སྤྱི་ཟླ་5པའི་ཚེས་30ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཨེ་ཅིབ་ཀྱི་སྲིད་འཛིན་ཞི་སད་ལ་རྟེན་འབྲེལ་ཞུ་བའི་གློག་འཕྲིན་བཏང་སྟེ་ཀྲུང་གོ་དང་ཨེ་ཅིབ་གཉིས་ཀྱི་འབྲེལ་བ་བཙུགས་ནས་ལོ་འཁོར་60ལོན་པར་རྟེན་འབྲེལ་ཞུས།

　　ཞི་ཅིན་ཕིང་གིས་རྟེན་འབྲེལ་ཞུ་བའི་གློག་འཕྲིན་ནང་། ལོ་ངོ་དྲུག་ཅུའི་སྔོན་ལ་རླབས་ཆེ་བའི་ཀྲུང་གོ་དང་ཨེ་ཅིབ་རྒྱལ་ཁབ་གཉིས་ཀྱིས་དངོས་སུ་འབྲེལ་བ་བཙུགས་པ་རེད། ལོ་ངོ་དྲུག་ཅུའི་རིང་ལ་རྒྱལ་ཁབ་གཉིས་ཀྱིས་མཉམ་དུ་འབད་བརྩོན་བྱས་འོག རྒྱལ་ཁབ་གཉིས་ཀྱི་ཆབ་སྲིད་དང་དཔལ་འབྱོར་བཟོ་ཚོང་། མི་ཆོས་སོགས་ཁྱབ་ཁོངས་མང་བོའི་ཐད་ནས་རྒྱ་ཆེ་བའི་མཉམ་ལས་སྤེལ་ནས་གཡུར་དུ་ཟ་བའི་གྲུབ་འབྲས་བླངས།  ཀྲུང་གོ་དང་ཨེ་ཅིབ་གཉིས་ཀྱི་འབྲེལ་བ་དེ་ཀྲུང་གོ་དང་ཨ་རབ་རྒྱལ་ཁབ། ཀྲུང་གོ་དང་ཨ་ཧྥེ་རི་ཁ་བཅས་མཉམ་གཅིག་ཏུ་སྦྲེལ་བའི་དཔེ་སྟོན་ལྟ་བུ་ཡིན། མ་འོངས་པར་རྒྱང་ལྟ་བྱས་ན་ང་ཚོར་རྒྱལ་ཁབ་གཉིས་ཀྱི་འབྲེལ་བའི་མདུན་ལྗོངས་ལ་ཡིད་ཆེས་ཀྱིས་ཁེངས་ཡོད། བདག་གིས་ཁྱེད་དང་ལྷན་དུ་འབད་པ་ཆེན་པོས་རྒྱལ་ཁབ་གཉིས་ཀྱི་ཁྱོན་ཡོངས་ཀྱི་འཐབ་ཇུས་གྲོགས་པོའི་འབྲེལ་བ་གཏིང་ཟབ་ཏུ་སྤེལ་ཏེ། རྒྱལ་ཁབ་གཉིས་ཀྱི་མི་དམངས་ལ་སྔར་ལས་བདེ་སྐྱིད་བསྐྲུན་འདོད་ཅེས་བསྟན།

　　སད་ཞི་ཡིས་རྟེན་འབྲེལ་ཞུ་བའི་གློག་འཕྲིན་ནང་། རྒྱལ་ཁབ་གཉིས་ཀྱིས་ཆབ་སྲིད་དང་དཔལ་འབྱོར། རིག་གནས་སོགས་ཁྱབ་ཁོངས་ཀྱི་འབྲེལ་བ་གཏིང་ཟབ་ཏུ་སྤེལ་བ་དང་། ཐུན་མོང་གིས་སེམས་ཁུར་བྱེད་པའི་ས་གནས་དང་རྒྱལ་སྤྱིའི་གནད་དོན་ཐད་ནས་རོགས་འདེགས་ཚད་མཐོན་པོ་བྱེད་པ་རྒྱུན་འཁྱོངས་བྱེད་བཞིན་ཡོད་པར་མ་ཟད། ང་ཚོས་ཨེ་ཅིབ་དང་ཀྲུང་གོའི་འབྲེལ་བ་དེ་ཨེ་ཅིབ་རྒྱལ་ཁབ་ཀྱི་ཕྱི་ཕྱོགས་མཛའ་མཐུན་འབྲེལ་བའི་ཁྲོད་ཀྱི་ཆེས་གལ་ཆེ་བ་དང་ཆེས་འབུར་དུ་ཐོན་པའི་གྲུབ་ཆ་གལ་ཆེན་ཞིག་ཏུ་བརྩི་བཞིན་ཡོད་ཅེས་བསྟན།།