་པའི་འགན་ཁུར་བ་ལ་བཤད་པར་མ་ཟད། གང་མོས་ཀྱིས་ཉམས་གསོ་བྱ་མི་རུང་པའི་བསམ་ཚུལ་བཏོན་མྱངས་གསུངས།
གསར་འགོད་པས་མྱུར་དུ་དགོན་པ་དེའི་མཁན་པོ་ཚེ་རིང་རྡོ་རྗེ་དང་འབྲེལ་བ་བྱས་ཏེ་གནས་ཚུལ་ཞིབ་ཕྲ་བཅར་འདྲི་བྱས། མཁན་པོ་དེ་ཕ་ཡུལ་ནང་ཆེན་ནས་ཡིན་ཞིང་། དགོན་པ་འདིར་ལོ་བཅུ་ལྷག་གི་མཁན་པོ་མཛད་མྱངས་རུང་གཙོ་ཁང་ཟུར་དུ་དེ་འདྲའི་རི་མོ་ཡོད་པ་གཏན་ནས་མཐོང་མ་མྱངས་གསུངས། ཁོང་གིས་རི་མོ་དེ་དག་གི་རིན་ཐང་དང་ལོ་རབས་ཁ་གསལ་པོ་ཞིག་མི་ཤེས་རུང་། ཕར་བལྟས་ཚོད་ལ་ཧ་ཅང་རྙིང་པ་ཡིན་པའི་ཉམས་འདུག་་ཟེར། ཁོང་གིས་གསུངས་པར་ལྟར་ན་ལྷ་ཁང་རྙིང་པ་དེ་སྨྀ་ཏི་ཛྙ་ནས་བཞེངས་ཚུལ་གྱི་བཤད་སྲོལ་ཡང་འདུག གང་ལྟ་ལྷ་ཁང་དེ་ནི་ཧ་ཅང་རྙིང་ཆེ་ནས་རྟིང་རྡིབ་པ་ཞིག་རེད་གསུངས། གསར་འགོད་པས་ཁོང་གིས་བསྐུར་བའི་འདྲ་པར་རྣམས་ལམ་སང་ཀྲུང་གོའི་གནའ་རྫས་རྟོག་ཞིབ་པ་གྲགས་ཅན་ཝུན་ཡུས་ཁྲེང་དང་། བོད་ཀྱི་མཁས་དབང་དཀོན་མཆོག་བསྟན་འཛིན། དམངས་ཁྲོད་ཀྱི་ཐང་ག་ཉར་ཚགས་པ་དཀོན་མཆོག་བཀྲ་ཤིས། ནོར་བུ། བསོད་ནམས་གྲགས་པ་དང་། ལྷ་རིས་པ་མཁས་ཅན་ལྟག་ཨུ་རྒྱན་ཆོས་འཕེལ་དང་ཡ་མ་ཚེ་རིང་སོགས་རི་མོ་ལ་ཆ་རྒྱུས་ཆེ་བའི་མཁས་དབང་རྣམས་ལ་དེའི་ལོ་རབས་དང་རིན་ཐང་སྐོར་བཀའ་འདྲི་ཞུས་པ་ཡིན།
སློབ་ནུབ་མི་རིགས་སློབ་ཆེན་གྱི་དགེ་རྒན་ཆེན་མོ་དཀོན་མཆོག་བསྟན་འཛིན་ལགས་ཀྱིས་རི་མོ་ཁ་ཤས་དུས་རབས་༡༤པ་ནས་༡༥་པ་ཙམ་ཡིན་པ་དང་། ཁ་ཤས་ནི་དུས་རབས་༡༧པ་ཙམ་ཡིན་པའི་དགོངས་འཆར་བཏོན། རི་མོ་ལ་ཉམས་མྱོང་ཆེ་བའི་ཐང་ག་ཉར་ཚགས་པ་དཀོན་མཆོག་བཀྲ་ཤིས་དང་། ནོར་བུ། བསོད་ནམས་གྲགས་པ་སོགས་ཀྱིས་ཀྱང་ལྡེབས་རིས་དེ་དག་དུས་རབས་༡༥པའི་རི་མོ་ཡིན་ཚུལ་བཏོན། ཀྲུང་གོའི་གནའ་རྫས་རྟོག་ཞིབ་པ་གྲགས་ཅན་ཝུན་ཡུས་ཁྲེང་གིས་ཀྱང་རི་མོ་དེ་དག་མིང་དུས་རབས་ཀྱི་ཡིན་པ་དང་། ཁ་ཤས་ནི་ཆིང་གི་དུས་རབས་སུ་སྣོན་འབྲི་བྱས་པ་ཡིན་པའི་དགོངས་འཆར་བཏོན།
