གསར་འགོད་པས་ལི་ཐང་རྫོང་རིག་གནས་ཡུལ་སྐོར་དང་རྒྱང་སྒྲོག་གློག་བརྙན་བརྙན་འཕྲིན་ལུས་རྩལ་ཅུས་ནས་གནས་ཚུལ་རྒྱུས་ལོན་བྱུང་པ་ལྟར་ན། མིག་སྔའི་བར། རྫོང་དེས་སྐོར་བྲོ་དང་ལ་གཞས་208ཀྱི་སྒྲ་ལེན་དང་གླུ་ཚིག་ལེགས་སྒྲིག་བྱེད་པའི་ལས་ཀ་བདེ་བླག་ངང་ལེགས་འགྲུབ་བྱུང་།
གོམ་གང་མདུན་སྤོས་ཀྱིས་མི་རིགས་ཀྱི་ཕུལ་དུ་བྱུང་བའི་སྲོལ་རྒྱུན་རིག་གནས་རྒྱུད་འཛིན་དང་དར་སྤེལ་གཏང་བ་དང་། ལི་ཐང་རྫོང་གི་རིག་གནས་ལས་དོན་འཕེལ་རྒྱས་དང་མི་རིགས་དང་ས་གནས་ཀྱི་ཁྱད་ཆོས་ལྡན་པའི་རིག་གནས་ཁོ་ཡུག་འཛུགས་སྐྲུན་བྱ་ཆེད། གླུ་མཛོད་དང་དབྱངས་མཛོད། པར་མཛོད། སྒྲ་མཛོད་དང་གློག་བརྙན་མཛོད་སོགས་གཞི་གཅིག་ཏུ་འདུས་པའི་ལི་ཐང་རྫོང་གི་སྐོར་བྲོ་དང་ལ་གཞས་ཀྱི་གཞི་གྲངས་ཆེན་མོའི་མཛོད་ཀྱི་ལས་གཞི་ཞིག་འཛུགས་སྐྲུན་བྱེད་པར་སྐུལ་སློང་བྱས་པ་རེད།
སྤྱི་ལོ་2015ལོའི་ཟླ་11པར་ལས་གཞི་འདི་འགོ་བརྩམས་པ་ནས་བཟུང་། རྫོང་འདིའི་རིག་གནས་དྲིལ་བསྒྲགས་ཀྱི་ལས་བྱེད་མི་སྣ་ཞིང་འབྲོག་ཁུལ་དུ་ཐེངས་60ལྷག་ལ་ཟབ་ཞུགས་བྱས་ནས། སྐོར་བྲོ་དང་ལ་གཞས་རིགས་ཀྱི་དམངས་སྲོལ་རིག་གནས་ཀྱི་ཐོན་ཁུངས་སྔོག་འདོན་དང་ལེགས་སྒྲིག་བྱས་པར་མ་ཟད། ཡུལ་ཚོ་དང་གྲོང་རྡལ་སོ་སོའི་ཁྲོད་ཀྱི་དམངས་ཁྲོད་སྲོལ་རྒྱུན་རིག་གནས་རྒྱུད་འཛིན་མི་སྣ་དང་ཡུལ་གྲོང་གི་སྒྱུ་རྩལ་འཇོན་མི་འཚོལ་ཞིབ་དང་བཅར་འདྲི་བྱས་ཏེ། གདོད་མའི་རྒྱུ་ཆ་མང་པོ་འཚོལ་བསྡུ་བྱས་ཤིང་། འབྱུང་ཁུངས་ཀྱི་ཐས་ནས་རྫོང་དེའི་སྐོར་བྲོ་དང་ལ་གཞས་ཀྱི་གཞི་གྲངས་ཆེན་མོའི་མཛོད་ཀྱི་དོན་དངོས་རང་བཞིན་དང་འཐུས་ཚང་རང་བཞིན་ཁག་ཐེག་བྱས་པས། མི་རིགས་ཀྱི་དམངས་ཁྲོད་སྲོལ་རྒྱུན་གླུ་གར་སྒྱུ་རྩལ་ལ་ཟིན་ཐོ་འགོད་པ་དང་ཉར་ཚགས་བྱེད་པའི་ཐད་དུ་རྨང་གཞི་སྲ་བརྟན་ཞིག་བཏིང་བ་རེད།
ལི་ཐང་རྫོང་གི་སྣ་པོ་དང་ཞབས་པ་སོགས་ས་ཁུལ་གྱི་སྐོར་བྲོ་དང་ལ་གཞས་རིག་གནས་ཀྱི་ནང་དོན་ཕུན་སུམ་ཚོགས་པས། མང་ཚོགས་ཀྱི་ཤུགས་ཆེན་པོས་རྒྱབ་སྐྱོར་དང་རོགས་རམ་འོག སྐོར་བྲོའི་གླུ་208གྱི་ཚིག་མཛོད་དང་། དབྱངས་མཛོད། སྒྲ་མཛོད་བཅས་འཛུགས་སྐྲུན་ལེགས་འགྲུབ་བྱུང་བ་རེད། དེ་མིན་དངོས་ལྗོངས་བརྙན་ལེན་བྱེད་སྐབས་སུ་དུས་ཚིགས་རང་བཞིན་གྱི་མཛེས་ལྗོངས་བརྙན་ལེན་ཐུབ་ཆེད། ད་ལོ་དབྱར་ཁའི་ཟླ་7པ་ནས་8པའི་བར་མང་ཚོགས་རྩ་འཛུགས་བྱས་ནས་འབྲེལ་ཡོད་ཀྱི་པར་རིས་དང་འཁྲབ་སྟོན་གྱི་བརྙན་སོགས་འཚོལ་བསྡུ་བྱས་ཏེ། ཁྱོན་ཡོངས་ནས་པར་མཛོད་དང་བརྙན་མཛོད་ཀྱི་འཛུགས་སྐྲུན་འགན་འཁྲི་ལེགས་འགྲུབ་ཡོང་བ་བྱ་རྒྱུ་རེད།།
