ཉེ་ཆར། ཞིང་ཆེན་ཏང་ཨུའི་ཐེངས་དྲུག་པའི་སྐོར་ཞིབ་ཚན་ཆུང་ལ་དཀར་མཛེས་ཁུལ་གྱི་ལས་ཀའི་སྙན་ཞུ་གནང་སྐབས། དཀར་མཛེས་ཁུལ་ཨུའི་ཧྲུའུ་ཅི་ལིའུ་ཁྲེན་མིང་གིས་བཤད་རྒྱུར། 2020ལོར། དཀར་མཛེས་ཁུལ་གྱིས་འབུམ་རམས་པ་100དང་ཤེས་རམས་པ་1000བསྡུ་རྒྱུ་ཡིན་པ་བསྟན།
    ལོ་ལྔའི་འཆར་གཞི་བཅུ་གསུམ་པའི་སྐབས་སུ། དཀར་མཛེས་ཁུལ་གྱིས་དབུལ་སྒྲོལ་འགག་སྒྲོལ་གྱི་འགག་རྩའི་རྒྱལ་ཁ་མངོན་འགྱུང་བྱེད་པ་དང་། དབུལ་པོའི་གྲོང་སྡེ1360དང་། དབུལ་པོའི་དུད་ཚང་48433དང་། ཡིག་ཚགས་བཟོས་པའི་དབུལ་པོའི་མི་འབོར་197464ངེས་པར་དུ་ཁག་བགོ་བྱས་ནས་དབུལ་ཕོངས་ལས་ཐར་བར་བྱ་དགོས་ཤིང་། ཤེས་ལྡན་མི་སྣ་དཀོན་པ་ནི་དཀར་མཛེས་ཁུལ་གྱི་དབུལ་སྒྲོལ་འགག་སྒྲོལ་གྱི་དཀའ་གནད་གལ་ཆེན་ཞིག་ཏུ་འགྱུར་ཡོད། 
    དཀར་མཛེས་ཁུལ་ཨུའི་རྒྱུན་ལས་ཨུ་ཡོན། རྩ་འཛུགས་པུའུ་ཡི་པུའུ་ཀྲང་ཀྲོ་པོ་ཡིས་ངོ་སྤྲོད་བྱས་པ་ལྟར་ན། གཙོ་བོ་ཡུལ་སྐོར་དང་ཆུ་གློག་གསར་སྤེལ། ཞིང་ལས། ཕྱུགས་རིགས་སྨན་པ། ཕྱི་ཕྱོགས་དཔལ་འབྱོར་དང་ཕྱི་ཕྱོགས་ཉོ་ཚོང་། དངུལ་རྩའི་འགན་བཅོལ། ཁོར་ཡུག་སྲུང་སྐྱོབ།  བཅའ་ཁྲིམས་སོགས་ཀྱི་ཆེད་ལས་ཤེས་ལྡན་མི་སྣ་མི་འདང་བ་དང་། མཐོ་སྒང་གི་དེང་རབས་ཞིང་འབྲོག་ལས་རིགས་དང་ཁྱད་ལྡན་གཏེར་ལས། སྐྱེ་ཁམས་ནུས་ཁུངས། ཀྲུང་ལུགས་དང་བོད་ལུགས་སྨན་ལས། མི་རིགས་རིག་གནས་སོགས་ཀྱི་ཐོན་ལས་ཤེས་ཡོན་ཅན་ཧ་ཅང་དཀོན་ཞེས་བསྟན། 
  ད་ལོར། དཀར་མཛེས་ཁུལ་ཨུ་དང་ཁུལ་སྲིད་གཞུང་གིས་བརྟག་ཞིབ་གང་ལེགས་བྱས་པ་བརྒྱུད། 《འབུམ་རམས་པ་བརྒྱ་དང་ཤེས་རམས་པ་སྟོང་དཀར་མཛེས་སུ་བསྐྱོད་པ་ཞེས་པའི་བྱ་འགུལ་སྐོར་གྱི་ལག་བསྟར་བསམ་འཆར།》བཏོན་ཞིང་། དཀར་མཛེས་ཁུལ་གྱི་དཔལ་འབྱོར་སྤྱི་ཚོགས་འཕེལ་རྒྱས་ཀྱི་དབུལ་སྒྲོལ་འགག་སྒྲོལ་དང་ཁྲིམས་ལྟར་ཁུལ་སྐྱོང་བ། ཐོན་ལས་ལ་བརྟེན་ནས་དམངས་ཚོགས་ཕྱུག་གྱུར་བྱེད་པ། འགྲིམ་འགྲུལ་སྔོན་ལ་བསྐྲུན་པ། གྲོང་ཁྱེར་དང་གྲོང་གསེབ་མཐོར་འདེགས་དང་སྐྱེ་ཁམས་དཔལ་ཡོན་འཛུགས་སྐྲུན་སོགས་ཀྱི་འཐབ་ཇུས་ཆེན་པོ་དྲུག་ལ་དམིགས་ཏེ། ལས་རིགས་ཁག་གི་ཤེས་ལྡན་མི་སྣ་གཅིག་ཏུ་བསྡུས་ནས། 2020ལོར་འབུམ་རམས་པ་100དང་ཤེས་རམས་པ་1000བསྡུ་ལེན་བྱ་རྒྱུ་རེད། །